ប្រភពពីមន្ត្រីជលផលបានឱ្យដឹងថា លោក ណៅ ធួក ប្រតិភូរបស់រាជរដ្ឋាភិបាលទទួលបន្ទុកជាប្រធានរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានដឹកនាំមន្ត្រីមួយក្រុមទៅប្រលែងកូនត្រីជាច្រើនម៉ឺនក្បាល ដែលប៉ាន់ប្រមាណជាទម្ងន់សរុបប្រហែល ៤តោន ទៅក្នុងបឹងទន្លេសាបនៃទឹកដីខេត្តសៀមរាប កាលពីថ្ងៃអាទិត្យ ទី១២ ខែមិថុនា ដើម្បីជួយឱ្យពូជត្រីទាំងនោះបានរស់នៅក្នុងបឹងធម្មជាតិ និងបង្កើតពូជឡើងវិញឱ្យគងវង់យូរអង្វែងតទៅមុខទៀត។
លោក ទឹម សាវុធ នាយខណ្ឌរដ្ឋបាលជលផលប្រចាំខេត្តសៀមរាប នៃអធិការដ្ឋានរដ្ឋបាលជលផលខាងជើងបឹងទន្លេសាប បានមានប្រសាសន៍កាលពីរសៀលថ្ងៃអាទិត្យ ទី១២ ខែមិថុនា ថាកូនត្រីជាច្រើនម៉ឺនក្បាល ត្រូវបានប្រលែងនៅក្នុងបឹងទន្លេសាប ដើម្បីឱ្យមានការធំលូតលាស់ និងបង្កើតកូនចៅតទៅមុខទៀត ក្នុងបំណងជួយឱ្យត្រីក្នុងបឹងទន្លេសាបសំបូរឡើងវិញ៕