ប្រជាពលរដ្ឋ ព្រះសង្ឃនៃសហគមន៍ព្រៃឈើ រួមទាំងអង្គការសិទ្ធិមនុស្សក្រៅរដ្ឋាភិបាល កំពុងព្រួយបារម្ភថា គម្រោងសាងសង់ទំនប់ទឹកឈ្មោះស្ទឹងស្រែងទី២ ដែលគ្រោងនឹងចាប់ផ្ដើមអនុវត្តដោយក្រុមហ៊ុនចិន នៅចន្លោះភូមិសាស្ត្រស្រុកចុងកាល់ និងស្រុកអន្លង់វែង ខេត្តឧត្តរមានជ័យ គឺអាចនឹងធ្វើឲ្យលិចលង់ស្រែចម្ការ និងធនធានធម្មជាតិជាច្រើនទៀតនៅពេលខាងមុខ។
ក៏ប៉ុន្តែ អាជ្ញាធរខេត្តឧត្តរមានជ័យ អះអាងថា បន្ទាប់ពីការចុះសិក្សាជំហានដំបូងរកឃើញថា ការប៉ះពាល់ដោយសារគម្រោងសាងសង់ទំនប់ទឹកនោះ គឺមានតិចតួច ដែលមិនគួរឲ្យព្រួយបារម្ភទេ។
គណៈកម្មការអន្តរក្រសួងរបស់រដ្ឋាភិបាល និងអាជ្ញាធរខេត្តឧត្តរមានជ័យ បានចុះទៅពិនិត្យនៅភូមិចំនួន៣ ក្នុងឃុំត្រពាំងតាវ និងឃុំលំទង ស្រុកអន្លង់វែង ដើម្បីសិក្សាអំពីការប៉ះពាល់នានាដែលអាចនឹងកើតមានឡើង ដោយសារគម្រោងសាងសង់ទំនប់ទឹកស្ទឹងស្រែងទី២ ដើម្បីយកទឹកស្រោចស្រពកសិកម្ម ដែលក្រុមហ៊ុនចិន នឹងចាប់ផ្ដើមអនុវត្តការសាងសង់នាពេលខាងមុខ។
អភិបាលខេត្តឧត្តរមានជ័យ គឺលោក ស ថាវី។ លោកមានប្រសាសន៍កាលពីព្រឹកថ្ងៃពុធ ទី៦ ខែឧសភា ថា គណៈកម្មការរបស់ខេត្ត និងមន្ត្រីអន្តរក្រសួង បានចុះទៅពិនិត្យមើលនៅភូមិទំនប់ថ្មី ភូមិចារ ឃុំត្រពាំងតាវ និងភូមិគោកសំព័រ នៃឃុំលំទង ស្រុកអន្លង់វែង កាលពីថ្ងៃទី៥ ខែឧសភា កន្លងទៅ។ ការចុះសិក្សានេះរកឃើញថា គម្រោងសង់ទំនប់ទឹកស្ទឹងស្រែងទី២ ដើម្បីយកទឹកស្រោចស្រពកសិកម្ម ដែលនឹងចាប់ផ្ដើមអនុវត្តដោយក្រុមហ៊ុនចិន ឈ្មោះ ស៊ីណូហៃក្រូ នៅពេលខាងមុខ គឺអាចមានទឹកលិចដីស្រែចម្ការអ្នកភូមិតិចតួច។ បញ្ហានេះ អាជ្ញាធរកំពុងចាប់ផ្ដើមស្រង់យកទិន្នន័យនៃការប៉ះពាល់ ដើម្បីឈានទៅដល់គោលនយោបាយសងការខូចខាតវិញ៖ «ក្រុមការងារទើបតែចេញដំណើរ និងចុះសិក្សា អ៊ីចឹងបើរកឃើញផលប៉ះពាល់ប៉ុណ្ណា គឺនឹងដោះស្រាយទៅតាមតម្លៃទីផ្សារ។ ការងារនេះ គឺក្រុមការងារកំពុងតែបន្តចុះវាស់វែងសិន បើលិចកន្លែងណា គឺដោះកន្លែងហ្នឹង»។
ការចុះសិក្សាអំពីការប៉ះពាល់ទៅលើដីស្រែចម្ការ និងលំនៅឋានរបស់ប្រជាពលរដ្ឋនេះ បានធ្វើឡើងបន្ទាប់ពីមានការព្រួយបារម្ភពីប្រជាពលរដ្ឋជាច្រើន រស់នៅជុំវិញតំបន់នៃគម្រោងសាងសង់ទំនប់ទឹកស្ទឹងស្រែងទី២ នោះ។
អាជ្ញាធរខេត្តឧត្តរមានជ័យ ឲ្យដឹងថា គម្រោងសាងសង់ទំនប់ទឹកស្ទឹងស្រែងទី២ នេះ អាចនឹងស្តុកទឹកទុកប្រើប្រាស់លើវិស័យកសិកម្មបានប្រមាណ ២០ម៉ឺនម៉ែត្រគូប ហើយបើទំនប់ទឹកសាងសង់រួចរាល់ គឺនឹងអាចផ្គត់ផ្គង់ទៅឲ្យកសិករប្រើប្រាស់បាន ៣ខេត្ត ដូចជាខេត្តឧត្តរមានជ័យ ខេត្តសៀមរាប និងខេត្តបន្ទាយមានជ័យ។
ទោះយ៉ាងណា ប្រធានសហគមន៍ព្រៃឈើសង្ឃរុក្ខវ័ន្ត ព្រះភិក្ខុ ប៊ុន សាលួត ដែលទទួលការពារព្រៃឈើជាង ១ម៉ឺនហិកតារ មានព្រះថេរដីកាថា នៅពេលណាទំនប់ទឹកស្ទឹងស្រែងទី២ មានរូបរាងឡើងនោះ ព្រៃការពាររបស់ព្រះអង្គប្រមាណ ២ពាន់ហិកតារ នឹងលិចលង់។ ព្រះអង្គព្រួយបារម្ភថា ទំនប់ទឹកនោះមិនមែនបង្កការប៉ះពាល់តែព្រៃឈើប៉ុណ្ណោះទេ គឺអាចធ្វើឲ្យប៉ះពាល់ដល់ភ្នំប្រវត្តិសាស្ត្រ និងតំបន់រ៉ែធម្មជាតិខ្លះទៀតផង៖ «អាត្មាព្រួយបារម្ភណាស់ ទី១ បាត់បង់តំបន់អេកូទេសចរណ៍។ ទី២ បាត់បង់ភ្នំប្រវត្តិសាស្ត្រ ភ្នំរូងដែកភ្នំអី ហើយនិងបាត់បង់រ៉ែ ព្រោះទីនោះមានរ៉ែមាស និងរ៉ែដែក»។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ លោក ស្រី ណារ៉េន មានប្រសាសន៍ប្រហាក់ប្រហែលគ្នាថា តាមលោកចុះទៅពិនិត្យនៅតំបន់ភ្នំសេកស កាលពីពេលថ្មីៗឃើញថា គម្រោងសាងសង់ទំនប់ទឹកស្ទឹងស្រែងទី២ នឹងធ្វើឲ្យប៉ះពាល់ដល់ដីស្រែចម្ការ និងព្រៃសហគមន៍របស់ព្រះសង្ឃខ្លះនៅក្នុងភូមិសាស្ត្រស្រុកអន្លង់វែង និងប៉ះពាល់ដល់ប្រជាពលរដ្ឋមួយចំនួនទៀតនៅភូមិស្រះកែវ ឃុំពង្រ ស្រុកចុងកាល់ ទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។