ក្រុមយុវជនរិះគន់អាជ្ញាធរក្រុងភ្នំពេញថា រៀបចំទុកដាក់សំរាមមិនបានត្រឹមត្រូវអំឡុងពេលប្រកួតកីឡាស៊ីហ្គេមដែលបណ្ដាលឱ្យមានថង់ប្លាស្ទិកនៅពាសពេញខាងមុខកីឡដ្ឋានជាតិអូឡាំពិកដែលប៉ះពាល់ដល់អារម្មណ៍ភ្ញៀវទេសចរ។ ពួកគេស្នើដល់អាជ្ញាធររៀបចំធុងសំរាម និងកន្លែងចោលសំរាមឱ្យមានសោភ័ណភាពដើម្បីទាក់ទាញភ្ញៀវមកទស្សនានៅកម្ពុជា។
ក្រុមយុវជនលើកឡើងស្រដៀងៗគ្នាថា អាជ្ញាធរបណ្ដែតបណ្ដោយឱ្យមានការចោលសំរាមគ្មានសណ្ដាប់ធ្នាប់។ ការលើកឡើងនេះគឺបន្ទាប់ពីការប្រកួតបាល់ទាត់កីឡាស៊ីហ្គេម បុរសអាយុក្រោម ២២ឆ្នាំ រវាងកម្ពុជា និងប្រទេសទីម័រខាងកើត (Timor Leste) បានបញ្ចប់ និងបន្សល់ទុកនៅកាកសំណល់សំរាមរាយប៉ាយ។
សកម្មជនសង្គម លោក ស្វាយ សំណាង ប្រាប់វិទ្យុអាស៊ីសេរីនៅថ្ងៃទី៣០ មេសា ថា អំឡុងពេលកម្ពុជាក្លាយជាម្ចាស់ផ្ទះប្រកួតកីឡាស៊ីហ្គេម អាជ្ញាធរគួរតែបង្កើនការសំអាតអនាម័យនៅតាមទីសាធារណៈឱ្យបានល្អ ដើម្បីមុខមាត់ដល់កម្ពុជា។ លោកបន្តថា គឺជារឿងដ៏អាម៉ាស់នៅពេលរដ្ឋាភិបាលចំណាយលុយរាប់លានដុល្លារ ប៉ុន្តែគ្រាន់តែបញ្ហាសំរាមតូចតាចអាជ្ញាធរធ្វើមិនបាន។ លោក ស្វាយ សំណាង សង្កេតឃើញថា រៀងរាល់ការរៀបចំកម្មវិធីមិនថា បុណ្យជាតិ ឬក៏ព្រឹត្តិការណ៍សំខាន់ៗ អាជ្ញាធរមិនសូវគិតពីប៉ះពាល់នៃសំរាម ហើយអាជ្ញាធរមួយចំនួនទៀតគ្មានទំនួលខុសត្រូវក្នុងការបំពេញការងារនោះទេ ។ លោកបន្តថា អាជ្ញាធរតែងតែស្ដីបន្ទោស និងចោទប្រកាន់ទៅលើយុវជនដែលគិតពីបញ្ហាបរិស្ថាន។
លោក ស្វាយ សំណាង៖ «យុវជនរបស់យើងគាត់ត្រេកត្រអាលហ្នឹងជ័យជំនះទាំងអស់នោះ តែផ្ទុយទៅវិញគាត់មិនបានមើលឃើញពីចំណុចដែលគាត់ចូលរួមបំផ្លាញ គាត់ត្រេកអរ ប៉ុន្តែមិនដឹងថាខ្លួនឯងកំពុងតែធ្វើខុសនៅក្នុងប្រទេសខ្លួនឯងដែលកំពុងតែរៀបចំព្រឹត្តិការណ៍ស៊ីហ្គេមធ្វើឱ្យអន្តរជាតិគេមើលមកថា វាមិនសាកសមជាយុវជនដែលអាចនឹងបន្តវេន ឬក៏ជាទំពាំងស្នងឫស្សីដល់ប្រទេសជាតិបាននេះគឺបានបង្ហាញយ៉ាងច្បាស់ហើយទៅកាន់ប្រទេសដទៃទៀត»។
ស្រដៀងគ្នានេះដែរយុវជនស្រឡាញ់បរិស្ថានម្នាក់ទៀតគឺ កញ្ញា នុត ធិ សាទរដែលកម្ពុជាបានរៀបចំកម្មវិធីដ៏ធំមួយនេះ។ ប៉ុន្តែ កញ្ញា សោកស្ដាយអាជ្ញាធរដែលព្រងើយកន្តើយមិនចូលរួមថែរក្សាបរិស្ថាន ហើយធ្វើឱ្យថង់ប្លាស្ទិកនៅតាមដងផ្លូវរាយប៉ាយព្រោងព្រាត។ កញ្ញាបន្តថា កម្ពុជានឹងបាក់មុខបើបញ្ហាសំរាមគ្រប់គ្រងមិនបាន។
កញ្ញា នុត ធិ៖ «ជាសំណូមពររបស់ខ្ញុំទៅលើដំណោះស្រាយសំរាមហ្នឹង រដ្ឋាភិបាលគួរតែផ្សព្វផ្សាយទៅលើផ្ទាំងប៉ាណូផ្សេងៗ ហើយក៏ដូចជាការលើកទឹកចិត្តការនិយាយផ្ទាល់ហ្នឹង ហើយនឹងអន្តរាគមន៍ទាន់ពេលទៅលើបញ្ហាសំរាមកុំឱ្យមានហោះហើរពេញមេឃអ៊ីចឹង វាអត់ល្អមើលទេនៅពេលដែលយើងជាប្រទេសមួយអត់អាចគ្រប់គ្រងទៅលើសំរាមក្រោយដែលបញ្ចប់កម្មវិធីភ្លាមវាដូចជាព្រិលធ្លាក់នៅកម្ពុជា»។
ប្រតិកម្មរបស់ក្រុមយុវជននេះគឺបន្ទាប់ពីកម្ពុជារៀបចំការប្រកួតកីឡាស៊ីហ្គេម ដែលមានការប្រកួតវិញ្ញាសា ៣ ប្រភេទ រួមមាន បាល់ទាត់បុរសអាយុក្រោម ២២ ឆ្នាំ អុកចត្រង្គ និងកីឡាគ្រីកឃីត (Cricket ) ដោយមានអ្នកចូលរួមច្រើនជាងការប្រកួតបាល់ទាត់រវាងកម្ពុជា និងទីម័រខាងកើត (Timor Leste) កាលពីថ្ងៃទី២៩ មេសា ។ ការចូលរួមទស្សនាច្រើនបែបនេះហើយបានជាមានអ្នកសំរាមចោលពាសពេញកន្លែងទីសាធារណៈ។
វិទ្យុអាស៊ីសេរីមិនអាចទាក់ទងអភិបាលរាជធានីភ្នំពេញ លោក ឃួង ស្រេង និងអ្នកនាំពាក្យសាលារាជធានីភ្នំពេញ លោក ម៉េត មាសភក្តី ដើម្បីបកស្រាយជុំវិញមតិរិះគន់នេះបានទេ នៅថ្ងៃទី៣០ មេសា។
ជុំវិញរឿងនេះអ្នកការពារសិទ្ធិមនុស្ស និងបរិស្ថាន លោក សាន់ ម៉ាឡា មានប្រសាសន៍ថា បញ្ហាសំរាមនៅតាមទីសាធារណៈ និងការប្រគំតន្ត្រី ខាងមុខពហុកីឡដ្ឋានជាតិអូឡាំពិក នេះគឺដោយសារតែអាជ្ញាធរមិនបានផ្សព្វផ្សាយដល់សាធារណជនឱ្យបានយល់ដឹង ហើយជាពិសេសអាជ្ញាធរគួរតែមានវិធានការតឹងរ៉ឹងចំពោះអ្នកដែលចោលសំរាមផ្ដេសផ្ដាស ។ លោកបន្តថា លោកខកចិត្តនៅពេល ដែលរដ្ឋចំណាយថវិកាជាតិច្រើនដើម្បីរៀបចំកម្មវិធីស៊ីហ្គេម ប៉ុន្តែបែរជាធ្វើឱ្យមានមតិរិះគន់ពីប្រជាពលរដ្ឋរឿងកង្វះអនាម័យទៅវិញ។
លោក សាន ម៉ាឡា៖ «ធម្មតាទេនៅតំបន់ជួបជុំរបស់យុវវ័យមានសំរាមអ៊ីចឹង គេអាចវាយតម្លៃបានថា ប្រជាជាតិរបស់យើងនៅមិនទាន់ជឿនលឿន ប្រជាជាតិរបស់យើងមិនមែនជាប្រជាជាតិស៊ីវិល័យស្អាតបាតមានអនាម័យល្អគ្រប់គ្រាន់ទេ វាប្រាកដជាធ្វើឱ្យប៉ះពាល់ទៅដល់រដ្ឋជាពិសេសភ្ញៀវទេសចរដែលគេចូលចិត្តភាពស្អាត គេប្រាកដជានឹងមិនសម្រេចចិត្តមកលេងប្រទេសកម្ពុជា»។
កន្លងមកពលរដ្ឋ សកម្មជនបរិស្ថាន និងសង្គមស៊ីវិលរិះគន់រដ្ឋាភិបាល លោក ហ៊ុន សែន ថាអសមត្ថភាពក្នុងការដោះស្រាយបញ្ហាសំរាមជូនពលរដ្ឋ ហើយជួនកាលមានយុវជនខ្លះហាក់អស់សង្ឃឹមចំពោះចំណាត់ការរបស់មន្ត្រីរដ្ឋាភិបាល ហើយពួកគេបានចងក្រងគ្នាទៅជាក្រុមយុវជនដើរប្រមូលសំរាមនៅតាមទីសាធារណ សួនច្បារ ទីកន្លែងដែលមានការប្រគំតន្ត្រី និងនៅតាមដងទន្លេជាដើម ។
ដោយឡែកការប្រកួតកីឡាស៊ីហ្គេម លើកទី៣២ មានគណៈប្រតិភូ ចំនួន៨ប្រទេសក្នុងចំណោម១១ ប្រទេស ចូលរួមប្រកួតប្រជែងបានមកដល់កម្ពុជា ហើយរួមមាន គណៈប្រតិភូមកពី ប្រទេសឥណ្ឌូណេស៊ី មីយ៉ាន់ម៉ា និងប្រទេសមួយចំនួនទៀត។ ការប្រកួតកីឡាស៊ីហ្គេមនេះក៏មានកីឡាចំនួន៣៧ប្រភេទ និងមាន ៥៨៦វិញ្ញាសាក្នុងការប្រកួតផងដែរ។
ក្រុមកីឡាករបាល់ទាត់ក្រោមអាយុ២២ឆ្នាំ ក្នុងតារាងពូលបេ Bនៅថ្ងៃទី៣០ មេសា គឺ ក្រុមបាល់ទាត់ប្រទេសថៃ (Thai) ប្រកួតជាមួយ ក្រុមបាល់ទាត់ សិង្ហបុរី (Singapore) និងក្រុមបាល់ទាត់ វៀតណាម (Vietnam) ប្រកួតជាមួយ ក្រុមបាល់ទាត់ឡាវ (Laos) ។ វិញ្ញាសាខ្លះទៀតនឹងត្រូវចាប់ផ្ដើមប្រកួតពីថ្ងៃទី១ ឧសភា ដែរមានដូចជា កីឡាវាយកូនបាល់ (Hockey) និងជិះទូកក្ដោង (Sailing) ជាដើម។
កម្មវិធីបើកការប្រកួតកីឡាស៊ីហ្គេមលើកទី៣២ នៅកម្ពុជា នឹងប្រព្រឹត្តទៅនៅថ្ងៃទី៥ ឧសភា ហើយការប្រកួតលើវិញ្ញាសាកីឡាចំនួន៥៨៦ នឹងចាប់ផ្ដើមពីថ្ងៃទី៦ ខែឧសភា បន្តរហូតដល់ពេលបិទបញ្ចប់នៅថ្ងៃទី១៧ ខែឧសភា ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។