ឧកញ៉ា ឡេង ណាវ៉ាត្រា គឺជាសេដ្ឋីវ័យក្មេងមួយរូប ដែលកំពុងលេចមុខមាត់ខ្លាំងក្នុងសង្គមកម្ពុជា។ លោកក្ដោបក្ដាប់មុខជំនួញជាច្រើនមុខនៅកម្ពុជា រាប់ចាប់តាំង ពីវិស័យ អចលនទ្រព្យ ហិរញ្ញវត្ថុ ធនាគារ កសិកម្ម រហូតដល់ វិស័យសិល្បៈ។ ជាពិសេស លោកបានផ្ដល់លុយឱ្យរដ្ឋាភិបាល របស់លោក ហ៊ុន សែន រាប់លានដុល្លារក្នុងរយៈពេលប៉ុន្មានឆ្នាំចុងក្រោយនេះ។
តើលោក ឡេង ណាវ៉ាត្រា មានប្រវត្តិយ៉ាងណា ហើយធ្វើជំនួញអ្វីខ្លះ ទើបបានជាមានលុយវាល់លានដុល្លារកាន់ក្នុងដៃបែបនេះ?
សូមទស្សនាការសេចក្ដីរាយការណ៍របស់លោក យ៉ង ចាន់តារា ដូចតទៅ
ក្នុងវ័យត្រឹមតែជាង ៣០ឆ្នាំ លោក ឡេង ណាវ៉ាត្រា បានឡើងរាសីខ្ពស់ត្រដែតសឹងមិនគួរឱ្យជឿ។ លោកជាអតីតពលករធ្វើការនៅប្រទេសកូរ៉េខាងត្បូងកាលពីជិត ១០ឆ្នាំមុន ប៉ុន្តែពេលនេះលោកបានក្លាយជាអ្នកជំនួញដ៏លេចធ្លោម្នាក់ ដែលមានងារជា «អ្នកឧកញ៉ា»។
មជ្ឈដ្ឋានមួយចំនួនបានកោតសរសើរលោក ឡេង ណាវ៉ាត្រា ដែលក្លាយខ្លួនជាសេដ្ឋីវាល់លានទាំងវ័យក្មេង។ អ្នកខ្លះបានហៅលោកថា ឧកញ៉ាសប្បុរសទៀតផង ពីព្រោះលោកបានបរិច្ចាគថវិការាប់លានដុល្លារដល់រដ្ឋាភិបាល ដើម្បីទប់ទល់គ្រោះមហន្តរាយ ប្រយុទ្ធប្រឆាំងនឹងជំងឺកូវីដ-១៩ ការស្ដារឡើងវិញក្រោយវិបត្តិជំងឺឆ្លងជាសាកល និងកិច្ចការមនុស្សធម៌ដទៃទៀត។ ក៏ប៉ុន្តែក្នុងពេលជាមួយគ្នានេះ មជ្ឈដ្ឋានមួយចំនួនជឿជាក់ថា ទ្រព្យសម្បត្តិដ៏ច្រើនសន្ធឹកសន្ធាប់នោះ មិនមែនជារបស់ឧកញ៉ាវ័យក្មេងរូបនេះឡើយ ហើយលោកទំនងជាអ្នកឈរឈ្មោះរកស៊ីឱ្យគេ ដើម្បីបំភ័ន្តភ្នែកសាធារណជនប៉ុណ្ណោះ។ ការវាយតម្លៃបែបនេះផ្អែកទៅលើអង្គហេតុពីរសំខាន់ គឺការកើនឡើងដ៏ឆាប់រហ័សនៃទ្រព្យសម្បត្តិ និងឥទ្ធិពលរបស់លោក។
ជីវប្រវតិ្តសង្ខេប៖
លោក ឡេង ណាវ៉ាត្រា មានអាយុ ៣៤ឆ្នាំ និងមានឈ្មោះពិតថា ឡេង ភក្រា (ភក្ត្រា)។ លោកមានស្រុកកំណើតនៅភូមិត្រពាំងសាលា ឃុំឈើកាច់ ស្រុកបាភ្នំ ខេត្តព្រៃវែង។ លោកឱ្យដឹងថា គ្រួសាររបស់លោកក្រីក្ររកតែបាយហូបមិនគ្រប់ ហើយលោកបានឈប់រៀនត្រឹមថ្នាក់ទី ៩ ដើម្បីជួយរកប្រាក់ចំណូលផ្គត់ផ្គង់គ្រួសារ៖« ខ្ញុំមានឪពុកឈ្មោះ ឡុង យឿន មុខរបរជាអ្នករែកដី ម្ដាយឈ្មោះ ប៉ែន ងឿន បានស្លាប់ចោលនៅពេលដែលខ្ញុំទៅធ្វើពលករនៅប្រទេសកូរ៉េបានពីរឆ្នាំ។ បងប្អូនខ្ញុំមាន ៥នាក់។ គ្រួសារខ្ញុំក្ររហូតរកបាយហូបមិនគ្រប់ ចំណែកខ្ញុំជួយរែកដីឪពុកខ្ញុំតាំងពីអាយុ ១២ឆ្នាំ ដើម្បីដោះស្រាយការហូបចុក ហើយក៏មិនមានឱកាសទទួលបានការអប់រំខ្ពស់នោះដែរ » ។
លោក ឡេង ណាវ៉ាត្រា បានទៅធ្វើជាពលករនៅប្រទេសកូរ៉េខាងត្បូងចន្លោះពីឆ្នាំ២០១០ ដល់ឆ្នាំ ២០១៤ ដែលនៅទីនោះ លោកក៏ធ្លាប់ជាអ្នកគាំទ្រគណបក្សសង្គ្រោះជាតិម្នាក់ផងដែរ។
ក្លាយជាសេដ្ឋីក្នុងពេលជាង ៣ឆ្នាំ៖
ទោះជាយ៉ាងណាក្ដី ជីវិតរបស់លោកបានផ្លាស់ប្ដូរយ៉ាងលឿនរហ័ស ក្រោយពីលោកបានវិលមកកម្ពុជាវិញនៅឆ្នាំ២០១៤។ លោក ឡេង ណាវ៉ាត្រា អះអាងប្រាប់អ្នកសារព័ត៌មានថា លោកមានបានដល់សព្វថ្ងៃនេះ គឺដោយសារត្រូវប៉ាន់ដី ហើយកាក់កបក្នុងជំនួញដីឡូត៍ ផ្ទះល្វែង និងបុរី។ លោកបញ្ជាក់ថា ក្នុងឆ្នាំ២០១៤ លោកមានលុយត្រឹមតែ ១ម៉ឺន ១ពាន់ដុល្លារ ហើយលោកបានខ្ចីលុយធនាគារបន្ថែម ដើម្បីបង្គ្រប់ទិញដីមួយកន្លែងនៅម្ដុំចោមចៅ ក្នុងតម្លៃជាង ៤ម៉ឺនដុល្លារ។ លោកអះអាងថា ជិតមួយឆ្នាំក្រោយមក លោកលក់ដីនោះវិញបានលុយ ១២ម៉ឺនដុល្លារ ពោលគឺ ចំណេញបាន ៨ម៉ឺនដុល្លារ។ លោកថ្លែងទៀតថា លុយចំណេញនេះ លោកបានយកទៅទិញដីពុះឡូត៍ និងសាងសង់ផ្ទះល្វែងលក់បន្តទៀត រហូតដល់ឆ្នាំ២០១៨ ទ្រព្យសម្បត្តិរបស់លោកបានកើនឡើងដល់ ២០លានដុល្លារ។
ក្រោយឆ្នាំ ២០១៨ លោក ឡេង ណាវ៉ាត្រា មិនបានទម្លាយអំពីទ្រព្យសម្បត្តិរបស់លោកជាសាធារណៈទៀតនោះទេ ប៉ុន្តែវាទំនងជាកើនឡើងច្រើនទៀត ពីព្រោះលោកបានពង្រីកមុខជំនួញកាន់តែធំ និងច្រើនវិស័យ។
បច្ចុប្បន្ននេះ លោក ឡេង ណាវ៉ាត្រា មានឈ្មោះជាម្ចាស់អាជីវកម្មជាច្រើនមុខ ក្នុងនោះរួមមាន បុរីឡេង ណាវ៉ាត្រា ផលិតកម្ម ហ្គាឡាក់ស៊ី ណាវ៉ាត្រា ផ្សារកសិផលធម្មជាតិ ឡេង ណាវ៉ាត្រា គ្រឹះស្ថានមីក្រូហិរញ្ញវត្ថុ ឡេង ណាវ៉ាត្រា និងគម្រោងក្រុងរណបឆាយណា-ប៉ោយប៉ែត (China Poipet Satellite City) ជាដើម។
ឥទ្ធិពលក្រោយក្លាយជាឧកញ៉ា៖
លោក ឡេង ណាវ៉ាត្រា ចាប់ផ្ដើមលេចមុខមាត់ខ្លាំងក្រោយលោកទទួលបានងារជាឧកញ៉ានៅឆ្នាំ ២០១៨ និងជាអ្នកឧកញ៉ា នៅឆ្នាំ២០២១។ លោកមានរថយន្តម៉ាកល្បីៗ ប្រមាណ១០ គ្រឿង ដូចជា រ៉ូលរ៉យស៍ (Roll Royce) ឡាំបូហ្គីនី (Lamborghini) ហ្វើរ៉ារី (Ferrari) ផច្ឆ (Porsche) និងប៊ែនលី (Bentley) ព្រមទាំងឧទ្ធម្ភាគចក្រផ្ទាល់ខ្លួនមួយគ្រឿងទៀត ដែលសរុបជាទឹកប្រាក់រាប់សិបលានដុល្លារ។ សារព័ត៌មានក្នុងស្រុកមួយចំនួនបាននាំគ្នាបង្កើតមាតិកាព័ត៌មានពិសេសដោយឡែក ផ្ដោតទៅលើជីវិតហ៊ឺហា មុខជំនួញ និងសកម្មភាពមនុស្សធម៌របស់លោក ឡេង ណាវ៉ាត្រា។ ជំនួញដីធ្លី និងអចលនទ្រព្យរបស់លោកបានរីកសាយភាយស្ទើរគ្រប់រាជធានី-ខេត្ត ជាពិសេស គម្រោងដីឡូត៍ និងបុរី។ ងាកទៅផលិតកម្មចម្រៀងហ្គាឡាក់ស៊ីដែលលោកបង្កើតឡើងកាលពីឆ្នាំ២០១៦ នោះវិញ ផលិតកម្មថ្មីថ្មោងនេះបានស្រូបយកអ្នកចម្រៀងលំដាប់ជួរមុខជាច្រើននាក់ ក្នុងនោះមានទាំងលោក ព្រាប សុវត្ថិ ម្នាក់ផង។ រីឯបុគ្គលល្បីៗ មួយចំនួន ក៏បាននាំគ្នាមកបណ្ដាក់ទុនរកស៊ីជាមួយលោកផងដែរ។
ជាងនេះទៅទៀត បងប្អូនរបស់លោក ៣នាក់បានទទួលងារជាឧកញ៉ាព្រមៗ គ្នានៅខែមករា ឆ្នាំ២០២១ ហើយមួយខែក្រោយមកក្មួយប្រសាម្នាក់ទៀតរបស់លោកក៏បានក្លាយជាឧកញ៉ាដែរ។ គិតជាសរុបគ្រួសារ គ្រួសារលោក ឡេង ណាវ៉ាត្រា ពេលនេះ មានងារជា «អ្នកឧកញ៉ា» និង «ឧកញ៉ា» ចំនួន ៥នាក់ហើយ។
បរិច្ចាគលុយរាប់លានដុល្លារពេលពលរដ្ឋភាគច្រើនបាត់ចំណូល៖
អ្វីដែលសាធារណជនចាប់អារម្មណ៍ខ្លាំងបំផុតចំពោះលោក ឡេង ណាវ៉ាត្រា នោះ គឺការបរិច្ចាគលុយម្ដងរាប់លានដុល្លារ។ គិតដោយត្រួសៗ ក្នុងរយៈពេលជាង ២ឆ្នាំចុងក្រោយនេះ លោកបានបរិច្ចាគលុយតិចបំផុតជិត ១៥លានដុល្លារអាមេរិក ក្នុងនោះប្រមាណ ១០លានដុល្លារសម្រាប់រដ្ឋាភិបាល លោក ហ៊ុន សែន ជិត ៤លានដុល្លារសម្រាប់កាកបាទក្រហមកម្ពុជាដឹកនាំដោយអ្នកស្រី ប៊ុន រ៉ានី ហ៊ុន សែន និងជិតកន្លះលានដុល្លារទៀតសម្រាប់ក្រុមគ្រូពេទ្យស្ម័គ្រចិត្តរបស់លោក ហ៊ុន សែន ដឹកនាំដោយភរិយាលោក ហ៊ុន ម៉ាណែត។ នេះមិនទាន់រាប់បញ្ចូលលុយរាប់សែនដុល្លារផ្សេងទៀត ដែលលោកបានបរិច្ចាគនៅមុនឆ្នាំ២០២០ ព្រមទាំងលុយដែលលោកបរិច្ចាគទៅកាន់មន្ទីរពេទ្យគន្ធបុប្ផា និងការងារមនុស្សធម៌មួយចំនួនទៀតនៅឡើយទេ។
ក្នុងរយៈពេលដូចគ្នានេះ គេមិនឃើញមានឧកញ៉ា ឬឈ្មួញធំៗ ណាម្នាក់បរិច្ចាគលុយដល់រដ្ឋាភិបាលលោក ហ៊ុន សែន ច្រើនជាងលោក ឡេង ណាវ៉ាត្រា នោះទេ សូម្បីតែមហាសេដ្ឋីលំដាប់កំពូល ដូចជា លោក គិត ម៉េង ជាដើម ក៏បរិច្ចាគតិចជាងនេះដែរ។ ម្យ៉ាងវិញទៀត លោក ឡេង ណាវ៉ាត្រា ច្រើនតែដឹកមុខគេក្នុងការប្រកាសបរិច្ចាគទៅកាន់រដ្ឋាភិបាលលោក ហ៊ុន សែន។ ជាពិសេស លុយបរិច្ចាគប្រមាណ ៦លានដុល្លារ លោកផ្ដល់ឱ្យជាសាច់ប្រាក់សុទ្ធ គឺក្រដាសប្រាក់ ១០០ដុល្លារគរទាំងដុំៗ។
អនុប្រធានគណបក្សសង្គ្រោះជាតិ លោក អេង ឆៃអ៊ាង ដែលធ្លាប់ធ្វើជាតំណាងរាស្ត្រចំនួន ៣អាណត្តិនោះ មានប្រសាសន៍ថា វាមិនអាចទៅរួចឡើយដែលពលករមួយរូបក្លាយខ្លួនជាសេដ្ឋីក្នុងរយៈពេលដ៏ខ្លីបែបនេះ។ លោកថ្លែងថា មុខជំនួញផ្នែកអចលនទ្រព្យ និងដីធ្លី មានឧកញ៉ា និងអ្នកជំនួញជាច្រើន រកស៊ីមុនលោក ឡេង ណាវ៉ាត្រា ទៅទៀត ខណៈផលិតកម្មចម្រៀងវិញមិនទំនងជាអាចផ្ដល់ប្រាក់ចំណូលច្រើនឡើយ។ លោកជឿជាក់ថា ក្នុងបរិបទប្រទេសកម្ពុជា ដែលសម្បូរដោយអំពើពុករលួយ និងការធ្វើជំនួញមិនសុចរិតនោះ លោក ឡេង ណាវ៉ាត្រា អាចគ្រាន់តែជាបុគ្គលដើរតួរកស៊ីជំនួសឱ្យអ្នកផ្សេង ដែលជននោះទំនងជាមនុស្សមានអំណាចបំផុតនៅស្រុកខ្មែរ គឺគ្រួសារលោកនាយករដ្ឋមន្ត្រី ហ៊ុន សែន៖« បើអ្នកហ្នឹងគាត់រកបានដោយស្រួល ដោយអត់មានអ្វីហ្នឹង ច្បាស់ជាអ្នករកស៊ីដទៃទៀត គេត្រូវឃ្លាំមើលហើយ ព្រោះធម្មតាអ្នកដែលក្មេងល្ហក់ អត់មានបង្អែក អត់មានពាក់ព័ន្ធជាមួយគ្រួសារត្រកូលលោក ហ៊ុន សែន ទេ ច្បាស់ជាអ្នកហ្នឹងក៏លំបាកដែរណា។ ទោះបីគាត់ចង់រៀបចំឈុតឆាកបែបម៉េច ក៏គេមិនអាចជឿបានទេ។ បើចង់ឱ្យគេជឿបាន ទាល់តែគាត់ដាក់ខ្លួនឱ្យគេស៊ើបអង្កេតដោយឯករាជ្យឱ្យដឹងថា តើប្រភព [ លុយ ] ពិតប្រាកដមកពីណាពីណី » ។
ចំណែកស្ថាបនិកចលនាមាតាធម្មជាតិ លោក អាឡិចហាន់ដ្រូ ហ្គន់សាឡេស ដេវិតសុន (Alejandro Gonzalez Davidson) វិញ លោកថ្លែងថា មុខជំនួញរបស់លោក ឡេង ណាវ៉ាត្រា មានចំណុចមិនប្រក្រតី និងគួរឱ្យសង្ស័យច្រើន។ លោកថា ទីមួយ ក្រុមហ៊ុននេះជាក្រុមហ៊ុនក្នុងស្រុក និងធ្វើជំនួញតែនៅក្នុងប្រទេសកម្ពុជា ប៉ុន្តែបែរជាមានលុយវាល់លានដុល្លារ ខណៈពលរដ្ឋខ្មែរជាច្រើនមានជីវភាពក្រីក្រ។ ជាពិសេស ក្នុងពេលដែលកម្ពុជារងផលប៉ះពាល់ខ្លាំងដោយសារវិបត្តិជំងឺកូវីដ-១៩ លោក ឡេង ណាវ៉ាត្រា បែរជាមានលទ្ធភាពផ្ដល់លុយដល់រដ្ឋាភិបាលរាប់លានដុល្លារ។ លោកជឿជាក់ថា លោក ឡេង ណាវ៉ាត្រា ប្រាកដជាកំពុងឈរឈ្មោះរកស៊ី និងលាងលុយកខ្វក់ឱ្យអ្នកមានអំណាចកំពូលនៅកម្ពុជា ដែលគ្មានអ្នកណាផ្សេងក្រៅពីគ្រួសារលោក ហ៊ុន សែន ឡើយ៖« មានន័យថា ណាវ៉ាត្រា ឈរឈ្មោះឱ្យត្រកូល ហ៊ុន ដែលសម្បូរលុយកខ្វក់ដែលមកពីសកម្មភាពខុសច្បាប់។ គាត់វិនិយោគលើវិស័យនេះ វិស័យនោះ។ ក្រោយពីបានវិនិយោគ គាត់យកលុយចំណេញពីក្រុមហ៊ុន ឬក៏ចំណូលហ្នឹងយកទៅផ្ញើទៅក្រៅប្រទេស។ នៅពេលប្រទេសទីពីរ ទីបី សួរថា តើប្រភពថវិកាហ្នឹងបានមកពីណា ? គាត់ឆ្លើយថា ខ្ញុំវិនិយោគក្នុងក្រុមហ៊ុននេះ វិស័យនេះ វិស័យនោះ។ អាហ្នឹងគឺជាវិធីមួយដែលគេនិយមធ្វើនៅប្រទេសផ្ដាច់ការ ដែលសម្បូរដោយអំពើពុករលួយ និងសម្បូរលុយកខ្វក់ » ។
អំឡុងឆ្នាំ ២០២១ ពេលដែលពលរដ្ឋស្ទើរទូទាំងប្រទេសកំពុងជួបការលំបាកផ្នែកជីវភាពនោះ លោក ឡេង ណាវ៉ាត្រា បានបរិច្ចាគលុយឱ្យរដ្ឋាភិបាលលោក ហ៊ុន សែន កាកបាទក្រហម និងក្រុមគ្រូពេទ្យស្ម័គ្រចិត្តរបស់លោក ហ៊ុន សែន សរុបជាង ១៣លានដុល្លារ ក្នុងនោះជាង ៥លានដុល្លារ គឺជាសាច់ប្រាក់សុទ្ធ។
សម្រាប់ប្រទេសដែលមានប្រព័ន្ធច្បាប់រឹងមាំ លុយបរិច្ចាគរាប់លានដុល្លារជាសាច់ប្រាក់បែបនេះនឹងគេចមិនផុតពីការចោទសួរពីសំណាក់ស្ថាប័នជំនាញរបស់រដ្ឋាភិបាល ឬសភារបស់ប្រទេសនោះឡើយ ពីព្រោះគេបារម្ភថា លុយនេះជាលុយកខ្វក់ដែលបានមកពីអំពើទុច្ចរិត ហើយកំពុងត្រូវបានលាងសម្អាតក្រោមរូបភាពជាជំនួយមនុស្សធម៌។ ក៏ប៉ុន្តែសម្រាប់រដ្ឋាភិបាលលោក ហ៊ុន សែន វិញ ករណីបែបនេះមិនត្រូវបានត្រួតពិនិត្យនោះទេ។
អ្នកនាំពាក្យគណបក្សកាន់អំណាច លោក សុខ ឥសាន អះអាងថា រដ្ឋាភិបាលក្ដាប់បានសភាពការណ៍នៅក្នុងប្រទេស ដូច្នេះមិនមានអ្វីត្រូវបារម្ភអំពីប្រភពលុយដែលលោក ឡេង ណាវ៉ាត្រា បានបរិច្ចាគនោះឡើយ។ លោកបកស្រាយបន្ថែមថា ការបរិច្ចាគជាសាច់ប្រាក់សុទ្ធបែបនេះ គឺជាការជួយសម្រួលដល់រដ្ឋាភិបាលទៅវិញទេ៖« បើឱ្យលុយសែក (Check) ទៅឱ្យរាជរដ្ឋាភិបាល គង់តែរាជរដ្ឋាភិបាលយកលុយសែកហ្នឹងទៅបើកនៅធនាគារ ហើយយកទៅចាយវាយជូនទៅដល់ពលរដ្ឋដែលរងគ្រោះហ្នឹងដដែលទេ។ អ៊ីចឹងគេចង់សម្រួលការងារឱ្យរាជរដ្ឋាភិបាល គឺថាយកលុយជាសាច់ប្រាក់ទៅជូនរាជរដ្ឋាភិបាល ដើម្បីរាជរដ្ឋាភិបាលចាត់ចែងសាច់ប្រាក់ហ្នឹងដល់ដៃប្រជាពលរដ្ឋតែម្ដង ដោយមិនចាំបាច់ឆ្លងកាត់ប្រព័ន្ធធនាគារ នាំឱ្យយឺតយូរទេ » ។
បដិសេធការលាងលុយ និងគំរាមប្ដឹងអ្នករិះគន់៖
ពាក់ព័ន្ធនឹងរឿងនេះដែរ លោក ឡេង ណាវ៉ាត្រា បានចេញមុខបដិសេធរាល់ការចោទប្រកាន់ទាំងឡាយដែលថា លោកកំពុងរកស៊ីលាងលុយកខ្វក់ និងមានអ្នកនៅពីក្រោយខ្នងលោក។ ក្នុងខ្សែអាត់សំឡេងមួយកាលពីថ្ងៃទី១៨ សីហាថា លោក ឡេង ណាវ៉ាត្រា បានចាត់ទុកការចោទប្រកាន់ទាំងនេះថា ជាការបំផ្លើស និងជាការបំផ្លាញកិត្តិយសរបស់លោក និងក្រុមគ្រួសារ។ លោកថែមទាំងនិយាយក្នុងន័យគំរាមប្រើប្រាស់ផ្លូវច្បាប់ប្រឆាំងនឹងអ្នកទាំងឡាយណា ដែលហ៊ានលើកឡើងអំពីបញ្ហាទាំងនេះនៅពេលខាងមុខទៀតផង៖« ខ្ញុំសូមបដិសេធ ៣ចំណុច និងមិនបន្តឱ្យបងប្អូនមួយចំនួនតូចចោទប្រកាន់ទៀតឡើយ។ ទីមួយ ចោទខ្ញុំថាកាប់ឈើលក់ ប្រសិនបើស៊ើបអង្កេតសិក្សាឃើញថា ខ្ញុំបានលក់ឈើ ១មីលីម៉ែត្រ ខ្ញុំសុខចិត្តដើរចូលគុក។ ទីពីរ ការចោទប្រកាន់ថា លាងលុយកខ្វក់ វាជាការចោទប្រកាន់ស្មើនឹងបទឧក្រិដ្ឋអន្តរជាតិដ៏អាក្រក់។ ទីបី មានអ្នកនៅពីក្រោយ។ ចាប់ពីពេលនេះតទៅ បងប្អូនដែលចោទប្រកាន់ ដោយគ្មានមូលហេតុ ដោយគ្មានភស្តុតាង ធ្វើឱ្យប៉ះពាល់ដល់ក្រុមហ៊ុនធ្ងន់ធ្ងរនោះ ក្រុមហ៊ុនមិនអាចនៅស្ងៀមឡើយ។ អ្វីដែលខ្ញុំបានធ្វើ ខ្ញុំទទួល អ្វីដែលខ្ញុំមិនបានធ្វើ ខ្ញុំក៏មិនទទួល ព្រោះខ្ញុំមានកាតព្វកិច្ចថែទាំ ទទួលខុសត្រូវជោគវាសនាបុគ្គលិករាប់ពាន់នាក់ » ។
ក៏ប៉ុន្តែទន្ទឹមនឹងការប្រកាសបដិសេធនេះ លោក ឡេង ណាវ៉ាត្រា មិនបានផ្ដល់នូវភស្តុតាងរឹងមាំណាមួយដើម្បីបញ្ជាក់ពីភាពស្អាតស្អំនៃប្រភពលុយ និងភាពជាម្ចាស់កម្មសិទ្ធិលើមុខជំនួញទាំងឡាយរបស់លោកនោះឡើយ។
អគ្គលេខាធិការសហព័ន្ធនិស្សិតបញ្ញវន្តកម្ពុជា លោក គៀន ពន្លក ថ្លែងថា លោក ឡេង ណាវ៉ាត្រា គឺជាបុគ្គលសាធារណៈ ដូច្នេះការគំរាមប្រើប្រាស់វិធានការច្បាប់ដើម្បីបំបិទមាត់អ្នករិះគន់បែបនេះ មិនមែនជាជម្រើសត្រឹមត្រូវឡើយ។ លោកបន្ថែមថា ដើម្បីបំបាត់មន្ទិលសង្ស័យរបស់សាធារណជន លោក ឡេង ណាវ៉ាត្រា គួរតែចេញមុខបកស្រាយរឿងនេះឱ្យបានច្បាស់ជាមួយនឹងភស្តុតាងរឹងមាំ៖ « គាត់មានលុយវាល់លាន [ ដុល្លារ ] ឧបត្ថម្ភដល់កាកបាទក្រហមកម្ពុជា ហើយនិងឧបត្ថម្ភទៅកាន់គណបក្សកាន់អំណាចនោះ គឺលុយវាល់លាន មិនមែនជាសែកទៅទៀត គឺលុយសុទ្ធ។ អ៊ីចឹងគាត់ត្រូវមានភស្តុតាងណាមួយជាក់លាក់ ដើម្បីបញ្ជាក់ឱ្យបានច្បាស់ថា បញ្ហានេះគឺមិនមែនជាបញ្ហាដែលមានអ្នកកាងពីក្រោយខ្នង មិនមែនជាការលាងលុយកខ្វក់ ដើម្បីបង្ហាញប្រាប់មតិជាតិ និងអន្តរជាតិកុំឱ្យមានការសង្ស័យតទៅទៀត » ។
ទំនាក់ទំនងជាមួយគ្រួសារលោក ហ៊ុន សែន
មន្ទិលសង្ស័យរបស់សាធារណជនមួយចំនួនដែលថា លោក ឡេង ណាវ៉ាត្រា កំពុងឈរឈ្មោះធ្វើជំនួញឱ្យគ្រួសារត្រកូលហ៊ុននេះ បាននាំឱ្យមានប្រតិកម្មដោយផ្ទាល់ពីសំណាក់កូនប្រុសច្បងរបស់លោក ហ៊ុន សែន គឺលោក ហ៊ុន ម៉ាណែត។ អនាគតនាយករដ្ឋមន្ត្រីនៃគណបក្សប្រជាជនកម្ពុជារូបនេះបានបដិសេធថា លោក ឡេង ណាវ៉ាត្រា មិនមែនជាអ្នកឈរឈ្មោះរកស៊ីឱ្យលោកឡើយ ប៉ុន្តែសេដ្ឋីវ័យក្មេងរូបនេះជាសមាជិកក្រុមយុវជនរបស់លោក៖« គេរកស៊ីចំណេញរឿងដីធ្លី។ ពេលដែលមានក្រុមការងារយុវជន គេស្គាល់តាមក្រុមការងារយុវជន ខ្ញុំមិនដឹងអ្នកណាទេ។ ស្គាល់គ្នាបន្តបន្ទាប់ គេសុំចូលរួមជួយទៅ ហើយក្រោយមកគេបានងារឧកញ៉ារឿងអ្វីរបស់គាត់។ អចលនទ្រព្យ គេធ្វើនៅឯណា រឿងរបស់គេ។ ហើយបើចោទថា ឡេង ណាវ៉ាត្រា ជាមនុស្សរបស់ខ្ញុំដោយគ្រាន់តែជាក្រុមការងារយុវជនរបស់ខ្ញុំ មិនមែនមានតែ ឡេង ណាវ៉ាត្រា មួយទេ ឧកញ៉ានៅក្នុងក្រុមការងារយុវជនរបស់ខ្ញុំឧកញ៉ាមួយគគោក អ៊ីចឹងសុទ្ធតែគាត់រកស៊ីឱ្យខ្ញុំហើយអ៊ីចឹង ?» ។
ការបដិសេធរបស់លោក ហ៊ុន ម៉ាណែត នេះ គឺសម្រាប់តែខ្លួនលោកប៉ុណ្ណោះ ដោយលោកមិនបាននិយាយតំណាងឱ្យសមាជិកគ្រួសារ និងសាច់ញាតិរបស់លោកដទៃទៀតឡើយ ខណៈរបាយការណ៍ស៊ើបអង្កេតកន្លងទៅរកឃើញថា គ្រួសារត្រកូលហ៊ុនកំពុងក្ដោបក្ដាប់មុខជំនួញរាប់មិនអស់នៅកម្ពុជា រាប់ចាប់តាំងពីវិស័យអចលនទ្រព្យ ឧស្សាហកម្ម កសិកម្ម ទេសចរណ៍ តំបន់សេដ្ឋកិច្ចពិសេស ធនាគារ សារព័ត៌មាន និងវិស័យជាច្រើនទៀត។ អង្គការឃ្លាំមើលពិភពលោក (Global Witness) រកឃើញថា គ្រួសារត្រកូលហ៊ុនបានកាន់កាប់ដោយផ្ទាល់ និងដោយផ្នែកក្នុងក្រុមហ៊ុនជាច្រើនដែលមានដើមទុនចុះបញ្ជីជាង ២០០លានដុល្លារ ប៉ុន្តែនេះគ្រាន់តែជាតួលេខដែលគេបង្ហាញឱ្យឃើញក្នុងការចុះបញ្ជីនៅក្រសួងពាណិជ្ជកម្មប៉ុណ្ណោះ។ អង្គការអន្តរជាតិដដែលអះអាងថា គ្រួសារត្រកូលហ៊ុនមានភាគហ៊ុនច្រើនជាងនេះដែលមិនបានប្រកាសឱ្យដឹង ប៉ុន្តែប្រើអ្នកឈរឈ្មោះក្លែងក្លាយ និងជ្រកក្រោមផ្លាកក្រុមហ៊ុនផ្សេងៗ។
ស្ថាបនិកចលនាមាតាធម្មជាតិលោក អាឡិច ជឿជាក់ថា លោក ឡេង ណាវ៉ាត្រា គឺជាម្នាក់ក្នុងចំណោមអ្នកទាំងនោះ៖ « ក្នុងនាមជានាយករដ្ឋមន្ត្រី បើកូនខ្លួនឯងក្ដោបក្ដាប់សេដ្ឋកិច្ចគ្រប់ វិស័យដោយចំហ អាហ្នឹងអាចមានបញ្ហា។ មានបញ្ហាចំពោះប្រជារាស្ត្រខ្លួនឯង ដែលប្រជាជនមិនសប្បាយចិត្ត ជាពិសេសសម័យនេះដែលអត់សូវមានចំណូល មានសុទ្ធតែបំណុល ហើយអាចមានបញ្ហាចំពោះទណ្ឌកម្មអន្តរជាតិ។ អ៊ីចឹងបានជាគេចាប់ផ្ដើមរកមនុស្សបែប ណាវ៉ាត្រា ហ្នឹង ដាក់ឈ្មោះជំនួសគាត់ ដោយសារគេយល់អំពីហានិភ័យនៃការដាក់ឈ្មោះពិត » ។
លោក ឡេង ណាវ៉ាត្រា តែងតែបង្ហាញភាពជិតស្និទ្ធជាមួយក្រុមគ្រួសារលោកនាយករដ្ឋមន្ត្រី ហ៊ុន សែន។ លោកធ្លាប់លុតជង្គង់ថ្វាយបង្គំលោក ហ៊ុន សែន និងភរិយា ហែហមលោក ហ៊ុន សែន ចុះចែកអំណោយដល់ពលរដ្ឋ ចុះធ្វើការងារសង្គមជាមួយកូនៗលោក ហ៊ុន សែន ព្រមទាំងប្រកាសគាំទ្រឥតងាករេចំពោះការដឹកនាំរបស់លោក ហ៊ុន សែន ទៀតផង។ រីឯលោក ហ៊ុន សែន វិញ លោកធ្លាប់បានលើកសរសើរលោក ឡេង ណាវ៉ាត្រា ជាសាធារណៈជាច្រើនដង ស្របពេលមង្គលការប្អូនស្រីលោក ឡេង ណាវ៉ាត្រា ក៏មានវត្តមានរបស់លោក ហ៊ុន ម៉ាណែត និងមន្ត្រីគ្រាក់ៗ មួយចំនួនចូលរួមដែរ។
ទំនងជាដោយសារភាពជិតស្និទ្ធជាមួយគ្រួសារលោក ហ៊ុន សែន នេះហើយ ទើបបានជាលោក ឡេង ណាវ៉ាត្រា ទទួលបាននូវគោរព និងសម្របសម្រួលពីមន្ត្រីរដ្ឋាភិបាល កងកម្លាំងប្រដាប់អាវុធ និងអាជ្ញាធរមូលដ្ឋាននៅពេលលោកចុះធ្វើសកម្មភាពអ្វីមួយ ទាំងការធ្វើជំនួញ និងកិច្ចការមនុស្សធម៌។ ជាងនេះទៅទៀត កាលពីឆ្នាំ ២០២១ លោក ហ៊ុន សែន បានកាត់ដីគម្របព្រៃឈើចំនួន ១៧២ ហិកតារនៅស្រុកបន្ទាយស្រី ខេត្តសៀមរាប ដើម្បីផ្ដល់ជាកម្មសិទ្ធិទៅឱ្យលោក ឡេង ណាវ៉ាត្រា។ ក្រោយមកទៀត លោក ហ៊ុន សែន បានសម្រេចកាត់ឆ្វៀលដីមួយចំណែកធំនៅតំបន់ភ្នំតាម៉ៅទៅឱ្យក្រុមហ៊ុនលោក ឡេង ណាវ៉ាត្រា ថែមទៀត។ ករណីភ្នំតាម៉ៅនេះ បើកុំតែមានប្រតិកម្មភ្លូកទឹកភ្លូកដីពីសាធារណជន ពុំនោះទេលោក ហ៊ុន សែន ក៏មិនលុបចោលគម្រោងនេះវិញដែរ។ លោក ហ៊ុន សែន មិនត្រឹមតែគ្មានចំណាត់ការលើក្រុមហ៊ុន ឡេង ណាវ៉ាត្រា ដែលបានឈូសកម្ទេចព្រៃភ្នំតាម៉ៅអស់រាប់រយហិកតារនោះទេ ប៉ុន្តែលោកថែមទាំងចេញមុខពាំងឱ្យក្រុមហ៊ុននេះថែមទៀតផង៖ « ត្រូវកាត់ទោសអ្នកបំផ្លាញព្រៃអភិរក្សនៅភ្នំតាម៉ៅ និងអ្នកស៊ីញេផ្តល់សិទ្ធិ។ អើ ! នាងអើយ ទៅកាត់ទោសទៅ ទៅកាត់ទោសអញម៉ោ !» ។
គេនៅមិនទាន់ដឹងថា តើលោក ហ៊ុន សែន នឹងមានគម្រោងកាត់ដីរដ្ឋនៅទីតាំងណាខ្លះទៀតទៅឱ្យក្រុមហ៊ុន លោក ឡេង ណាវ៉ាត្រា នោះទេ ក្រោយពីគម្រោងកាត់ឆ្វៀលដីភ្នំតាម៉ៅនេះត្រូវទទួលបរាជ័យ។ ទោះជាយ៉ាងណាក្ដី សេណារីយ៉ូមួយដែលអ្នកការពារភោគទ្រព្យជាតិ មន្ត្រីអង្គការសង្គមស៊ីវិល និងពលរដ្ឋមួយចំនួនព្រួយបារម្ភនោះ គឺថា ប្រសិនបើលោក ឡេង ណាវ៉ាត្រា ជាអ្នកឈរឈ្មោះរកស៊ីឱ្យគ្រួសារលោក ហ៊ុន សែន មែន នោះទ្រព្យសម្បត្តិជាតិជាច្រើនអាចនឹងក្លាយជាទ្រព្យសម្បត្តិឯកជនរបស់គ្រួសារត្រកូលហ៊ុន តាមរយៈការចុះហត្ថលេខាដោយផ្ទាល់ពីលោក ហ៊ុន សែន ក្នុងនាមជានាយករដ្ឋមន្ត្រី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។