គម្រោងអច្ឆរិយភាពទន្លេមេគង្គ លែងមេពូជត្រីធំៗ ប្រមាណ ១០០ក្បាល ជាប្រភេទត្រីកម្រជិតផុតពូជ រួមមាន ត្រីគល់រាំង ចំនួន ៣០ក្បាល និងប្រភេទត្រីប្រាធំចំនួន ៧០ក្បាល ចូលក្នុងទន្លេមេគង្គ។
គេហទំព័រគម្រោងអច្ឆរិយភាពទន្លេមេគង្គ ឲ្យដឹងថា មុនលែងត្រីកម្រទាំងនោះ ក្រុមការងារបានបំពាក់ឧបករណ៍តាមដាន និងដាក់ស្លាក ដើម្បីសិក្សាបន្ថែមពីការផ្លាស់ទី និងការវិវឌ្ឍរបស់ត្រីទាំងនោះ។ គម្រោងនេះ គឺជាផ្នែកមួយនៃការសិក្សាឆ្លងដែន នៅតំបន់ដងទន្លេមេគង្គ និងដៃទន្លេនានា នៅប៉ែកខាងជើងប្រទេសកម្ពុជា និងឡាវ។
អ្នកគ្រប់គ្រងកម្មវិធីអច្ឆរិយភាពទន្លេមេគង្គ អ្នកស្រី ជា សីលា ឲ្យដឹងថា ការលែងប្រភេទត្រីកម្រទាំងនេះ កាលពីថ្ងៃទី១៥ ខែឧសភា នៅភូមិសាស្ត្រឃុំកោះព្រះ ស្រុកសៀមបូក ខេត្តស្ទឹងត្រែង គឺមានគោលបំណង ឱ្យសាធារណជន បានស្គាល់អំពីត្រីកម្រជិតផុតពូជ និងចូលរួមការពារ ដើម្បីបង្កើនបរិមាណប្រភេទត្រីកម្រទាំងនោះឡើងវិញ។
នៅទន្ទឹមនេះ អ្នកស្រី ជា សីលា ក៏អំពាវនាវដល់ប្រជានេសាទឲ្យបង្កើនការប្រុងប្រយ័ត្ន និងចូលរួមអភិរក្សត្រីទាំងនោះ ដោយត្រូវដោះលែងវាភ្លាម ក្នុងករណីនេសាទបានហើយនៅរស់មានជីវិត។ ប៉ុន្តែ ប្រសិនបើត្រីនោះងាប់វិញ ត្រូវរាយការណ៍ជាបន្ទាន់ទៅក្រុមការងារគម្រោងអច្ឆរិយភាពទន្លេមេគង្គឬឆ្មាំទន្លេ ដើម្បីចុះទៅពិនិត្យ និងដោះយកឧបករណ៍ទាំងនោះត្រឡប់មកវិញ៕