ជនជាតិដើមភាគតិចព្នងជាច្រើននាក់ រស់នៅខេត្តមណ្ឌលគិរី បានលើកគ្នាតវ៉ា ២ថ្ងៃជាប់គ្នា ចាប់តាំងពីថ្ងៃទី១៥ ដល់ថ្ងៃទី១៦ មីនា ដើម្បីបញ្ឈប់សកម្មភាពឈូសឆាយព្រៃអភិរក្ស ពីសំណាក់ក្រុមហ៊ុន វីឡេក ឌីវឺឡប់មែន (Village Development)។ អ្នកភូមិអះអាងថា ក្រុមហ៊ុននេះ បានយកគ្រឿងចក្រពីរគ្រឿងឈូសផ្តួលដើមឈើធំៗ អស់រាប់រយដើម ក្នុងតំបន់ព្រៃសហគមន៍ភូមិឡៅកា ដែលពួកគាត់អាស្រ័យផលបែបប្រពៃណី។
ជនជាតិដើមភាគតិចព្នងជាង ៥០នាក់ រស់នៅភូមិឡៅកា សង្កាត់សុខដុម ក្រុងសែនមនោរម្យ ទាមទារឱ្យក្រុមហ៊ុន វីឡេក ឌីវឺឡប់មែន (Village Developmen) ដែលជារបស់សមាជិកក្រុមប្រឹក្សាខេត្តមណ្ឌលគិរី លោក យឹម លុច ទូទាត់សំណងប៉ះប៉ូវការខូចខាតព្រៃឈើ និងធនធានធម្មជាតិ នៅរយៈពេល ៣ថ្ងៃចុងក្រោយនេះ។ អ្នកភូមិអះអាងថា ក្រុមហ៊ុនមួយនេះបានឈូសបំផ្លាញដើមឈើធំៗ ជិត ១ពាន់ដើម ដែលភាគច្រើនជាដើមឈើផលិតជ័រទឹក និងដើមជ័រចុង ដែលជាឆ្នាំងបាយរបស់ពួកគាត់។
សមាជិកសហគមន៍ភូមិឡៅការ លោកស្រី ភ្លឹក ណាវី ប្រាប់វិទ្យុអាស៊ីសេរី នៅថ្ងៃទី១៦ មីនាថា ក្រុមហ៊ុននេះ បានឈូសឆាយបំពានចូលព្រៃស្រោង ទំហំចាប់ពី ៥ ទៅ ៦ម៉ែត្រ បណ្ដោយជិត ២គីឡូម៉ែត្រ ប៉ះពាល់ដើមឈើទាំងតូចទាំងធំដួលរាយប៉ាយពេញព្រៃ។
លោកស្រីបន្តថា មកទល់ពេលនេះ ក្រុមហ៊ុនបានផ្អាកសកម្មភាពឈូសឆាយហើយ ប៉ុន្តែមិនឃើញ អាជ្ញាធរខេត្ត ចុះដោះស្រាយនៅឡើយទេ។ លោកស្រីចាត់ទុក ទង្វើរបស់ក្រុមហ៊ុននេះថា ជាការ បំពានសិទ្ធិជាមូលដ្ឋាន របស់ជនជាតិដើមភាគតិច ដែលពឹងផ្អែកលើ អនុផលព្រៃឈើចិញ្ចឹមជីវិត៖ «ការឈូសឆាយហ្នឹង ប៉ះពាល់ច្រើនណាស់ ខែហ្នឹង ខែ៣ រកឃ្មុំ។ បើអស់ព្រៃពិបាករស់នៅ បេះស្លឹកព្រិច ចុងផ្ដៅ និងច្រើនទៀត ដែលពួកខ្ញុំរកស៊ីធនធានធម្មជាតិ»។
ស្ត្រីដដែលបន្ថែមថា អ្នកភូមិឡៅកាទាំងមូល ចាត់ទុកព្រៃសហគមន៍នេះ ជាប្រភពសេដ្ឋកិច្ចយ៉ាងសំខាន់ ដែលពួកគាត់តែងតែរកផ្សិត រកឃ្មុំ ជ័រចុង និងជ័រទឹកជាដើម ប្រសិនបើឈូសឆាយព្រៃអស់ នឹងប៉ះពាល់ជីវភាពពួកគាត់កាន់តែធ្ងន់។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីអ្នកនាំពាក្យសាលាខេត្តមណ្ឌលគិរី លោក ស៊ុន សារុន ដើម្បីសុំការបំភ្លឺរឿងនេះ បាននៅឡើយទេ នៅថ្ងៃទី១៦ មីនា ដោយទូរស័ព្ទមិនអាចទាក់ទងបាន។
ចំណែកចៅសង្កាត់សុខដុម លោក ពាន សុផាត បដិសេធមិនបំភ្លឺរឿងនេះទេ ដោយលោកថាកំពុងជាប់រវល់។
រីឯតំណាងក្រុមហ៊ុន វីឡេក ឌីវឺឡប់មែន លោក គ្រុយ រីណា បដិសេធថា លោកពុំមែនជាតំណាងក្រុមហ៊ុនដូចការលើកឡើងរបស់ពលរដ្ឋនោះទេ។ លោកថា លោកគឺជាមន្ត្រីនគរបាល ចុះឃ្លាំមើលពលរដ្ឋតវ៉ា ខ្លាចក្រែងកើតមានអំពើហិង្សា៖ «ក្នុងនាមជានគរបាល ចុះមើលសភាពការណ៍កន្លែងនោះ ពលរដ្ឋគាត់ចេញ សភាពការច្រឡោត ដកកាំបិតអ៊ីចឹង»។
តំបន់ការពារធម្មជាតិឡៅកា មានទំហំដី ២.២២៦ហិកតារ បានចុះបញ្ជីជាព្រៃសហគមន៍ដោយក្រសួងបរិស្ថានកាលពីឆ្នាំ ២០១៤។ ព្រៃសហគមន៍នោះឋិតក្នុងដែនជម្រកសត្វព្រៃភ្នំព្រេច នៃភូមិឡៅកា សង្កាត់សុខដុម ក្រុងសែនមនោរម្យ ខែត្រមណ្ឌលគិរី។ អ្នកភូមិថា ចាប់តាំងពីបង្កើតសហគមន៍មក ពួកគេប្រឈមបញ្ហាច្រើន ដូចជា សហគមន៍បានប្ដឹងចោទប្រកាន់ក្រុមហ៊ុន វីឡេក ឌីវឺឡប់មែន ទាក់ទិនការរំលោភឈូសឆាយព្រៃការពារជិត ៣០០ហិកតារ និងកាប់បំផ្លាញដើមឈើ ផលិតជ័រទឹកសហគមន៍រាប់ពាន់ដើម។
ទីប្រឹក្សាបណ្ដាញសហគមន៍ជនជាតិដើមភាគតិចព្នង លោក គ្រើង តុលា ស្នើឱ្យក្រសួងកសិកម្ម និង ក្រសួងបរិស្ថាន សហការគ្នាចុះដោះស្រាយបញ្ហានេះជាបន្ទាន់ ទាក់ទិនករណី ក្រុមហ៊ុនបន្តបំផ្លាញព្រៃឈើបន្សល់ចុងក្រោយ ដែលអ្នកភូមិខំថែទាំ៖ «រាល់ការបាត់បង់ព្រៃឈើ ម្ចាស់ក្រុមហ៊ុនហ្នឹង គាត់ដាំដុះរួចហើយ បញ្ឈប់ការឈូសឆាយរួចហើយ ឥលូវគាត់ធ្វើឱ្យប៉ះពាល់ព្រៃឈើ គួរតែចេញមុខមកដោះស្រាយ ដើម្បីបញ្ចប់សំណុំរឿង»។
ជុំវិញរឿងនេះ មន្ត្រីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុក លោក ប៉ែន ប៊ុណ្ណារ៍ សង្កេតឃើញថា នេះពុំមែនជាលើកទី១ ទេ ដែលក្រុមហ៊ុននេះ បានឈូសឆាយព្រៃសហគមន៍ ដោយគ្មានការដោះស្រាយឱ្យពិតប្រាកដ។ លោកបញ្ជាក់ថា អាជ្ញាធរខេត្ត និងក្រសួងពាក់ព័ន្ធ គួរតែកំណត់ព្រំប្រទល់ដីក្រុមហ៊ុនឱ្យច្បាស់លាស់ និងដោះស្រាយបញ្ហាប្រឈមទាំងនេះ ដោយយុត្តិធម៌ និងតម្លាភាព៖ «ស្ងាត់មួយរយះមក ឥលូវចាប់ផ្ដើមឈូសឆាយទៀតហើយ ដោយមិនកំណត់ទីតាំងច្បាស់លាស់ ដីសម្បទានទទួលបានប៉ុណ្ណា ? ដើមឈើជ័រមិនបានកំណត់ ទុកឱ្យសហគមន៍។ នីតិវិធីផ្តល់ដីសម្បទានសេដ្ឋកិច្ច ដើមឈើជ័រ ដាច់ខាតត្រូវតែទុក»។
ច្បាប់ស្ដីពីព្រៃឈើមាត្រា៤៤ ចែងថា សហគមន៍មូលដ្ឋាន បានដំណើរការក្រោមកិច្ចព្រមព្រៀងព្រៃសហគមន៍មានសិទ្ធិប្រមូលផលអនុផលព្រៃឈើក្នុងដែនព្រៃឈើ ស្របតាមផែនការគ្រប់គ្រងព្រៃសហគមន៍ដែលបានកំណត់ព្រំប្រទល់ដូចមានចែងក្នុងកិច្ចព្រមព្រៀងព្រៃសហគមន៍។ សហគមន៍មូលដ្ឋានមិនអាចយកព្រៃសហគមន៍ទៅប្រើប្រាស់ក្រោមរូបភាពសម្បទាន ឬលក់ដូរ ឬផ្ទេរសិទ្ធិព្រៃឈើទៅភាគីទី៣ បានឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។