ស្ថានភាពទឹកជំនន់នៅតាមទន្លេ បន្តហក់ឡើងជិតដល់កម្រិតប្រកាសអាសន្ន
2024.09.26
ស្ថានភាពទំនប់អាងទឹកថ្មី ក្នុងខេត្តឧត្តរមានជ័យ នៅថ្ងៃទី២៦ ខែកញ្ញា ឆ្នាំ២០២៤។
រូប៖ ហ្វេសប៊ុកក្រសួងធនធានទឹក
ទឹកជំនន់ប៉ែកខាងលើនៃអាងទន្លេមេគង្គ នៅក្នុងខេត្តក្រចេះ និងស្ទឹងត្រែង កំពុងហក់ឡើង ជិតដល់កម្រិតប្រកាសអាសន្ន ខណៈពលរដ្ឋមួយចំនួនត្រៀមជម្លៀសខ្លួន និងសត្វពាហនៈរកទីទួលសុវត្ថិភាព ប្រសិនបើទឹកនៅតែបន្តឡើងថែមទៀត។ ក្រសួងធនធានទឹក អំពាវនាវឱ្យប្រជាពលរដ្ឋមានការប្រុងប្រយ័ត្ន ខណៈតំបន់មួយចំនួនដែលនៅជាប់មាត់ទន្លេ កម្ពស់ទឹកអាចនឹងឡើងដល់កម្រិតប្រកាសអាសន្ន។
បន្ទាប់ពីព្យុះមួយចំនួនបានបោកបក់មកលើប្រទេសកម្ពុជា នាំឱ្យមានភ្លៀងធ្លាក់ឥតស្រាកស្រាន្តជិតកន្លះខែ ពេលនេះខេត្តមួយចំនួននៅតាមបណ្ដោយទន្លេមេគង្គ រួមមានខេត្តក្រចេះ ស្ទឹងត្រែង ត្បូងឃ្មុំ និងកំពង់ចាម នៅតែរងការជន់លិច ខណៈខេត្តមួយចំនួនទៀត ត្រៀមខ្លួនប្រកាសអាសន្ន និងជម្លៀសពលរដ្ឋ។
ពលរដ្ឋនៅឃុំដារ ស្រុកចិត្របុរី ខេត្តក្រចេះ លោក នុត សំណាង ប្រាប់វិទ្យុអាស៊ីសេរី នៅថ្ងៃទី២៥ ខែកញ្ញា ថា ទឹកទន្លេមេគង្គ បានឡើងរហូតដល់ហៀរមាត់ច្រាំង និងជន់លិចនៅតាមតំបន់ទំនាបមួយចំនួន។ លោកបន្តថា ប្រសិនបើទឹកទន្លេមេគង្គ នៅតែបន្តឡើងតែ ៣តឹកឬ ៣០សង់ទីម៉ែត្រទៀត នឹងដល់កម្រិតប្រកាសអាសន្ន ខណៈប្រជាពលរដ្ឋដែលរស់នៅតាមមាត់ទន្លេមួយចំនួន បានជម្លៀសទៅរកទីទួលសុវត្ថិភាពបណ្ដើរៗហើយ។
លោក នុត សំណាង៖ «ប្រសិនជានៅតែភ្លៀងបន្តធ្លាក់ទៀតហ្នឹង អាចនឹងលិចប្រកាសអាសន្ន (ទឹក)អាចនឹងឆ្លងផ្លូវ។ ផ្លូវចន្លោះពីខេត្ត ទៅស្រុកឆ្លូង វាមានផ្លូវខ្លះរាងទាប»។
សេចក្ដីប្រកាសព័ត៌មានរបស់ក្រសួងធនធានទឹក និងឧតុនិយម នៅថ្ងៃទី២៥ ខែកញ្ញា ឱ្យដឹងថា ទឹកទន្លេមេគង្គ ខេត្តក្រចេះ បានបន្តឡើងមានកម្ពស់ ២១,៥៥ម៉ែត្រ ខណៈកម្រិតទឹកប្រកាសអាសន្ន មានកម្ពស់ ២២ម៉ែត្រ ចំណែកទឹកទន្លេមេគង្គ ខេត្តស្ទឹងត្រែង បានឡើងដល់កម្ពស់ ១០,៤០ម៉ែត្រ ខណៈកម្រិតប្រកាសអាសន្ន មានកម្ពស់ ១០,៧០ម៉ែត្រ។ ទោះយ៉ាងណា ក្រសួងបានព្យាករណ៍ថា ស្ថានភាពទឹកទន្លេមេគង្គ នៅខេត្តក្រចេះ និងស្ទឹងត្រែង នឹងស្រកចុះទៅវិញនៅថ្ងៃស្អែក។
ដោយឡែកនៅខេត្តកំពង់ចាម ទឹកជំនន់ទន្លេមេគង្គ បានធ្វើឱ្យលិចផ្ទះ វត្តអារាម ផ្លូវថ្នល់ និងហូរបាក់ច្រាំងបណ្ដាលឱ្យប៉ះពាល់ផ្ទះប្រជាពលរដ្ឋមួយចំនួន នៅស្រុកកំពង់សៀម។ ចំណែកនៅតំបន់រាជធានីភ្នំពេញ និងកោះនរា ស្ថានភាពកម្ពស់ទឹកទន្លេ បានហក់ឡើងខ្ពស់ ខណៈក្រសួងធនធានទឹក បានអំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុនី ប្រាប់សារព័ត៌មានក្នុងស្រុក នៅថ្ងៃទី២៥ ខែកញ្ញា ថា ស្ថានភាពទឹកទន្លេមេគង្គ ទន្លេសាប និងទន្លេបាសាក់ កំពុងបន្តហក់ឡើង នៅថ្ងៃទី២៥ ខែកញ្ញា ហើយតំបន់ខ្លះ អាចនឹងឡើងដល់កម្រិតប្រកាសអាសន្នថែមទៀត។ អ្នកនាំពាក្យរូបនេះ អះអាងថា រដ្ឋាភិបាលបានត្រៀមស្បៀងអាហារប្រមាណ ២ម៉ឺនតោន គ្រាប់ពូជស្រូវ ៥ពាន់តោន និងគ្រាប់ពូជដំណាំផ្សេងទៀត ១០០តោន ដើម្បីផ្ដល់ជូនពលរដ្ឋដែលមានដំណាំរងការខូចខាត ដោយសារទឹកជំនន់។
ទាក់ទិនរឿងនេះ មន្ត្រីសម្របសម្រួលសមាគមអាហុក ខេត្តក្រចេះ លោក យ៉ុន អ៊ាម សង្កេតឃើញថា ពលរដ្ឋមួយចំនួនចាប់ផ្ដើមជម្លៀសសត្វពាហនៈ និងសម្ភារៈមួយចំនួនមកទុកនៅតាមបណ្ដោយផ្លូវជាតិ ខណៈភ្លៀងនៅតែបន្តធ្លាក់នៅតាមតំបន់មួយចំនួនក្នុងខេត្តនេះ។
លោក យ៉ុន អ៊ាម៖ «ទីមួយគឺយើងស្នើសុំឱ្យប្រជាពលរដ្ឋមានការប្រុងប្រយ័ត្ន មានកូនតូចៗ ដែលរស់នៅតាមដងទន្លេ។ ហើយទី២ សុំឱ្យគាត់ថែទាំសុខភាព ព្រោះដោយសារទឹកឡើងបែបនេះ គឺមានបញ្ហាច្រើន ពិសេសគឺមានមូសច្រើន ហើយអាចឆ្លងជំងឺផ្សេងៗកើតឡើង។ ហើយស្នើសុំឱ្យអាជ្ញាធរ ជួយសម្រួលពួកគាត់ក្នុងការរស់នៅ ហើយជួយជម្លៀសពួកគាត់ទៅរកទីទួលសុវត្ថិភាព»។
របាយការណ៍ គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា គិតត្រឹមថ្ងៃទី២៥ ខែកញ្ញា មានខេត្តចំនួន៩ ដែលរងការជន់លិចដោយសារជំនន់ទឹកភ្លៀង រួមមានខេត្តស្ទឹងត្រែង ព្រះវិហារ កំពង់ធំ កំពង់ស្ពឺ ព្រះសីហនុ កោះកុង ក្រចេះ ពោធិ៍សាត់ និងបាត់ដំបង បានធ្វើឱ្យប៉ះពាល់ប្រជាពលរដ្ឋជាង ១ម៉ឺន ៤ពាន់គ្រួសារ ប៉ះពាល់ផ្ទះសម្បែងចំនួន ៥ពាន់ ៤រយខ្នង និងប៉ះពាល់ស្រូវជាង ៩ពាន់ហិកតារ(៩.៤០០)។
ជាមួយគ្នានេះ ទឹកជំនន់ និងខ្យល់ព្យុះ ក៏បានសម្លាប់ពលរដ្ឋចំនួន ៣នាក់ នៅឃុំដារ ស្រុកចិត្របុរី ខេត្តក្រចេះ កាលពីថ្ងៃទី២០ ខែកញ្ញា ខណៈពួកគេកំពុងជិះទូកដឹកដំឡូងឆ្លងទឹកទន្លេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ