រដ្ឋាភិបាលកម្ពុជាកំពុងប្រើយុទ្ធសាស្ត្រច្បាំងផង ចរចាផងជាមួយរដ្ឋាភិបាលថៃ រឿងជម្លោះព្រំដែនគោក។ ការវិវឌ្ឍចុងក្រោយនេះ គឺរដ្ឋាភិបាលកម្ពុជាបានប្រកាន់ជំហរថា នឹងមិនបន្តចរចាជាមួយភាគីថៃ ដើម្បីដោះស្រាយជម្លោះនៅប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបីតទៀតទេ ហើយកម្ពុជាបានសម្រេចបញ្ជូនសំណុំរឿងតំបន់ទាំង៤នេះ នឹងប្ដឹងទៅតុលាការយុត្តិធម៌អន្តរជាតិនៅពេលខាងមុខ បើទោះជាភាគីថៃមិនចូលរួមសហការក៏ដោយ។
ឆ្លើយតបទៅនឹងជំហររបស់កម្ពុជានេះ រដ្ឋាភិបាលថៃបានចេញសេចក្ដីថ្លែងការណ៍ជាលើកទី២នៅថ្ងៃទី៥មិថុនា ថាប្រទេសខ្លួន មិនបានទទួលស្គាល់ការសម្រេចក្ដីរបស់តុលាការយុត្តិធម៌អន្តរជាតិ តាំងពីឆ្នាំ១៩៦២មកម្ល៉េះ ហើយនឹងមិនទទួលស្គាល់ការសម្រេចជាថ្មីទៀតនៅពេលខាងមុខនោះ។ រដ្ឋាភិបាលថៃនៅតែប្រកាសថា ខ្លួនចង់បន្តដោះស្រាយភាពតានតឹងនៃការប្រឈមមុខដាក់គ្នារវាងយោធានៅតាមព្រំដែន ដោយទ្វេភាគី ដែលជាយន្តការមានស្រាប់។
ទោះជាយ៉ាងណា ក្រុមអ្នកឃ្លាំមើលថា ជំហររបស់ថៃបែបនេះ ទំនងដឹងខ្លួនមុនថា នឹងចាញ់ក្ដីកម្ពុជានៅតុលាការយុត្តិធម៌អន្តរជាតិ។ ភាគីកម្ពុជាបានបញ្ជាក់ជំហរនៅក្នុងសេចក្ដីថ្លែងការណ៍ថា មិនយកបញ្ហាតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ដាក់បញ្ចូលនៅក្នុងរបៀបវារៈកិច្ចប្រជុំគណៈកម្មការព្រំដែនចម្រុះ នៅថ្ងៃទី១៤មិថុនានេះទេ។
ជុំវិញបញ្ហានេះ អតីតតំណាងរាស្ត្រគណបក្សសង្គ្រោះជាតិលោក អ៊ុំ សំអាន បានជំរុញទៅរដ្ឋាភិបាល ត្រូវប្រញាប់ដាក់ពាក្យប្ដឹងថៃទៅតុលាការអន្តរជាតិឱ្យបានលឿន ក្រោយកិច្ចប្រជុំនៅថ្ងៃទី១៤មិថុនា ដើម្បីទប់ស្កាត់កុំឱ្យមានការផ្ទុះអាវុធជាថ្មីជាមួយភាគីថៃ។
ហើយកាលណា សហគមន៍អន្តរជាតិ ឬតុលាការយុត្តិធម៌អន្តរជាតិ គេកាត់ក្ដី គឺថៃមិនហ៊ានរញ៉េរញ៉ៃឈ្លានពានទឹកដីយើងទេ។ ហើយមិនអ៊ីចឹងទេ គឺថៃនឹងមានឈ្មោះស្អុយលើពិភពលោក។
— លោក អ៊ុំ សំអាន
រដ្ឋមន្ត្រីក្រសួងការពារជាតិថៃលោក ភូមិថាំ វេឆាយ៉ាឆៃ (Phumtham Wechayachai) បានអះអាងថា រដ្ឋាភិបាល និងកងទ័ព បានត្រៀមខ្លួនរួចរាល់ទាំងស្រុង ក្នុងការការពារទឹកដី និងបានព្រមានថា ថៃនឹងអាចជ្រើសយកវិធានការបិទច្រកព្រំដែនជាមួយប្រទេសកម្ពុជា ប្រសិនបើកិច្ចប្រជុំគណៈកម្មការព្រំដែនចម្រុះ នៅថ្ងៃទី១៤មិថុនាខាងមុខនេះ បរាជ័យ។ លោកបានព្រមានបែបនេះ នៅពេលចុះទៅលើកទឹកចិត្តកងទ័ពថៃប្រចាំនៅភូមិភាគទី០២ ដែលជាក្រុមកងទ័ពបានលួចឆ្មក់បាញ់សម្លាប់ទាហានម្នាក់ កាលពីម៉ោង៥ព្រឹក ថ្ងៃទី២៨ឧសភា នៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ។
សារព័ត៌មានថៃបានចុះផ្សាយថា លោក ភូមិថាំ វេឆាយ៉ាឆៃ ក៏បានធ្វើដំណើរមកកម្ពុជា ដើម្បីជួបជាមួយរដ្ឋមន្ត្រីការពារជាតិកម្ពុជាលោក ទៀ ស៊ីហា ដើម្បីជជែកគ្នាដើម្បីបន្ធូរបន្ថយភាពតានតឹងនៃកងទ័ពប្រទេសទាំងពីរនៅតាមព្រំដែន។
អ្នកសិក្សាកិច្ចការសង្គម និងនយោបាយលោក ប៉ោ មករា បានយល់ឃើញថា កម្ពុជាគួរតែត្រៀមយុទ្ធសាស្ត្រ ស្វែងរកកិច្ចអន្តរាគមន៍ពីសហគមន៍អន្តរជាតិ រួមមានអង្គការសហប្រជាជាតិ និងអាស៊ានឱ្យជួយដោះស្រាយ និងដឹងឭ ប្រសិនកងទ័ពប្រទេសថៃ វាយចូលឈ្លានពានទឹកដីកម្ពុជាជាថ្មី។
នៅពេលបញ្ហាហ្នឹង នឹងដឹងឬចូលរួមដោះស្រាយជាមួយសហគមន៍អន្តរជាតិ និងសហគមន៍តំបន់នេះ ខ្ញុំគិតថា ថៃនឹងមានបញ្ហា ឬក៏នឹងមានភាពអាម៉ាស់ច្រើន ពាក់ព័ន្ធនឹងបញ្ហាដែលគេហៅថា រំលោភច្បាប់អន្តរជាតិ។
— លោក ប៉ោ មករា
រដ្ឋាភិបាលកម្ពុជាបានប្ដេជ្ញាថា នឹងប្រើប្រាស់កម្លាំងទ័ពប្រយុទ្ធការពារទឹកដី ហើយនឹងប្ដឹងទៅក្រុមប្រឹក្សាសន្តិសុខអង្គការសហប្រជាជាតិ ប្រសិនកងទ័ពថៃចូលឈ្លានពានទឹកដីកម្ពុជាសាជាថ្មី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។