៦​នាក់​ស្លាប់​ដោយ​គ្រោះ​ទឹក​ជំនន់​នៅ​ខេត្ត​ភាគ​ពាយ័ព្យ

ជំនន់​ទឹក​ភ្លៀង​នៅ​ខេត្ត​ភាគ​ពាយ័ព្យ បាន​បណ្ដាល​ឲ្យ​មនុស្ស​ស្លាប់​ចំនួន ៦​នាក់។ ក្នុង​នោះ​នៅ​ខេត្ត​បាត់ដំបង ៥​នាក់ និង​នៅ​ខេត្ត​បន្ទាយមានជ័យ ម្នាក់។ រីឯ​នៅ​ខេត្ត​ប៉ៃលិន ពុំ​មាន​មនុស្ស​រង​គ្រោះ​ស្លាប់​ទេ ប៉ុន្តែ​អ្នក​ភូមិ​ដែល​ស្ថិត​នៅ​ផ្នែក​ខាង​ក្រោម​នៃ​តំបន់​ជួរ​ភ្នំ ក្នុង​ស្រុក​សាលាក្រៅ នោះ កំពុង​ស្ថិត​នៅ​ក្នុង​ស្ថានភាព​សង្គ្រោះ​ជា​បន្ទាន់ ដោយសារ​តែ​ទឹក​ហូរ​ចាក់​ពី​តំបន់​ភ្នំ​យ៉ាង​ខ្លាំង។
ដោយ សួន សុផលមុន្នី
2013-10-07
Share
ទឹក​ជំនន់ បាត់ដំបង ៦១០ ស្ថានភាព​ទឹក​ជន់​លិច​លើ​កំណាត់​ផ្លូវ​ជាតិ​លេខ​៥ ស្ថិត​នៅ​ក្នុង​សង្កាត់​រតនៈ ក្រុង​បាត់ដំបង ខេត្ត​បាត់ដំបង នៅ​ថ្ងៃ​ទី៧ ខែ​តុលា ឆ្នាំ​២០១៣។
RFA

របាយការណ៍​បឋម​របស់​អាជ្ញាធរ​ខេត្ត​បាត់ដំបង និង​ខេត្ត​បន្ទាយមានជ័យ ឲ្យ​ដឹង​ថា គិត​ពី​ថ្ងៃ​ទី​៥ រហូត​មក​ដល់​ថ្ងៃ​ទី​៧ ខែ​តុលា នេះ ជំនន់​ទឹក​ភ្លៀង​បាន​បណ្ដាល​ឲ្យ​មនុស្ស​ស្លាប់ និង​លិចលង់​លំនៅឋាន​ប្រជាពលរដ្ឋ​ជាច្រើន។ ជំនន់​នេះ ស្ថិត​នៅ​ក្នុង​ស្ថានភាព​ធ្ងន់ធ្ងរ​នៅ​ឡើយ។ ចំណែក​នៅ​ឯ​ខេត្ត​ប៉ៃលិន វិញ ថ្វី​ត្បិត​ពុំ​មាន​មនុស្ស​ស្លាប់ ប៉ុន្តែ​កម្លាំង​ទឹក​ដែល​ហូរ​ចេញ​ពី​តំបន់​ភ្នំ កំពុង​បំផ្លាញ និង​លិច​លំនៅឋាន​អ្នក​ភូមិ​អស់​រាប់​រយ​ខ្នង​មិន​អាច​ឲ្យ​ពួក​គាត់​ស្នាក់​នៅ​បាន។

ថ្លែង​ប្រាប់​វិទ្យុ​អាស៊ីសេរី នៅ​ថ្ងៃ​ទី​៧ ខែ​តុលា អភិបាល​ខេត្ត​បាត់ដំបង លោក ប្រាជ្ញ ចន្ទ បញ្ជាក់​ថា រហូត​មក​ពេល​នេះ ជំនន់​ទឹក​ភ្លៀង​បាន​ជន់​លិច​គ្រប់​ស្រុក​ក្រុង​ទាំងអស់​ក្នុង​ខេត្ត​បាត់ដំបង។ ក្នុង​នោះ បណ្ដា​ស្រុក​ដែល​កំពុង​រង​គ្រោះ​ធ្ងន់ធ្ងរ​ជាង​គេ​មាន​នៅ​ស្រុក​កំរៀង ស្រុក​សំពៅលូន និង​ស្រុក​បវេល ហើយ​ទឹក​ជំនន់​នេះ​បាន​សម្លាប់​មនុស្ស​អស់​ចំនួន ៥​នាក់៖ «កំពុង​ប្រមូល​ផ្ដុំ​ដោះស្រាយ​បញ្ហា​ធំៗ​ចំពោះ​មុខ​សិន មក​ដល់​ម្សិលមិញ​ដូច​ច្បាស់​លាស់​ស្លាប់​មោងឬស្សី ១​នាក់ សង្កែ ១​នាក់ ថ្មគោល ពីរ​នាក់ និង​កំរៀង ១​នាក់ នេះ​ជា​របាយការណ៍​បណ្ដោះ​អាសន្ន»

នៅ​ក្រុង​បាត់ដំបង ជំនន់​ទឹក​ភ្លៀង​បាន​ជន់​លិច​លំនៅឋាន លិច​ផ្សារ លិច​អគារ​សាលា​រៀន អគារ​ធ្វើ​ការ​របស់​រដ្ឋបាល​មូលដ្ឋាន រួម​ទាំង​សំណង់​អគារ​ផ្សេង​ជា​ច្រើន​ទៀត។ ជំនន់​ទឹក​ភ្លៀង​នេះ កំពុង​ហូរ​កាត់​លើ​កំណាត់​ផ្លូវ​ជាតិ​លេខ​៥។ លោក​អភិបាល​ខេត្ត​បញ្ជាក់​ថា ក្រុម​អាជ្ញាធរ​កំពុង​ចាត់​វិធាន​ការ​កាយ​ប្រឡាយ ដើម្បី​រំដោះ​ទឹក​ចេញ​ពី​ក្រុង​បាត់ដំបង និង​ជួយ​សង្គ្រោះ​ប្រជាពលរដ្ឋ​នៅ​តាម​ស្រុក​មួយ​ចំនួន ទៅ​កាន់​ទី​ទួល​សុវត្ថិភាព។

ចំណែក​នៅ​ខេត្ត​បន្ទាយមានជ័យ វិញ ជំនន់​ទឹក​ភ្លៀង​បាន​សម្លាប់​មនុស្ស​ម្នាក់ នៅ​ពេល​ជន​រង​គ្រោះ​បាន​ចុះ​រាយ​មង។

អភិបាល​ខេត្ត​បន្ទាយមានជ័យ លោក ទ្រី ណារិន បញ្ជាក់​ថា កម្ពស់​ទឹក​ជំនន់​នៅ​ខេត្ត​បន្ទាយមានជ័យ នៅ​តែ​កើន​ឡើង​ដដែល ក្រុម​អាជ្ញាធរ​មូលដ្ឋាន​កំពុង​ចុះ​ជួយ​សង្គ្រោះ​ប្រជាពលរដ្ឋ ទៅ​កាន់​ទី​ទួល​សុវត្ថិភាព៖ «ឥឡូវ កំពុង​ចាត់​ចែង​ហើយ​ណាស់ បន្តបន្ទាប់​បងប្អូន​ទាំងអស់​ដែល​ឡើង​ទី​ទួល​សុវត្ថិភាព​ហ្នឹង បាន​ទទួល​អស់​ហើយ។ ជំហាន​ទី​២ អ្នក​ណា​ទើប​ឡើង យើង​ដោះស្រាយ​ចំពោះ​មុខ​ឲ្យ​គាត់​សិន តិចតួច​មាន​មី​មាន​អី​ទៅ​សិន ឲ្យ​មួយ​គាត់​មួយ​ថ្ងៃ​នេះ»

នៅ​ខេត្ត​ប៉ៃលិន វិញ ជំនន់​ទឹក​ភ្លៀង​កំពុង​ហូរ​ចាក់​យ៉ាង​ខ្លាំង​ពី​តំបន់​ភ្នំ ជន់​លិច​ភូមិ​ឋាន​របស់​អ្នក​ស្រុក​នៅ​ក្នុង​ស្រុក​សាលាក្រៅ ខេត្ត​ប៉ៃលិន។ ផ្លូវ​ថ្នល់ សាលា​រៀន លំនៅឋាន​អ្នក​ភូមិ​រាប់​រយ​ខ្នង កំពុង​ជន់​លិច​មិន​អាច​ធ្វើ​ដំណើរ​ចេញ​បាន។

លោក អ៊ី ឈាន អភិបាល​ខេត្ត​ប៉ៃលិន បញ្ជាក់​ថា លោក​បាន​ចុះ​ធ្វើ​សកម្មភាព​ផ្ទាល់​នៅ​ក្នុង​ទឹក ដើម្បី​ជួយ​សង្គ្រោះ​អ្នក​ស្រុក​ចេញ​ពី​លំនៅឋាន​តាម​ភូមិ​ឃុំ​នានា​ទូទាំង​ស្រុក​សាលាក្រៅ។ លោក​បន្ត​ថា ក្នុង​រយៈពេល​ជាង ៣០​ឆ្នាំ ខេត្ត​ប៉ៃលិន ពុំ​ដែល​ជួប​ប្រទះ​ទឹក​ជំនន់​ដូច​ឆ្នាំ​នេះ​ទេ។ បច្ចុប្បន្ន បញ្ហា​ចំពោះ​មុខ អាជ្ញាធរ​ខេត្ត​បាន​ទិញ​កាណូត​ចំនួន ៥​គ្រឿង និង​បណ្ដាក់​គ្នា​ជួយ​សង្គ្រោះ​ប្រជាពលរដ្ឋ​ដែល​ជាប់​គាំង​នៅ​ក្នុង​លំនៅឋាន ចេញ​ទៅ​កាន់​ទី​ទួល​សុវត្ថិភាព​ជា​មុន​សិន៖ «ខ្ញុំ​ផ្ទាល់ ហើយ​និង​ក្រុម​ការងារ​ទាំងអស់ ចែក​គ្រប់​មុខ​សញ្ញា​ទាំងអស់​រុញ​បង​ប្អូន​ឲ្យ​ទៅ​ដល់​មូលដ្ឋាន​លិចលង់​អត់​មាន​ទេ គាត់​ទី​ទួល​សុវត្ថិភាព​ដែរ ប៉ុន្តែ​គាត់​ភ័យ យើង​សង្គ្រោះ​កន្លែង​ណា​ដែល​លិច​ដូច​ថា បើ​យើង​មិន​ទៅ​ភ្លាម អាច​មាន​គ្រោះ​ថ្នាក់​អ៊ីចឹង ខ្ញុំ​ឲ្យ​បង​ប្អូន​ទៅ​កន្លែង​មាន​សុវត្ថិភាព​សិន​អ៊ីចឹង។ ជា​រួម យើង​ដោះស្រាយ​បាន អត់​មាន​អី​គ្រោះ​ថ្នាក់​ទេ ប៉ុន្តែ​ដំណាំ​ផ្សេង​ខូច​អស់»

នៅ​ខេត្ត​ប៉ៃលិន ដំណាំ​ពោត និង​ដំឡូងមី រាប់​ពាន់​ហិកតារ ត្រូវ​បាន​ទឹក​ហូរ​កាត់​ច្រោះ​របើក​ទាំង​ឫស​ទាំង​គល់ ចេញ​ពី​ដី​អណ្ដែត​ទៅ​តាម​ទឹក។ ផ្លូវ​ថ្នល់ លំនៅឋាន​អ្នក​ស្រុក​រាប់​រយ​ខ្នង កំពុង​លិចលង់​ស្នាក់​នៅ​ពុំ​កើត។ នៅ​ខេត្ត​បន្ទាយមានជ័យ និង​ខេត្ត​បាត់ដំបង ហេដ្ឋារចនាសម្ព័ន្ធ ផ្លូវ​ថ្នល់ សាលា​រៀន លំនៅឋាន រាប់​ពាន់​ខ្នង និង​សំណង់​អគារ​ផ្សេងៗ​ជា​ច្រើន​ទៀត កំពុង​លិច​ទឹក​មិន​អាច​ដំណើរ​ការ​បាន។ ក្រៅ​ពី​នេះ ផល​ដំណាំ​ស្រូវ​រាប់​ពាន់​ហិកតារ កំពុង​លិចលង់​ប្រឈម​ទៅ​នឹង​ការ​ខូចខាត។

ទោះ​យ៉ាង​ណា អាជ្ញាធរ​ទាំង​បី​ខេត្ត​នៅ​ភាគ​ពាយ័ព្យ ពុំ​អាច​ប៉ាន់ស្មាន​ពី​ផល​ប៉ះពាល់ និង​ការ​ខូចខាត​បាន​ទេ ដោយសារ​តែ​ជំនន់​ទឹក​ភ្លៀង​នេះ​កំពុង​លិចលង់​នៅ​ឡើយ ហើយ​ការ​វាយ​តម្លៃ​នៃ​ផល​ខូចខាត​សរុប អាច​ធ្វើ​ទៅ​បាន​លុះត្រា​ទឹក​ជំនន់​នេះ​ស្រក​ចុះ​ទៅ​វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល