ពលរដ្ឋ ៥ភូមិខេត្តស្ទឹងត្រែង ស្នើឱ្យអាជ្ញាធរការពារដើមច្បោះជ័រទឹកកំពុងប្រឈមបាត់បង់ក្នុងព្រៃឡង់
2021.01.20
ពលរដ្ឋចំនួន ៥ភូមិរស់នៅខេត្តស្ទឹងត្រែងដែលតែងតែពឹងលើរបរដងជ័រទឹកលក់ប្រចាំថ្ងៃ អំពាវនាវដល់អាជ្ញាធរខេត្តនេះ ឱ្យរកមធ្យោបាយការពារ សុវត្ថិភាពដើមឈើផលិតជ័រទឹកក្នុងតំបន់ព្រៃឡង់។ ការលើកឡើងនេះ ក្រោយពីមានសកម្មភាពកាប់បំផ្លាញដើមច្បោះជ័រ របស់អ្នកភូមិអស់ជាង ៦ពាន់ដើមជាថ្មីទៀត។
ពលរដ្ឋរាប់រយគ្រួសារ រស់នៅភូមិចំនួន ៥ ជាប់ព្រៃឡង់ខេត្តស្ទឹងត្រែង នៃឃុំកាំងចាម ស្រុកថាឡាបរិវ៉ាត់ នៅតែស្វែងរកការជួយជ្រោមជ្រែងពីមន្ត្រីសង្គមស៊ីវិល និង អាជ្ញាធរមានសមត្ថកិច្ច ឱ្យជួយការពាររណ្តៅជ័រទឹកដែលជាឆ្នាំងបាយរបស់អ្នកភូមិ ក្នុងតំបន់ព្រៃឡង់។ អ្នកភូមិថា ដើមច្បោះជ័រទឹករបស់ពួកគេ នៅចំណុច វាលបែកសៀមត្រូវគេកាប់ធ្វើអាជីវកម្មអស់ ៦.០០០ដើម នៅរយៈពេល ៦ខែចុងក្រោយនេះ។
សមាជិកសហគមន៍ព្រៃឡង់ខេត្តស្ទឹងត្រែង លោក គង់ រី ឱ្យដឹងនៅថ្ងៃទី១៩ មករាថា ដើមឈើផលិតជ័រទឹកក្នុងតំបន់ព្រៃឡង់ ឋិតនៅចំណុចអូរឈ្លីច ចំណុចហុងមៀង និងចំណុចហុងចំប៉ក់ កំពុងទទួលរងការកាប់ផ្តួលយកឈើលក់យ៉ាងពេញទំហឹង។ ទន្ទឹមនឹងនេះ ពួកលោកបានចុះដល់ទីតាំងនោះ ប្រទះឃើញ ក្រុមកម្មករជាច្រើនក្រុម កាន់រណាយន្ត ចូលព្រៃអារឈើលក់ដោយគ្មានការទប់ស្កាត់។ លោកថា ព្រៃច្បោះនៅទីនោះ ត្រូវគេកាប់រំលំអស់ជាច្រើនពាន់ដើម នៅរយៈពេល ៣ខែចុងក្រោយនេះ៖ «រាប់ម៉ឺនដើម មិនមែនមួយពាន់ទៅពីរដើមទេ ព្រោះគ្រាន់តែគោយន្តហ្នឹង វារាប់ពាន់គ្រឿងហើយ ប៉ុន្មានភូមិហ្នឹង ពុំមែនតែស្ទឹងត្រែងថា ខេត្តក្រចេះ ព្រោះវិហារ និងខេត្តកំពង់ធំ ផ្តៀតដើមដំបោរដែរ ក្រៅពីហ្នឹងកកោះអស់អាលីងហើយ ផែក្ដារអស់ហើយ»។
បុរសដដែលបន្ថែមថា កាលពីសប្តាហ៍មុន ពួកលោកបានទៅដល់ការិយាល័យមន្ទីរបរិស្ថានខេត្តស្ទឹងត្រែង ២ដងហើយ ដើម្បីស្នើសុំឱ្យស្ថាប័នជំនាញមួយនេះ ទប់ស្កាត់បទល្មើសព្រៃឈើ ក៏ប៉ុន្តែគ្មានលទ្ធផល។ លោកថា មន្ត្រីបរិស្ថានខេត្តស្ទឹងត្រែងភាគច្រើន គ្មានភាពស្មោះត្រង់ការពារព្រៃនោះទេ ហើយពួកគេតែងតែទទួលលុយពីអ្នកដឹកឈើខុសច្បាប់ ជាថ្នូរមិនអនុវត្តច្បាប់៖ «ពលរដ្ឋនៅឃុំកាំងចាមនេះប៉ះពាល់ច្រើនណាស់ ក៏ប៉ុន្តែគ្នា (ពលរដ្ឋ) ក៏មិនដឹងធ្វើម៉េចហ៊ាននិយាយ គេក៏គំរាមកំហែងដល់យើង ហើយបរិស្ថានអង្គុយចាំចាប់យកតែលុយហ្នឹង មានធ្វើអី។ មួយគោយន្តមួយ ១លាន ទៅ ២លានក៏មានដែរ ដឹកគ្រឿងផ្ទះក៏ចាប់យកលុយគ្នាដែរ ធ្វើច្បាប់ហើយ ក៏នៅតែចាប់ដែរ»។
ពលរដ្ឋរស់នៅឃុំកាំងចាម លោក អេង វៃ សង្កេតឃើញថា អ្នកភូមិខ្លះបានបោះបង់មុខរបបដងជ័រទឹក ដោយសារតែដើមផលិតជ័រទឹករបស់ពួកគេ ត្រូវគេកាប់លក់អស់។ លោកថា ថ្មីៗ នេះ អ្នកភូមិកំពង់ប៉ាង ៦គ្រួសារទៀត បានប្តឹងឱ្យអាជ្ញាធរជួយអន្តរាគមន៍ ករណីក្រុមឈ្មួញបានកាប់ដើមច្បោះរបស់ពួកគេអស់ជាច្រើនរយដើម តែគ្មានដំណោះស្រាយ៖ «បើគេកាប់អស់ហើយ វាបាត់បង់អស់ហើយ ខ្លះគេកាប់ចម្ការ ខ្លះកាប់ផែឈើ ព្រោះអាជ្ញាធរហ្នឹងគេគិតថា ព្រៃខ្លះបៀតៗ ទៅ ខ្លះផែឈើបន្តិចបន្តួច»។
អាស៊ីសេរីមិនទាន់សុំការឆ្លើយតប ពីប្រធានមន្ទីរបរិស្ថាន ខេត្តស្ទឹងត្រែង លោក អេង ភីរ៉ុង និងអ្នកនាំពាក្យក្រសួងបរិស្ថាន លោក នេត្រ ភក្ត្រា ដើម្បីសុំការបំភ្លឺរឿងនេះ បាននៅឡើយទេ នៅថ្ងៃទី១៩ មករា។
ចំណែកអ្នកនាំពាក្យសាលាខេត្តស្ទឹងត្រែង លោក ម៉ែន គុង វិញ លោក បកស្រាយថា គណៈបញ្ជាការឯកភាពខេត្ត បានសហការជាមួយដៃគូពាក់ព័ន្ធទាំងអស់ អនុវត្តគម្រោងការពារតំបន់ព្រៃឡង់ស្របតាមបទបញ្ជារបស់រដ្ឋាភិបាល។ ចំពោះសំណួរថា អ្នកភូមិស្នើសុំអាជ្ញាធរឱ្យជួយការរពារដើមច្បោះជ័រ ដែលនៅសល់ចុងក្រោយ អ្នកនាំពាក្យរូបនេះឆ្លើយយ៉ាងខ្លីថា មន្ត្រីជំនាញពាក់ព័ន្ធ និងប្រជាសហគមន៍កំពុងសហការគ្នា ការពារព្រៃឡង់ និងទប់ស្កាត់បទល្មើសព្រៃឈើ៖ «ខេត្តមានយន្តការអនុវត្តតាមសរាចរណែនាំលេខ០៥ របស់រដ្ឋាភិបាលគឺ យើងប្រើប្រាស់គណៈបញ្ជាការឯកភាព និងផ្នែកពាក់ព័ន្ធនៅមូលដ្ឋាន។ ទាំងអស់ហ្នឹងយើងមានដៃគូមួយចំនួន ដែលគាំទ្រគម្រោងការពារ តំបន់ព្រៃឡង់»។
ជាមួយគ្នានេះ មន្ត្រីសម្របសម្រួលសមាគមអាដហុក (ADHOC) ខេត្តស្ទឹងត្រែង លោក ប៊ី វ៉ាន់នី យល់ថា ការបណ្តោយឱ្យមានបទល្មើសកើតឡើងច្រើន គឺជាការទទួលខុសត្រូវយ៉ាងសំខាន់ របស់មន្ត្រីបរិស្ថាន និងអាជ្ញាធរពាក់ព័ន្ធខេត្តស្ទឹងត្រែង។ លោកសង្កេតឃើញថា មន្ត្រីបរិស្ថានតែងតែច្រានចោល ពាក្យបណ្តឹងរបស់ពលរដ្ឋ ដែលពឹងឱ្យជួយរកយុត្តិធម៌ ករណីដើមច្បោះជ័រទឹក របស់អ្នកស្រុកត្រូវគេកាប់បំផ្លាញអស់ជាច្រើនរយដើម។ មន្ត្រីសង្គមស៊ីវិលរូបនេះបារម្ភថា ពលរដ្ឋធ្លាក់ចុះប្រាក់ចំណូលធ្ងន់ធ្ងរ ដោយសារបាត់បង់រណ្តៅជ័រទឹក ហើយមន្ត្រីជំនាញតែងឆ្លើយដោះសារយករួចខ្លួនដដែលៗ គេចពីការទទួលខុសត្រូវ។
កាលពីពាក់កណ្តាលឆ្នាំ២០២០ ក្រុមពលរដ្ឋជាង ១រយនាក់ (១១០) រស់នៅឃុំកាំងចាម បានផ្តិតមេដៃដាក់ញត្តិទៅមន្ទីរបរិស្ថានខេត្តស្ទឹងត្រែង រដ្ឋសភា និងព្រឹទ្ធសភា ដើម្បីពឹងឱ្យស្ថាប័នទាំងនេះ ជួយការពារដើមច្បោះជ័រ ដែលនៅសល់ក្នុងតំបន់ព្រៃឡង់។ ក៏ប៉ុន្តែ ពលរដ្ឋ អះអាងថា មកទល់ពេលនេះ ពុំមានស្ថាប័នណាមួយ ដោះស្រាយញាត្តិរបស់ពួកគាត់នៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។