យុវជនចលនាមាតាធម្មជាតិប្រកាន់ជំហររឹងមាំការពារធនធានធម្មជាតិ ទោះរងការគំរាមតាមច្បាប់
2023.05.25
យុវជនចលនាមាតាធម្មជាតិ កញ្ញា មាន លីសា ថ្លែងកាលពីថ្ងៃទី៩ ខែមេសា ២០២៣។
រូប៖ ពលរដ្ឋផ្ដល់ឱ្យ
យុវជនចលនាមាតាធម្មជាតិ នៅតែមានជំហររឹងមាំ ក្នុងការចូលរួមការពារសម្បត្តិធនធានធម្មជាតិ បើទោះបីជាយុវជនទាំងនោះ ទទួលរងការគំរាមចាត់វិធានការច្បាប់ ពីសំណាក់ក្រសួងបរិស្ថាន។ ប្រតិកម្មនេះ កើតមានឡើងបន្ទាប់ពីក្រសួងបរិស្ថាន បានចេញសេចក្ដីប្រកាស ចោទថា ក្រុមយុវជនទាំងនោះធ្វើសកម្មភាពប្រាសចាកឧត្តមប្រយោជន៍ជាតិ ផ្ទុយនឹងច្បាប់ និងគំរាមចាត់វិធានការច្បាប់ចំពោះអ្នកចូលរួមជាមួយពួកគេ។
យុវជនចលនាមាតាធម្មជាតិ ដែលរងការចោទប្រកាន់ពីក្រសួងបរិស្ថាន និងគំរាមប្រើប្រាស់វិធានការច្បាប់ មិនតក់ស្លុតចំពោះគំរាមទាំងនោះទេ ហើយថែមទាំងបង្ហាញឆន្ទៈក្លាហាន ក្នុងការចូលរួមការពារសម្បត្តិធនធានធម្មជាតិនៅកម្ពុជា។ ជាងនេះទៅទៀត យុវជនទាំងនោះ ប្ដេជ្ញាចិត្តថែរក្សាមរតកធម្មជាតិ ដែលបុព្វរសខ្មែរបានបន្សល់ទុកសម្រាប់មនុស្សជំនាន់ក្រោយ។
យុវជនចលនាមាតាធម្មជាតិ កញ្ញា មាន លីសា ប្រាប់វិទ្យុអាស៊ីសេរីនៅថ្ងៃទី២៤ ឧសភាថា កញ្ញាមិនភ្ញាក់ផ្អើលចំពោះសេចក្ដីប្រកាសរបស់ក្រសួងបរិស្ថាន ដែលគំរាមមកលើក្រុមយុវជនការពារបរិស្ថានមួយនេះទេ ព្រោះការគំរាមនេះមិនមែនជាលើកទីមួយទេ។ កញ្ញា ចាត់ទុកការគំរាមនេះថា ជាការបំបិទសិទ្ធិសេរីភាពយុវជន ដែលហ៊ានលើកយកបញ្ហាពិតមកលាតត្រដាង។
កញ្ញា មាន នីសា៖ «ទី១ខ្ញុំសុំលើកទឹកចិត្តយុវជន ឥឡូវខ្ញុំកំពុងតែបារម្ភពីទឹកចិត្ត ក៏ដូចជាផ្លូវអារម្មណ៍របស់យុវជន ដូច្នេះសុំកុំមានការភ័យខ្លាចអ៊ី នេះគឺជារូបភាពគំរាមកំហែង តែអ្នកទាំងអស់គ្នាបានធ្វើការដើម្បីប្រទេសជាតិ ការចូលរួមក្នុងយុទ្ធនាការសាធារណៈក្ដីនឹង គឺអ្នកទាំងអស់គ្នាត្រូវមានមោទនភាព ដែលអ្នកទាំងអស់គ្នាជាចំណែកនៃការចូលរួមដើម្បីសំឡេងប្រជាធិបតេយ្យដើម្បីឲ្យមានយុត្តិធម៌បរិស្ថាន ដូច្នេះខ្ញុំគ្រាន់តែចង់បញ្ជាក់ថា ការដែលយើងនិយាយពីបរិស្ថាន វាមិនមែនជាបទល្មើសទេ បើយើងនិយាយការពិត យើងលាតត្រដាងពីការពិត វាមិនមែនជាបទល្មើសទេចា៎ស»។
កញ្ញា មាន លីសា អះអាងថា សកម្មភាព ដែលយុវជនចលនាមាតាធម្មជាតិធ្វើ ឡើងក្រោមឆន្ទៈស្រឡាញ់បរិស្ថានពិតប្រាកដ ក្នុងការទប់ស្កាត់ការបំផ្លិចបំផ្លាញធនធានធម្មជាតិ។ កញ្ញាចង់ឃើញ យុវជនដទៃទៀតក្លាហាននិយាយការពិតអំពីបរិស្ថាន ព្រោះការនិយាយការពិត ដើម្បីការពារទ្រព្យសម្បត្តិជាតិ មិនមែនជារឿងខុសច្បាប់នោះទេ។
ការបង្ហាញជំហររបស់យុវជននេះ គឺបន្ទាប់ពីក្រសួងបរិស្ថាន នៅថ្ងៃទី២៤ ឧសភា បានចេញសេចក្ដីប្រកាសថា រាល់សកម្មភាព ដែលក្រុមយុវជនមាតាធម្មជាតិធ្វើ គឺប្រាសចាកពីឧត្តមប្រយោជន៍ជាតិ និងផ្ទុយពីច្បាប់ស្ដីពីអង្គការ និងសមាគមមិនមែនរដ្ឋាភិបាល។ សេចក្ដីប្រកាសដដែលនេះ គំរាមចាត់វិធានការច្បាប់ ចំពោះអ្នកចូលរួមសកម្មភាពជាមួយយុវជនទាំងនោះ។
វិទ្យុអាស៊ីសេរីនៅពុំទាន់អាចទាក់ទងអ្នកនាំពាក្យក្រសួងបរិស្ថាន លោក នេត្រ ភក្ត្រា ដើម្បីសុំអត្ថាធិប្បាយជុំវិញការចោទប្រកាន់ និងគំរាមលើយុវជនបរិស្ថានបានទេ នៅថ្ងៃទី២៤ ឧសភា។
ទោះជាយ៉ាងណា ប្រធានសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា(ADHOC) លោក នី សុខា មានប្រសាសន៍ថា ការអនុវត្តសិទ្ធិសេរីភាពជាមូលដ្ឋានរបស់ពលរដ្ឋ ក្នុងការការពារសម្បត្តិធនធានធម្មជាតិ គឺត្រូវបានធានាដោយរដ្ឋធម្មនុញ្ញ។ លោកចង់ឃើញអាជ្ញាធរមានសមត្ថកិច្ច បែងចែកឲ្យច្បាស់រវាងសកម្មភាពរបស់អង្គការ ដែលត្រូវបានក្រសួងមហាផ្ទៃដកចេញពីបញ្ជី និងសកម្មភាពរបស់យុវជន ឬប្រជាពលរដ្ឋ ដែលការពារបរិស្ថាន។
លោក នី សុខា បន្ថែមថា រដ្ឋគួរតែលើកទឹកចិត្តដល់ពលរដ្ឋណា ដែលលះបង់សេចក្ដីសុខខ្លួនឯង ការពារសម្បត្តិធនធានជាតិ ជាពិសេសនោះ គឺសកម្មជនបរិស្ថាន។
លោក នី សុខា៖ «ប្រសិនជាសកម្មភាពនោះធ្វើក្រោមស្លាកអង្គការមាតាធម្មជាតិ អានិងវាជារឿងមួយដែលខុស ដោយសារតែអង្គការនោះត្រូវបានបិទហើយ ប៉ុន្តែបើសិនជាធ្វើក្នុងនាមជាប្រជាពលរដ្ឋខ្មែរមួយរូប ក្នុងការការពារធនធានសម្បត្តិធម្មជាតិ ខ្ញុំថាអារឿងនឹងមិនមែនជារឿងមួយ ដែលខុសទេ ផ្ទុយទៅវិញប្រសិនជាគេធ្វើក្នុងនាមជាប្រជាពលរដ្ឋដើម្បីការពារធនធានធម្មជាតិ ចូលរួមសកម្ម ក្នុងការការពាររឿងនឹងមិនផ្ទុយពីគោលការណ៍ច្បាប់ មិនផ្ទុយពីរដ្ឋធម្មនុញ្ញទេ ដូច្នេះការព្រមានទាំងអស់នោះជាការដាក់សម្ពាធ វាជាការមួយបំភិតបំភ័យទៅដល់ប្រជាពលរដ្ឋ ដែលគេមានឆន្ទៈក្នុងការចូលរួមចំណែក ក្នុងការចូលរួមសកម្មការងារសង្គមបាទ»។
ថ្មីៗនេះក្រុមយុវជនចលនាមាតាធម្មជាតិ តែងតែធ្វើសកម្មភាពដើម្បីការពារធនធានធម្មជាតិនៅកម្ពុជារួមមាន ការដាក់ញត្តិស្នើឲ្យក្រសួងបរិស្ថានបញ្ឈប់កាត់ឆ្វៀលដីតំបន់ឧទ្យានជាតិឲ្យក្រុមហ៊ុនឯកជន ការដាក់ញត្តិទៅក្រសួងបរិស្ថានឲ្យដកហូតកោះកុងក្រៅមកជាទ្រព្យសម្បត្តិរដ្ឋ និងជាឧទ្យានជាតិសមុទ្រជាដើម។
យុវជន និងមន្ត្រីសង្គមស៊ីវិល ទទូចឲ្យអាជ្ញាធរបង្កភាពងាយស្រួលដល់ពលរដ្ឋ ឲ្យពួកគេធ្វើសកម្មភាពដើម្បីការពារបរិស្ថាន និងធនធានធម្មជាតិនៅកម្ពុជា ជាជាងការលាបពណ៌ថា ធ្វើការបម្រើឲ្យបរទេស ធ្វើការប្រឆាំងក្នុងគោលបំណងផ្ដួលរំលំរដ្ឋាភិបាលជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលករខ្មែរមួយចំនួនធ្វើការនៅប្រទេសថៃប្រកាសស្វាគមន៍អមដំណើរលោក សម រង្ស៊ី វិលចូលស្រុកវិញ
- លោក ហ៊ុន សែន អះអាងថា សេដ្ឋកិច្ចកម្ពុជាលែងត្រូវការប្រព័ន្ធអនុគ្រោះពន្ធEBA ពីអឺរ៉ុបហើយ
- ពលរដ្ឋបង្ខំចិត្តចាកចេញពីតំបន់អង្គរ ប្រឈមនឹងជីវភាពខ្វះខាត និងបាត់បង់មុខរបរ
- ម្ចាស់អាជីវកម្មទាំងខ្នាតតូច និងខ្នាតធំកំពុងជួបវិបត្តិបង្វិលសាច់ប្រាក់មិនទាន់
- មិនមានភស្តុតាងបញ្ជាក់ថា លោក សម រង្សី ត្រូវបណ្ដេញចេញពីម៉ាឡេស៊ី ទេ