តំណាង​អយ្យការ​ខេត្ត​មណ្ឌលគិរី​ដោះលែង​ អនុ​រដ្ឋ​លេខាធិការ​ក្រសួង​កសិកម្ម​ក្រោយពី​សួរ​នាំ​មួយ​ព្រឹក

ដោយ មាន ឫទ្ធិ
2019-08-21
អ៊ីម៉ែល
មតិ
Share
បោះពុម្ព
សាលា​ដំបូង​ខេត្ត​មណ្ឌលគិរី ថ្ងៃ​ទី​៦ ខែ​មករា ឆ្នាំ​២០១៦។ Photo courtesy of ADHOC
សាលា​ដំបូង​ខេត្ត​មណ្ឌលគិរី ថ្ងៃ​ទី​៦ ខែ​មករា ឆ្នាំ​២០១៦។ Photo courtesy of ADHOC
Photo courtesy of ADHOC

ព្រះរាជអាជ្ញា​អម​សាលាដំបូង​ ខេត្ត​មណ្ឌលគិរី​ សម្រេច​ដោះ​លែង​មន្ត្រី​ជាន់​ខ្ពស់​ក្រសួង​កសិកម្ម​ម្នាក់​មក​វិញ ក្រោយ​ពី​សាកសួរ​ពេញ​មួយ​ព្រឹក នៅ​ថ្ងៃ​ទី២១ សីហា ពាក់ព័ន្ធ​សំណុំ​រឿង​នេះ​ ភាព​មិន​ប្រក្រតី​នៃ​ការ​ផ្ដល់​ដី​សម្បទាន​សេដ្ឋកិច្ច។ អ្នកនាំពាក្យ​តុលាការ​ខេត្ត​នេះ​អះអាង​ថា​ ព្រះរាជអាជ្ញា​នឹង​កោះ​ហៅ​អ្នក​ជាប់​ពាក់ព័ន្ធ​ជាច្រើន​នាក់​ទៀត។

អ្នកនាំពាក្យ​សាលាដំបូង​ ខេត្ត​មណ្ឌលគិរី​ លោក​ មាស​ ប្រុស​ ឲ្យដឹង​នៅ​ថ្ងៃ​ទី២១ សីហា​ថា ព្រះរាជ​អាជ្ញា​មិនទាន់​សម្រេច​បែប​ណា​នៅ​ឡើយ​ទេ​ លើ​លោក​ ឡោ​ រស្មី​ អនុ​រដ្ឋលេខាធិការ​ក្រសួង​កសិកម្ម​ ដោយ​គ្រាន់​តែ​សាកសួរ​ធ្វើ​កំណត់​ហេតុ​ ព្រោះ​សំណុំ​រឿង​នេះ​មាន​ជាប់​ព័ន្ធ​មនុស្ស​ជា​ច្រើន​ទៀត។ លោក​មិន​បញ្ជាក់​លម្អិត​ថា​ នឹង​កោះហៅ​នរណា​ទៀត​នោះ​ទេ? លោក​សង្កត់​ធ្ងន់​ថា​ ប្រសិនបើ​រក​ឃើញ​មាន​ភាព​មិន​ប្រក្រតី​ក្រុមហ៊ុន​ និង​អ្នក​ពាក់ព័ន្ធ​ នឹង​ប្រឈម​ចំពោះ​មុខ​ច្បាប់៖ «ព្រះរាជ​អាជ្ញា​អត់​ទាន់​សម្រេច​អី​ទេ គ្រាន់​តែ​សួរ​ធ្វើ​កំណត់​ហេតុ​ទេ ព្រោះ​សំណុំ​រឿង​ហ្នឹង មិន​មែន​តែ​គាត់​ម្នាក់​ទេ​ច្រើន ហៅ​ចូល​តៗ ទៀត។ យក​ចម្លើយ​ម្តង​មួយៗ ឲ្យ​អស់ បាន​សម្រេច​ក្នុង​សំណុំ​រឿង​ហ្នឹង​មួយ។ ប្រសិន​បើ​រក​ឃើញ មាន​ភាព​មិន​ប្រក្រតី ជាប់​ក្រុមហ៊ុន ដែល​គ្មាន​អាជ្ញាប័ណ្ណ ដែល​គាត់​ទៅ​ធ្វើ​ក្រុមហ៊ុន គឺ​មាន​បញ្ហា​ប្រឈម​ហើយ»

អាស៊ី​សេរី​បាន​ព្យាយាម​ទាក់ទង​ ព្រះរាជអាជ្ញា​ ខេត្ត​មណ្ឌលគិរី​ លោក ហៀង សុភក្ត្រ ដើម្បី​សុំ​ការ​បំភ្លឺ​រឿង​នេះ​ តែ​ទូរស័ព្ទ​លោក​មិន​អាច​ទាក់ទង​បាន​នៅ​ថ្ងៃ​ទី២១ សីហា។

ចំណែក​ លោក​ ម៉ន​ វ៉ាន់​ដា​ អ្នកនាំពាក្យ​អយ្យការ​អម​សាលាដំបូង​ខេត្ត​មណ្ឌលគិរី​ បដិសេធ​មិន​អធិប្បាយ​ករណី​នេះ​ទេ​ ដោយ​លោក​ថា​ ទូរស័ព្ទ​ស្ដាប់​មិន​ឮ​ និង​ឈប់​ទទួល​ទូរស័ព្ទ៖ «ស្ដាប់​អត់​បាន​ទេ​បង។ ឮ​ដាច់ៗ បង អាឡូ»

កាលពី​ថ្ងៃ​ទី៥​ សីហា​ លោក​ ហៀង​ សុ​ភក្ត្រ​ តំណាង​អយ្យការ​អម​សាលាដំបូង​ខេត្ត​នេះ​ បាន​កោះ​ហៅ​ អនុ​រដ្ឋ​លេខាធិការ​ក្រសួង​កសិកម្ម​ លោក​ ឡោ​ រស្មី​ ពាក់ព័ន្ធ​ការ​អនុញ្ញាត​ផ្ដល់​ដី​សម្បទាន​សេដ្ឋកិច្ច​ឲ្យ​ក្រុមហ៊ុន ផេស៊ីហ្វិកហ្គេន យ៉ញ-ស្តុក ខមភេនី លីមីធីត (Pacific Grand Joint-stock Company Limited) មាន​ទំហំ​ជិត​ ៨ពាន់​ហិកតារ (.៧៤១)

មន្ត្រី​ជាន់​ខ្ពស់​សមាគម អាដហុក (ADHOC) លោក ប៉ែន ប៊ុណ្ណារ៍ ចាត់​ទុក​ដីកា​កោះ​ហៅ​នេះ​ ជា​តម្រុយ​ថ្មី​មួយ​ ទាមទារ​ឲ្យ​អយ្យការ​ត្រូវ​ស៊ើប​អង្កេត​ឲ្យ​ហ្មត់​ចត់ ព្រោះ​រឿង​នេះ​ជា​បទ​ល្មើស​ឧក្រិដ្ឋ​ធ្ងន់ធ្ងរ។ លោក​ថា​ ភាព​មិន​ប្រក្រតី​នៃ​ការ​ផ្ដល់​ដី​សម្បទាន​សេដ្ឋកិច្ច​រាប់ពាន់​ហិកតារ​ អាច​ធ្វើ​ទៅ​បាន​ មាន​ការ​សម​គំនិត​ជា​ប្រព័ន្ធ​ រវាង​ក្រុមហ៊ុន​ និង​អាជ្ញាធរ​ពាក់ព័ន្ធ​ប្រព្រឹត្ត​អំពើ​ពុក​រលួយ៖ «បើ​យើង​និយាយ​អំពើ​ពុក​រលួយ​វា​អាច​កើត​ឡើង​បាន លុះ​ត្រា​តែ​​សមគំនិត​គ្នា​ច្រើន។ រឿង​វា​ធំ ដូច​ជា​សម្បទាន​ដី​រាប់​ម៉ឺន​ហិកតារ​អ៊ីចឹង វា​នឹង​ក្លាយ​ជា​សម្ល​កំពឹស។ អ្វី​ដែល​សំខាន់ គឺ​រឿង​ពិត និង​យុត្តិធម៌​សម្រាប់ ពលរដ្ឋ​ទូទាំង​ប្រទេស ដែល​ត្រូវ​បាន​ទទួល​យុត្តិធម៌ នៅ​ពេល​ដ៏​ខ្លី​ខាង​មុខ​ហ្នឹង។ អយ្យការ​ត្រូវ​ស៊ើប​អង្កេត​ឲ្យ​បាន​ហ្មត់ចត់ ព្រោះ​រឿង​ហ្នឹង​ជា​បទ​ល្មើស​ឧក្រិដ្ឋ​ធ្ងន់ធ្ងរ»

សហគមន៍​ជនជាតិ​ដើម​ភាគតិច​ រស់នៅ​ឃុំ​រយ៉​ ស្រុក​កោះញែក លោក ប្រុម ណច កត់​សម្គាល់​ថា ការ​ផ្ដល់​ដីសម្បទាន​សេដ្ឋកិច្ច​ជា​ដើម​ចម​ នាំ​ឲ្យ​បាត់​បង់​ដើម​ឈើ​ធំៗ​ ក្នុង​ព្រៃ​សហគមន៍​ ព្រៃ​តំណម​ និង​ព្រៃ​អភិរក្ស​ ដែល​ជន​ជាតិ​ដើម​ភាគ​តិច​អាស្រ័យ​ផល​បែប​ប្រពៃណី។ លោក​ថា​ ក្រុមហ៊ុន​ស្ទើរ​ទាំង​អស់​ មិន​បាន​ផ្ដល់​ផល​ប្រយោជន៍​ដល់​ពលរដ្ឋ​មូលដ្ឋាន​ទេ​ គឺ​ឃើញ​តែ​ធ្វើ​អាជីវកម្ម​ឈើ​ និង​បើក​ការដ្ឋាន​អារ​ឈើ​ បំផ្លាញ​ធនធាន​ធម្មជាតិ​ក្នុង​តំបន់​ពួក​គេ​រស់នៅ​អស់​ស្ទើរ​ទាំងស្រុង៖ «ការ​ផ្ដល់​ដី​សម្បទាន​សេដ្ឋកិច្ច​ហ្នឹង បាត់​បង់​ព្រៃ​ឈើ​ខ្លាំង សំខាន់​ឈើ​ហ្មង​ខាង​យើង​នេះ។ វា​ធ្វើ​ឈើ​ឲ្យ​អស់​សិន​បាន​ចាប់​ផ្ដើម​ដី បាត់បង់​អត្តសញ្ញាណ​របស់​គាត់ (ជន​ជាតិ​ដើម​ភាគ​តិច) ព្រៃ​តំណម​របស់​គាត់ ព្រៃ​អារក្ស​អ្នកតា មាន​ព្រៃ​ឈើ​ធំៗ ក៏​អស់​ដែរ នៅ​សល់​តិចតួច​ទេ»

យ៉ាងណា​ សកម្មជន​បរិស្ថាន​ លោក​ ហេង​ ស្រស់​ សង្ឃឹមថា តុលាការ​នឹង​ពន្លឿន​វែកមុខ​ក្រុម​ឧក្រិដ្ឋជន​ និង​អាជ្ញាធរ​ខិលខូច​មក​ផ្ដន្ទាទោស​តាមច្បាប់។ លោក​ថា​ ក្រសួង​កសិកម្ម​បាន​ជិះ​សេះ​លែង​ដៃ​ បណ្ដែត​បណ្ដោយ​ឲ្យ​ក្រុមហ៊ុន​ កាប់​បំផ្លាញ​ព្រៃឈើ​ខុសច្បាប់​ជាច្រើន​ឆ្នាំ​មក​ហើយ៖ «ដើម​ចម​ដែល​ធ្វើ​ឲ្យ​បាត់​បង់​ព្រៃ​ឈើ​ហ្នឹង ដោយ​សារ​មាន​ការ​ស៊ីញេ​ចេញ​ពី​អស់​លោក​ថ្នាក់​ខាង​លើៗ ហ្នឹង បាន​វា​មាន​ការ​កាប់​បំផ្លាញ​ព្រៃ​ឈើ។ ក្នុង​ប្រទេស​កម្ពុជា​ក្រុមហ៊ុន​ទាំង​អស់ គ្មាន​ក្រុមហ៊ុន​ណា​មួយ អនុវត្ត​ច្បាប់​បាន​ត្រឹមត្រូវ​ទេ។ អា​ក្រុមហ៊ុន ប៊ិញភឿក១ និង​ប៊ិញភឿក២ នៅ​ស្រុក​លំផាត់ ក៏​គ្មាន​ដាំ​អី​ទេ ប៉ុន្មាន​ឆ្នាំ​ហើយ សុទ្ធ​តែ​កាប់​ព្រៃ​ឈើ​នៅ​ខាង​ក្រោយ កំពុង​ដឹក​យ៉ាង​គគ្រឹកគគ្រេង»

ក្រុម​អង្គការ​សង្គម​ស៊ីវិល​ និង​សកម្មជន​បរិស្ថាន​សង្កេត​ឃើញ​ថា រដ្ឋាភិបាល​ហាម​មិន​ឲ្យ​ផ្ដល់​ដី​សម្បទាន​សេដ្ឋកិច្ច​វិនិយោគ​ក្នុង​តំបន់​ព្រៃ​ស្រោង ក៏​ប៉ុន្តែ​ការ​អនុវត្ត​ជាក់​ស្ដែង​ពុំ​ដូច្នេះ​ទេ ក្រសួង​កសិកម្ម​ជា​អ្នក​ផ្ដួចផ្ដើម​នាំ​ឲ្យ​បាត់បង់​ធនធាន​ធម្មជាតិ​ធំធេង​ រំលោភ​សិទ្ធិ​ជន​ជាតិ​ដើម​ភាគតិច​ និង​កើត​មាន​ជម្លោះ​ដីធ្លី។ កន្លង​ទៅ​សហគមន៍​ជន​ជាតិ​ដើម​ភាគ​តិច​ស្ទើរ​គ្រប់​តំបន់​ បាន​ស្រែក​តវ៉ា និង​ទាមទារ​រក​យុត្តិធម៌​ ក្រោយ​ពី​ក្រុមហ៊ុន​រំលោភ​ដីធ្លី​ និង​កាប់​ឈើ​ក្នុង​តំបន់​ពួក​គេ​រស់​នៅ​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល