ពលរដ្ឋ​ក្រុមហ៊ុន​ដឹក​រ៉ែ​របស់​កូន​លោក ទ្រី ភាព ធ្វើ​ឲ្យ​ខូច​ផ្លូវ​ពិបាក​ធ្វើ​ដំណើរ និង​បង្ក​គ្រោះ​ថ្នាក់​ដល់​សិស្ស​សាលា

0:00 / 0:00

ប្រជា​ពលរដ្ឋ​មួយ​ចំនួន​រស់​នៅ​ស្រុក​រវៀង ខេត្ត​ព្រះវិហារ រិះគន់​ក្រុម​ហ៊ុន​កូន​ប្រុស​របស់​លោក​ឧកញ៉ា​ ទ្រី ភាព គឺ​លោក ទ្រី ដាលុច ថា​កំពុង​បំផ្លាញ​ផ្លូវ​ជាតិ​មួយ​ខ្សែ​បង្ក​ឲ្យ​មាន​ភាព​លំបាក​ដល់​ពលរដ្ឋ​ធ្វើ​ដំណើរ និង​បង្ក​គ្រោះ​ថ្នាក់​ដល់​សិស្សានុសិស្ស​ពេល​ចេញ​ពី​សាលា។

ពលរដ្ឋ​រស់​នៅ​តាម​បណ្ដោយ​ផ្លូវ​ជាតិ(213) នៃ​ស្រុក​រវៀង​ត្អូញត្អែរ​ពី​ការ​ពិបាក​​ធ្វើ​ដំណើរ​ ក្រោយ​ពី​រថយន្ត​ធន់​ធំ​ដឹក​រ៉ែដែក របស់​ក្រុមហ៊ុនគ្លូប៊ល ហ្គ្រីន​(ខេមបូឌា) អេនើជី​ឌីវេឡុបមេន(GLOBAL GREEN (CAMBODIA)​ ENERGY DEVELOPMENT CO., LTD ដែល​ជា​របស់​កូន​ប្រុស​លោក ទ្រី ភាព ធ្វើ​ឲ្យ​ផ្លូវ​ជាតិ​មួយ​ក្នុង​ស្រុក​រវៀង​ខូច​ខាត​ស្ទើរ​ទាំង​ស្រុង មិន​តែ​ប៉ុណ្ណោះ​រថយន្ត​ទាំង​អស់​នោះ​បាន​បង្ក​គ្រោះថ្នាក់​ដល់​សិស្ស​សាលា​នូវ​ពេល​ដែល​ចេញ​ពី​សាលា។ អ្នក​ភូមិ​អះអាង​ថា អាជ្ញាធរ​នៅ​តំបន់​នោះ​ហាក់​មិន​ខ្វាយខ្វល់​ជួយ​ដោះ​ស្រាយ​បញ្ហា​នេះ​ជូន​ដល់​ពលរដ្ឋ​ឡើយ។

ម្ចាស់តូប​លក់​អាហារ​មួយ​កន្លែង​ស្ថិត​នៅ​ឃុំ​រីករាយ សុំ​មិន​បញ្ចេញ​ឈ្មោះ​ប្រាប់​វិទ្យុ​អាស៊ីសេរី​ថ្ងៃ​ទី​១០​កញ្ញា ថា រថយន្ត​ធន់​ធំ​ជា​ច្រើន​គ្រឿង​ធ្វើ​ការ​ដឹក​ជញ្ជូន​រ៉ែ​ដែក​ចេញ​ពី​ចំណុច​កោះ​កែវ​ទាំង​យប់​ទាំង​ថ្ងៃ​ដែល​ដឹក​សំដៅ ទៅ​ទី​រួម​ខេត្ត​កំពង់ធំ បាន​ធ្វើ​ឲ្យ​ពលរដ្ឋ​នៅ​ទី​នោះ​មាន​ការ​ព្រួយ​បារម្ភ​ខ្លាច​​គ្រោះថ្នាក់​ដល់​​កូន​ៗ​របស់​ពួក​គេ​នៅ​ពេល​ទៅ​សាលា​ដោយ​រថយន្ត​ទាំង​នោះ​បើកបរ​គ្មាន​ការ​ប្រុងប្រយ័ត្ន។

ពលរដ្ឋ​រស់​នៅ​ឃុំ​រីករាយ​ដែរ គឺ​លោក​ស្រី​ ចាយ ម៉េង ថ្លែង​ថា លោក​ស្រី​​ព្រួយ​បារម្ភ​ខ្លាច​កូន​មាន​គ្រោះថ្នាក់​​ពេល​កូន​ធ្វើ​ដំណើរ​ទៅ​សាលា​រៀន​ម្ដងៗ ដោយសារ​ផ្លូវ​លំបាក​ខ្លាំង។ លោក​ស្រី​បន្ថែម​ថា​ពេល​ខ្លះ​រថយន្ត​ទាំង​នោះ​បាន​បើក​បរ​ល្បឿន​លៀន​ធ្វើ​ឲ្យ​ខ្ទាត​ភក់​ប្រឡាក់​ពេញ​ខ្លួន​ក៏​មាន។

លោក​ស្រី​ ចាយ ម៉េង៖ «ខ្លាច​តើ ​ខ្លាច​កូន​ទៅ​រៀន​បារម្ភ​ពី​កូន ​កូន​ជិះ​ម៉ូតូ​ទៅ​រៀន​រាល់​ថ្ងៃ​តែ​មិន​ដឹង​ធ្វើ​យ៉ាង​ម៉េច​ផ្លូវ​ត្រូវ​បើកបរ ​និយាយ​ពី​បារម្ភ​បារម្ភ​ណាស់​ហើយ​ បើ​ផ្លូវ​វា​រអិល​វា​រអិល​យ៉ាង​នេះ ជិះ​ម៉ូតូ​អត់​ស្រួល​ផង ចង់​ឲ្យ​ជួយ​ផ្សាយ​ចង់​បាន​ផ្លូវ​ល្អ​ដូច​ពី​មុន»។

ជុំ​វិញ​រឿង​នេះ វិទ្យុ​អាស៊ីសេរី មិន​អាច​ទាក់ទង​អ្នកនាំពាក្យ​សាលា​ខេត្ត​ព្រះវិហារ លោកយង់ គឹមហឿងនិង​ប្រធាន​មន្ទីរ​រ៉ែ និង​ថាមពល​ខេត្ត​ព្រះ​វិហារ​លោក ស៊ុន ច័ន្ទរក្សាដើម្បី​សុំ​ការ​បក​ស្រាយ​បាន​ទេ​ នៅ​ថ្ងៃ​ទី​១០ ខែ​កញ្ញា​នេះ។ចំណែ​អគ្គនាយក​រង​ក្រុមហ៊ុន​លោកឃៀង សុជីវ័ន្តនិង​អភិបាល​រង​ស្រុក​រវៀង​លោកទេស សំអាងក៏​មិន​អាច​ទាក់ទង​បាន​ដែរ។

បច្ចុប្បន្ន​ក្រុមហ៊ុនគ្លូប៊លហ្គ្រីន (ខេមបូឌា)អេនើជី ឌីវេឡុបមេន (GLOBAL GREEN (CAMBODIA)​ ENERGY DEVELOPMENT CO., LTD​ កំពុង​ធ្វើ​អាជីវកម្ម​រ៉ែដែក​​​នៅ​ឃុំ​រីករាយ​​ស្រុក​រវៀង​ ខេត្ត​ព្រះវិហារ និង​បាន​ដឹក​ជញ្ជូន​រ៉ែ​ដែក​ទាំង​នោះ លក់​ទៅ​ប្រទេស​វៀតណាមតាម​ច្រក​អន្តរ​ជាតិ​​ក្អមសំណរ​ ខេត្ត​កណ្ដាល​ដោយ​ដឹក​ជញ្ជូន​ពី​ខេត្ត​ព្រះវិហារ​មក​ដាក់​សាឡង់​នៅ​ស្រុក​កំពង់លែង​ខេត្ត​កំពង់ឆ្នាំង។

ទាក់ទង​នឹង​បញ្ហា​នេះ​សកម្មជន​​ចលនា​មាតា​ធម្មជាតិ ​លោកលី ចាន់ដារ៉ាវុត សង្កេត​ឃើញ​ថា រាល់​ក្រុមហ៊ុន​ឯកជន​ធ្វើ​អាជីវកម្ម​រ៉ែ​នៅ​ខេត្ត​ព្រះវិហារ មិន​ឃើញ​មាន​តម្លាភាព​ត្រឹមត្រូវ​នោះ​ទេ មួយ​វិញ​ទៀត​ក្រុមហ៊ុន​ទាំង​នោះ​មិន​បាន​បង្ហាញ​ពី​ការ​សិក្សា​អំពី​ផល​ប៉ះ​ពាល់​ នឹង​ការ​វាយ​តម្លៃ​ផល​ប៉ះពាល់​ជា​សាធារណៈដើម្បី​ឲ្យ​ប្រជា​ពលរដ្ឋ​បាន​ដឹង​នោះ​ទេ។ លោក​បន្ថែម​ថា ប្រសិន​បើ​ក្រុម​ហ៊ុន​ទាំង​នោះ​ធ្វើ​អាជីវកម្ម​ធ្វើ​ឲ្យ​ប៉ះពាល់​ដល់​ជីវភាព និង​ការ​រស់​នៅ និង​សម្បត្តិ​សាធារណៈ​រដ្ឋ​គួរ​តែ​បញ្ឈប់​ក្រុមហ៊ុន​ទាំងអស់​នោះ។

លោកលី ចាន់ដារ៉ាវុត៖ «នេះ​វា​កើត​ចេញ​ពី​មិន​តម្លាភាព​របស់​រដ្ឋ​យើង ក្នុង​ការ​គ្រប់គ្រង​ធនធាន​ធម្មជាតិ​ វា​ធ្វើ​ឲ្យ​ប៉ះ​ពាល់​សេដ្ឋកិច្ច​សង្គម បរិស្ថាន និង​ប្រជា​ពលរដ្ឋ​នៅ​មូលដ្ឋាន ក្រុម​ហ៊ុន​ហ្នឹង​គឺ​មាន​កាតព្វកិច្ច​ក្នុង​ការ​បញ្ចៀស​ផល​ប៉ះពាល់​ទាំង​អស់​ហ្នឹង មាន​ន័យ​ថា​ក្រុមហ៊ុន​មិន​ធ្វើ​ឲ្យ​ខូច​ផ្លូវ​ប្រជា​ពលរដ្ឋ​ជា​ផ្លូវ​រដ្ឋ ដែល​ប្រជា​ពលរដ្ឋ​ប្រើប្រាស់​ប្រចាំ​ថ្ងៃ មិន​ធ្វើ​ឲ្យ​ខូច​បរិស្ថាន​ដែល​ពួក​គេ​រស់​នៅ ហើយ​ក៏​មិន​ធ្វើ​ឲ្យ​ប៉ះ​ពាល់​សេដ្ឋកិច្ច​ដែរ»។

កាល​ឆ្នាំ​២០២២ ក្រុម​ហ៊ុន​គ្លូប៊ល​ហ្គ្រីន​(ខេមបូឌា)​អេនើជី​ ឌីវេឡុបមេន​ ​ធ្លាប់​បរិច្ចាគ​ប្រាក់​ ១០​លាន​រៀល​​ចូលរួម​ជា​មួយ​កាកបាទ​ក្រហម​កម្ពុជា។ ឧកញ៉ា ទ្រី ដាលុច មិន​មែន​តែ​ជា​អ្នក​គ្រប់គ្រង​ក្រុមហ៊ុន​គ្លូប៊ល​ហ្គ្រីន​​(ខេមបូឌា) អេនើជីឌីវេឡុបមេន​នោះ​ទេ លោក​ក៏​ជា​អគ្គនាយករង​ក្រុមហ៊ុន ទ្រី ភាព គ្រុប​ផង​ដែរ។ លោក ទ្រី ដាលុច ត្រូវ​បាន​អតីត​នាយករដ្ឋមន្ត្រី ហ៊ុន សែន ទូល​ថ្វាយ​ទៅ​ព្រះមហាក្សត្រ​ឲ្យ​ផ្ដល់​គោរមងារ «ឧកញ៉ា» នៅ​ឆ្នាំ​២០១៣។ ក្រៅ​ពី​ទទួល​បាន​គោរមងារ​ ​«ឧកញ៉ា»​ ​ហើយ​នោះ លោកទ្រី ដាលុច ក៏​ជា​អនុប្រធាន​យុវជន​ស្រុក​កណ្ដាលស្ទឹង និង​ជា​អនុប្រធាន​ក្រុម​ការងារ​ថ្នាក់​ជាតិ​ចុះ​ជួយ​ឃុំ​ត្បែង ស្រុក​កណ្ដាលស្ទឹង ខេត្ត​កណ្ដាល នៃ​គណបក្ស​ប្រជា​ជន​កម្ពុជា​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។