ពលរដ្ឋ​ទាមទារ​​ឱ្យ​រដ្ឋាភិបាល​លុប​អនុក្រឹត្យ​ស្ដីពី​ការ​កាត់​ដី​បឹង​ទន្លេបាទី​ជាង​២​រយ​ហិកតារ

ដោយ ម៉ៅ សុធានី
2022.06.25
Share on WhatsApp
Share on WhatsApp
ពលរដ្ឋ​ទាមទារ​​ឱ្យ​រដ្ឋាភិបាល​លុប​អនុក្រឹត្យ​ស្ដីពី​ការ​កាត់​ដី​បឹង​ទន្លេបាទី​ជាង​២​រយ​ហិកតារ ផ្ទះទឹក​សម្រាប់ទេសចរ​មក​កម្សាន្ត នៅ​​ទន្លេបាទី ខេត្ត​តាកែវ។
រូប៖ ពលរដ្ឋ​ផ្ដល់ឱ្យ

ក្រុម​អាជីវករ​លក់​ដូរ​នៅ​រមណីយដ្ឋាន​ទន្លេបាទី ខេត្តតាកែវ សម្តែង​ក្ដី​បារម្ភ​ពី​ការបណ្តេញចេញ ក្រោយពី​លោកនាយក​រដ្ឋមន្ត្រី ហ៊ុន សែន បាន​ចេញ​អនុក្រឹត្យ​កាត់​ឆ្វៀល​ដី​ជាង ២​រយ​ហិកតា (២២២) ផ្តល់​ឱ្យ​បុគ្គល​ឯកជន​។ ប្រជាពលរដ្ឋ និង​អ្នក​លក់ដូរ​នៅ​តំបន់​ទន្លេបាទី ទាមទារ​ដល់​ប្រមុខ​រដ្ឋាភិបាល លុបចោល​អនុក្រឹត្យ​នេះ ដើម្បី​ធានា​ការពារ​ពី​ប៉ះពាល់​បរិស្ថាន និង​តំបន់​ដែល​ពោរពេញ​ដោយ​សក្ដានុពល​ផ្នែក​វិស័យ​ទេសចរណ៍​។

ប្រជាពលរដ្ឋ និង​ក្រុម​អាជីវករ​បម្រើ​ផ្នែក​សេវាកម្ម​ភ្ញៀវ​ទេសចរ នៅ​តំបន់​រមណីដ្ឋាន​ទន្លេបាទី ខកចិត្ត​ចំពោះ​លោក ហ៊ុន សែន ដែល​កាត់​ឆ្វៀល​ដី​ប្រមាណ​ជាង ២​រយ​ហិកតារ (២២២) ទៅ​ឱ្យ​ឯកជន ដែល​ធ្វើ​ឱ្យ​ពួកគាត់​ប្រឈម​បាត់បង់​ចំណូល និង​បណ្តេញ​ចេញពី​ការ​ប្រកប​អាជីវកម្ម​នៅ​តំបន់​វប្បធម៌​ប្រវត្តិសាស្ត្រ​។ លើស​ពី​នេះ ក្រុម​អាជីវករ​ថា ការ​ធ្វើ​អនុបយោគ​ផ្ទៃ​ទន្លេបាទី​ជាង ២​រយ​ហិកតារ​ឱ្យ​បុគ្គល​ឯកជន​នេះ គឺ​អាជ្ញាធរ​មូលដ្ឋាន​បាន​ធ្វើ​សំណើ​ស្ងាត់ៗ​ទៅ​រដ្ឋាភិបាល ដោយ​មិន​អនុញ្ញាត​ឱ្យ​ប្រជាពលរដ្ឋ​បាន​ដឹង ក្នុង​ការ​ចូលរួម​បញ្ចេញ​យោបល​នៃ​ប៉ះពាល់​បរិស្ថាន និង​តំបន់​ផ្ទៃ​បឹង​ទន្លេបាទី​នេះនោះ​ឡើយ។

អាជីវករ​លក់ដូរ​ម្នាក់​នៅ​តំបន់​ទន្លេបាទី លោកស្រី សុង សោភា រៀបរាប់​ប្រាប់​វិទ្យុ​អាស៊ីសេរី​នៅ​ថ្ងៃទី​២៥ ខែ​មិថុនា ថា​កន្លង​ទៅ អាជ្ញាធរ​តែង​ប្រាប់​ប្រជាពលរដ្ឋ​ថា តំបន់​ទន្លេបាទី​នឹង​ត្រូវ​បាន​ស្ដារ​ជម្រៅ​ផ្ទៃ​ទឹក​ទន្លេ ដើម្បី​ពង្រីក​សក្ដានុពល​ទេសចរណ៍​។ ទោះ​យ៉ាងណា លោកស្រី​ថា រយៈពេល​ប៉ុន្មាន​ឆ្នាំ​កន្លងមក​នេះ អាជ្ញាធរ​មិន​បាន​ស្ដារ​ទឹកទន្លេ​ឡើយ​។ ក្រៅពី​នេះ លោកស្រី​ថា ផ្ទៃ​ទឹក​ទន្លេ​បែរ​ជា​ល្អក់​កករ​កាន់តែ​ខ្លាំង ដោយសារ​តែ​មាន​បុគ្គល​មាន​លុយ មានអំណាច​មួយចំនួន​ឆ្លៀតឱកាស​ចាក់​បំពាន​ចូល​ផ្ទៃ​ទឹកទន្លេ ធ្វើជា​កម្មសិទ្ធិ​ផ្ទាល់ខ្លួន។

បន្ថែម​ពី​នេះ លោកស្រី​លើកឡើង​ថា ក្រោយពី​រដ្ឋាភិបាល​បានសម្រេច​កាត់​ឆ្វៀល​ដី​ទៅ​ឯកជន គ្រប់គ្រង​ជាង​២​រយ​ហិកតារ (២២២) បន្ថែម​ទៀត អាជីវករ​ជាច្រើន​មិន​សប្បាយចិត្ត និង​សម្ដែង​ក្ដី​ព្រួយបារម្ភ​ពី​ការបាត់បង់​ប្រាក់ចំណូល​នៅ​តំបន់​ទន្លេបាទី​។ លោកស្រី ទទូច​ដល់​រដ្ឋាភិបាល គួរតែ​មាន​ការ​អភិរក្ស​តំបន់​ទន្លេបាទី​នេះ មិន​គួរ​ផ្តល់​សិទ្ធិ​ឱ្យ​ឯកជន​គ្រប់គ្រង ដែល​ប្រឈម​នឹង​ការ​ចាក់​ដី​លុប​ទន្លេ ធ្វើ​ឱ្យ​បាត់បង់​អត្តសញ្ញាណ និង​ប៉ះពាល់​ដល់​ជីវភាព​របស់​ប្រជាពលរដ្ឋ​បែបនេះ​ឡើយ៖ «អនាគត​នឹង​លុប​ទន្លេ​[​បាទី​] ហ្នឹង​ពួក​ខ្ញុំ​គឺ​ដាច់ពោះ​ហ្មង​។ ទីមួយ ធ្វើ​ឱ្យ​ទឹក​រីង ទី​ពីរ​ត្រី​។ ប្រសិនជា​លុប ពួក​ខ្ញុំ​ដឹង​តែ​ចប់​ហើយ ព្រោះ​អី​ប្រជាជន​ពួក​ខ្ញុំ​នៅ​ហ្នឹង រស់​ដោយសារ​ទន្លេ​ហ្នឹង​ទាំងអស់គ្នា លក់​ម្ហូប គ្រប់សព្វ​គ្រប់យ៉ាង ពួក​ខ្ញុំ​ដូច​ចែក​គ្នា​រស់​ដែរ»

ចំណែកឯ ពលរដ្ឋ​ម្នាក់ទៀត​នៅ​រស់​ក្បែរ​ទន្លេបាទី លោក ឈុន វុត្ថា លើកឡើង​ថា លោក​មិន​ចង់​ឃើញ​ការ​អភិវឌ្ឍ ដែល​ធ្វើ​ឱ្យ​បាត់បង់​ធនធាន​ធម្មជាតិ ហើយ​អ្នក​ដែល​ទទួល​បាន​ប្រយោជន៍​មានតែ​បុគ្គល​មាន​លុយ​មានអំណាច​នោះ​ឡើយ​។ លោក​បារម្ភ​ថា បើ​មានការ ចាក់​លុប​ទន្លេបាទី​ក្រោម​ស្លាក​អភិវឌ្ឍ រមណីដ្ឋាន​ទន្លេបាទី​ក្នុង​ខេត្តតាកែវ​នឹង​បាត់បង់​អត្តសញ្ញាណ​វប្បធម៌​ប្រវត្តិសាស្ត្រ ហើយ​ប្រជាពលរដ្ឋ​រាប់​រយ​គ្រួសារ​នឹង​កាន់​តែ​មាន​ជីវភាព​ក្រីក្រ ដោយសារតែ​គ្មាន​កន្លែង​ប្រកប​អាជីវកម្ម​រក​ប្រាក់​ចំណូល​បាន​តទៅ​ទៀត៖ «ធម្មតា​តែងតែ​ស្ដាយ តែងតែ​បារម្ភ ប៉ះពាល់​ជាពិសេស រឿង​ប្រសាទ និង​ទន្លេបាទី ជា​កេរ្តិ៍ដំណែល​ខ្មែរ​តាំង​​ពីដើម​មក​។ គឺ​តែងតែមាន​ការ​សោកស្ដាយ ដូច​មាន​អារម្មណ៍​ថា ពិបាក​នឹង​និយាយ​ដែរ ព្រោះ​អី​ច្បាប់​ចេញ​មក គឺ​លក្ខណៈ​ថា មិនដឹង​ថា ក្នុងចំណោម​អ្នក​លក់ដូរ គាត់​បានដឹង ឬក៏​អត់​ផង ព្រោះ​អី ច្បាប់​ទាំងអស់​ហ្នឹង​ទើប​ថ្មីៗ​ដែរ»

វិទ្យុ​អាស៊ីសេរី មិនទាន់​អាច​ទាក់ទង អ្នកនាំពាក្យ​ក្រសួង​រៀបចំ​ដែន នគរូបនីយកម្ម និង​សំណង់ លោក សេង ឡូត និង​អ្នកនាំពាក្យ​ក្រសួងបរិស្ថាន លោក នេត្រ ភក្ត្រា ដើម្បី​សុំ​អត្ថាធិប្បាយ​ជុំវិញ​រឿងនេះ បានទេ​នៅ​ថ្ងៃទី​២៥ មិថុនា​។ ចំណែកឯ អភិបាល​ខេត្តតាកែវ លោក អ៊ូច ភា និង​អភិបាល​ខេត្តកណ្តាល​លោក គង់ សោភ័ណ្ឌ ក៏​វិទ្យុ​អាស៊ីសេរី​មិនទាន់​អាច​ទាក់ទង ដើម្បី​សាកសួរ​អំពី​រឿងនេះ បាន​ដែរ​នៅ​ថ្ងៃ​ដដែល​នេះ។

កាលពី​ថ្ងៃទី​២ ខែមីនា​កន្លង​ទៅ​នេះ លោក ហ៊ុន សែន បាន​សម្រេច​កាត់​ឆ្វៀល​ដី​តំបន់​ប្រវត្តិសាស្ត្រ​ទន្លេបាទី​ជាង ២​រយ​ហិកតា (២២២) ប្រគល់​ឱ្យ​បុគ្គល​ឯកជន​ម្នាក់ ឈ្មោះ ស្រ៊ុន ប៊ុន​លាភ ដើម្បី​អភិវឌ្ឍ​។ ផ្ទៃ​បឹង​ទន្លេបាទី​ជាង ២​រយ​ហិកតារ ដែល​លោក ហ៊ុន សែន ធ្វើឱ្យ​អនុ​ប​យោគ​ផ្តល់ឱ្យ​បុគ្គល​ឈ្មោះ ស្រ៊ុន ប៊ុន​លាភ នេះ មួយផ្នែក​ស្ថិតនៅ​ឃុំ​ទ្រា ស្រុក​កណ្តាលស្ទឹង ខេត្តកណ្តាល ដែល​ទំហំ​ជាង ១​រយ​ហិកតា (១០៦) និង​មួយ​ផ្នែក​ទៀត ស្ថិតនៅ​ឃុំ​ក្រាំងធ្នង់ ស្រុក​បាទី ខេត្តតាកែវ ដែល​មាន​ទំហំ​ជាង ១​រយ​ហិកតា (១៦៦)​។ អ្នកស្រុក​បាទី ឱ្យដឹង​ថា បុគ្គល ស្រ៊ុន ប៊ុនលាភ នេះ​ពួកគាត់​ធ្លាប់​ឮ​តែ​ឈ្មោះ​តែប៉ុណ្ណោះ ហើយ​ប្រជាពលរដ្ឋ​សង្ស័យ​ថា ការ​ចាក់ដី​បំពាន​ចូល​ផ្ទៃ​ទឹកទន្លេ​បាទី ពី​សំណាក់​អ្នក​មាន​អំណាច​កន្លងមក​នេះ អាច​មាន​ជាប់​ពាក់ព័ន្ធ​នឹង​បុគ្គល​រូប​នេះ​នៅ​ពី​ក្រោយខ្នង​។​

ជុំវិញ​រឿង​នេះ អ្នកនាំពាក្យ​សមាគម​ការពារ​សិទ្ធិមនុស្ស​អាដហុក (ADHOC) លោក ស៊ឹង សែន​ករុណា លើក​ឡើង​ថា ការអភិវឌ្ឍន៍​គឺជា​រឿង​ប្រសើរ ប៉ុន្តែ​រដ្ឋាភិបាល​ក៏​មិន​គួរ​មើល​រំលង​ពី​ផល​ប៉ះពាល់​សង្គម នោះ​ដែរ​។ លោក​បន្ត​ថា ដី​តំបន់​ទន្លេបាទី​ដែល​រដ្ឋាភិបាល​សិទ្ធិ​ជាង​២​រយ​ហិកតា​ឱ្យ​បុគ្គលិក​ឯកជន​គ្រប់គ្រង​នេះ នឹង​មាន​ការប្រែប្រួល​នៅ​រយៈពេល​ខ្លី​ខាងមុខ​។ ទោះជា​យ៉ាងណា លោក​ទទូច​ដល់​រដ្ឋា​បាល និង​អាជ្ញាធរ​មូលដ្ឋាន ត្រូវតែ​មាន​ការ​គិតគូរ​តំបន់​អភិរក្ស និង​ជីវភាព​ប្រជាពលរដ្ឋ​ជា​ចម្បង និង​អនុញ្ញាតិ​ពួក​គាត់​ចូលរួម​វាយតម្លៃ​ផល​ប៉ះពាល់ ដើម្បី​ធានា​តម្លាភាព និង​គណនេយ្យភាព៖ «យើង​ក៏​មិន​ចង់​ឃើញ​ដែរ ពី​បញ្ហា​ដែល អភិវឌ្ឍ​មិន​គោរព​តាម​ការ​លើកឡើង ឬក៏​ក្ដី​កង្វល់​របស់​ប្រជាពលរដ្ឋ ក៏ដូចជា​អង្គការ​សង្គម​ស៊ីវិល ដែល​យើង​ធ្វើ​ការងារ ទៅលើ​បញ្ហា​ដីធ្លី បញ្ហា​បរិស្ថាន ឬ​បញ្ហា​សិទ្ធិមនុស្ស​ផ្សេងទៀត​ហ្នឹង​គឺ យើង​មិន​ចង់​ឃើញ​។ ប្រសិនជា​អាច​ធ្វើ​បាន​នោះ យើង​ទទូច​ស្នើសុំ ឱ្យ​មាន​ការ​ទុក​តំបន់​ដែល​ជា​កន្លែង​ជា​ប្រវត្តិសាស្ត្រ ជា​កន្លែង​កម្សាន្ត ជា​វប្បធម៌​ទៅ​ហើយ អ៊ីចឹង​យើង​មានការ​ព្រួយបារម្ភ ពី​បញ្ហា​ដែល​កើតឡើង​ផ្សេងៗ​នៅក្នុង​តំបន់​»

រដ្ឋាភិបាល លោក ហ៊ុន សែន រង​ការរិះគន់​ជា​បន្តបន្ទាប់ ទាក់ទង​នឹង​ការ​កាត់​ដី​សាធារណៈ​របស់​រដ្ឋ និង​ដី​តំបន់​សម្បូរ​ធនធានធម្មជាតិ ធ្វើ អនុបយោគ​ផ្តល់​សិទ្ធិ​ឱ្យ​បុគ្គល​ឯកជន ដែល​សកម្មជន​បរិស្ថាន និង​សង្គម​ស៊ីវិល​មើលឃើញ​ថា គ្មាន​តម្លាភាព និង​គណនេយ្យភាព​។ លើស​ពី​នេះ តំបន់​ដី បឹង ទន្លេ ឆ្នេរសមុទ្រ ដែល​លោក ហ៊ុន សែន ធ្វើ​អនុ​ប​យោគ​ប្រគល់​សិទ្ធ​គ្រប់គ្រង គឺ​ភាគច្រើន​ទៅឱ្យ​ក្រុមគ្រួសារ​កូនចៅ​របស់​លោក និង​ក្រុម​ឧកញ៉ា​ឈ្នួ​ញ​គ្រាក់ៗ ព្រមទាំង​ក្រុមហ៊ុន​ឯកជន​ដែល​ផ្តល់​ផលប្រយោជន៍​ឱ្យ​លោក ដើម្បី​ឱ្យ​អ្នក​ទាំងនោះ ចាក់​ដី​លុប​តំបន់​ធនធានធម្មជាតិ​ដើម្បី​សាងសង់ ជា​អគារ វិឡា ខុន​ដូ ផ្ទះល្វែង សម្រាប់​ធ្វើ​អាជីវកម្ម​ឯកជន​ដូច​នៅ​តំបន់​បឹង​តា​មោក​ជាដើម​។​

ប្រជាពលរដ្ឋ និង​សង្គម​ស៊ីវិល​ព្រួយបារម្ភ​ថា បើ​អាជ្ញាធរ នៅតែ​ព្យាយាម​បិទបាំង​ព័ត៌មាន​ពី​គម្រោង​អភិវឌ្ឍ​ទន្លេបាទី វាសនា​តំបន់​អភិរក្ស​នៃ​ផ្ទៃ​ទន្លេបាទី​នេះ ក៏​មិន​ខុសពី​តំបន់​បឹង​តា​មោក ដែល​ត្រូវបាន​ឈ្មួញ អ្នកមាន​លុយ មានអំណាច បង្កើត​ទីក្រុង​រណប​ទំន​ប​គ្រប់គ្រង​ធ្វើ​អាជីវកម្ម​ផ្ដាច់មុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល