ក្រសួង​រ៉ែ​និង​ថាមពល​នឹង​រឹត​បន្តឹង​លើ​អាជីវកម្ម​ទាញ​យក​រ៉ែ​ធម្មជាតិ​ដោយ​ខុស​ច្បាប់

ដោយ សេក បណ្ឌិត
2015-03-16
អ៊ីម៉ែល
មតិ
Share
បោះពុម្ព
សកម្មភាព​កាណូត​បូម​ខ្សាច់​នៅ​មុខ​ព្រះបរមរាជវាំង កាល​ពី​ថ្ងៃ​ទី​១៩ ខែ​ធ្នូ ឆ្នាំ​២០១៤។
សកម្មភាព​កាណូត​បូម​ខ្សាច់​នៅ​មុខ​ព្រះបរមរាជវាំង កាល​ពី​ថ្ងៃ​ទី​១៩ ខែ​ធ្នូ ឆ្នាំ​២០១៤។
RFA/Ouk Savborey

ក្រសួង​រ៉ែ និង​ថាមពល ប្រកាស​ថា ឆ្នាំ​២០១៥ និង​ឆ្នាំ​២០១៦ ជា​ឆ្នាំ​យុទ្ធនាការ​ធំ​ក្នុង​ការ​រឹត​បន្តឹង​លើ​អាជីវកម្ម​ទាញ​យក​រ៉ែ​ពី​ធម្មជាតិ​ដោយ​ខុសច្បាប់ និង​ត្រួតពិនិត្យ​អំពី​ចំណូល​ពី​អាជីវកម្ម​រ៉ែ​ឡើងវិញ។ទាក់ទង​ករណី​នេះ មន្ត្រី​សង្គម​ស៊ីវិល​ដែល​ធ្វើការ​អភិរក្ស​ធនធាន​ធម្មជាតិ​ស្វាគមន៍ ចំពោះ​វិធានការ​នេះ។

មន្ត្រី​ជាន់ខ្ពស់​នៃ ក្រសួង​រ៉ែ និង​ថាមពល​បង្ហាញ​ថា ការ​រឹត​បន្តឹង​លើ​ការ​ផ្ដល់​អាជ្ញាប័ណ្ណ​បូម​ខ្សាច់ និង​អាជីវកម្ម​រ៉ែ​ផ្សេងទៀត ព្រមទាំង​មាន​វិធានការ​ទប់ស្កាត់​ភាព​អនាធិបតេយ្យ​លើ​អាជីវ​កម្ម​នេះ គឺជា​បញ្ហា​ប្រឈម​ធ្ងន់ធ្ងរ​មួយ។ តែ​ទោះ​យ៉ាងណា​ក្រសួង​បាន​ចាត់​ទុក​បញ្ហា​នេះ​ជា​សម​ភូមិ​ក្ដៅ និង​ជា​ចំណុច​អាទិភាព​ទី​មួយ​ដែល​ក្រសួង​ត្រូវ​អនុវត្ត​ឲ្យ​បាន​នៅ​ក្នុង​ឆ្នាំ​២០១៥​នេះ។

មន្ត្រី​នាំ​ពាក្យ​ក្រសួង​​រ៉ែ​និង​ថាមពល លោក ម៉េង សក្តិធារ៉ា មានប្រសាសន៍​នៅ​ថ្ងៃ​ទី​១៦ មីនា ​ថា ជំហាន​បន្ទាប់​ទៀត​នោះ គឺ​ឆ្នាំ​២០១៦ ក្រសួង​រ៉ែ​និង​ថាមពល​ នឹង​ត្រួតពិនិត្យ​ទៅលើ​ចំណូល​ដែល​បាន​មក​ពី​ការ​ធ្វើ​អាជីវកម្ម​រ៉ែ​នេះ​ឡើងវិញ​ដោយ​ម៉ត់​ចត់។

ទន្ទឹមគ្នា​នេះ​ដែរ ក្រសួង​នឹង​ចាត់វិធានការ​តឹង​រឹង​ចំពោះ​ការ​ផ្តល់​អាជ្ញាប័ណ្ណ​រ៉ែ ដោយ​តម្លាភាព និង​ចាត់វិធានការ​ចំពោះ​អ្នកលក់​អាជ្ញាប័ណ្ណ​បន្ត​ដោយ​គ្មាន​អនុញ្ញាត​ពី​ក្រសួង៖ «អាជីវករ​ទាំង​អស់​ដែល​ទទួល​អាជ្ញាប័ណ្ណ​ពី​ក្រសួង​ត្រូវ​ទទួល​ខុស​ត្រូវ​ច្បាស់លាស់​ណាស់ ហើយ​មិន​អាច​យក​ទៅ​លក់​បន្ត​ដោយ​គ្មាន​ការ​អនុញ្ញាត​ពី​ក្រសួង​នោះ​បាន​ទេ»។

លោក​បន្ត​ថា នីតិវិធី​នៃ​ការ​សុំ​អាជ្ញាប័ណ្ណ​ថ្មី​របស់​ក្រសួង​បាន​រៀបចំ​រួចរាល់​ហើយ ហើយ​អាជីវករ​ទាំងអស់​ត្រូវ​រៀបចំ​គម្រោង​ផែនការ​អាជីវកម្ម ផលិតកម្ម​ឲ្យ​ច្បាស់លាស់​ហើយ​ត្រូវ​យក​គម្រោង​នោះ​មក​ការពារ​នៅ​ក្រសួង មុននឹង​ក្រសួង​សម្រេច​ផ្ដល់​អាជ្ញាប័ណ្ណ​នោះ។ វិធានការ​នេះ​ចាត់ទុកជា​ការកែទម្រង់​ថ្មី​មួយ បន្ទាប់ពី​ក្រសួង​នេះ​បំបែក​ចេញពី​ក្រសួង​ឧស្សហកម្ម​នៅ​ក្នុង​រដ្ឋាភិបាល​អាណត្តិ​ទី​៥​នេះ និង​ស្រប​ពេល​អាជ្ញាប័ណ្ណ​អាជីវកម្ម​រ៉ែ​ជាពិសេស​អាជីវកម្ម​បូម​ខ្សាច់​ទាំងអស់​នឹង​ផុត​កំណត់​នៅ​ចុង​ឆ្នាំ​២០១៥​នេះ។

ទាក់ទង​នឹង​ការកែទម្រង់ ឬ​វិធានការ​ទប់ស្កាត់​អាជីវកម្ម​រ៉ែ​អានាធិបតេយ្យ​នេះ ប្រធាន​អង្គការ​វេទិកា​អង្គការ​មិនមែន​រដ្ឋាភិបាល លោក ​តឹក វណ្ណារ៉ា ដែល​ធ្វើ​ឃ្លាំមើល​និង​ចូលរួម​អភិរក្ស​ធនធានធម្មជាតិ បាន​ស្វាគមន៍​ចំពោះ​ការ​ប្ដេជ្ញា​ចិត្ត​ជាថ្មី​នេះ និង​សូម​ឲ្យ​ការអនុវត្ត​ច្បាប់​ធ្វើឡើង​ដោយ​តម្លាភាព ព្រមទាំង​មាន​ផែនការ​ច្បាស់លាស់​ក្នុង​អនុញ្ញាត​ឲ្យ​មានការ​ទាញ​យក​រ៉ែ​ពី​ធម្មជាតិ​ប្រកបដោយ​និរន្តរភាព៖ «ជាពិសេស​ទាក់ទង​នឹង​ការ​វាយ​តម្លៃ​ផល​ប៉ះពាល់​ជា​មុន ហើយ​គួរ​មាន​ផែនការ​មេ​ត្រឹម​ត្រូវ​ថា​គួរ​យក​ប៉ុន្មាន ទុក​ប៉ុន្មាន​ដើម្បី​ឲ្យ​មាន​តុល្យភាព​នៅ​បាត​ទន្លេ និង​រក្សា​ជីវចម្រុះ​ផង​ដែរ ទន្ទឹម​ហ្នឹង​ត្រូវ​មាន​របាយការណ៍​ស្ដីពី​ផល​ប៉ះពាល់​បរិស្ថាន​ជាមុន ដើម្បី​មាន​ទិសដៅ​ច្បាស់លាស់​ក្នុង​ការ​ស្តារ​បរិស្ថាន​ឡើង​វិញ និង​ត្រូវ​ផ្ដល់​ឱកាស​ឲ្យ​មាន​ការ​ចូល​រួម​ពី​ភាគី​ពាក់ព័ន្ធ»។

លោក​បន្ត​ថា ចំពោះ​ការ​ផ្ដល់​អាជ្ញាប័ណ្ណ​នីមួយៗ លោក​សូម​ឲ្យ​ធ្វើជា​ចំហ មាន​ព័ត៌មាន​ច្បាស់លាស់​ដែល​ចាំបាច់​ផ្សព្វផ្សាយ​ជា​សាធារណៈ ហើយ​ត្រូវ​មាន​ការប្រកួតប្រជែង​គ្នា​តាមរយៈ​ការ​ដេញ​ថ្លៃ​ប្រកបដោយ​យុត្តិធម៌ និង​មាន​តម្លាភាព៖ «ធ្វើ​ឲ្យ​ទិដ្ឋភាព​នៃ​ការ​ប្រកួត​ប្រជែង​ក្នុង​ការ​ដេញ​ថ្លៃ​យក​អាជ្ញាប័ណ្ណ​នោះ​មាន​ភាព​ល្អ​ប្រសើរ និង​កាន់តែ​មាន​ការ​ជឿ​ទុក​ចិត្ត​ពី​ភាគី​ពាក់ព័ន្ធ»

កន្លង​មានការ​រិះគន់​ពី​ប្រពល​រដ្ឋ​ជា​ម្ចាស់​អាជីវកម្ម និង​សង្គម​ស៊ីវិល​ថា ការ​ទាញ​យក​រ៉ែ​ពី​ធម្មជាតិ​ធ្វើឡើង​ដោយ​គំហុក និង​ខ្វះ​ការវាយតម្លៃ​ពី​ផល​ប៉ះពាល់​ឲ្យ​បាន​ត្រឹមត្រូវ ព្រមទាំង​ពុំ​មាន​ការ​តាមដាន​សកម្មភាព​ទាញ​យក​រ៉ែ​នោះ​ឲ្យ​បាន​ម៉ត់ចត់​ឡើយ។ ចំណែក​ការ​ដេញ​ថ្លៃ​លើ​អាជីវកម្ម​នីមួយៗ មុន​បាន​អាជ្ញាប័ណ្ណ​នោះ​ ក៏​ធ្វើឡើង​មិន​ចំហ និង​មិន​មាន​ការ​ដេញ​ថ្លៃ​ដោយ​យុត្តិធម៌ និង​តម្លាភាព​ដែរ។ ទាំងនេះ​គឺ​ផ្ទុយ​ពី​ផែន​ការ​កែ​ទម្រង់​ថ្មី​របស់​ក្រសួង​រ៉ែ​និង​ថាមពល ​នៅ​ឆ្នាំ​២០១៥​នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

អ្នក​អាន​អនាមិក

លោកអើយ និយាយត្រង់ៗទៅវាងាយស្តាប់ជាង រិតបន្តឹងៗៗៗ ដល់​រិតពេលទៅឡើងសល់តែសំបកដីទៅហើយរាល់ថ្ងៃនេះ មិនខុសអីពី​បិត​បនល្បែងស៊ិសងនោះទេ វាសិតតែល្បិចរកលុយទាំងអស់ហ្នឹង ដូចឳសថស្ថាន ដូចសិប្បកម្មឆ្នៃឈើ ជាដើម អោយតែដាក់លុយ​ចូល​ទៅ អ្វីៗវាស្របច្បាប់អស់ទៅហើយ មិនអញ្ចឹង?

Mar 17, 2015 02:37 AM

Mike

ពី Boston

It sounds that they are waking up. But what about the forestry department? When will it take more serious measure against all kinds of logging? Or is it not too late to take such legal measure to protect the forests? Why are they still in power if they don't take any action seriously? We've all paid lots of tax to pay for these useless officials to work in the public sector.

Mar 16, 2015 08:39 PM

គេហទំព័រ​ទាំងមូល