ពលរដ្ឋដែលរងគ្រោះពីការបាក់ស្រុតផ្ទះចូលទន្លេនៅក្នុងស្រុកស្អាងខឹងសម្បារទៅអាជ្ញាធរ ខណៈពួកគាត់បានលើកឡើងថា ការបាក់ច្រាំងទន្លេ ដោយសារមានការលួចបូមខ្សាច់។ ប៉ុន្តែអាជ្ញាធរបដិសេធថា ពុំមានការអនុញ្ញាតឱ្យបូមខ្សាច់នៅទីតាំងនោះឡើយ ហើយការបាក់ច្រាំងនោះ បណ្ដាលមកពីគ្រោះធម្មជាតិ។
ក្រុមពលរដ្ឋមិននឹកស្មានថា ផ្ទះពួកគាត់ជាច្រើនខ្នង ដែលខ្លះរស់នៅ ២០ ទៅ ៣០ឆ្នាំទៅហើយនោះ បែរជាបាក់ស្រុតតាមច្រាំងទន្លេចូលទៅក្នុងទឹក ទាំងនៅក្នុងរដូវប្រាំងគ្មានទឹកហូរបុកខ្លាំង ដូចនៅក្នុងខែវស្សា។ ក្រុមពលរដ្ឋទាំងនោះ ក៏បង្ហាញការសោកស្ដាយទ្រព្យសម្បត្តិខិតខំរកបានអស់រាប់ឆ្នាំ បែរត្រូវបាត់បង់ត្រឹមមួយពព្រិចភ្នែក។
ពលរដ្ឋម្ចាស់ផ្ទះលក់ទូរស័ព្ទដៃ ដែលបានបាក់ស្រុតចូលទន្លេសុំមិនបញ្ចេញឈ្មោះប្រាប់អាស៊ីសេរីនៅថ្ងៃទី២៥ មេសាថា ការបាក់ច្រាំងទន្លេនេះ ដោយសារមានការលួចបូមខ្សាច់ ជាពិសេស នៅពេលយប់ ដោយគ្មានអាជ្ញាធរទប់ស្កាត់។
លោកថា៖«ដោយសារការបូមខ្សាច់ខ្លាំងពេក អ៊ីចឹងណា៎។ បូមខ្សាច់ហ្នឹង វាបូមតែពេលយប់ទេ។ ផ្ទះថ្មធំៗ សុទ្ធតែមានប្លង់អចិន្ត្រៃយ៍ ៣០-៤០ឆ្នាំហើយ»។
ចំណែកពលរដ្ឋម្នាក់ទៀត ដែលសុំមិនបញ្ចេញឈ្មោះដោយបារម្ភពីសុវត្ថិភាពបានអះអាងថា ផ្ទះបួនល្វែងដែលឪពុករបស់លោកខិតខំស្វែងរកថវិការាប់ឆ្នាំ យកមកសាងសង់ឡើង និងមានប្លង់បញ្ជាក់ត្រឹមត្រូវ បានប្រេះនិងធ្លាក់ចូលទន្លេបណ្ដើរៗ ថ្វីត្បិតនៅទីតាំងនោះ ពុំដែលមានករណីបាក់ច្រាំង ដូចនៅកន្លែងផ្សេងឡើយ។ លោកបន្តថា ផ្ទះទាំងបួនល្វែង ដែលមួយល្វែងមានតម្លៃមិនក្រោម ៣០ម៉ឺនដុល្លារ គឺផ្ទះតតាកទៅខាងក្រោយប្រវែង ១៥ម៉ែត្រ បានបាក់ធ្លាក់ចូលទន្លេទាំងស្រុងរួចហើយ ខណៈផ្ទះធំដែលបានបុកគ្រឹះរឹងមាំប្រវែង ២០ម៉ែត្រ ក៏បានផ្អៀងត្រៀមនឹងបាក់ចូលទន្លេបន្ថែមទៀត។ លោកបញ្ជាក់ទៀតថា ផ្ទះទាំងបួនល្វែងនេះ គឺពីរល្វែងសងខាង មួយល្វែងសម្រាប់បើកពេទ្យធ្មេញនិងមួយល្វែងទៀតសម្រាប់ទុកដាក់រថយន្ត ខណៈពីរល្វែងកណ្ដាលទុកធ្វើជាផ្ទះធំសម្រាប់រស់នៅ និងបើកកន្លែងលក់មាស។
ពលរដ្ឋ៖«ខ្ញុំឮថា អ្នកខ្លះថាមកពីបូមខ្សាច់ អ៊ីចឹង ខ្ញុំអត់ដឹងទេ គ្រាន់តែថា ពីមុនមក អត់មានបញ្ហាអ៊ីចឹងទេ។ គឺផ្ទះខ្ញុំនឹងបុកផ្ដាច់(ពីផ្ទះធំកណ្ដាលទៅផ្នែកតតាកខាងមុខ)ហើយ វានឹងអាចបះហើយ វាទៅ(បាក់)ទៅទាំង ២០ម៉ែត្រតែម្ដង ព្រោះវាជាប់គ្រឹះ។ អ៊ីចឹង!វាហាក់បីដូចជា បាតទន្លេហ្នឹង វារុញដីចូលទប់នឹងបាតទន្លេ។ ដូចបាតទន្លេអត់មានដីអ៊ីចឹងទៅ វាជ្រាលទៅដើម្បីឱ្យស្មើគ្នាអ៊ីចឹង»។
Opens in new windowជុំវិញបញ្ហានេះ ហ្វេសប៊ុករដ្ឋបាលខេត្តកណ្ដាលឱ្យដឹងថា ការបាក់ច្រាំងទន្លេបាសាក់កាលពីថ្ងៃទី២៤ មេសា នៅតាមបណ្ដោយផ្លូវជាតិលេខ ២១អា (A) ស្ថិតនៅទល់ផ្សារស្អាងខាងជើង ក្នុងភូមិត្រពាំងឈូក ឃុំព្រែកគយ ស្រុកស្អាង បានធ្វើឱ្យប៉ះពាល់ផ្ទះ ៤០ខ្នង ស្មើនឹង ២១គ្រួសារ ក្នុងនោះផ្ទះរលំទាំងស្រុងមាន ២ខ្នង ផ្ទះប៉ះពាល់ធ្ងន់ធ្ងរមាន ២៨ខ្នង និងផ្ទះប៉ះពាល់ស្រាលមាន ១០ខ្នង ហើយមិនមានករណីមនុស្សស្លាប់ឬរបួសឡើយ។
រដ្ឋបាលខេត្តបញ្ជាក់ទៀតថា ការបាក់ស្រុតច្រាំងនេះ បណ្ដាលមកពីទឹកទន្លេបានស្រកចុះទើបបណ្ដាលឱ្យមានការទាញដី ហើយទម្ងន់ផ្ទះបានដាក់បន្ទុកទៅលើច្រាំង ដែលជាហេតុធ្វើឱ្យមានការបាក់ស្រុតជាចម្រៀកៗ។
ថ្វីត្បិតមានការបកស្រាយពីរដ្ឋបាលខេត្តបែបនេះក្ដី ប៉ុន្តែពលរដ្ឋជាម្ចាស់ផ្ទះខ្លះ ដែលមានផ្ទះបាក់ចូលទន្លេ បានបង្ហោះហ្វេសប៊ុករិះគន់ថា អាជ្ញាធរគួរតែបើកភ្នែកមើលឱ្យបានច្បាស់ ដោយពួកគាត់បានបង្ហាញពីវីដេអូនៃសាឡង់បូមខ្សាច់ជាច្រើនគ្រឿងស្ថិតនៅលើដងទន្លេ និងបានស្នើឱ្យលោក ហ៊ុន សែន ជួយរកយុត្តិធម៌។
ទាក់ទងនឹងរឿងនេះ ប្រធានមន្ទីររ៉ែ និងថាមពលខេត្តកណ្ដាលលោក ជា សារិទ្ធ ប្រាប់វិទ្យុអាស៊ីសេរីថា ក្រសួងនិងរដ្ឋបាលខេត្តកណ្ដាល ពុំបានចេញអាជ្ញាប័ណ្ណណាអនុញ្ញាតឱ្យមានការបូមខ្សាច់នៅទីតាំងបាក់ច្រាំងទន្លេនោះឡើយ ហើយក៏មិនមានការលួចបូមខ្សាច់ដូចពលរដ្ឋបានលើកឡើងនោះដែរ។ លោកបន្តថា មានតែទូកដឹកខ្សាច់បើកឆ្លងកាត់នៅទីនោះប៉ុណ្ណោះ ហើយការបាក់ច្រាំងនេះ ដោយសារដីនៅទីនោះទន់មិនទ្រទម្ងន់ផ្ទះថ្មបាន។
លោក ជា សារិទ្ធ៖«ដីនៅតំបន់ហ្នឹង គឺជាដីល្បាយ គឺជាដីល្បាប់ គឺជាដីប្រភេទគេហៅថា ដីទន់។ អ៊ីចឹង!សំណង់របស់គាត់ វាមានលក្ខណៈធ្ងន់ ផ្ទះល្វែងមួយៗ សុទ្ធតែពីរជាន់បីជាន់។ អ៊ីចឹង អាដីហ្នឹង វាមិនអាចទ្រនូវទម្ងន់ផ្ទះពួកគាត់បានទេ វាអាចបង្កលក្ខណៈឱ្យបាក់ អាហ្នឹង ក៏ជាហេតុផលមួយដែរ»។
ទោះជាយ៉ាងណាក៏ដោយ សកម្មជនបរិស្ថានលោក សាន់ ម៉ាឡា លើកឡើងថា អាជ្ញាធរតែងបដិសេធមិនទទួលស្គាល់ការពិត និងតែងបន្ទោសទៅលើគ្រោះធម្មជាតិ ជាជាងការបន្ទោសទៅលើសកម្មភាពបូមខ្សាច់។ លោកបន្តថា ខ្សាច់ជាធនធានកកើតឡើងវិញ ប៉ុន្តែការបូមខ្សាច់ចេញពីទន្លេច្រើនហួសហេតុ ដោយគ្មាននិរន្តភាព និងគ្មានការបើកទូលាយព័ត៌មានច្បាស់លាស់ ប្រាកដណាស់នឹងធ្វើឱ្យប៉ះពាល់ពលរដ្ឋរស់នៅតាមដងទន្លេ។
លោក សាន់ ម៉ាឡា៖«នៅពេលបាតទន្លេកាន់តែជ្រៅទៅៗ ហើយលែងមានស្រទាប់ខ្សាច់ដើម្បីការពារ ចង់មិនចង់ វាប្រាកដជាធ្វើឱ្យកម្លាំងទឹកបុកទៅ ធ្វើឱ្យប៉ះពាល់ទៅដល់ច្រាំងហើយ។ អ៊ីចឹង!អាជ្ញាធរមិនគួរបដិសេធដោយមិនមានការស៊ើបអង្កេតឬក៏បកស្រាយតាមលក្ខណៈវិទ្យាសាស្ត្រឱ្យប្រជាពលរដ្ឋគាត់អស់ចិត្ត។ ដោយគ្រាន់តែបដិសេធដើម្បីដោះសាយករួចខ្លួន»។
ផ្ទះដែលបានរងផលប៉ះពាល់ពីការបាក់ច្រាំងទន្លេ សុទ្ធសឹងតែជាផ្ទះថ្មធំៗ មានកម្ពស់ពី ២ជាន់ ទៅ ៣ជាន់ បើកលក់ដូរសម្ភារៈផ្សេងៗ ដូចជា លក់ទូរស័ព្ទដៃ លក់កង់ លក់គ្រឿងសំណង់ លក់គ្រឿងអលង្ការ និងកន្លែងដូរលុយជាដើម។ រដ្ឋបាលខេត្តកណ្ដាលប្រកាសឱ្យពលរដ្ឋរុះរើសម្ភារៈ និងទ្រព្យសម្បត្តិមិនទាន់បាត់បង់ និងត្រូវចាកចេញពីលំនៅឋាន ដែលមិនមានសុវត្ថិភាព ព្រោះអាចនឹងមានការបាក់ស្រុតបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។