សហគមន៍អូរយ៉ាដាវចោទមន្ត្រីព្រំដែនថា បើកដៃឱ្យឈ្មួញកាប់ឈើដឹកយកទៅវៀតណាមរាល់ថ្ងៃ
2023.09.07
ប្រធានក្រុមប្រឹក្សាស្រុកអូរយ៉ាដាវ លោក មុី សុីវុធធឿន (ឆ្វេង) និងលោក ហេង ប៑ុន្នី អភិបាលស្រុកអូរយ់ាដាវ ចូលរួមវេទិកា កាលពីថ្ងៃទី២៥ សីហា ២០២៣។
រូប៖ ហ្វេសប៊ុករដ្ឋបាលស្រុកអូរយ៉ាដាវ
ប្រជាពលរដ្ឋរស់នៅតាមព្រំដែនកម្ពុជា-វៀតណាមអះអាងថា ព្រៃសហគមន៍ឡុំ ស្ថិតនៅស្រុកអូរយ៉ាដាវ ខេត្តរតនគិរី កំពុងរងការកាប់ និងដឹកយកទៅលក់នៅប្រទេសវៀតណាមដោយសេរីជារៀងរាល់ថ្ងៃ ដោយមិនខ្លាចញញើតអាជ្ញាធរនៅតំបន់នោះ។
ប្រជាពលរដ្ឋអះអាងថា ចាប់តាំងពីបោះឆ្នោតរួចមក ការកាប់និងដឹកជញ្ជូនឈើយកទៅលក់នៅប្រទេសវៀតណាមមានទាំងយប់ទាំងថ្ងៃ។ ក្រុមឈ្មួញបានសម្រុកចូលទៅកាប់ប្រភេទឈើកម្រដូចជា សុក្រំ ស្រឡៅ គគីរនិងផ្ចឹក ស្ថិតនៅក្នុងព្រៃសហគមន៍ឡុំ ឃុំប៉ក់ញ៉ៃ ស្រុកអូរយ៉ាដាវ ដែលមានផ្ទៃដីជាង ៨ពាន់ហិកតារ បច្ចុប្បន្នព្រៃនេះសហគមន៍ជនជាតិដើមភាគតិចចារាយតែងតែចូលទៅរកអនុផលនៅទីនោះតាំងឆ្នាំ២០១១មក។
ប្រជាសហគមន៍រស់នៅភូមិឡុំ លោក រម៉ាស់ ស្រេន អះអាងប្រាប់វិទ្យុអាស៊ីសេរីនៅថ្ងៃទី៦ ខែកញ្ញា ថា ក្រោយការបោះឆ្នោតរួចមក សកម្មភាព កាប់និងដឹកជញ្ជូនឈើយកទៅលក់នៅប្រទេសវៀតណាម កាន់តែខ្លាំងឡើង ដោយមិនឃើញមានសមត្ថកិច្ចចុះទប់ស្កាត់នោះទេ។ លោកបន្តថា សហគមន៍ពិបាកក្នុងទប់ស្កាត់ ដោយសារតែអាជ្ញាធរមូលដ្ឋាននៅតំបន់នោះ មិនសហការដើម្បីចុះល្បាតព្រោះក្រុមជនល្មើសខ្លះមានអាវុធកែច្នៃដាក់តាមខ្លួន។
លោក រម៉ាស់ ស្រេន៖ «គេដឹកមកពីខាងគេ ក៏ដូចជាព្រៃភូមិឡុំ និងព្រៃការពារហ្នឹងគេចូលលួចៗដល់ភូមិខ្លួនឯង លួចកាប់ គេការពារហើយដូចជាខាងគណៈកម្មការគេការពារព្រៃឈើហ្នឹង គេទប់ខាងនេះវាលួចទៅខាងនោះ ទប់ខាងនោះ វាលួចទៅខាងនេះអ៊ីចឹងណា៎»។
ស្រដៀងគ្នានេះដែរ ពលរដ្ឋរស់នៅឃុំប៉ក់ញ៉ៃ លោក សល់ ម៉ាស់ ប្រាប់ឲ្យដឹងដែរថា ការដឹកជញ្ជូនឈើ ទៅលក់នៅប្រទេសវៀតណាម កើតឡើងទាំងយប់ទាំងថ្ងៃ មានទាំងតាមម៉ូតូ គោយន្ត និងរថយន្ត។ លោកបន្តថា ឈ្មួញទាំងនោះត្រូវចំណាយលុយ២០ម៉ឺនរៀលដើម្បីបង់ឲ្យអាជ្ញាធរគ្រប់ភាគីទាំងអស់ដែលឈរជើងនៅតំបន់នោះ។
លោក សល់ ម៉ាស់៖ «វាកាប់អស់រលីងហើយមានអ្វីទៀត មានអ្វីយើងទៅពឹងជំនាន់ក្រោយ កូនចៅយើងអត់មាន ឥឡូវវាអស់ហើយចប់អស់ហើយ»។
ក្រៅពីឈ្មួញលួចកាប់យកឈើមានតម្លៃហើយ ក៏មានពលរដ្ឋចំណាកស្រុក តែងតែលួចចូលទៅឈូសឆាយយកដីព្រៃធ្វើជាកម្មសិទ្ធិឯកជនថែមទៀត។
ជុំវិញរឿងនេះ វិទ្យុអាស៊ីសេរីមិនអាចទាក់ទង អភិបាលខេត្តរតនគីរី លោក ញ៉ែម សំអឿន និងអភិបាលស្រុកអូរយ៉ាដាវ លោក ម៉ា វិចិត្រ ដើម្បីសុំការអត្ថាធិប្បាយបានទេ នៅថ្ងៃទី៦ ខែកញ្ញានេះ ដោយទូរស័ព្ទចូលគ្មានអ្នកទទួល។
សហគមន៍ជនដើមភាគតិចចារាយធ្លាប់ដាក់ស្នើសុំចុះបញ្ជីព្រៃសហគមន៍ឡុំនេះ ជាតំបន់អភិរក្សតាំងពីឆ្នាំ២០១១មក ប៉ុន្តែមិនមានការឆ្លើយតបពីអាជ្ញាធរនោះទេ។
អ្នកស្រាវជ្រាវនិងឃ្លាំមើលធនធានធម្មជាតិនៅកម្ពុជា លោក សេង សុខហេង សង្កេតឃើញថា ការដឹកឈើចេញពីប្រទេសកម្ពុជាទៅលក់នៅប្រទេសវៀតណាម គឺដោយសារមានជាប់ពាក់ព័ន្ធអំពើពុករលួយជាប្រព័ន្ធ រវាងក្រុមឈ្មួញ និងអាជ្ញាធរឈរជើងនៅតំបន់នោះ ។ លោកបន្តថា ដឹកឈើយកទៅវៀតណាម តាមរយៈម៉ូតូ និងគោយន្ត កើតឡើងជារៀងរាល់ថ្ងៃ រីឯរថយន្តធំៗ ប្រហែល ៣ថ្ងៃទើបដឹកចេញម្ដង។
លោក សេង សុខហេង៖ «បើសិនជាសមត្ថកិច្ចពាក់ព័ន្ធគាត់មិនអនុញ្ញាត គាត់មិនគប់គិត គ្មានអំពើពុករលួយទទួលផលប្រយោជន៍ពីសកម្មភាពហ្នឹងទេ ឈើមិនអាចចេញរួច ដូចជាឈើហ្នឹងវាអត់មានអ្វីត្រូវអាថ៌កំបាំងពិបាកលាក់មើលឃើញនឹងភ្នែក ដូចថ្នាំញៀន នេះឈើដឹកទាំងឡាន ខ្ញុំគិតថាវាមានអ្វីពិបាកក្នុងការឆែកឆេរ ក្នុងការបង្ក្រាប ក្នុងការទប់ស្កាត់ទេ»។
សហគមន៍និងអ្នកឃ្លាំមើល ទទូចទៅរដ្ឋាភិបាលថ្មី ត្រូវចាត់ឲ្យអាជ្ញាធរថ្នាក់ជាតិចុះទប់ស្កាត់ និងស្រាវជ្រាវស្វែងរកអ្នកដែលពាក់ព័ន្ធយកមកផ្ដន្ទាទោសទៅតាមច្បាប់ បើពុំដូច្នោះទេពួកគេថាព្រៃឈើដែលនៅជាប់ព្រំប្រទល់ កម្ពុជា-វៀតណាមនឹងរងវិនាសហិនហោចជាក់ជាមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- រដ្ឋាភិបាលកាត់ដីគម្របព្រៃឈើនៅខេត្តព្រះសីហនុជិត៣០ហិកតារឲ្យប្រពន្ធលោក នេត សាវឿន
- គ្រួសារថា អាជ្ញាធរបង្ខំឱ្យលោក កង សារ៉ន សុំទោសជាថ្នូរទទួលបានសេរីភាពឡើងវិញ
- សង្គមស៊ីវិលបារម្ភពីករណីបង្ខាំងមនុស្ស និងចាប់ជំរិតផ្ទុះឡើងវិញនៅកម្ពុជា
- ក្រុមសង្គមស៊ីវិលប្រាប់អ្នករាយការណ៍ពិសេស UNថា រដ្ឋាភិបាលថ្មី មិនទាន់កែលម្អស្ថានភាពសិទ្ធិមនុស្ស និងប្រជាធិបតេយ្យទេ
- លោក ហ៊ុន សែន កាត់ដីឧទ្យានជាតិគិរីរម្យជាង ២រយហិកតារទៀតឱ្យក្រុមហ៊ុនស្និទ្ធនឹងលោក
