ពលរដ្ឋរិះគន់អាជ្ញាធរគំរាមកំហែងកម្មករស៊ីនទ្រី ជាងរកដំណោះស្រាយរឿងគំនរសំរាម
2020.10.10
សកម្មភាពអាជ្ញាធរប្រមូលសំរាម ក្រោយកម្មករប្រមូលសំរាមស៊ីនទ្រី ធ្វើបាតុកម្មមិនធ្វើការ ទាមទារដំណោះស្រាយ។ រូបថ្ងៃទី៥ ខែតុលា ឆ្នាំ២០២០។
រូបពីហ្វេសប៊ុកលោក ម៉េត មាសភក្ដី
ពលរដ្ឋត្អូញត្អែរក្លិនស្អុយពីគំនរសំរាម និងរិះគន់អាជ្ញាធរក្រុងភ្នំពេញ ដែលមិនដោះស្រាយនឹង កម្មករប្រមូលសំរាមស៊ីនទ្រី។ សង្គមស៊ីវិលថា អាជ្ញាធរគួរតែចរចាជាមួយកម្មករឲ្យពួកគេទទួលយកបាន ជាជាងការចង់ឈ្នះចាញ់ហើយចេញវិធានការ សំអាតទីក្រុងភ្នំពេញ។
ស្ត្រីជាគ្រូបង្រៀនម្នាក់ ឈ្មោះ សិលា ដែលរស់នៅក្រុងភ្នំពេញរៀបរាប់ប្រាប់អាស៊ីសេរីថា គំនរសំរាមគរដូចភ្នំ និងរាយប៉ាយថែមទាំងមានក្លិនស្អុយពិបាកទ្រាំជាច្រើនថ្ងៃមកហើយ នៅក្បែរផ្ទះរបស់អ្នកស្រី។ លោកស្រីបន្តថា ប្រសិនជាមានភ្លៀងហើយលិចនឹងពិបាកទ្រាំខ្លាំងណាស់ ប៉ុន្តែដោយសារអ្នកស្រីរស់នៅអគារជន់ទី១ ទើបស្ថានភាពមិនសូវជាប៉ះពាល់ដោយសារតែក្លិនស្អុយនោះទេ។
លោកស្រីបន្តថា ថ្ងៃ១០ តុលា នេះ ឃើញមានឡាននិងកម្មករខ្លះមកប្រមូលសំរាមយកទៅអស់ដែលធ្វើឲ្យស្ថានភាពបានប្រសើរខ្លះ។ ទោះយ៉ាងណាអ្នកស្រីថា មិនដឹងថា អាចស្អាតបែបនេះប៉ុន្មានថ្ងៃនោះទេ ព្រោះតែកម្មករប្រមូលសំរាមនៅមិនទាន់ព្រមចូលធ្វើការវិញនៅឡើយ។ អ្នកស្រីអះអាងថា មិនខឹងឬអាក់អន់ចិត្តនឹងកម្មករដែលកំពុងធ្វើបាតុកម្ម ហើយមិនមកប្រមូលសំរាមនោះទេ ព្រោះគេគ្មានជម្រើសអ្វីផ្សេងក្រៅពីបន្តទាមទារនោះទេ។ «»
គំនរសំរាមគរជាច្រើន រាយប៉ាយនៅតាមផ្លូវក្បែរផ្សារ ក្បែររបងវត្ត ក្បែរប្រឡាយ ក្បែរសាលារៀន និងមុខផ្ទះប្រជាពលរដ្ឋជាច្រើនថ្ងៃមកហើយ បន្ទាប់ពីកម្មករក្រុមហ៊ុនស៊ីនទ្រី ផ្ទុះការតវ៉ាមុខក្រុមហ៊ុន ដោយមិនព្រមចេញប្រមូល និងដឹកសំរាមដូចរាល់ដង ក្រោយពួកគេបារម្ភបាត់ការងារនិងអត្ថប្រយោជន៍ការងារ នៅពេលថា មានក្រុមហ៊ុនមួយចំនួននឹងដេញថ្លៃគ្នាក្នុងសេវាប្រមូលសំរាមក្នុងរាជធានីភ្នំពេញ។
ពលរដ្ឋជាច្រើនដែលរស់នៅក្រុងភ្នំពេញប្រើប្រាស់បណ្ដាញសង្គមចែកចាយរូបភាព និងបញ្ចេញមតិ រួមទាំងរិះគន់អំពីបញ្ហាគំនរសំរាម និងក្លិនស្អុយទាំងនោះថា សំរាមគ្រប់ទីកន្លែងពលរដ្ឋចូលផ្សារមិនចង់កើតព្រោះក្លិនពេក ប៉ះពាល់សុខភាពខ្លាំងណាស់។ ចំណែកហ្វេសបុកពលរដ្ឋខ្លះសរសេរអមជាមួយនឹងរូបភាពសំរាមជាច្រើននៅលើផ្លូវមួយយ៉ាងវែងថា គេប្រថុយប្រឈមនឹងហានិភ័យ ជំងឺឆ្លងនានាដើម្បីតែជីវភាព និងសោភ័ណភាពទីក្រុង។ ហ្វេសបុកនេះបន្តថា គេប្រមូលសំរាមបែរជាចាត់ទុកគេដូចសំរាម។
លោកស្រី ចាន់ រស្មី រស់នៅក្នុងភ្នំពេញម្នាក់ទៀត យល់ថា អាជ្ញាធរក្រុងភ្នំពេញគួរតែចរចាដើម្បីឲ្យមានដំណោះស្រាយដល់កម្មករទាំងអស់ដែលកំពុងតវ៉ា ឲ្យទទួលយកបាន ជាជាងប្រើគ្រប់មធ្យោបាយព្រមានពួកគេឲ្យផ្អាកការតវ៉ា។ អ្នកស្រីបន្តថា សំរាមមានរាល់ថ្ងៃហើយយន្តការឬសកម្មភាពរបស់អាជ្ញាធរដោះស្រាយបានតែមួយពេលៗប៉ុណ្ណោះ។ «»
ឆ្លើយតបនឹងការរិះគន់នេះ អភិបាលក្រុងភ្នំពេញ លោក ឃួន ស្រេង អះអាងថា សាលាក្រុងភ្នំពេញបានចេញវិធានការ និងសកម្មភាពប្រមូលសំរាមចេញពីក្រុងប្រមាណជា ៩៥ភាគរយហើយ។ លោកបដិសេធថា សាលាក្រុងមិនបានគំរាមកំហែងកម្មករនោះទេ គឺគ្រាន់តែប្រាប់ឲ្យកម្មករគោរពច្បាប់ការងារប៉ុណ្ណោះ។ «»
កន្លងទៅថ្មីៗនេះក្រសួងការងារចេញលិខិតព្រមានដោយចោទថា ជាអ្នកដឹកនាំ សហជីពថាញុះញង់ឲ្យកម្មករធ្វើកូដកម្ម ចំណែកសាលាក្រុងភ្នំពេញប្រកាសជ្រើសរើសបុគ្គលិកថ្មីជំនួសកម្មករដែលកំពុងតវ៉ា។ មន្ត្រីអ្នកនាំពាក្យសាលាក្រុង លោក ម៉េត មាសភក្តី សរសេរលើទំព័របណ្តាញសង្គមរបស់លោក នៅថ្ងៃនេះរួមជាមួយនឹងការបង្ហោះវីដេអូ ឡានដឹកសំរាមមួយចំនួនប្រមូលសំរាម នៅថ្ងៃ១០ តុលានេះ នៅតំបន់មួយចំនួននៃក្រុងភ្នំពេញ ហើយលោកបញ្ជាក់ថា មានកម្មករប្រមាណជា ៣០០នាក់បានត្រឡប់ចូលធ្វើការវិញហើយ។
ការអះអាងរបស់មន្ត្រីសាលាក្រុងរូបនេះ ថា មានកម្មករប្រមាណ៣០០នាក់ចូលធ្វើការវិញនៅថ្ងៃនេះ បន្ទាប់ពីក្រុមប្រឹក្សាអាជ្ញាកណ្តាលបានចេញលិខិតបញ្ជាឲ្យកម្មករទាំងអស់ផ្អាកបាតុកម្ម និងត្រឡប់ចូលធ្វើការតាមវេនរបស់ពួកគេនៅថ្ងៃ១០ តុលានេះ។ ទោះយ៉ាងណាកម្មករភាគច្រើននៅតែបន្តតវ៉ា នឹងមិនទាន់ត្រឡប់ចូលធ្វើការវិញនៅឡើយទេ ព្រោះតែមិនទុកចិត្ត ការសន្យារបស់សាលាក្រុង និងក្រុមហ៊ុន ថានឹងដោះស្រាយតាមការទាមទាររបស់ពួកគេ។
នាយកប្រតិបត្តិនៃមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គីមអេង ថ្លែងប្រាប់អាស៊ីសេរីថា ស្ថានភាពសំរាមក្នុងទីក្រុង គឺមានស្ថានភាពប្រសើរបន្តិចនៅតាមដងផ្លូវមួយចំនួន ប៉ុន្តែ នៅតាមមុខផ្ទះរបស់ពលរដ្ឋ និងតាមទីតាំងដីទំនេរជាច្រើន គឺស្ថានភាពគំនរសំរាមគរ និងមានក្លិនស្អុយដដែល។ លោកបន្តថា អាជ្ញាធរគួរតែពន្លឿនការចរចាជាមួយកម្មករ ជាជាងការចង់ឈ្នះចាញ់ជាមួយពួកគេ ព្រោះថា ចំណាត់ការ និងសកម្មភាពដែលអាជ្ញាធរកំពុងធ្វើនឹងមិនមានប្រសិទ្ធភាពនោះទេ ដោយសារតែសំរាមនឹងមានកើតឡើងជារៀងរាល់ថ្ងៃ។ លោកប្រាប់ថា ប្រសិនជាកម្មករ ទាំងអស់ទទួលបានដំណោះស្រាយហើយត្រឡប់ចូលធ្វើការវិញ នោះពួកគេនឹងប្រមូលសំរាម ហើយសំអាតទីក្រុងបានលឿនព្រោះពួកគេមានជំនាញ ស្គាល់ទីតាំង និងរបៀបធ្វើការប្រមូលសំរាមបានរហ័ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត
- លោក ហ៊ុន សែន មិនគាំទ្រដីកាតុលាការICCដើម្បីចាប់ខ្លួនមេដឹកនាំរុស្ស៊ី