របាយការណ៍ស្ដីពីជំងឺអេដស៍របស់អង្គការសហប្រជាជាតិ បានចាត់ថ្នាក់ប្រទេសកម្ពុជា ទៅក្នុងចំណោមប្រទេសក្នុងតំបន់អាស៊ីប៉ាស៊ីហ្វិក ចំនួន១២ ដែលប្រឈមនឹងបន្ទុកធ្ងន់ធ្ងរនៃការចម្លងថ្មី ក្នុងនោះគេបានរកឃើញថា ការប្រើប្រាស់មធ្យោបាយការពារទប់ទល់នឹងការចម្លងមេរោគនេះបានថយចុះ។
របាយការណ៍នោះបានរកឃើញទៀតថា ការប្រើប្រាស់ស្រោមអនាម័យទៀងទាត់ក្នុងការរួមភេទ នៅក្នុងចំណោមអ្នកប្រឈមនឹងការឆ្លងជំងឺនេះបានធ្លាក់ចុះ។ ស្របគ្នានេះដែរ ការចម្លងមេរោគតាមការចាក់គ្រឿងញៀនបានកើនឡើង។ ចំណែកច្បាប់ស្ដីពីការគ្រប់គ្រងគ្រឿងញៀន ក៏ជាឧបសគ្គមួយក្នុងការកាត់បន្ថយអត្រាឆ្លងក្នុងផ្នែកនេះ ព្រោះតែអ្នកប្រើប្រាស់គ្រឿងញៀនត្រូវទទួលទោសឧក្រិដ្ឋ។
បើទោះជាយ៉ាងណាក្ដី អត្រាចម្លងមេរោគអេដស៍នៅបន្តថយចុះជាបន្តបន្ទាប់។ មកដល់ពេលនេះ អង្គការសហប្រជាជាតិជំងឺអេដស៍ បានរកឃើញថា ពលរដ្ឋកម្ពុជា សរុបចំនួន ៧ម៉ឺន ៦ពាន់នាក់ កំពុងផ្ទុកមេរោគអេដស៍។ ជាមួយគ្នានេះ ក្នុងចំណោមអ្នកផ្ទុកមេរោគអេដស៍ប្រមាណ ៥ម៉ឺន ៤ពាន់នាក់ ដែលតម្រូវអោយប្រើប្រាស់ថ្នាំពន្យារជីវិត គឺមានជាង ៤ម៉ឺន ៤ពាន់នាក់ ទទួលបានថ្នាំ។
វិទ្យុអាស៊ីសេរី នៅពុំទាន់អាចសុំការអធិប្បាយពីមន្ត្រីមជ្ឈមណ្ឌលជាតិប្រយុទ្ធជំងឺអេដស៍ និងអាជ្ញាធរជាតិប្រយុទ្ធនឹងជំងឺអេដស៍បានទេ នៅល្ងាចថ្ងៃទី២០ ខែវិច្ឆិកា។
ចាប់តាំងពីឆ្នាំ២០០១ មក ភាគរយនៃការប្រើប្រាស់ស្រោមអនាម័យបានទៅដល់ជិត ៩០% ក្នុងចំណោមក្រុមអ្នកសកម្មក្នុងការរួមភេទ។
ប្រធានអង្គការខាណា (KHANA) ដែលធ្វើការទាក់ទងនឹងជំងឺអេដស៍នៅកម្ពុជា លោក អ៊ុំ សុភាព មានប្រសាសន៍ថា ស្ថានភាពនៃការប្រយុទ្ធប្រឆាំងមេរោគអេដស៍ ជំងឺអេដស៍នៅកម្ពុជា គឺមានការវិវឌ្ឍន៍ប្រសើរឡើងជានិច្ច ហើយកម្ពុជា គ្រោងថានឹងកាត់បន្ថយអត្រាឆ្លងអោយមកនៅសូន្យក្នុងឆ្នាំ២០២០ ខាងមុខ។
ទោះជាដូច្នេះក្ដី លោក អ៊ុំ សុភាព ទទួលស្គាល់ថា ពិតជានៅមានបញ្ហាដូចរបាយការណ៍របស់អង្គការសហប្រជាជាតិ បានរកឃើញមែន។ ប៉ុន្តែ ប្រសិនបើពិនិត្យតួលេខជាក់ស្ដែង គឺកម្ពុជា មានចំនួនតិចតួចបំផុត បើនិយាយពីការចម្លងមេរោគតាមការចាក់ថ្នាំញៀន។
តួលេខដែលផ្ដល់ដោយប្រធានអង្គការខាន់ណា បានអោយដឹងថា ក្នុងចំណោមអ្នកផ្ទុកមេរោគអេដស៍ជាង ៧ម៉ឺននាក់នៅកម្ពុជា នេះ មានប្រហែល ១ពាន់នាក់ ជាអ្នកប្រើប្រាស់គ្រឿងញៀន ហើយអត្រាឆ្លងក្នុងចំណោមនេះ គឺមានចំនួន ២៥%៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។