ផលដំណាំ និងផ្ទះសម្បែងរបស់ប្រជាកសិករជាច្រើនគ្រួសារ នៅស្រុកមោងឫស្សី ខេត្តបាត់ដំបង ត្រូវជំនន់ទឹកភ្លៀងលិចខូចខាត ដោយសារភ្លៀងកក់ខែជាប់ៗគ្នាជាច្រើនមេ ក្នុងរយៈពេលប៉ុន្មានថ្ងៃចុងក្រោយនេះ។
អ្នកភូមិបញ្ជាក់ថា ប្រសិនបើទឹកភ្លៀងនៅតែបន្តធ្លាក់ប្រមាណមួយសប្ដាហ៍ខាងមុខទៀត នោះដំណាំស្រូវរបស់ប្រជាកសិករនឹងខូចខាតគ្មានសល់ជាពុំខាន។
ជំនន់ទឹកភ្លៀងលិចនៅស្រុកមោងឫស្សី កំពុងប៉ះពាល់ដល់ដំណាំស្រូវ និងហូរចូលផ្ទះសម្បែង រោងម៉ាស៊ីនកិនស្រូវនៅតាមដងផ្លូវជាតិលេខ៥ នៅម្ដុំទីប្រជុំជនស្រុក។
ប្រជាពលរដ្ឋរស់នៅតំបន់ទឹកលិចនោះ សម្ដែងក្ដីកង្វល់ខ្លាចដាច់ស្បៀងឆ្នាំក្រោយ ដោយសារតែទឹកចេះតែឡើងបន្តបន្ទាប់ ពីព្រោះដំណាំស្រូវភាគច្រើនចេញផ្លែ និងខ្លះស្ទើរតែប្រមូលផលបានបណ្ដើរៗទៅហើយ។
ប្រជាពលរដ្ឋម្នាក់ គឺលោក តឹក ក្រូច រស់នៅភូមិមោងឫស្សី ឃុំមោងឫស្សី ថ្លែងនៅថ្ងៃទី៣០ តុលា ថា ដំណាំស្រូវរបស់លោកប្រមាណ ៣ហិកតារ ត្រូវទឹកលិចពាក់កណ្ដាលដើម និងស្រែខ្លះស្ទើរតែលិចអស់ទាំងស្រុងទៅហើយ។ លោកបន្តថា ជំនន់ទឹកភ្លៀងចូលផ្ទះរបស់អ្នកភូមិប្រមាណពីរថ្ងៃមកហើយ បន្ទាប់ពីមានភ្លៀងធ្លាក់ញឹកញាប់ប្រមាណមួយសប្ដាហ៍មកនេះ៖ «មិនចំពោះតែខ្ញុំទេ អាត្រឡាចល្ពៅ រនោង ឃ្លោក វាម៉ាភូមិហ្នឹងហ្មង ចាប់ពីសាលាកាលេសទៅស្ពានស្នោនេះ គ្មានសល់ទេ។ ស្រូវហ្នឹងក៏វា បើថាទឹកថែមមកទៀតហ្នឹង អស់ហើយមិនថាខ្ញុំទេ ប្រជាជននៅតាមចិញ្ចើមថ្នល់ហ្នឹង អត់មានទាំងពូជទៅទៀតកុំថាស្រូវហូប»។
ទាក់ទងនឹងបញ្ហានេះ មេឃុំមោងឫស្សី លោក ស្រី សាម៉ុន មានប្រសាសន៍បញ្ជាក់ថា គិតមកទល់ម៉ោង ៤រសៀលថ្ងៃទី៣០ តុលា ទឹកជំនន់លិចផ្ទះរបស់អ្នកភូមិប្រមាណជាង ២១០ខ្នងក្នុងភូមិចំនួន៤ គឺភូមិរលួស ភូមិប្រឡាយ ភូមិតាតុកពីរ និងភូមិកន្សៃបន្ទាយ ហើយលិចសាលារៀនមួយកន្លែង និងផលដំណាំខូចខាតទាំងស្រុងប្រមាណជាង ១៥ហិកតារ។ លោកបន្តថា ដំណាំស្រូវប្រឈមនឹងការខូចខាតក្នុងរយៈពេលដ៏ខ្លីខាងមុខនេះប្រមាណជាង ៥០០ហិកតារ ប៉ុន្តែពុំមានប្រជាពលរដ្ឋគ្រោះថ្នាក់ដល់អាយុជីវិតនោះទេ៖ «អឺ! ស្រូវយើងដែលលិចទើបតែ ១០ហិកតារទេ ក្រៅពីហ្នឹងចុងវាអត់ទាន់ដល់ហេតុការណ៍ហ្នឹង វាគិតតែអាលិចសុទ្ធ។ សាលារៀនយើងលិចអនុវិទ្យាល័យសាលាមួយកន្លែង អាហ្នឹងវាហូរចូលក្នុងសាលាហ្មង ហើយដោយឡែករោងម៉ាស៊ីនចំនួន ២រោងម៉ាស៊ីន រួចត្រឹមចង្កេះចុះក្រោម មានកន្លែងខ្លះត្រឹមចង្កេះ កន្លែងខ្លះត្រឹមជង្គង់លើជង្គង់»។
លោកបន្ថែមទៀតថា សំទុះជំនន់ទឹកភ្លៀងនៅតែហក់ឡើងនៅឡើយ ហើយប្រសិនបើភ្លៀងចេះតែបន្តមិនឈប់ទេនោះ ផលដំណាំរបស់ប្រជាពលរដ្ឋនៅឃុំមោងឫស្សី អាចនឹងខូចខាតច្រើនថែមទៀតក្នុងពេលខាងមុខ។
ប្រជាពលរដ្ឋឲ្យដឹងថា កន្លងមកអ្នកភូមិនៅតំបន់នោះមិនធ្លាប់មានជំនន់ទឹកភ្លៀងលិចផលដំណាំនៅក្នុងរដូវនេះឡើយ ហើយហេតុដែលមានទឹកជំនន់នេះ ដោយសារអាជ្ញាធរសាងសង់ប្រពន្ធប្រឡាយទឹកមួយខ្សែនៅតំបន់ឃុំមោងឫស្សី ដែលប្រឡាយទឹកនោះមានតាមមាត់ប្រឡាយទំនប់ខ្ពស់ ធ្វើឲ្យទឹកមិនអាចហូរឆ្លងកាត់ទៅខាងក្រៅបានដូចសព្វដង ទើបបណ្ដាលឲ្យផលដំណាំ និងផ្ទះសម្បែងរបស់ប្រជាពលរដ្ឋលិចលង់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។