ប្រជាពលរដ្ឋរស់នៅស្រុកមេមត់អះអាងថា ក្រុមហ៊ុនទាញយករ៉ែមាសបរទេសមួយចំនួន នៅតែបន្តសកម្មភាពទាញយករ៉ែមាសដោយខុសច្បាប់នៅឃុំជាំតាម៉ៅ។ ការលើកឡើងនេះ ក្រោយពីក្រសួងរ៉ែ និងថាមពលប្រកាសថា ក្រសួងបានរកឃើញទីតាំងទាញយករ៉ែមាស ៣កន្លែងទៀត កាលពីថ្ងៃទី១៦ ខែមករា។ មន្ត្រីសង្គមស៊ីវិលលើកឡើងថា ដើម្បីទប់ស្កាត់ការទាញយករ៉ែមាសដោយខុសច្បាប់ឱ្យមានប្រសិទ្ធភាព រដ្ឋាភិបាលគួរតែមានចំណាត់ការផ្លូវច្បាប់ឱ្យបានតឹងរ៉ឹងទៅលើឈ្មួញទុច្ចរិត និងអាជ្ញាធរពាក់ព័ន្ធ។
ប្រជាពលរដ្ឋរស់នៅស្រុកមេមត់ ខេត្តត្បូងឃ្មុំ លើកឡើងដូចៗគ្នាថា បើទោះបីជាក្រសួងរ៉ែ និងថាមពល ធ្វើយុទ្ធនាការលុបបំបាត់អាជីវកម្មរ៉ែមាសខុសច្បាប់ នៅតំបន់សំពៅលូន ឃុំជាំតាម៉ៅ កាលពីថ្ងៃទី១០ មករា ក្ដី ក៏ក្រុមហ៊ុនទាញយករ៉ែមាសទាំងនោះ នៅតែបន្តសកម្មភាពយ៉ាងអនាធិបតេយ្យ។
ពលរដ្ឋម្នាក់រស់នៅស្រុកមេមត់ ខេត្តត្បូងឃ្មុំ គឺលោក ឆៃ វ៉ិត ប្រាប់វិទ្យុអាស៊ីសេរីនៅថ្ងៃទី១៨ មករា ថា ក្រុមហ៊ុនទាញយក រ៉ែមាសដែលថៅកែភាគច្រើនគឺជាជនជាតិចិន និងវៀតណាម នៅតែបន្តសកម្មភាពទាញយករ៉ែមាស នៅតំបន់សំពៅលូន។
លោក ឆៃ វ៉ិត៖ «ការឈូសឆាយយករ៉ែមាស វាមិនមែនទើបតែកើតមានឡើងឥឡូវៗនេះទេ គ្រាន់តែថា វាមានភាពស្ងប់ស្ងាត់ អានេះគេថាលួច លួចសហការបែប ខ្មោចស្រុកវាបើកដៃ ទើបខ្មោចព្រៃលុកលុយៗ ហើយពលរដ្ឋគាត់មិនហ៊ាន ពលរដ្ឋខ្លះមិនហ៊ាននិយាយ មិនហ៊ានសរសេរបង្ហោះតាមហ្វេសប៊ុក គេខ្លាចអាជ្ញាធរភូមិឃុំ គេគំរាមគេបន្លាច អ៊ីចឹងបានជាម្នាក់ៗចេះតែសំងំទៅ»។
ដូចគ្នាទៅនឹងការលើកឡើងនេះដែរ ប្រជាពលរដ្ឋម្នាក់ទៀតរស់នៅស្រុកមេមត់ ប្រាប់វិទ្យុអាស៊ីសេរីក្នុងលក្ខខណ្ឌសុំមិនបញ្ចេញឈ្មោះ និងសំឡេង ដោយបារម្ភពីសុវត្ថិភាពថា ក្រុមហ៊ុនចិន និងវៀតណាម នៅតែបន្តទាញយករ៉ែមាសនៅក្នុងឃុំជាំតាម៉ៅ។ លោកស្រីអះអាងដូច្នេះដោយសារតែ លោកស្រីឃើញមានជនជាតិចិន និងជនជាតិវៀតណាមជាច្រើន នៅតែដើរទិញទំនិញ ម្ហូបអាហារដឹកចូលទៅក្នុងតំបន់សំពៅលូន។
ក្រសួងរ៉ែ និងថាមពល បានចេញសេចក្ដីប្រកាសព័ត៌មានមួយកាលពីថ្ងៃទី១៧ ខែមករា អំពីការទប់ស្កាត់សកម្មភាពអាជីវកម្មរ៉ែមាស អនាធិបតេយ្យនៅតំបន់ភ្នំសំពៅលូន ស្រុកមេមត់ ខេត្តត្បូងឃ្មុំ។ ទោះជាយ៉ាងណា នៅក្នុងសេចក្ដីប្រកាសព័ត៌មាននេះបញ្ជាក់ថា ក្រសួងមិនមានវិធានការច្បាប់ទៅលើម្ចាស់ទីតាំងទាញយករ៉ែមាសទាំងនោះឡើយ ដោយគ្រាន់តែឱ្យធ្វើកិច្ចសន្យាបញ្ឈប់ការទាញយករ៉ែមាសតែប៉ុណ្ណោះ។
ប្រជាពលរដ្ឋនៅស្រុកមេមត់លើកឡើងថា ប្រជាពលរដ្ឋខ្មែរបានប្រកបរបររែងរ៉ែមាស តាំងពីអំឡុងឆ្នាំ១៩៩០ មកម្ល៉េះ លុះមកដល់ឆ្នាំ២០១៧ ទើបមានក្រុមហ៊ុនដែលមានម្ចាស់ជាជនជាតិចិន និងវៀតណាម ប្រើប្រាស់គ្រឿងចក្រធំៗ សារជាតិគីមី និងជីករូងចូលក្រោមដី ដើម្បីទាញយករ៉ែមាស នៅតំបន់ភ្នំសំពៅលូន។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងរ៉ែ និងថាមពល លោក អ៊ឹង ឌីប៉ូឡា ដើម្បីសុំការបកស្រាយបន្ថែមជុំវិញរឿងនេះបាននៅឡើយទេនៅថ្ងៃទី១៨ ខែមករា។
ជុំវិញរឿងនេះដែរ នាយកវិទ្យាស្ថានតស៊ូមតិ និងគោលនយោបាយ ( API ) លោក ឡាំ សុជាតិ មានប្រសាសន៍ថា សកម្មភាពទាញយករ៉ែមាសដោយខុសច្បាប់មិនត្រឹមតែធ្វើឱ្យរដ្ឋាភិបាលមិនអាចទទួលបានប្រាក់ចំណូលតែប៉ុណ្ណោះទេ តែថែមទាំង បណ្ដាលឱ្យប៉ះពាល់ដល់បរិស្ថាន និងសង្គមទៀតផង។ លោកបន្តថា ដើម្បីទប់ស្កាត់ការទាញយករ៉ែមាសដោយខុសច្បាប់ឱ្យមានប្រសិទ្ធភាព អាជ្ញាធរមានសមត្ថកិច្ចគួរចាត់វិធានការផ្លូវច្បាប់ឱ្យបានតឹងរ៉ឹងទៅលើឈ្មួញទុច្ចរិត និងអាជ្ញាធរពាក់ព័ន្ធ ជាជាងគ្រាន់តែចុះណែនាំឱ្យបញ្ឈប់សកម្មភាពទាញយករ៉ែតែប៉ុណ្ណោះ។
លោក ឡាំ សុជាតិ៖ «អ៊ីចឹងបើសិនជាគាត់ជាជនជាតិបរទេសទៀតមករុករករ៉ែ របស់ខ្មែរនៅក្នុងប្រទេសខ្មែរហើយអត់មានអាជ្ញាប័ណ្ណទៀត អាហ្នឹងវាខុសច្បាប់ហើយខុសទៀត អ៊ីចឹងវាគួរតែត្រូវបានអនុវត្តតឹងរ៉ឹង ទាំងមន្ត្រីដែលគប់គិត ទាំងមន្ត្រីដែលនៅពីក្រោយអនាធិបតេយ្យ ត្រូវតែមានការអនុវត្តតាមច្បាប់ហើយ»។
ប្រជាពលរដ្ឋរស់នៅស្រុកមេមត់អះអាងថា ម្ចាស់អាជីវកម្មទាញយករ៉ែមាសភាគច្រើន តែងមានអ្នកមានអំណាច និងអាជ្ញាធរមូលដ្ឋានកាងឱ្យធ្វើអាជីវកម្ម ដូច្នេះពួកគេស្នើឱ្យអាជ្ញាធរពាក់ព័ន្ធ គួរចាប់ក្រុមឈ្មួញទុច្ចរិត និងមន្ត្រីពាក់ព័ន្ធមកប្រឈមនឹងផ្លូវច្បាប់ ជាជាងគ្រាន់តែចេញលិខិតព្រមាន និងត្រឹមតែធ្វើកិច្ចសន្យាបញ្ឈប់ការទាញយករ៉ែមាស ដែលអាចឱ្យឈ្មួញទុច្ចរិតទាំងនោះ ងាយស្រួលបន្តសកម្មភាពទាញយករ៉ែមាសឡើងវិញ ក្នុងពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។