ប្រជាពលរដ្ឋរងគ្រោះដីធ្លីជាមួយក្រុមហ៊ុនចិននៅក្នុងខេត្តកោះកុងជំរុញឱ្យអាជ្ញាធរបញ្ចប់ជម្លោះនៅដំណាច់ឆ្នាំ ២០២០
2020.12.30
រូបថតមើលពីផ្កាយរណបបង្ហាញឲ្យឃើញពីផ្លូវរត់យន្តហោះនៅព្រលានយន្តហោះតារាសាគរ កំពុងសាងសង់ដោយក្រុមហ៊ុនគ្រប់គ្រងដោយរដ្ឋអំណាចចិន UDG កាលពីថ្ងៃទី០៩ ខែមិថុនា ឆ្នាំ២០២០។
ពលរដ្ឋប្រមាណជាង១៦០ គ្រួសារ នៅក្នុងស្រុកចំនួនពីរ គឺស្រុក បុទុមសាគរ ស្រុកគីរីសាគរ ខេត្តកោះកុង មានជម្លោះដីធ្លីដ៏រាំរ៉ៃ ជាមួយក្រុមហ៊ុន ចិន យូ ឌី ជី(UDG) មានរយះពេលជាង១២ឆ្នាំមកហើយនៅមិនទាន់បញ្ចប់នៅឡើយ។
តំណាងសហគមន៍ឃុំតានួនលោក សំ ធី មានប្រសាសន៍ថា ពលរដ្ឋទាំងអស់សង្ឃឹមថា នៅដំណាច់ឆ្នាំ២០២០ ខាងមុខនេះ រដ្ឋាភិបាល នឹងបញ្ចប់ជម្លោះដីធ្លីដ៏រាំរៃ មួយនេះ។លោក ថា ប្រជាពលរដ្ឋដែលនៅសេសសល់គ្មានចង់បានអ្វីក្រៅពីសំណងតាមតម្លៃទីផ្សារ ហើយទាមទារឱ្យរដ្ឋាភិបាលធ្វើជាអាជ្ញាកណ្ដាល នៅក្នុងការដោះស្រាយឱ្យបានយុត្តិធម៌ រវាងពលរដ្ឋរងគ្រោះជាមួយក្រុមហ៊ុន
ចិន។៖«បាទខ្ញុំសំណូមពរថា ឱ្យគាត់ដោះស្រាយបញ្ចប់ទៅកុំឱ្យនៅចេះតែលាបពណ៌ថាប្រជាពលរដ្ឋចេះតែដោះស្រាយចឹង។ប្រជាពលរដ្ឋទៅតវ៉ានៅថ្នាក់ខេត្តក៏ដូចជា ថ្នាក់ជាតិចេះតែឆ្លើយថា ក្រុមសហគមន៍ក្រុមតាមនួន ដោះស្រាយរួចមិន មែនចឹងទេ។ ចង់ឱ្យដោះស្រាយរួច បានរួចឆាប់ៗមក ពីព្រោះប្រជាពលរដ្ឋលោកអត់ឃ្លានណាស់មិនមែនអាជ្ញាធរនិយាយថា ប្រជាពលរដ្ឋដោះស្រាយរួចចឹងទេ។»
រដ្ឋាភិបាល បានប្រគល់ដី២កន្លែងនៅខេត្តកោះកុង ទំហំ៣ម៉ឺន ៦ពាន់ហិកតារ ឲ្យទៅក្រុមហ៊ុនចិន យូញៀនឌីវីឡុបមិនគ្រុប(Union Development Group) កាលពីឆ្នាំ២០០៨ ក្រោមហេតុផលថា ក្រុមហ៊ុនអភិវឌ្ឍន៍ធ្វើជាតំបន់ទេសចរណ៍ និងពាណិជ្ជកម្ម ដែលរួមមានការសាងសង់ព្រលានយន្តហោះ និងទីលានវាយកូនគោល ដែលមានតម្លៃសរុបចំនួនប្រមាណ៥ពាន់លានដុល្លារអាមេរិក។
ទីតាំងដីទាំង២កន្លែងនោះ នៅជាប់មាត់សមុទ្រ ក្នុងភូមិសាស្ត្រចំនួន៥ឃុំ នៃស្រុកបទុមសាគរ និងគិរីសាគរ។ កាលពីឆ្នាំ២០១១ រដ្ឋាភិបាល បានសម្រេចជួលដីនៅតំបន់នោះ ឲ្យក្រុមហ៊ុនចិនយូញៀន បន្ថែមជាង៦ ពាន់ហិកតារថែមទៀត។ ការផ្ដល់ដី សម្បទានទាំងអស់នេះ បានប៉ះពាល់លើដីពលរដ្ឋច្រើនរយគ្រួសារ ទាំងអ្នកមានប្លង់កម្មសិទ្ធិ និងអ្នកពុំទាន់បានធ្វើប័ណ្ណកម្មសិទ្ធិ។ ក្នុងរយៈពេលជាង១២ឆ្នាំមកនេះ ពលរដ្ឋទាំងនោះ មិនទាន់ទទួលបានសំណង ឬដំណោះស្រាយ ពីផលប៉ះពាល់នេះ នៅឡើយទេ។
តំណាងពលរដ្ឋរងគ្រោះនៅឃុំកោះស្តេច លោកស្រី សាំង ពុយ បញ្ជាក់ថា អាជ្ញាធរក្នុងឆ្នាំ២០២០នេះ មិនដោះស្រាយជម្លោះដីធ្លីទេ ហើយមួយរយៈនេះទុកឱ្យនៅជាប់គាំងដដែល។ ប៉ុន្តែប្រជាពលរដ្ឋមិនសុខចិត្តទេ គឺពួកគេនៅតែបន្តសកម្មភាពតវ៉ា រហូតទាល់តែមានដំណោះស្រាយ។
លោកស្រីបន្តថា ប្រជាពលរដ្ឋរងគ្រោះទាំងអស់នៅតែបារម្ភ ដោយសារតែជិតដាច់ឆ្នាំ២០២០ នេះហើយ ខាងអាជ្ញាធរហាក់បីដូចជាព្រងើយកន្តើយ នៅមិនដោះស្រាយតាមការចង់បានរបស់ពលរដ្ឋតាមតម្លៃទីផ្សារ៖«ត្រូវតែទាមទារឱ្យក្រុមហ៊ុនដោះស្រាយឱ្យប្រជាពលរដ្ឋឱ្យបានឆាប់។ បើសិនគាត់ដោះស្រាយមិនបានគាត់និយាយថា ក្រុមហ៊ុនអត់មានលុយ អត់មានសំណងឱ្យប្រជាពលរដ្ឋ ដោះស្រាយមិនបានសោះត្រូវតែកាត់ឆ្វៀលដីកន្លែងហ្នឹងឱ្យប្រជាពលរដ្ឋបានរស់នៅ ដូចពីមុនទៅ ឱ្យគាត់មានសិទ្ធិដាំដុះ ដាំចម្ការ មើលថែដូចពីមុនទៅ។ ពីព្រោះឥឡូវហ្នឹងគឺ គេហាមឃាត់អត់ឱ្យប្រជាពលរដ្ឋចូលដីខ្លួនឯងទេ។ចឹងកន្លងមកជាង១០ ឆ្នាំហ្នឹង គឺប្រជាពលរដ្ឋអត់មានបានថែដំណាំរបស់ពួកគាត់ទាំងអស់។»
ទាក់ទិនទៅនឹងរឿងជម្លោះដីធ្លីនេះ អ្នកសម្របសម្រួលអង្គការលីកាដូខេត្តកោះកុង លោក ហួរ អ៊ីន បានប្រសាសន៍ថា ជម្លោះដីធ្លីរវាងពលរដ្ឋជាមួយនឹងក្រុមហ៊ុន យូ ឌី ជី(UDG) នៅមិនទាន់បានដោះស្រាយឱ្យមានចប់ទាំងអស់ឱ្យបាន ១០០% នោះទេ គឺនៅស្រុកបុទុមសាគរ មានពីរ ឃុំ គឺឃុំ តានួននិង ឃុំថ្មស និងស្រុកគីរីសាគរមាន ៣ ឃុំគឺឃុំ កោះស្តេច ឃុំព្រែកខ្សាច់ និងឃុំភ្ញីមាស។
លោកបញ្ជាក់ថា អាជ្ញាធរក្នុងរយៈពេលចុងក្រោយនេះមានការស្ងប់ស្ងាត់ ក្នុងការបង្ហាញជំហរដោះស្រាយឈានដល់កម្រិតណា ហើយបញ្ចប់នៅពេលណា មិនទាន់មានអ្វីច្បាស់លាស់ទេ។ ចំណែកឯប្រជាពលរដ្ឋក៏កំពុងរង់ចាំការដោះស្រាយដោយមិនបញ្ឈប់សកម្មភាពតវ៉ា របស់ពួកគេនៅឡើយ
ដែរ៖«អញ្ចឹងនៅក្នុងដំណាច់ឆ្នាំនាពេលខាងមុខនេះដែរអាជ្ញាធរខេត្តក្រសួងដែនដី និងក្រសួងការពារជាតិ ក៏ដូចជាក្រសួងបរិស្ថានដែនពាក់ព័ន្ធក្នុងការដោះស្រាយជម្លោះដីធ្លីជាមួយពលរដ្ឋ និងក្រុមហ៊ុន យូ ឌី ជី ហ្នឹងសូម ធ្វើការដោះស្រាយបញ្ចប់ទៅដើម្បីឱ្យប្រជាពលរដ្ឋហ្នឹងបានរស់នៅឱ្យបានភាពស្ងប់ចិត្ត បន្ទាប់ពីបានរង់ចាំ អស់រយៈពេលជាង ១០ ឆ្នាំ ហើយការតវ៉ាកន្លងមក មានការរើសអើង ការគំរាមកំហែងគ្រប់សព្វបែបយ៉ាង ជាពិសេសប៉ះពាល់ដល់ជីវភាពពួកគាត់ធ្ងន់ធ្ងរមែនទែន។»
ប្រជាពលរដ្ឋដែលនៅសេសសល់ ពីគម្រោងអភិវឌ្ឍន៍នេះ ប្រមាណជាង ២០០គ្រួសារ កាលពីខែកញ្ញា បានឡើងមកតវ៉ានៅទីក្រុងភ្នំពេញ និងទីរួមខេត្តកោះកុង ដើម្បីរកដំណោះស្រាយឱ្យបានសមរម្យ ទៅតាមតម្លៃទីផ្សារដែលពួកគេចង់បាន។
ក្រសួងរៀបចំដែនដី ធ្លាប់បានចេញសេចក្ដីប្រកាសព័ត៌មាន ថា គណៈកម្មការអន្តរក្រសួងបានដោះស្រាយ ដោយ ១គ្រួសារទទួលបានដីលំនៅឋានទំហំ៥០ម៉ែត្រ គុណ ១០០ម៉ែត្រ ផ្ទះឈើមួយខ្នង និងថវិកាពី ៣៥០ដុល្លារ ទៅ ១ម៉ឺនដុល្លារ រួមទាំងដីចម្ការទំហំចាប់ពី ១ហិកតារ ទៅ ៦ហិកតារ ទៅតាមទំហំដីតូច ឬធំដែលពួកគេធ្លាប់កាន់កាប់។
លោក ជា សុផារ៉ារដ្ឋមន្ត្រីក្រសួងដែនដី ប្រាប់អាស៊ីសេរីកាលពីថ្ងៃទី ២៥ ធ្នូថា ពលរដ្ឋបង្កភាពស្មុគស្មាញដល់អាជ្ញាធរ ទោះបីជាប្រឹងជួយ ដោះស្រាយយ៉ាងណាក៏ មិនអាចផ្គាប់ចិត្តពលរដ្ឋបានដែរ ដោយសារតែដីនៅតំបន់នោះលក់តៗគ្នា គ្មានប្លង់កម្មសិទ្ធិច្បាស់លាស់។
លោកបន្តថា ប្រជាពលរដ្ឋដែលមានផលប៉ះពាល់ដល់គម្រោងអភិវឌ្ឍន៍ រដ្ឋាភិបាលបានដោះស្រាយដូរដីជួនពួកគាត់ ដោយរៀបចំហេដ្ឋារចនាសម្ព័ន្ធ នឹងទីតាំងថ្មី ដើម្បីឱ្យផុតពីគម្រោងអភិវឌ្ឍន៍ ចំណែកអ្នកដែលទទួលយកគោលនយោបាយពីរដ្ឋាភិបាលហើយ អាជ្ញាធរនឹងមិនដោះស្រាយជូនពួកគាត់ទៀតទេ៖«ប្រជាពលរដ្ឋមានការទិញដូរនៅក្នុងកន្លែងហ្នឹងគឺយើង បែងចែកឱ្យច្បាស់គឺការដោះស្រាយនេះគឺដោះស្រាយជាមួយប្រជាពលរដ្ឋរស់នៅអាស្រ័យផលនៅក្នុងទីតាំងដែលរដ្ឋាភិបាលបានធ្វើផ្ដល់នូវគោលការវិនិយោគឱ្យគេ។ចឹងយើងរៀបចំឱ្យមុខសញ្ញាហ្នឹងជាមុខសញ្ញាអាទិភាព។មុខសញ្ញាផ្សេងៗទៀតគឺជាមុខសញ្ញាដែលត្រូវពិចារណាទេ។ គោលការណ៍មានតែប៉ុណ្ណឹង។»
សហរដ្ឋអាមេរិក បានចេញរបាយការណ៍កាលពីខែកញ្ញាឲ្យដឹងថា ក្រុមហ៊ុនUDG បានចុះបញ្ជីក្លែងបន្លំបោកប្រាស់ថាជាក្រុមហ៊ុនមានសញ្ជាតិកម្ពុជា ដើម្បីទទួលបានដីសម្បទានដល់ទៅ ៣៦.០០០ហិកតារ ក្នុងនោះបានបណ្ដាលឲ្យពលរដ្ឋកម្ពុជាជាច្រើននាក់ត្រូវរងគ្រោះដោយសារការបណ្ដេញចេញពីដីធ្លីរបស់ពួកគេដោយបង្ខំ។ ក្រុមហ៊ុននេះ ក៏បំផ្លាញបរិស្ថាន និងបង្កផលប៉ះពាល់ដល់ជីវភាពរស់នៅរបស់សហគមន៍មូលដ្ឋានផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
