ក្រុមយុវជន ព្រះសង្ឃ និងជនជាតិដើមភាគតិចជង បន្តអំពាវនាវឱ្យអាជ្ញាធរខេត្តកោះកុងពង្រឹងសមត្ថភាព ការពារព្រៃឈើនៅតំបន់អារ៉ែងឱ្យច្បាស់លាស់ដើម្បីធានាពីសុវត្ថិភាព ធនធានធម្មជាតិនៅតំបន់នោះឱ្យគង់វង្ស។ ការលើកឡើង ក្រោយពីពួកគេបានរួមគ្នា ប្រារព្ធពិធីបំបួសដើមឈើធំៗជាង ៣០ ដើមនៅតំបន់អារ៉ែង ក្នុងបំណងការពារដើមឈើធំៗ ដែលក្រុមឈ្មួញ បានកំណត់គោលដៅកាប់បំផ្លាញ ធ្វើអាជីវកម្ម។
ក្រុមយុវជន និងជនជាតិដើមភាគតិចជងព្រួយបារម្ភពីអនាគត ដើមឈើធំៗ នៅតំបន់អារ៉ែងឋិតក្នុងឃុំជំនាប់ និងឃុំប្រឡាយ ក្នុងស្រុកថ្មបាំង ខេត្តកោះកុង កំពុងប្រឈមការកាប់បំផ្លាញ ធ្វើអាជីវកម្មដោយក្រុមអ្នកមានអំណាច ឃុបឃិតជាមួយអាជ្ញាធរពាក់ព័ន្ធមួយចំនួននៅតំបន់នោះ។
កាលពីចុងសប្តាហ៍កន្លងទៅ (0៦ ដល់ ០៨ មេសា) ក្រុមយុវជនខ្មែរថាវរៈ ព្រះសង្ឃ និង ជនជាតិដើមភាគតិចជងជាង ៥០ អង្គ/នាក់ បានធ្វើពិធីបុណ្យបំបួសដើមឈើ រយៈពេល ២ យប់ និង ៣ ថ្ងៃ ដើម្បីផ្សព្វផ្សាយឱ្យពលរដ្ឋនៅមូលដ្ឋាន និងមហាជនចូលរួមការពារ ព្រៃឈើដែលនៅសេសសល់ចុងក្រោយ នៅតំបន់អារ៉ែងឱ្យគង់វង្សសម្រាប់កូនខ្មែរជំនាន់ក្រោយ។ ការប្រារព្ធពិធីនេះ ឋិតក្រោមការឃ្លាំមើលពីសមត្ថកិច្ចខេត្តកោះកុងជាច្រើននាក់មកសួរនាំ ប៉ុន្តែអាជ្ញាធរមិនបានហាមឃាត់ ពិធីបំបួសដើមឈើរបស់ក្រុមយុវជនទាំងនេះទេ។
តំណាងក្រុមយុវជនខ្មែរថាវរៈលោក ហ៊ុន វណ្ណៈ ប្រាប់វិទ្យុអាស៊ីសេរី នៅថ្ងៃទី១២ ខែមេសាថា គោលបំណងសំខាន់ការប្រារព្ធពិធីនេះ ដើម្បីឱ្យ យុវជន ពលរដ្ឋ និង ព្រះសង្ឃស្គាល់ ពីតម្លៃធនធានធម្មជាតិនៅតំបន់អារ៉ែង ដែលជួយផ្ដល់សេដ្ឋកិច្ចដល់ពលរដ្ឋនៅតំបន់នោះគ្រប់រដូវកាល។ លោកសង្កេតឃើញថា នៅរយៈពេល៤ ខែចុងក្រោយនេះ ដើមឈើធំៗ ជាច្រើនដើម ដុះតាមបណ្តោយដងស្ទឹងអារ៉ែង បានទទួលរងការកាប់ផ្តួល ធ្វើអាជីវកម្មអស់ជាច្រើនដើម។ លើសពីនេះ នៅរយៈពេលជាង ១ ខែចុងក្រោយនេះ ថ្មីត្បិតតែសកម្មភាពកាប់ឈើហាក់ស្ងប់ស្ងាត់បន្តិចក្តី ប៉ុន្តែពួកលោក នៅតែព្រួយបារម្ភពីជោគវាសនា ព្រៃឈើនៅតំបន់នោះ និងកំពុងរកមធ្យោបាយទប់ទល់បទល្មើសព្រៃឈើ៖ «គឺយើងចង់ឱ្យដើមឈើធំៗ ដែលជាគោលដៅរបស់ឈ្មួញកាប់បំផ្លាញ ត្រូវបានការពារតាមរយៈពិធីសាសនា។ ទី២ ផ្សព្វផ្សាយឱ្យក្រុមយុវជន និង ព្រះសង្ឃមានទម្លាប់មួយ ចូលរួមថែរក្សាសម្បត្តិធម្មជាតិ»។
យុវតីដែលចូលរួមពិធីបំបួសដើមឈើ គឺកញ្ញា ផល្លី រស្មី សង្កេតឃើញថា ដើមឈើធំៗ នៅតំបន់នោះ ជាជម្រកយ៉ាងសំខាន់ របស់សត្វខ្លាឃ្មុំ ខ្លា ត្រីនាគ ក្រពើភ្នំ ទោច និង ស្វាជាដើម ប្រសិនបើមិនថែទាំព្រៃឈើឱ្យគង់វង្សទេនោះ សត្វព្រៃកម្រទាំងនេះ នឹងប្រឈមបាត់បង់។ កញ្ញាបញ្ជាក់ថា ដើមឈើធំៗទាំងនោះរួមមាន ក្រញ៉ូង គគីរ បេង និង ឈើទាលជាដើម ជាប្រភពសេដ្ឋកិច្ចដ៏មានតម្លៃ របស់ជនជាតិដើមភាគតិចជង និងទាក់ទាញ់វិស័យទេសចរណ៍៖ «នាងខ្ញុំមានការស្នើសុំ និងសារផ្ញើទៅកាន់ពលរដ្ឋនៅកម្ពុជាទាំងអស់ និងជនមានអំណាច កាប់បំផ្លាញព្រៃឈើ សូមមេត្តា បើគ្មានសមត្ថភាពថែរក្សាព្រៃ កុំកាប់បំផ្លាញព្រៃឈើនៅទីនេះ។ ព្រៃនេះមានសារៈសំខាន់ទ្រទ្រង់ដល់សត្វព្រៃ មនុស្ស សត្វ និង សត្វពាហណៈជាច្រើន ដែលគាត់បានជ្រកនៅទីនេះ»។
ជនជាតិដើមភាគតិចជងរស់នៅភូមិប្រឡាយ ឃុំប្រឡាយ លោក តា មាំ សោកស្តាយដើមឈើធំៗ មានអាយុកាលរាប់រយឆ្នាំ ផ្តល់ប្រយោជន៍សំបូរបែបដល់អ្នកភូមិ ត្រូវគេកាប់ផ្តួលធ្វើអាជីវកម្មអស់ជាច្រើនដើម។ លោកថា អ្នកភូមិមានគ្នាតិច មិនអាចទប់ស្កាត់បទល្មើសព្រៃឈើនៅតំបន់នោះគ្រប់ជ្រុងជ្រោយទេ បានត្រឹមតែសម្រក់ទឹកភ្នែកស្តាយស្រណោះប៉ុណ្ណោះ៖ «ខ្ញុំកាន់តែឃើញដើមឈើ សឹងតែស្រក់ទឹកភ្នែក តែឃើញដឹកទាំងឡាយស្តាយព្រៃឈើខ្លាំងពេក»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីប្រធានមន្ទីរបរិស្ថានខេត្តកោះកុង ហ៊ុន ម៉ារ៉ាឌី និងអភិបាលខេត្តកោះកុង អ្នកស្រី មិថុនា ភូថង បាននៅឡើយទេ នៅថ្ងៃទី១២ ខែមេសា ដោយទូរសព្ទហៅចូល តែគ្មានអ្នកលើក។ ចំណែកអ្នកនាំពាក្យក្រសួងបរិស្ថាន លោក នេត្រ ភក្ត្រា ក៏មិនអាចសុំការបំភ្លឺបានដែរនៅថ្ងៃដដែលនេះ។
កន្លងទៅ លោកនាយករដ្ឋមន្ត្រី ហ៊ុន សែន ធ្លាប់លើកឡើងថា បំណងរបស់លោក ចង់រក្សាតំបន់អារ៉ែង ទុកឲ្យខ្មែរជំនាន់ក្រោយជាអ្នកសម្រេច ថាតើត្រូវធ្វើដូចម្ដេច? ការលើកឡើងនេះ ស្របទៅនឹងអ្វីដែលក្រុមយុវជនខ្មែរថាវរៈ ពលរដ្ឋ និង ព្រះសង្ឃ ចង់រក្សាតំបន់ព្រៃភ្នំអារ៉ែងនេះ ឲ្យគង់វង្សយូរអង្វែង។
ព្រះសង្ឃចូលរួមពិធីបំបួសដើមឈើ គឺព្រះអង្គ ប៊ុន ហៀម អំពាវនាវឱ្យពលរដ្ឋខ្មែរទាំងអស់ ចាប់អារម្មណ៍ និងរួមគ្នាថែរក្សាព្រៃឈើនៅតំបន់អារ៉ែងឱ្យគង់វង្ស ដើម្បីជាជម្រកត្រីពងកូន និងជីវចម្រុះដែលជាប្រភពម្ហូបអាហាររបស់ជនជាតិដើមភាគតិច៖ «ចុះមកតំបន់អារ៉ែងនេះ មានបំណងចង់រក្សាព្រៃឈើឱ្យបានសល់ ឱ្យក្មេងជំនាន់ក្រោយ និងជាផលប្រយោជន៍ឱ្យមនុស្សនៅជុំវិញនេះ»។
ជ្រលងភ្នំអារ៉ែង គឺជាកន្លែងដ៏ស្រស់ស្អាតមួយក្នុងខេត្តកោះកុងដែលមានប្រភេទសត្វព្រៃដ៏កម្រ អមដោយព្រៃឈើដ៏ស្រស់ត្រកាល បន្សល់ចុងក្រោយនៅកម្ពុជា។ តំបន់នោះជាកន្លែងដែលជនជាតិដើមភាគតិចជងជាង ១ ពាន់ ៥រយនាក់ (១.៥០០) កំពុងរស់នៅ ជាមួយនឹងបរិស្ថានធម្មជាតិស្រស់បំព្រង តាមបណ្តោយជ្រលងភ្នំ ដែលមានសត្វព្រៃកម្ររស់នៅរួមមាន សត្វក្រពើភ្នំ ត្រីនាគ ដំរីធំៗជាដើម។ បច្ចុប្បន្នដើមគគីរ និង ដើមឈើទាលជាដើម ដុះតាមបណ្តោយដងស្ទឹងអារ៉ែង ដែលជាអត្តសញ្ញាណប្រពៃណី ជនជាតិដើមភាគតិច កំពុងប្រឈមការបាត់បង់ទាំងស្រុង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។