ប្រជាសហគមន៍ព្រៃឡង់ប្រទះឃើញ សកម្មភាពកាប់ព្រៃទន្ទ្រានយកដី ធ្វើជាកម្មសិទ្ធិ និងការកាប់ផ្តួលរំលំឈើហ៊ុបទ្រង់ទ្រាយធំ ឋិតក្នុងដែនជម្រកសត្វព្រៃឡង់ខេត្តស្ទឹងត្រែងជាថ្មីទៀត។ ពួកគាត់ថ្លែងបែបនេះ ក្រោយពីចុះល្បាតរយៈពេល ៣ថ្ងៃ នៅដើមសប្តាហ៍នេះ ដើម្បីតាមដានពីស្ថានភាពព្រៃឡង់នៅតំបន់នោះ។
ប្រជាសហគមន៍ព្រៃឡង់ រស់នៅឃុំកាំងចាម ស្រុកថាឡាបរិវ៉ាត់ អះអាងថា ដើមកកោះ ដួងចែម និងឈើទាល ជាដើម មានមុខកាត់ ៧តឹកឡើងទៅ នៅតែបន្តទទួលរងការកាប់រំលំធ្វើអាជីវកម្ម ឋិតនៅចំណុច អូរពពេល ភ្នំអំប៉ែ ត្រពាំងកកោះ និងអន្លង់ពង្រ។
ប្រជាសហគមន៍បានចុះល្បាត ប្រទះឃើញ សកម្មភាពកាប់ព្រៃទន្ទ្រានយកដីទ្រង់ទ្រាយធំអស់ប្រមាណ ១០០ហិកតាជាថ្មីទៀត នៅតំបន់នោះ ដែលប្រព្រឹត្តឡើងដោយពលរដ្ឋចំណូលស្រុកឃុបឃិត ជាមួយអាជ្ញាធរមូលដ្ឋានមួយចំនួន។
សមាជិកបណ្តាញសហគមន៍ព្រៃឡង់ខេត្តស្ទឹងត្រែងលោក គង់ រី ប្រាប់អាស៊ីសេរីនៅថ្ងៃទី១៩ ខែតុលាថា ពួកលោកមានគ្នា ១៥នាក់ ប្រថុយប្រថានចុះល្បាតរយៈពេល ៣ថ្ងៃ ចាប់ពីថ្ងៃ១៧ ដល់ថ្ងៃទី១៩ ខែតុលានេះ ដើម្បីឃ្លាំមើលពីបទល្មើសព្រៃឈើ ក្នុងតំបន់ព្រៃឡង់។ លោកសោកស្តាយ ដែលឃើញដើមឈើធំៗ ត្រូវបានជនល្មើសកាប់ផ្តួល យកឈើលក់ ឋិតក្នុងព្រៃអភិរក្សមួយនេះ។ លោកបញ្ជាក់ថា ពួកលោកបានផ្តល់ដំណឹងនេះ ឱ្យមន្ត្រីបរិស្ថាននៅតំបន់នោះហើយ ក្រោយពីសហគមន៍បានរឹបអូសគោយន្តដឹកឈើ ៥គ្រឿង ផ្ទុកឈើកកោះ ជិត ១០ម៉ែត្រគូប ដើម្បីរក្សាទុកនៅទីស្នាក់ការបរិស្ថាន៖ «ពលរដ្ឋទាំងអស់គ្នាដែលបានចុះទៅចូលរួម យើងមានការសោកស្តាយ ដោយគ្មានការទប់ស្កាត់ ពីអាជ្ញាធរ ខ្ញុំសូមណូមពរ អភិបាល នៃគណៈអភិបាលស្រុក និងប្រធានមន្ទីរបរិស្ថានខេត្តព្រមទាំងរដ្ឋបាលព្រៃឈើ ខេត្តស្ទឹងត្រែង មេត្តាជួយទប់ស្កាត់បទល្មើសព្រៃឈើ ទាំងយប់ទាំងថ្ងៃ ដែលមានអាជ្ញាធរបើកដៃ ពិសេសភូមិ / ឃុំ មេប៉ស្តិ៍»។
សកម្មជនព្រៃឡង់រូបនេះបន្ថែមថា សកម្មភាពដឹកឈើចេញពីព្រៃឡង់ តាមគោយន្តនៅតែកើតមានទាំងយប់ និងថ្ងៃ ដោយគ្មានការបង្ក្រាប និងអនុវត្តច្បាប់ឱ្យតឹងរ៉ឹងទេ។ រីឯ ក្រុមអ្នកកាប់ឈើបានអះអាងថា ពួកគេបានបង់លុយសូកប៉ាន់ ឱ្យមេឃុំ និងមេប៉ុស្តិ៍កាំងចាមជាថ្នូរមិនចាប់ពួកគេ។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះពីប្រធានមន្ទីរបរិស្ថានលោក អេង ភីរុង បាននៅឡើយទេ នៅថ្ងៃទី១៩ ខែតុលា ដោយទូរសព្ទហៅចូលតែគ្មានអ្នកលើក។
ប៉ុន្តែអ្នកនាំពាក្យសាលាខេត្តស្ទឹងត្រែងលោក ម៉ែន គុង ប្រាប់វិទ្យុអាស៊ីសេរីថា ក្រុមការងារជំនាញបានចុះស្រាវជ្រាវរឿងនេះហើយ និងកំពុងកំណត់អត្តសញ្ញាណរបស់ជនល្មើសជាបឋម ដើម្បីស្វែងរកជនល្មើស មកអនុវត្តច្បាប់៖ «ទាក់ទងការអនុវត្តយន្តការទប់ស្កាត់ ធនធានធម្មជាតិមានគោលការណ៍រួចហើយ ជាពិសេសគឺសារាចរណែនាំរបស់រដ្ឋាភិបាល បានប្តេជ្ញាចិត្តបន្ត អនុវត្តច្បាប់ទាំងឡាយ ដែលមានការណែនាំពីរដ្ឋាភិបាល»។
ជុំវិញរឿងនេះ មន្ត្រីសម្របសម្រួលសមាគមអាដហុក ខេត្តស្ទឹងត្រែងលោក ប៊ី វ៉ាន់នី សង្កេតឃើញថា រឿងបទល្មើសព្រៃឈើ គឺជាបញ្ហាប្រឈមដដែលៗ គ្មានចំណាត់ការច្បាស់លាស់ ពីអាជ្ញាធរថ្នាក់ក្រោមជាតិនោះទេ។ លោកអំពាវនាវឱ្យអភិបាលខេត្តថ្មី គួរតែដោះស្រាយរឿងនេះ ដើម្បីឱ្យពលរដ្ឋមានជំនុកចិត្ត៖ «ពាក់ព័ន្ធការលក់ដីព្រៃរបស់រដ្ឋ បើយើងធ្វើជាមន្ត្រី ហើយមិនការពារទ្រព្យសម្បត្តិជាតិ ដូចជា ធនធានធម្មជាតិ និងដីព្រៃរបស់រដ្ឋ។ តំបន់អភិរក្សជាដើម ជាសម្បត្តិជាតិកាលណាយើងមិនបានការពារ ហើយយើងមានពាក់ព័ន្ធបទល្មើស ប្រៀបដូចជាយើងជាជន ក្បត់ជាមួយដែរ។ យើងធ្វើជាមន្ត្រីមិនការពារធនធានធម្មជាតិ តើយើងធ្វើជាមន្ត្រី ដើម្បីអ្វី ?»។
មន្ត្រីសង្គមស៊ីវិលរូបនេះ ឆ្លល់ថា ក្រសួងបរិស្ថាន បានបញ្ជូនឆ្មាំអភិរក្សជាច្រើននាក់ យាមល្បាតការពារព្រៃនៅតំបន់នោះ ប៉ុន្តែបទល្មើសព្រៃឈើនៅតែបន្តកើតមានដដែលៗ ដោយគ្មានយន្តការលុបបំបាត់ ទាល់តែសោះ ជាច្រើនឆ្នាំមកហើយ។ លោកទទូចឱ្យអាជ្ញាធរខេត្តស្ទឹងត្រែង និង មន្ត្រីបរិស្ថាន ស៊ើបអង្កេតរឿងនេះ ស្វែងរកអ្នកនៅពីក្រោយខ្នងដែលទទួលទិញឈើនិងអ្នកឃុបឃិតគ្នាកាប់បំផ្លាញព្រៃឈើ ដើម្បីយកមកផ្ដន្ទាទោសតាមច្បាប់។
អង្គការជាតិ និងអន្តរជាតិបានរកឃើញថា ក្នុងរយៈពេល ២០ឆ្នាំចុងក្រោយនេះ ទំហំព្រៃឡង់ជាង១សែនហិកតា (១០២ ៤៣៦) ឬស្មើនឹង២៤% ត្រូវបានបាត់បង់ ក្លាយជាវាលរហោឋាន។ បន្ថែមពីនេះទៀត គិតត្រឹមឆ្នាំ២០១៩ ព្រៃឡង់ទំហំជិត ៦ម៉ឺនហិកតា (៥៨ ១៣៨) ត្រូវបានបំប្លែងទៅជាដីចម្ការដំណាំ ហើយមានផ្ទៃដីតែជាង ១ពាន់ហិកតា(១ ១១១) ប៉ុណ្ណោះ ត្រូវបានដាំដុះកូនឈើឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។