ពលរដ្ឋ​ថា ចិន​និង​វៀតណាម​ជួល​មេទាហាន​កាង​អាជីវកម្ម​រ៉ែ​មាស​នៅ​ភ្នំ​លុង​ ខេត្ត​ព្រះវិហារ

ដោយ ទីន ហ្សាការីយ៉ា
2018-12-09
Share
ទីតាំង​អាជីវកម្ម​រ៉ែ​មាស ៦២២ ទីតាំង​អាជីវកម្ម​រ៉ែ​មាស នៅ​តំបន់​ភ្នំលុង ឃុំ​រមទម្យ ស្រុក​រវៀង ខេត្ត​ព្រះវិហារ កាល​ពី​ខែ​ឧសភា ឆ្នាំ​២០១៧។
Photo courtesy of Mother Nature

មន្ត្រី​សង្គម​ស៊ីវិល និង​ពលរដ្ឋ​រស់នៅ​ស្រុក​រវៀង​ខេត្ត​ព្រះវិហារ អះអាង​ថា សកម្មភាព​ជីក​យក​រ៉ែ​មាស នៅ​តំបន់​ភ្នំ​លុង និង​តំបន់​ផ្សេងៗ ​ទៀត ដែល​ឋិត​ក្នុង​ភូមិ​សាស្ត្រ ឃុំ​រមទម្យ កើត​មាន​ច្រើន​ឆ្នាំ​មក​ហើយ គេ​ពុំ​ឃើញ​មាន​អាជ្ញាធរ ឬ​សមត្ថកិច្ច​ណាមួយ​ទប់ស្កាត់​នោះ​ទេ។

អ្នកភូមិ​ថា អាជីវកម្ម​រ៉ែ​មាស​នោះ មាន​ក្រុមហ៊ុន​ចិន និង​ក្រុមហ៊ុន​វៀតណាម​បាន​បើក​ការដ្ឋាន​ជីក​រណ្ដៅ​ចម្រាញ់​រ៉ែ​មាស ជាច្រើន​កន្លែង​ដោយមាន​សមត្ថកិច្ច​យាមល្បាត​យ៉ាង​ប្រុងប្រយ័ត្ន។

ប្រជា​សហគមន៍​រស់នៅ​ឃុំ​រមទម្យ ស្រុក​រវៀង ខេត្ត​ព្រះវិហារ​អះអាង​នៅ​ថ្ងៃទី៩ ខែ​ធ្នូថា ធនធាន​រ៉ែ​មាស​មាន​តម្លៃ ឋិត​នៅ​តំបន់​ភ្នំ​លុង និង​តំបន់​ផ្សេងទៀត​នៃ​ស្រុក​រវៀង ខេត្ត​ព្រះវិហារ បាន​ទទួល​រង​ការ​ជីក​កកាយ​បែប​អនាធិបតេយ្យ​ជាច្រើន​ឆ្នាំ​មក​ហើយ។ អ្នក​ប្រព្រឹត្តិ​ទាំងនោះ​ច្រើនតែ​ជា​ជនបរទេស​មាន​ជនជាតិ​វៀតណាម និង​ក្រុមហ៊ុន​ចិន បាន​ឃុបឃិត​ជាមួយ​អ្នក​មាន​អំណាច​កាង អាជីវកម្ម​ឲ្យ​ខ្លួន។

សេចក្ដីរាយការណ៍​របស់​សហគមន៍​អះអាង​ថា អ្នក​មានអំណាច​មួយ​ចំនួន ក្នុង​របប​លោក ហ៊ុន សែន បាន​កាង​អាជីវកម្ម​រ៉ែ​មាស​ជាច្រើន​កន្លែង​នៅ​តំបន់​នោះ ក្នុង​នោះ​លោក ហ៊ីង ប៊ុនហៀង ក៏​ចេញមុខ​កាង​អាជីវកម្ម​រ៉ែ មាស​ឲ្យ​ក្រុមហ៊ុន​ចិន​មួយ​ឈ្មោះ ​ឌែលខាម ( DELCOM )​។ លើស​ពី​នេះ​មាន​ក្រុមហ៊ុន​ចិន និង​ក្រុមហ៊ុន​វៀតណាម​ជាច្រើន​ទៀត​ដែល​គេ​មិន​ស្គាល់​ឈ្មោះ​ប្រើ​កម្លាំង​កម្មករ​រាប់​សិប​នាក់​កំពុង​ធ្វើ​សកម្មភាព​ខូង​យក​រ៉ែ​មាស​ជម្រៅ​រាប់​រយ​ម៉ែត្រ។

សហគមន៍​រស់នៅ​ស្រុក​រមទម្យ ថ្លែង​មិន​ហ៊ាន​បញ្ចេញ​ឈ្មោះ ព្រោះ​បារម្ភ​ពី​សុវត្ថិភាព​ឲ្យ​ដឹង​ថា ក្រុមហ៊ុន​ចិន​បាន​ហ៊ុម​ព័ទ្ធ​របង នៅ​ផ្នែក​ខ្លះ​នៅ​តំបន់​ភ្នំ​លុង​និង​តំបន់​ផ្សេងទៀត​ក្នុង​ឃុំ​រមទម្យ របស់​ស្រុក​រវាង​ដើម្បី​ខូង​រណ្ដៅ និង​ជីក​រុករក​រ៉ែ​មាស។ លោក​សង្ស័យ​ថា សកម្មភាព​ជីក​យក​រ៉ែ​មាស​ទាំងនោះ ជា​អាជីវកម្ម​ខុស​ច្បាប់ ខណៈ​អ្នកភូមិ​រក​ឃើញ​ចំណុច​សង្ស័យ​ជាច្រើន​ដែល​ក្រុមហ៊ុន​ធ្វើ​ដោយ​លួចលាក់ និង​បិទបាំង​ព័ត៌មាន ថែមទាំង​បាន​បញ្ជូន​សមត្ថកិច្ច និង​ទាហាន​យាម​ល្បាត​យ៉ាង​តឹងរ៉ឹង​៖ «ការ​ប្រកប​មុខ​របប លក្ខណៈ​គ្រួសារ​របស់​អ្នកភូមិ​លែង​មាន​ហើយ ព្រោះ​រាល់ថ្ងៃ​មាន​ក្រុមហ៊ុន វិស័យ​ឯកជន​បាន​ចាប់​យក ធ្វើជា​កម្មសិទ្ធិ​អស់ហើយ។ ភ្នំ​អន្លង់​គេ​មាន​ធ្វើ​អាជីវកម្ម​រ៉ែ​មាស​ដែរ ចាស់​ទំៗ​តែង​រក​អនុផល​ព្រៃឈើ​នៅ​តំបន់​ភ្នំ និង​រ៉ែ​មាស ដល់ពេល​ឥឡូវ គេ​ព័ទ្ធ​របង​មិន​ឲ្យ​ពួកគាត់​ចេញ​ចូល​​បាន»

បុរស​ដដែល​បន្ថែម​ថា អ្នកស្រុក​នៅ​តំបន់​នោះ​ភាគច្រើន​មិន​ហ៊ាន​ចេញមុខ​តវ៉ា និង​រិះគន់ អាជីវកម្ម​រ៉ែ​មាស​នៅ​តំបន់​នោះ​ទេ ខ្លាចក្រែង​អាជ្ញាធរ​ធ្វើទុក្ខបុកម្នេញ និង​ចាប់​ដាក់គុក។ លើស​ពី​នេះ អាជីវកម្ម​រ៉ែ​មាស​ទាំងនោះ មិនបាន​ផ្ដល់​ប្រយោជន៍​ដល់​ពលរដ្ឋ​នៅ​តំបន់​នោះ​ទេ ផ្ទុយទៅវិញ ក្រុមហ៊ុន​ប្រើ ជាតិ​អាស៊ីត និង​គីមី ចាក់ចោល​លើ​ដី​បំពុល​បរិស្ថាន និង​អាច​បង្ក​គ្រោះថ្នាក់​ដល់​ជីវិត​ពលរដ្ឋ និង​សត្វ​ពាហនៈ​ធ្ងន់ធ្ងរ​រយៈពេល​យូរ។

អ្នកនាំពាក្យ​ក្រសួង​រ៉ែ និង​ថាមពល​រដ្ឋ លោក យស មុនីរ៉ាត់ បដិសេធ​មិន​ផ្ដល់​បទសម្ភាសន៍​ដល់​អាស៊ីសេរី ដោយ​លោក​បាន​ចុច​ផ្ដាច់​ទូរស័ព្ទ និង​ឈប់​ទទួល​ទូរស័ព្ទ​នៅ​ថ្ងៃទី៩ ខែ​ធ្នូ។

ស្ថាបនិក​អង្គការ​មាតា​ធម្មជាតិ លោក អាឡិកហាន់ដ្រូ ហ្គាន់សាឡេស ដេវិតសិន (Alejandro Gonzalez Davidson) (ហៅ​កាត់ អាឡិច) ប្រាប់​អាស៊ីសេរី​ថា កូនទាហាន​ដែល​ឈរ​នៅ​តំបន់​នោះ បាន​ប្រាប់​ប្រជាជន​មូលដ្ឋាន​ថា លោក ហ៊ីង ប៊ុនហៀង គឺជា​អ្នក​​នៅ​ពី​ក្រោយខ្នង​ក្រុមហ៊ុន​ចិន​ឈ្មោះ ឌែលខាំ ដែល​បាន​ជីក​ចម្រាញ់​រ៉ែ​មាស​ជាច្រើន​ឆ្នាំ​មក​ហើយ។ លើស​ពី​នេះ​មាន​ក្រុមហ៊ុន​ចិន និង​វៀតណាម​ខ្លះ​ទៀត កំពុង​ធ្វើ​អាជីវកម្ម​រ៉ែ​មាស​នៅ​តំបន់​នោះ ក្នុង​នោះ​ក៏​មាន​ក្រុមហ៊ុន​​ខ្លះ​មាន​ភាគហ៊ុន សាច់​ញត្តិ លោក ហ៊ុន សែន ដែល​ជា​ហេតុ​ធ្វើ​ឲ្យ​អាជ្ញាធរ​ខេត្ត​ព្រះវិហារ និង​អាជ្ញាធរ​ជំនាញ​ថ្នាក់​ជាតិ​មិន​ហ៊ាន​អនុវត្ត​ច្បាប់៖ «សកម្មភាព​​រ៉ែ​មាស ដែល​កំពុង​កើតឡើង​នៅ​ទីនោះ គឺ​គ្មាន​ន​ណា ក្រៅពី​ត្រកូល​ហ៊ុន​នៅ​ពីក្រោយ​ខ្នង​ទេ ប្រសិនជា​ត្រកូល​ហ៊ុន​មិន​នៅ​ពីក្រោយ​ក៏​មិន​អាច​ធ្វើ​សកម្មភាព​​ដូច​សព្វថ្ងៃ​បាន​ទេ ព្រោះ​វា​ចំណេញ​ច្រើន​មែនទែន បង់ពន្ធ​តិច​តូច ហើយ​ធ្វើ​បែប​លួច​លាក់ៗ»

ទីតាំង​អាជីវកម្ម​រ៉ែ​មាស នៅ​តំបន់​ភ្នំលុង ឃុំ​រមទម្យ ស្រុក​រវៀង ខេត្ត​ព្រះវិហារ កាល​ពី​ខែ​ឧសភា ឆ្នាំ​២០១៧។
ទីតាំង​អាជីវកម្ម​រ៉ែ​មាស នៅ​តំបន់​ភ្នំលុង ឃុំ​រមទម្យ ស្រុក​រវៀង ខេត្ត​ព្រះវិហារ កាល​ពី​ខែ​ឧសភា ឆ្នាំ​២០១៧។
Photo courtesy of Mother Nature

លោក អាឡិច បន្ថែម​ថា តំបន់​ភ្នំ​អន្លង់ និង​តំបន់​ផ្សេងទៀត ក្នុងស្រុក​រវៀង ខេត្ត​ព្រះវិហារ សំបូរ​រ៉ែ​មាស​យ៉ាង​ច្រើន​ដែល​មាន​ក្រុមហ៊ុន​ផ្លូវ​ងងឹត និង​ក្រុមហ៊ុន​ចិន​មួយ​ចំនួន​ជួល​អ្នក​មាន​អំណាច​កាង​អោយ​ខ្លួន កំពុង​ធ្វើ​អាជីវកម្ម​ទាញ​យក​រ៉ែ​មាស​ទ្រង់ទ្រាយ​ធំ​នៅ​កម្ពុជា៖ «ធ្វើ​សកម្មភាព​រ៉ែ​មាស ខុសច្បាប់ និង​ប៉ះពាល់​បរិស្ថាន ប្រជាជន​មូលដ្ឋាន និង​រដ្ឋ​ស្ទើរ​គ្មាន​ចំណេញ និង​ខាត​មែនទែន​។ សកម្មភាព​រ៉ែ​មាស គ្មាន​និរន្តរភាព និង​គ្មាន​គង់វង្ស​ទេ មានន័យថា ទៅ​ប្លន់​ទៅ​ឆក់ ធនធាន​ក្រោម​ដី មិន​យូរ​ទេ ៥ឆ្នាំ យ៉ាង​យូរ ​ឆ្នាំ​ទៀត សល់​អី​ទៀត គឺ​សល់​តែ​សា​ធាតុ​ពុល​នៅ​ក្នុង​ដី ក្នុង​ទឹក ប្រជាជន​រស់នៅ​មិនបាន អស់​មាស​ហើយ​ក្រុមហ៊ុន​ទៅ​បាត់ ក្រោម​លេស​ថា ក្ស័យធន»

អ្នកភូមិ​កត់​សម្គាល់​ថា កាល​ពី​អំឡុង​ឆ្នាំ​២០១២ មានកម្ម​ករ​ជាង ២០ នាក់ ស្លាប់​ក្នុង​រណ្ដៅ​រ៉ែ​មាស​នៅ​តំបន់​នោះ​ដោយសារ​បាក់​រណ្ដៅ ក៏ប៉ុន្តែ​តួលេខ​របស់​អាជ្ញាធរ​ខេត្ត​ព្រះវិហារ​អះអាង​ថា មាន​ពលរដ្ឋ​ស្លាប់​តែ​ពីរ​នាក់​ប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល