លោក ឆែម សាវុធ ប្រធានពន្ធនាគារខេត្តសៀមរាប បានមានប្រសាសន៍កាលពីរសៀលថ្ងៃច័ន្ទ ទី២០ ធ្នូថា ខាងពន្ធនាគារបានដោះលែងបុរសជនជាតិថៃទាំង៣នាក់ តាំងតែពីព្រឹកថ្ងៃច័ន្ទ បន្ទាប់ពីមន្ត្រីពន្ធនាគារបានទទួលដីកាដោះលែងរបស់ព្រះរាជអាជ្ញាអមសាលាដំបូងខេត្តសៀមរាបមក ៖ "តាមរាជក្រឹត្យព្រះករុណាលើកលែងទោស។ ចេញហើយព្រឹកមិញខាងកងរាជអាវុធហត្ថគេមកយកទៅ"។
ទោះយ៉ាងណា មិនអាចទំនាក់ទំនងមន្ត្រីស្ថានទូតថៃប្រចាំកម្ពុជា ដើម្បីអធិប្បាយបញ្ហានេះបានទេ កាលពីរសៀលថ្ងៃច័ន្ទ។ ប៉ុន្តែតាមកាសែតបាងកកប៉ុស្តិ៍របស់ថៃ ដែលចេញផ្សាយកាលពីរសៀលថ្ងៃច័ន្ទ ទី២០ ធ្នូ បានដកស្រង់សំដីលោក កាស៊ីត ភិរម្យយ៉ា (Kasit Piromya) រដ្ឋមន្ត្រីក្រសួងការបរទេសថៃ បានអះអាងថា បុរសជនជាតិថៃទាំង៣ ត្រូវបានព្រះមហាក្សត្រខ្មែរលើកលែងទោស បន្ទាប់ពីលោកបានជួបលោកនាយករដ្ឋមន្ត្រីកម្ពុជា ហ៊ុន សែន នៅទីក្រុងភ្នំពេញ នៅថ្ងៃទី២០ ធ្នូ ដដែលនោះ។
បុរសជនជាតិថៃទាំង ៣នាក់នោះ ត្រូវបានសមត្ថកិច្ចនាំយកទៅទីក្រុងភ្នំពេញ បន្ទាប់ពីដោះលែងពីពន្ធនាគារខេត្តសៀមរាប ហើយពួកគេនឹងវិលត្រឡប់ទៅកាន់ប្រទេសថៃវិញ ជាមួយនិងលោកឧត្ដមសេនីយ៍ ប្រាយុទ្ធ មេបញ្ជាការយោធាថៃនៅថ្ងៃអង្គារ។
លោក ទី សុវិនថាល់ ព្រះរាជអាជ្ញាអមសាលាដំបូងខេត្តសៀមរាបបានមានប្រសាសន៍ថា ពិតជាមានការដោះលែងបុរសជនជាតិថៃទាំងបីនាក់នោះមែន ៖ "ត្រូវហើយជាការពិតហើយ ខ្ញុំអ្នកចេញដីកាដោះតាមច្បាប់"។
បុរសជនជាតិថៃទាំង៣នាក់នោះ ឈ្មោះ សាណង វង់ចារើន ឈ្មោះ លែម ភួងភេត និងឈ្មោះ លេន សាបសិរី ជាអ្នកស្រុកសង្ហា ខេត្តសុរិន្ទ។ អ្នកទាំង៣នាក់នោះ ត្រូវប៉ូលិសការពារព្រំដែនគោករបស់ខ្មែរចាប់ខ្លួនកាលពីថ្ងៃទី១៨ ខែសីហាកន្លងមក នៅតំបន់តាទុំ ចន្លោះបង្គោលឡាក់ព្រំដែនខ្មែរ-ថៃ លេខ៩ និងលេខ១០ បន្ទាប់ពីអ្នកទាំងនោះបានឆ្លងចូលមកក្នុងដីខ្មែរជម្រៅជាង៣០០ម៉ែត្រ ដោយមានអាវុធច្នៃ ព្រមទាំងគ្រាប់ជាច្រើនជាប់នឹងខ្លួនផង។
កាលពីថ្ងៃទី៩ ខែធ្នូកន្លងមក តុលាការខេត្តសៀមរាបបានចោទប្រកាន់អ្នកទាំង ៣នាក់ពីបទឆ្លងដែនចូលប្រទេសកម្ពុជា និងប្រើប្រាស់អាវុធដោយគ្មានការអនុញ្ញាត ហើយបានប្រកាសសាលក្រមផ្ដន្ទាទោសឲ្យជាប់ពន្ធនាគារក្នុងម្នាក់ៗ ១៨ខែ និងពិន័យជាប្រាក់ក្នុងម្នាក់ៗ ១លានរៀលផង៕