មន្ត្រីខណ្ឌរដ្ឋបាលព្រៃឈើខេត្តសៀមរាបគ្រោងដោះលែងសត្វព្រៃដែលចាប់បានពីអ្នកជួញដូរ
2017.08.31
សត្វអណ្ដើកភ្នំដែលមន្ត្រីរដ្ឋបាលព្រៃឈើខេត្តសៀមរាប រឹបអូសពីឡានក្រុងដែលក្រុមឈ្មួញដឹកជញ្ជូនយកទៅជួញដូរដោយខុសច្បាប់។ រូបថតថ្ងៃទី៣០ ខែសីហា ឆ្នាំ២០១៧។
RFA/Hang Savyouth
មន្ត្រីរដ្ឋបាលព្រៃឈើខេត្តសៀមរាប ឲ្យដឹងថា បច្ចុប្បន្នការជួញដូរសត្វព្រៃជាច្រើនប្រភេទ នៅតែកើតមាន ដោយសារតែសមត្ថកិច្ចមិនទាន់គ្រប់គ្រងទីផ្សារងងឹតនៃការជួញដូរសត្វព្រៃបានទាំងអស់នៅឡើយ។
រយៈពេល ៨ខែឆ្នាំ២០១៧ នេះ មន្ត្រីខណ្ឌរដ្ឋបាលព្រៃឈើខេត្តសៀមរាប ដែលសហការជាមួយនឹងអង្គការអភិរក្សសត្វព្រៃ (Wild Aid) តែងចុះបង្ក្រាបការយកសាច់សត្វព្រៃទៅចម្អិនធ្វើម្ហូបនៅតាមភោជនីយដ្ឋាន ការជួញដូរសត្វព្រៃខុសច្បាប់ ព្រមទាំងការក្លែងបន្លំធ្វើជាសរីរាង្គរបស់សត្វព្រៃ ដើម្បីដាក់លក់ទៅឲ្យភ្ញៀវទេសចរនៅលើខ្នងភ្នំគូលែន ជាដើម។
មន្ត្រីខណ្ឌរដ្ឋបាលព្រៃឈើខេត្តសៀមរាប គ្រោងនឹងបង្កើតគណៈកម្មការចម្រុះមួយមានកងរាជអាវុធហត្ថ មានប៉ូលិស ព្រមទាំងអាជ្ញាធរមូលដ្ឋាន ដើម្បីដោះលែងសត្វអណ្ដើកភ្នំចំនួន ២០ក្បាលទម្ងន់ជាង ១៥០គីឡូក្រាម និងសត្វត្រកួត ចំនួន ៥ក្បាល ទម្ងន់ ២០គីឡូក្រាមទៅក្នុងព្រៃធម្មជាតិវិញនៅថ្ងៃទី៣១ ខែសីហា។
សត្វព្រៃដែលគេនឹងលែងវិញនេះ គឺចាប់បានពីអ្នកជួញដូរសត្វព្រៃខុសច្បាប់ដែលដឹកចេញពីខេត្តសៀមរាប សំដៅទៅក្រុងភ្នំពេញ តាមរថយន្តក្រុង ១គ្រឿងរបស់ក្រុមហ៊ុន គ្រីស្ដាល់ អ៊ិចស្ព្រេស (Crystal Express)។
មន្ត្រីចល័តរបស់ផ្នែករដ្ឋបាលព្រៃឈើបន្ទាយស្រី គឺលោក ឡឹង សុខា។ លោកមានប្រសាសន៍នៅរសៀលថ្ងៃពុធ ទី៣០ ខែសីហា ថា សត្វអណ្ដើកភ្នំចំនួន ២០ក្បាល និងត្រកួត ៥ក្បាលនោះ គឺលោកបានទៅទទួលយកពីផ្នែកព្រហ្មទណ្ឌនៃកងរាជអាវុធហត្ថខេត្តសៀមរាប ប៉ុន្តែលោកមិនដឹងថាកម្លាំងកងរាជអាវុធហត្ថចាប់នៅកន្លែងណាឡើយ៖ «និយាយឲ្យអស់ទៅ ការងារនោះ គឺប៉េអិមអ្នកចាប់។ គេចាប់ពីត្រឹមណាមក ក៏ខ្ញុំអត់ដឹង គ្រាន់តែនាយខណ្ឌរដ្ឋបាលព្រៃឈើខេត្តប្រើឲ្យខ្ញុំទៅទទួល។ ខ្ញុំក៏ទៅយកមក»។
នាយខណ្ឌរដ្ឋបាលព្រៃឈើខេត្តសៀមរាប លោក ម៉ុង ប៊ុនលីម ឲ្យដឹងថា អណ្ដើកភ្នំចំនួន ២០ក្បាលទម្ងន់ ១៥៦គីឡូក្រាម និងសត្វត្រកួត ៥ក្បាលទម្ងន់ ២០គីឡូក្រាមនោះ គឺកម្លាំងកងរាជអាវុធហត្ថបានស្ទាក់រថយន្តក្រុង ១គ្រឿង ហើយចាប់បាននៅភូមិស្ពានត្នោត ឃុំល្វែងឫស្សី ស្រុកជីក្រែង កាលពីរាត្រីថ្ងៃទី២៨ ខែសីហា។
លោក ម៉ុង ប៊ុនលីម ឲ្យដឹងទៀតថា ខណ្ឌរដ្ឋបាលព្រៃឈើខេត្តសៀមរាប គ្រោងនឹងដោះលែងសត្វព្រៃទាំងនោះទៅក្នុងព្រៃធម្មជាតិវិញនៅតំបន់អភិរក្សពូជគ្រញូង ក្នុងស្រុកបន្ទាយស្រី នៅថ្ងៃទី៣១ ខែសីហា៖ «សត្វនៅរស់ យើងមិនអាចទុកយូរទៀតបានទេ ខ្លាចវាងាប់ អ៊ីចឹងហើយរដ្ឋបាលព្រៃឈើនឹងបង្កើតគណៈកម្មការមួយមានប៉ូលិស ប៉េអិម និងអាជ្ញាធរមូលដ្ឋាន ទៅចូលរួមលែងសត្វព្រៃទាំងនោះ»។
មន្ត្រីខណ្ឌរដ្ឋបាលព្រៃឈើខេត្តសៀមរាប សម្ដែងការព្រួយបារម្ភចំពោះការជួញដូរសត្វព្រៃខុសច្បាប់ ដែលនៅតែកើតមាននៅឡើយ។
ក្នុងរយៈពេល ៨ខែឆ្នាំ២០១៧ នេះ មន្ត្រីខណ្ឌរដ្ឋបាលព្រៃឈើខេត្តសៀមរាប ដែលសហការជាមួយអង្គការអភិរក្សសត្វព្រៃ (Wild Aid) បានចុះបង្ក្រាបការយកសាច់សត្វព្រៃទៅចម្អិនធ្វើម្ហូបនៅតាមភោជនីយដ្ឋានខ្លះ ការជួញដូរសត្វព្រៃមួយចំនួន ព្រមទាំងការក្លែងបន្លំធ្វើជាសរីរាង្គសត្វព្រៃដើម្បីដាក់លក់ឲ្យភ្ញៀវទេសចរនៅលើភ្នំគូលែន ជាដើម បានជាច្រើនករណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ