ពលរដ្ឋ​ជាច្រើន​គ្រួសារ​នៅ​ខេត្ត​បាត់ដំបង​ខ្វះ​ទឹក​ប្រើប្រាស់​ប្រចាំថ្ងៃ

ដោយ សេក បណ្ឌិត
2019-12-26
អ៊ីម៉ែល
មតិ
Share
បោះពុម្ព
ប្រជា​ពលរដ្ឋ​ដែល​ខ្វះទឹក​ប្រើប្រាស់​ជួបជុំ​គ្នា​នៅ​ភូមិ​ស្ថាពរ២​ ឃុំ​អំពិលប្រាំដើម ស្រុក​បវេល ខេត្ត​បាត់ដំបង។ រូប​ថត​ពី​ថ្ងៃ​ទី២៣ ធ្នូ ២០១៩។
ប្រជា​ពលរដ្ឋ​ដែល​ខ្វះទឹក​ប្រើប្រាស់​ជួបជុំ​គ្នា​នៅ​ភូមិ​ស្ថាពរ២​ ឃុំ​អំពិលប្រាំដើម ស្រុក​បវេល ខេត្ត​បាត់ដំបង។ រូប​ថត​ពី​ថ្ងៃ​ទី២៣ ធ្នូ ២០១៩។
Photo Provided

ប្រជាពលរដ្ឋ​រាប់​រយ​គ្រួសារ​នៅ​ស្រុក​បវេល ខេត្ត​បាត់ដំបង កំពុង​ខ្វល់ខ្វាយ​ពី​ការ​ខ្វះ​ទឹក​ប្រើប្រាស់​ប្រចាំថ្ងៃ ដោយសារ​គ្រោះ​រាំងស្ងួត។ អ្នក​ភូមិ​នាំគ្នា​ទៅ​ដងទឹក​ឆ្ងាយ​ពី​ផ្ទះ​ចម្ងាយ​ពី ២ ទៅ ៤​គីឡូម៉ែត្រ ដើម្បី​យក​ទឹក​មក​ប្រើប្រាស់។

ប្រជាពលរដ្ឋ​រស់នៅ​ភូមិ​ស្ថាពរ​២ ឃុំ​អំពិល​ប្រាំ​ដើម ស្រុក​បវេល លោក ប៉ែន សៀង ឱ្យ​ដឹង​នៅ​ថ្ងៃ​ទី​២៦ ធ្នូ ថា ប្រជា​ពលរដ្ឋ​នៅ​ក្នុង​ភូមិ​លោក​ខ្វះ​ទឹក​ប្រើ​ប្រចាំថ្ងៃ​ជិត ១​ខែ​ហើយ ដោយសារ​នៅ​តំបន់​នោះ​គ្មាន​ភ្លៀង​ធំ​ជាច្រើន​ខែ ហើយ​ក្នុង​ភូមិ​នោះ ក៏​មិន​មាន​ស្រះ​ស្តុក​ទឹក​ប្រើប្រាស់​ដែរ។ លោក​បន្ត​ថា សព្វថ្ងៃ​ពួកគាត់​ទិញ​ទឹក​ពី​ប្រជាពលរដ្ឋ​ដឹក​តាម​រថយន្ត​យក​មក​លក់ ដោយ​ទឹក ៥០០​លីត្រ​តម្លៃ ២​ម៉ឺន​៥​ពាន់​រៀល (២៥.០០០)។ លោក​បញ្ជាក់​ថា ពលរដ្ឋ​ខ្លះ​គ្មាន​ប្រាក់​ទិញ​ទឹក គឺ​នាំគ្នា​ទៅ​ដងទឹក​តាម​ប្រឡាយ និង​ស្រះ ដែល​ឆ្ងាយ​ពី​ផ្ទះ​ពី ២​ទៅ ៤​គីឡូម៉ែត្រ រួច​ច្រក​ប៊ីដុង​ដឹក​តាម​គោយន្ត​នឹង​ម៉ូតូ​មក​ប្រើ​ប្រចាំថ្ងៃ៖ «រាល់​ឆ្នាំ​មក​មាន​ទឹកភ្លៀង​សល់​ក្នុង​ប្រឡាយ​អាច​ប្រើ​បាន​ខ្លះ តែ​ឆ្នាំនេះ​អត់​មាន​ទឹក​សោះ។ ក្នុង​មួយ​ឆ្នាំ​អាជ្ញាធរ​ដឹក​ទឹក​ចែក​បាន​ធុង​ក៏​ឈប់​ចែក​ទៅ មិនមែន​យក​ប្រេង​មក​ចែក​ទេ​យក​ទឹក​មក​ចែក​បាន​មួយ​ប៊ីដុង យក​មក​ចែក​មាន​ប៉ុន្មាន​គ្រួសារ​ហ្នឹង​ក៏​បាត់​អស់​ទៅ។ បើ​អីចឹង​យើង​និយាយ​បាន​ប្រយោជន៍​អី​បើ​អាជ្ញាធរ​ចុះ​មក​ឃើញ​ហើយ​គាត់​មិន​យកចិត្តទុកដាក់​ផង»

លោក​បន្ត​ថា ពួកគាត់​បាន​ស្នើ​សុំ​ទៅ​អាជ្ញាធរ​ឃុំ និង​ស្រុក ដើម្បី​ឱ្យ​ជីក​ស្រះ​ស្តុក​ទឹកជា​ច្រើន​ឆ្នាំ​ហើយ ប៉ុន្តែ​មិន​មាន​អាជ្ញាធរ​ណា​អើពើ​ជួយ​ដល់​ពួកគាត់​ឡើយ​។ លោក​ថា សព្វថ្ងៃ​ប្រជាពលរដ្ឋ​ដែល​ខ្វះ​ទឹក​ប្រើប្រាស់ គឺ​នៅ​ឃុំ​បឹង​ប្រាំ អំពិល​ប្រាំ​ដើម និង​ឃុំ​ព្រៃ​ខ្ពស់ ក្នុងស្រុក​បវេល។

មេឃុំ​ព្រៃ​ខ្ពស់​លោក ហាច ហាន ប្រាប់​អាស៊ីសេរី​ថា អាជ្ញាធរ​បាន​ចែក​ប្រេង​ឱ្យ​ពលរដ្ឋ​យក​ទៅ​បូម​ទឹក និង​ដឹក​ទឹក​តាម​ឡាន ចែក​ជូន​ពលរដ្ឋ​តាម​ផ្ទះ​មួយ​ចំនួន​ហើយ​។ លោក​បញ្ជាក់​ថា ប្រជាពលរដ្ឋ​រាប់រយ​គ្រួសារ​ខ្វះ​ទឹក​ប្រើប្រាស់ ជាពិសេស​នៅ​ឃុំ​បឹង​ប្រាំ​ខ្វះខាត​ជាងគេ៖ «នៅ​ឃុំ​ខ្ញុំ​អត់​ទឹក​ពី​ពាក់កណ្ដាល​ខែ​វិច្ឆិកា​មក ហើយ​បើ​សិន​មិន​មាន​ភ្លៀង​គឺ​ដាច់​ទឹក​ច្រើន​គ្រួសារ។ ខ្ញុំ​បាន​ស្នើ​ទៅ​អភិបាលខេត្ត​ដើម្បី​បូម​ទឹក​ដាក់​តំបន់​ដែល​ដាច់​ទឹក​នៅ​ក្នុង​ឃុំ​ខ្ញុំ​នេះ ប្រជាពលរដ្ឋ​ដាច់​ទឹក​នៅ​ឃុំ​ខ្ញុំ​មាន​ជាង ១០០​គ្រួសារ ពួកគាត់​រស់នៅ​ឆ្ងាយ​ពី​សាលាឃុំ​១២​គីឡូម៉ែត្រ។ នៅ​ក្នុង​ឃុំ​ខ្ញុំ​មិនសូវ​អី​ទេ វា​យ៉ាប់​តែ​ពលរដ្ឋ​នៅ​ឃុំ​បឹង​ប្រាំ និង​អំពិល​ប្រាំ​ដើម​ដែល​ជួប​ការ​លំបាក​ខ្លាំង ព្រោះ​ដឹក​ទឹក​ចែក​តាំងពី​ខែ​តុលា មក»

ទាក់ទង​នឹង​បញ្ហា​នេះ​អភិបាល​ខេត្ត​បាត់ដំបង លោក ងួន រតនៈ មាន​ប្រសាសន៍​ថា ការ​ខ្វះខាត​ទឹក​មិនទាន់​ដល់​កម្រិត​ប្រកាស​អាសន្ន​នោះ​ទេ ហើយ​អាជ្ញាធរ​ខេត្ត​ក៏​បាន​បញ្ជូន​ប្រេងម៉ាស៊ូត​ទៅ​អាជ្ញាធរ​មូលដ្ឋាន​ចែក​ជូន​ប្រជាពលរដ្ឋ​រួច​ហើយ៖ «ខ្ញុំ​បាន​ធ្វើ​វេទិកា សាធារណៈ​ថ្ងៃមុន​បាន​គាត់​បាន​ស្នើ​ប្រេង​ទៅ​បូម​ទឹក ហើយ​យើង​បាន​ផ្ដល់​ឱ្យ​ទៅ​គាត់​ហើយ។ នៅ​តំបន់​នោះ​គាត់​មាន​អណ្ដូង​បុក និង​ស្រះ​ទឹក​តូចៗ បាទ​!​សម្រាប់​ទឹក​ប្រើប្រាស់​ហ្នឹង​ដូច​មិន​អី​ទេ»

មន្ត្រី​សម្របសម្រួល​សមាគម​ការពារ​សិទ្ធិមនុស្ស អាដហុក (Adhoc) ខេត្ត​បាត់ដំបង លោក យិន ម៉េងលី ថ្លែង​ថា រឿង​នេះ អាជ្ញាធរ​ពាក់ព័ន្ធ​ត្រូវ​ដោះស្រាយ​ជួយ​ដល់​ប្រជាពលរដ្ឋ​ជាបន្ទាន់ ព្រោះ​ការ​ខ្វះខាត​ទឹក​ប្រើ​ជា​កត្តា​ធ្វើ​ឱ្យ​ពលរដ្ឋ​កាន់តែ​ក្រីក្រ ដោយសារ​ពួកគាត់​ត្រូវ​ចំណាយ​ប្រាក់​បន្ថែម​ទៀត​ដើម្បី​ទឹក​ប្រើប្រាស់​ប្រចាំថ្ងៃ។

លោក ប៉ែន សៀង ប៉ាន់​ស្មានថា ក្នុង​រយៈពេល​ប្រមាណ ២​ខែ​ខាងមុខ​ទៀត នឹង​មាន​ពលរដ្ឋ​នៅ​ស្រុក​បវេល​រាប់ពាន់​គ្រួសារ​ប្រឈម​នឹង​ខ្វះ​ខាត​ទឹក​ធ្ងន់ធ្ងរ ដោយសារ​សព្វថ្ងៃ​ទឹកស្រះ ដែល​អ្នក​ភូមិ​ទៅ​ដង​យក​មក​ប្រើ​នៅ​សល់​ទឹក​ជម្រៅ​ប្រហែល​មួយ​ម៉ែត្រ​ប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល