ប្រជាពលរដ្ឋប្រមាណជាង ៤០នាក់តំណាងឲ្យអតីតបុគ្គលិកថែសួនទីក្រុងភ្នំពេញប្រមាណ ២៧០នាក់ដែលត្រូវបានមន្ទីរសាធារណការបញ្ឈប់ពីការងារកាលពីដើមខែមករានោះ មានការកើតទុក្ខមិនសុខចិត្តបាននាំគ្នាមកតវ៉ាម្តងហើយម្តងទៀតនៅមុខសាលារាជធានីភ្នំពេញ សុំឲ្យមានដំណោះស្រាយសមរម្យចំពោះការបញ្ឈប់ពួកគាត់ពីកាងារ ប៉ុន្តែការតវ៉ានេះក្រុមសមត្ថកិច្ចមិនស្វាគមន៍ឡើយ ហើយត្រូវបានបណ្តេញចេញឲ្យទៅតវ៉ានៅមន្ទីរសាធារណការវិញ។
ស្រ្តីម្នាក់អាយុជាង ៤០ឆ្នាំ ឈ្មោះអ្នកស្រី ចាន់ សុខុន ជាកម្មករថែសួនអស់រយៈពេលជាច្រើនឆ្នាំមកហើយនោះ បានមានប្រសាសន៍ទាំងការយំសោក ដោយរៀបរាប់ពីទុក្ខលំបាកក្នុងជីវភាពរស់នៅ និងការប្រឈមមុខអត់កាងារធ្វើ ប្រាប់វិទ្យុអាស៊ីសេរីយ៉ាងដូច្នេះ ៖ «ធ្វើការតាំងពីកូននៅស្លៀកសំពត់កៅស៊ូឯណោះ! កុំអាលដេញភ្លាមនោះ ឲ្យគ្នានិយាយហេតុផលរបស់គ្នាផង។ ម្នាក់ៗវេទនាចង់ងាប់ តស៊ូម្នាក់ ២០ឆ្នាំ ១០ឆ្នាំជាង ហេតុអីបានដកគ្នាដូចស្ពៃ អត់ឲ្យលុយឲ្យកាក់គ្នា ១រៀលចាយ មិនបានអីគិតគូរដោះស្រាយឲ្យគ្នាផង។ វេទនា ជំពាក់គេមិនតិចទេម្នាក់ៗ»។
ស្រ្តីរូបនេះបានឲ្យដឹងទៀតថា ពួកគាត់តវ៉ាពីបញ្ហានេះតាំងពីខែធ្នូ ឆ្នាំ២០០៩ ប៉ុន្តែពុំមានការយកចិត្តទុកដាក់ពីថ្នាក់ដឹកនាំក្រុងនោះទេ ដោយដេញពួកគាត់ពីមួយកន្លែងទៅមួយកន្លែង ហើយពុំមានការទទួលខុសត្រូវពីស្ថាប័នពាក់ព័ន្ធទាំងនោះឡើយ។
អ្នកស្រី ចាន់ សុខុន បានថ្លែងថា ៖ «ពួកខ្ញុំមកច្រើនដងហើយ ប៉ុន្តែមិនដោះស្រាយឲ្យសោះ ចេះតែដោះស្រាយចេញពីលិចចូលកើត ចេញពីកើតចូលលិច អត់គិតគូរឲ្យសោះ!»។
ស្រ្តីតំណាងអ្នកតវ៉ាម្នាក់ទៀតឈ្មោះ ជិម សយ បានឲ្យដឹងថា ការបញ្ឈប់ពួកគាត់នេះគឺរដ្ឋាភិបាលលើកហេតុផលថា សេដ្ឋកិច្ចធ្លាក់ចុះ ពុំមានលុយគ្រប់គ្រាន់សម្រាប់បើកប្រាក់ខែឲ្យ។
ក្រុមអ្នកតវ៉ាបានឲ្យដឹងទៀតថា ពួកគាត់ក៏មិនជំទាស់ដែរចំពោះបញ្ហានេះ ប៉ុន្តែសូមឲ្យមានការឧបត្ថម្ភជាប្រាក់ខែចំនួន ១ឆ្នាំ ដើម្បីធ្វើដើមរកស៊ីកសាងជីវភាពថ្មី ៖ «...គោលការណ៍ខ្ញុំសុំតែ (ប្រាក់ខែ) ១ឆ្នាំ តែបើមានសន្ដានចិត្តជួយលើសហ្នឹងក៏ខ្ញុំអរដែរ ព្រោះខ្ញុំអត់មានអី។ អ្នកខ្លះអត់ផ្ទះនៅទេ។ សុំប្រាក់ឧបត្ថម្ភគោលនយោបាយហ្នឹង ជាប្រាក់ខែ ១ឆ្នាំ ដើម្បីយកមកធ្វើដើមរកស៊ីចិញ្ចឹមជីវិត។ ១ខែ ២៥៥.០០០(រៀល)»។
មន្រ្តីទទួលខុសត្រូវរបស់មន្ទីរសាធារណការមិនអាចទាក់ទងសុំការពន្យល់ពីបញ្ហាបញ្ឈប់កម្មករថែសួននេះបានទេ។
នាយខុទ្ទកាល័យសាលារាជធានីភ្នំពេញ លោក នួន សុមេធ មិនអធិប្បាយយ៉ាងណាទេជុំវិញការបញ្ឈប់ក្រុមអ្នកថែសួន និងការទាមទារបស់ពួកគេនោះ ដោយលោកថាជាប់រវល់ប្រជុំ ៖ «លោកទាក់ទងការិយាល័យរដ្ឋបាលទៅ ការិយាល័យសរុបគេមានព័ត៌មានទាំងអស់»។
ក្រុមអ្នកថែសួនដែលត្រូវបញ្ឈប់ទាំងនោះភាគច្រើនជាស្រ្តីមានវ័យយ៉ាងតិចពី ៤០ឆ្នាំឡើងទៅ៕