ពលរដ្ឋរស់នៅរាជធានីភ្នំពេញត្អូញត្អែរពីជំនន់ទឹកភ្លៀងប៉ះពាល់ដល់ការរស់នៅ និងជីវភាព
2024.08.09
ទិដ្ឋភាពទឹកភ្លៀងជន់លិចផ្លូវមួយ ក្នុងខណ្ឌសែនសុខ រាជធានីភ្នំពេញ នៅថ្ងៃទី៩ ខែសីហា ឆ្នាំ២០២៤។
រូប៖ ហ្វេសប៊ុករដ្ឋបាលខណ្ឌសែនសុខ រាជធានីភ្នំពេញ/2024-08-09
ប្រជាពលរដ្ឋមួយចំនួននៅរាជធានីភ្នំពេញត្អូញត្អែរពីបញ្ហាជំនន់ទឹកភ្លៀងលិចហូរចូលក្នុងផ្ទះ និងលិចផ្លូវពិបាកធ្វើដំណើរដែលបង្កឱ្យរំខានដល់ការរស់នៅ និងប្រកបមុខរបររបស់ពួកគាត់។ ពួកគាត់ថា បញ្ហាជំនន់ទឹកភ្លៀងជន់លិចស្ទើររាល់ឆ្នាំនេះគឺដោយសារតែរដ្ឋាភិបាលកាត់ឆ្វៀលដីបឹងឱ្យក្រុមហ៊ុនឯកជនចាក់ដីលុបបឹងធម្មជាតិ។
ជំនន់ទឹកភ្លៀងនៅរាជធានីភ្នំពេញកើតមានឡើងស្ទើររាល់ឆ្នាំបណ្ដាលឱ្យផ្សារ និងកំណាត់តូចធំជាច្រើនត្រូវលិច ហើយកន្លែងខ្លះទៀតមានសំរាមលាយឡំនឹងទឹកលូស្អុយហូរចូលផ្ទះប្រជាពលរដ្ឋ ដែលធ្វើឱ្យពួកគាត់ប្រឈមនឹងបញ្ហាសុខភាព។
អាជីវករលក់មាន់នៅផ្សារគីឡូម៉ែត្រលេខ៧ ខណ្ឌឫស្សីកែវ លោកស្រី ម៉ាន ម៉ារី ប្រាប់វិទ្យុអាស៊ីសេរីនៅថ្ងៃទី៩ ខែសីហា ថា លោកស្រីលក់មាន់មិនដាច់នោះទេដោយសារភ្លៀងខ្លាំងធ្វើឱ្យលិចផ្លូវដូច្នេះគ្មានអតិថិជនចេញមកទិញម្ហូបអាហារនោះទេ។ លោកស្រីបន្តថា ក្រៅពីលក់មិនដាច់ហើយនោះ ផ្ទះលោកស្រីក៏ជន់លិចផងដែរនៅពេលមានភ្លៀងធ្លាក់ម្តងៗ ជាពិសេសគឺលូទឹកស្អុយហូរចូលផ្ទះដែលបណ្ដាលឱ្យកូនលោកស្រីកើតរមាស់ស្បែក ។
លោកស្រី ម៉ាន ម៉ារី៖ «អ៊ីចឹងទៅវាគគ្រិចទៅមានផលប៉ះពាល់ខ្លួនប្រាណយើងកូនចៅយើងខ្លួនយើងផលប៉ះពាល់ប្រព័ន្ធការពារចាស់ដល់ក្មេងវាឆ្លងលឿនវាធ្វើឱ្យជំងឺរោគរូសអ៊ីចឹងទៅបរិស្ថានមិនល្អមិនស្អាត»។
ស្រដៀងគ្នានេះដែរ ពលរដ្ឋនៅក្នុងរាជធានីភ្នំពេញ លោកស្រី យឹម សុវណ្ណា សង្កេតឃើញថា ជំនន់ទឹកភ្លៀងពីឆ្នាំទៅមួយឆ្នាំកាន់តែកើនឡើងដែលធ្វើឱ្យផ្លូវលិចស្ទើរគ្រប់កន្លែងពិបាកធ្វើដំណើរ និងប្រឈមគ្រោះថ្នាក់នៅតាមដងផ្លូវពីព្រោះលោកស្រីមើលជង្ហុកមិនឃើញ។ លោកស្រីបារម្ភមានសត្វពស់ សត្វក្អែបខាំកូនលោកស្រី ខណៈខ្សែភ្លើងនៅតាមដងផ្លូវធ្លាក់រាយប៉ាយអាចប្រឈមនឹងឆក់ជាដើម។
លោកស្រី យឹម សុវណ្ណា៖ «បច្ចុប្បន្ននៅកម្ពុជាយើងកន្លែងខ្លះជួនកាលរាំងភ្លើងពីរបីថ្ងៃទឹកមិនទាន់ស្រកផងដល់ពេលអ៊ីចឹងកន្លែងខ្លះទៀតប្រព័ន្ធលូច្រើនជាង។ ប្រសិនជាមានប្រព័ន្ធលូទឹកភ្លៀងពេលភ្លៀងមកវាអាចជន់តែពេលរាំងវាទៅអស់តែបែរជារាំងភ្លៀងទឹកអត់វានៅហ្នឹងដដែលដល់អ៊ីចឹងវាមានផលប៉ះពាល់ជាមួយសត្វ ក្អែប ខ្ទួយ ពស់ អីខ្ញុំថ្ងៃមុនទឹកលិចជុំវិញផ្ទះពស់ចូលមកដល់បន្ទប់ចូលមកដល់ផ្ទះបាយហើយកូនតូចៗទៀតបារម្ភមែនទែនខ្លាច»។
ដោយឡែកពលរដ្ឋមួយចំនួន ក៏បានបង្ហោះសារនៅបណ្ដាញសង្គមកាលពីយប់ថ្ងៃទី៨ ដោយបង្ហាញថា ផ្លូវ២០០៤ ផ្លូវ២០០២ ផ្លូវហាណូយ និងផ្លូវម្ដុំផ្សារអូរឫស្សីជាដើមលិចទាំងស្រុង ដែលធ្វើឱ្យម៉ូតូ និងឡានមួយចំនួនខូចហើយពួកគាត់នាំគ្នាចុះបណ្ដើរម៉ូតូ ហើយខ្លះទៀតទុកឡានចោលកណ្ដាលផ្លូវជាដើម។
វិទ្យុអាស៊ីសេរីមិនអាចទាក់ទង អភិបាលរាជធានីភ្នំពេញ លោក ឃួង ស្រេង ដើម្បីសុំការបកស្រាយជុំវិញបញ្ហានេះបានទេនៅថ្ងៃទី៩ ខែសីហា។
ក៏ប៉ុន្តែរដ្ឋបាលខណ្ឌសែនរាជធានីភ្នំពេញបានបង្ហោះសារនៅលើហ្វេសប៊ុកផេក នៅថ្ងៃទី៩ ខែសីហា បង្ហាញថា ទឹកលិចនៅតំបន់សង្កាត់ភ្នំពេញថ្មី និងសង្កាត់ឃ្មួញស្រកបន្តិចហើយ ក្រោយមានភ្លៀងធ្លាក់ខ្លាំងកាលពីយប់ថ្ងៃទី៨ ខែសីហាដែលបណ្ដាលឱ្យផ្លូវមួយចំនួនក្នុងខណ្ឌសែនសុខលិច។ រដ្ឋបាលខណ្ឌសែនរាជធានីភ្នំពេញបញ្ជាក់ថា អាជ្ញាធរកំពុងពន្លឿនការបូមទឹកទម្លាក់ទៅបឹងតាមោក ខណៈដែលបឹងមួយនេះ ក៏កំពុងត្រូវបានរដ្ឋាភិបាល ពុះហែកចែកឱ្យក្រុមគ្រួសារសាច់ញាតិរបស់លោក ហ៊ុន សែន និងក្រុមមន្ត្រីជាន់ខ្ពស់ព្រមទាំងឧកញ៉ា ដែលជិតស្និទ្ធនឹងលោក ហ៊ុន សែន។
ជុំវិញរឿងនេះ ប្រធានកម្មវិធីបណ្ដាញ និងតស៊ូមតិនៃអង្គការភាពជាដៃគូដើម្បីបរិស្ថាន និងការអភិវឌ្ឍ (PED) លោក សាន់ ម៉ាឡា យល់ឃើញថា ចាប់តាំងពីរដ្ឋាភិបាលកាត់ឆ្វៀលដីបឹងធម្មជាតិឱ្យក្រុមហ៊ុនឯកជនចាក់ដីលុបបញ្ហាជំនន់ទឹកភ្លៀងកើតមានឡើងស្ទើររាល់ឆ្នាំ បើទោះជាភ្លៀងធ្លាក់តិចតួចក៏ដោយ ក៏នៅរាជធានីភ្នំពេញជន់លិចដែរ។ លោកបន្តថា បញ្ហានេះបានធ្វើឱ្យប៉ះពាល់ដល់សុវត្ថិភាព និងសុខភាពរបស់ពលរដ្ឋកាន់តែធ្ងន់ធ្ងរ ប្រសិនបើរដ្ឋាភិបាលនៅតែគ្មានឆន្ទៈដោះស្រាយទេនោះទេ។
លោក សាន់ ម៉ាឡា៖ «ការជន់លិចនេះរដ្ឋាភិបាលហាក់បីដូចជាមិនបានឆ្លើយតបមកកាន់ប្រជាពលរដ្ឋឱ្យទំនងសោះគាត់តែងតែបន្ទោសថា មកពីមេឃភ្លៀង ហើយគាត់ក៏មិនដែលបង្ហាញប្រាប់ប្រជាពលរដ្ឋថាត្រូវដោះស្រាយម៉េច លិចដោយសារមេឃភ្លៀងបែបណាខ្លះនោះទេ។ ជាពិសេសយើងឃើញផ្លូវនៅភ្នំពេញហ្នឹងកកស្ទះដោយសារតែបន្តជួសជុលឥតឈប់ឥតឈរពេលក៏ខាងរដ្ឋាករទឹក ពេលខ្លះខាងអគ្គិសនី ពេលខ្លះក៏ត្រូវការផ្លូវដើម្បីដោះដូរប្រព័ន្ធលូ»។
កន្លងទៅរដ្ឋាភិបាលតែងរងការរិះគន់ពីពលរដ្ឋថា អសមត្ថភាពជួយដោះស្រាយបញ្ហាឱ្យពលរដ្ឋ និងចេះតែបន្តកាត់ឆ្វៀលដីបឹងធម្មជាតិដែលជាផ្លូវរំដោះទឹកឱ្យទៅអ្នកមានអំណាចយកទៅធ្វើជាកម្មសិទ្ធិឯកជន។ ពួកគាត់ធ្លាប់ព្រមានពីការចាក់ដីលុបបឹងធ្វើឱ្យជន់លិចរាជធានីភ្នំពេញ ប៉ុន្តែរដ្ឋាភិបាលមិនបានយកចិត្តទុកដាក់ស្ដាប់ពីមតិរិះគន់ និងកែលម្អតាមការស្នើសុំរបស់ពលរដ្ឋនោះឡើយ ដែលធ្វើឱ្យភ្នំពេញបាត់បង់អាងស្តុកទឹកស្ទើរទាំងស្រុង។
របាយការណ៍របស់អង្គការសមាគមធាងត្នោតចេញផ្សាយកាលពីខែធ្នូ ឆ្នាំ២០១៩ បង្ហាញថា ចាប់តាំងពីឆ្នាំ១៩៩០ មក រដ្ឋាភិបាលបានលុបបឹងធម្មជាតិ នៅក្នុងរាជធានីភ្នំពេញ អស់ចំនួន ១៦បឹងហើយ។ ចំណែកបឹងនៅសល់ចំនួន ១០ទៀត កំពុងប្រឈមការចាក់លុបដោយផ្នែកៗ ជាបណ្ដើរៗ។ ការលុបបឹងទាំងនោះអាចធ្វើឱ្យក្រុងភ្នំពេញរងការគំរាមកំហែង ដោយសារគ្រោះទឹកជំនន់ ទាំងជំនន់ទឹកភ្លៀង និងទឹកជំនន់ពីប្រព័ន្ធទន្លេមេគង្គ។ លើសពីនេះបឹងមួយចំនួន ដែលការពារដោយអនុក្រឹត្យ ក៏កំពុងប្រឈមនឹងការចាក់លុបដូចគ្នាដែរ ហើយប្រសិនបើស្ថានភាពដូចបច្ចុប្បន្ននៅតែបន្តរាជធានីភ្នំពេញ និងតំបន់ជុំវិញ នឹងបាត់បង់ត្រីធម្មជាតិ និងបាត់បង់អាងប្រព្រឹត្តិកម្មទឹកកង្វក់បែបធម្មជាតិ ហើយប៉ះពាល់ដល់ជីវភាពប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ