កូនប្រុសលោក ឈុត វុទ្ធី គឺលោក ឆឺយ ឧត្តមរស្មី គ្រោងធ្វើបុណ្យរម្លឹកខួប ១០ ឆ្នាំនៃឃាតកម្មលើឳពុករបស់លោក នៅទីក្រុងឡូវែល រដ្ឋម៉ាសាឈូសេត សហរដ្ឋអាមេរិក។
លោក ឈុត វុទ្ធី ដែលជាសកម្មជនព្រៃឈើ ត្រូវឃាតកបាញ់សម្លាប់កាលពីថ្ងៃទី២៦ ខែមេសា ឆ្នាំ ២០១២។ ប៉ុន្តែលោក ឆឺយ ឧត្តមរស្មី ជ្រើសយកថ្ងៃអាទិត្យ ទី១ ខែឧសភា មកធ្វើពិធីរម្លឹកខួបនេះដោយសារថ្ងៃនោះប៉ះចំថ្ងៃអត់ធ្វើការ ដើម្បីឲ្យអ្នកដែលគោរពស្រលាញ់លោក ឈុត វុទ្ធី អាចចូលរួមបានច្រើនកុះករ។ ពិធីនេះ នឹងប្រព្រឹត្តទៅនៅវត្តពន្លឺពុទ្ធចក្រ (ហៅវត្តថ្មី)។
លោក ឆឺយ ឧត្តមរស្មី ដែលសព្វថ្ងៃនៅបន្តកេរតំណែល និងបេសកកម្មរបស់លោក ឈុត វុទ្ធី ថាពិធីបុណ្យនេះ មានសារៈសំខាន់ ក្នុងការរម្លឹកនឹកគុណដល់វីរៈភាពរបស់លោក ឈុត វុទ្ធី ដែលស្លាប់ក្នុងបេសកកម្មការពារព្រៃឈើនៅកម្ពុជា។ លោកបន្តថា ១០ ឆ្នាំកន្លងផុតទៅ ពន្លឺយុត្តិធម៌សម្រាប់ឳពុករបស់លោកក៏នៅតែគ្មាន។ រីឯការកាប់បំផ្លាញព្រៃឈើវិញ សកម្មភាពល្មើសនេះ នៅតែបន្តកើតមាន និងកើនឡើងជាលំដាប់៖ «ចំពោះរឿងយុត្តិធម៌ យើង មិនមានសង្ឃឹមចំពោះរដ្ឋាភិបាល បច្ចុប្បន្នទេ ដោយសារតែរដ្ឋាភិបាលបច្ចុប្បន្ន មិនមានឆន្ទៈក្នុងការការពារ និងទប់ស្កាត់បទល្មើសព្រៃឈើ។ យើង មានតែសង្ឃឹមមានការផ្លាស់ប្តូរ រដ្ឋាភិបាលថ្មី នឹងអាចរកឃើញឃាតករពិត »។
ទោះជាឳពុករបស់លោកត្រូវឃាតករបាញ់សម្លាប់ដោយសារបេសកកម្មការពារព្រៃឈើក្តី ក៏លោក ឆឺយ ឧត្តមរស្មី ថាលោកមិនរួញរួញក្នុងការបន្តបេសកកម្មការពារសម្បត្តិធម្មជាតិរបស់ខ្មែរនេះបន្តពីឳពុកលោកនោះដែរ។ លោកថា សព្វថ្ងៃ លោកបានជួយបណ្តុះយុវជនជាច្រើន ឲ្យមានភាពក្លាហានក្នុងការបន្តស្មារតីការពារព្រៃជាពិសេសព្រៃឡង់។ លោកថាសព្វថ្ងៃនេះ លោកជានាយកប្រតិ្តបត្តិនៃអង្គការការពារធនធានធម្មជាតិប៉ុន្តែមិនមានប្រាក់ខែនោះទេគឺលោកធ្វើដោយស្ម័គ្រចិត្តព្រោះស្រលាញ់ការងារនិងកេរតំណែលរបស់ឳពុកលោក។តែយ៉ាងណា លោថា លោកបានទទួលការឧបត្ថម្ភពីសប្បុរសជនខ្មែរនៅក្រៅប្រទេសដើម្បីជួយដល់សកម្មភាពការពារធនធានធម្មជាតិនេះ។
លោកសង្ឃឹមថា ពិធីបុណ្យរម្លឹកវិញ្ញាណក្ខន្ធលោក ឈុត វុទ្ធី នាពេលខាងមុខនេះ នឹងមានពលរដ្ឋច្រើនចូលរួម និងជួយឧបត្ថម្ភ និងបរិច្ចាគជាថវិកា ដើម្បីទ្រទ្រង់សកម្មភាពនេះបន្ត៖«កន្លងមកយើងធ្វើបុណ្យហ្នឹង តែងតែមានបងប្អូនខ្មែរយើង គាត់ចាប់កុសល្យផលបុណ្យចូលហ្នឹង ប្រាក់ថវិកាមួយចំនួនហ្នឹងយើងទុកសន្សំធ្វើចេតីយរបស់គាត់ ។ ប្រាក់មួយចំនួនទៀត យើង ជួយទៅយុវជននៅប្រទេសកម្ពុជា ដើម្បីធ្វើកិច្ចការងារហ្នឹងបន្ត ។ អ្វីដែលខ្ញុំអាចធ្វើបាន ខ្ញុំនឹងលះបង់ ហើយក៏អរគុណបងប្អូនកន្លងមកដែលបានជួយជាថវិកា ជួយជាគំនិតយោបល់ក្នុងការងារនេះ។ ដូច្នេះខ្ញុំសង្ឃឹមថា មានបងប្អូនខ្មែរយើងនៅក្រៅប្រទេសហ្នឹងជួយបន្ថែមទៀតដល់អង្គការការពារធនធានធម្មជាតិនេះបាទ»។
លោក ឈុត វុទ្ធី ត្រូវបានមន្ត្រីកងរាជអាវុធហត្ថបាញ់សម្លាប់ក្នុងរថយន្តរបស់លោក។ ហេតុការណ៍បាញ់សម្លាប់នេះ បានកើតឡើងក្នុងពេលលោក និងអ្នកកាសែតពីររូប បានចូលទៅស៊ើបអង្កេត និងថតរូបភាពគំនរឈើរបស់ក្រុមហ៊ុនកាប់ឈើ ធីមប៊ើរ ហ្គ្រីន (Timber Green) ក្នុងទឹកដីខេត្តកោះកុង។ ម្ចាស់ភាគហ៊ុនធំរបស់ក្រុមហ៊ុនរកស៊ីកាប់ឈើមួយនេះគឺ អ្នកស្រី ខៀវ សស៊ីលាភ និងឈ្មួញម្នាក់ទៀតមានងារជាឧកញ៉ាផង និងជាមន្ត្រីយោធាជាន់ខ្ពស់ផងគឺ លោក ហួរ ហាប់ ដែលគេដឹងថាអ្នកទាំងពីរនេះ មានទំនាក់ទំនងជិតស្និទ្ធជាមួយគ្រួសារលោកនាយករដ្ឋមន្ត្រី ហ៊ុន សែន។ ក្រោយមក ក៏មានការចោទប្រកាន់ថា អ្នកស្រី ខៀវ សស៊ីលាភ គឺជាអ្នកឈរឈ្មោះតំណាងឱ្យអ្នកស្រី ហ៊ុន ម៉ាណា ដែលជាកូនស្រីរបស់លោក ហ៊ុន សែន នៅក្នុងក្រុមហ៊ុន ធីមប៊ើរហ្គ្រីន នេះទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។