មន្ត្រីក្រសួងសុខាភិបាលកម្ពុជា ថ្លែងថា រដ្ឋាភិបាលបានអនុវត្តយុទ្ធសាស្ត្រជំហានទី៣ ស្ដីពីការពង្រឹងប្រព័ន្ធសុខាភិបាលឲ្យកាន់តែមានគុណភាព ក្នុងការផ្ដល់សេវាព្យាបាលជំងឺ និងថែទាំសុខភាពជូនពលរដ្ឋឲ្យមានសុវត្ថិភាព ស័ក្តិសិទ្ធិភាព ព្រមទាំងសមធម៌ចាប់ពីឆ្នាំ២០១៦ រហូតទៅដល់ឆ្នាំ២០២០។
ការប្រកាសចេញនូវយុទ្ធសាស្ត្រនេះ ក្នុងបំណងកាត់បន្ថយភាពពិការផ្នែកសុខភាពដោយសារជំងឺ ព្រមទាំងភាពពិការដោយសារតែគ្រោះថ្នាក់ផ្សេងៗទៅលើពលរដ្ឋខ្មែរ ជាហេតុធ្វើឲ្យបាត់បង់កម្លាំងពលកម្មរបស់សង្គម។
ក្រសួងសុខាភិបាល សហការជាមួយអង្គការសុខភាពពិភពលោក (WHO) ក្រសួងសង្គមកិច្ច អតីតយុទ្ធជន និងយុវនីតិសម្បទា ព្រមទាំងអង្គការជនពិការអន្តរជាតិ (Handicap International) បានធ្វើវេទិកាថ្នាក់ជាតិរយៈពេល ៣ថ្ងៃ ស្ដីពីការស្ដារលទ្ធភាពពលកម្មឡើងវិញនៅឯខេត្តសៀមរាប។
វេទិកានេះ ចាប់ផ្ដើមនៅព្រឹកថ្ងៃទី១ ហើយបន្តរហូតដល់ថ្ងៃទី៣ ខែសីហា ក្នុងបំណងចែករំលែកចំណេះដឹង បទពិសោធន៍ទៅឲ្យក្រុមគ្រូពេទ្យ និងអង្គការជាដៃគូនានាឲ្យយល់ដឹងអំពីការផ្ដល់សេវាថែទាំសុខភាព និងព្យាបាលជំងឺជូនពលរដ្ឋនៅតាមសហគមន៍ឲ្យមានប្រសិទ្ធភាព ដើម្បីកាត់បន្ថយនូវភាពពិការទាំងឡាយ ព្រមទាំងស្ដារលទ្ធភាពពលកម្មឡើងវិញនៅក្នុងសង្គម។
រដ្ឋលេខាធិការក្រសួងសុខាភិបាល គឺលោក អេង ហួត។ លោកថ្លែងនៅក្នុងពិធីប្រកាសបើកវេទិកាថ្នាក់ជាតិនៅព្រឹកថ្ងៃអង្គារ ទី១ ខែសីហា ថា រដ្ឋាភិបាលបានដាក់ចេញយុទ្ធសាស្ត្រអភិវឌ្ឍន៍ប្រកបដោយចីរភាព ចាប់ពីឆ្នាំ២០១៦ រហូតដល់ឆ្នាំ២០៣០ គឺជំរុញឲ្យវិស័យសុខាភិបាលអនុវត្តយុទ្ធសាស្ត្រជំហានទី៣ ចាប់ពីឆ្នាំ២០១៦-២០២០ ពង្រឹងការផ្ដល់សេវាព្យាបាលជំងឺ និងថែទាំសុខភាពជូនពលរដ្ឋឲ្យកាន់តែមានគុណភាព សុវត្ថិភាព និងប្រសិទ្ធភាព។
លោករដ្ឋលេខាធិការដដែលបញ្ជាក់ថា ក្នុងទសវត្សរ៍ចុងក្រោយនេះ កម្ពុជា បានទទួលជោគជ័យលើការលើកកម្ពស់ផ្នែកសុខភាពស្ត្រី កុមារ និងជនងាយរងគ្រោះ ដូចជាការកាត់បន្ថយអត្រាមរណៈរបស់ម្ដាយ និងទារកនៅពេលសម្រាលកូន ជាដើម ក៏ប៉ុន្តែបច្ចុប្បន្ន វិស័យសុខាភិបាលនៅតែប្រឈមមុខនឹងការព្យាបាលសុខភាពពលរដ្ឋមួយចំនួន ដូចជាជនចាស់ជរាមានកំណើនកាន់តែច្រើនឡើងៗ បញ្ហាគ្រោះថ្នាក់ចរាចរណ៍ ជំងឺមិនឆ្លងរ៉ាំរ៉ៃ ព្រមទាំងបញ្ហាសុខភាពសាធារណៈ ដែលតម្រូវឲ្យមានការយកចិត្តទុកដាក់បន្ថែម តាមរយៈការស្ដារលទ្ធភាពពលកម្មនៅក្នុងការងារសង្គមឡើងវិញ៖ « ក្រសួងសុខាភិបាល សហការជាមួយដៃគូពាក់ព័ន្ធ រួមទាំងអង្គការសុខភាពពិភពលោក តាមរយៈការផ្ដល់ជំនួយហិរញ្ញវត្ថុពីរដ្ឋាភិបាលអូស្ត្រាលី យើងបានដាក់ឲ្យប្រើប្រាស់នូវមគ្គុទ្ទេសក៍នៃការស្ដារលទ្ធភាពពលកម្មសម្រាប់ជំងឺគ្រោះថ្នាក់សរសៃឈាមខួរក្បាល »។
ជនពិការកម្ពុជា បានទាមទារឲ្យរដ្ឋាភិបាល មិនត្រឹមតែផ្ដល់សេវាព្យាបាលជំងឺឲ្យកាន់តែមានប្រសិទ្ធភាពប៉ុណ្ណោះទេ គឺត្រូវឲ្យមានការផ្ដល់ឧបករណ៍ជួយទ្រទ្រង់រាងកាយថែមទៀតទៅដល់អ្នកដែលពិការទៅហើយនោះ។
នាយកប្រតិបត្តិអង្គការជនពិការកម្ពុជា លោក ងិន សៅរ័ត្ន មានប្រសាសន៍ថា ប្រសិនបើជនពិការគ្រប់រូបខ្វះសេវាព្យាបាលសុខភាព និងឧបករណ៍ទ្រទ្រង់រាងកាយ គឺមានន័យថា ជនពិការទាំងឡាយមិនអាចចូលរួមការងារសង្គម ហើយនិងការរស់នៅបានប្រសើរទេ៖ « រវាងការរស់នៅរបស់អ្នកពិការ និងអ្នកមិនពិការ គឺមានភាពខុសគ្នា។ មានន័យថា អ្នកមិនពិការគ្រាន់តែទទួលបានសេវាព្យាបាលសុខភាពល្អនោះប្រសើរហើយ ប៉ុន្តែអ្នកពិការវិញ ត្រូវការឧបករណ៍ជួយទ្រទ្រង់រាងកាយថែមទៀត »។
ឯកអគ្គរដ្ឋទូតអូស្ត្រាលី ប្រចាំកម្ពុជា អ្នកស្រី អេនជេលឡា ខកខររ៉េន (Angela Corcoran) ថ្លែងថា រដ្ឋាភិបាលអូស្ត្រាលី គាំទ្រ ព្រមទាំងផ្ដល់មូលនិធិឲ្យរដ្ឋាភិបាលកម្ពុជា ក្នុងការអនុវត្តយុទ្ធសាស្ត្រពង្រឹងវិស័យសុខាភិបាល ដើម្បីស្ដារលទ្ធភាពពលកម្មឡើងវិញនេះ។
របាយការណ៍ដែលសហការបោះពុម្ពដោយអង្គការជនពិការកម្ពុជា និងអង្គការជនពិការអន្តរជាតិ ឲ្យដឹងថា យោងតាមការជំរឿនទូទាំងប្រទេសកាលពីឆ្នាំ២០១៣ គឺក្នុងចំណោមពលរដ្ឋខ្មែរជាង ១៥លាននាក់ មានអត្រាជនពិការ ២,១%។ ភាពពិការទាំងនោះ បណ្ដាលមកពីគ្រោះថ្នាក់ដោយសារគ្រាប់មីន គ្រោះថ្នាក់ចរាចរណ៍ និងបណ្ដាលមកពីបញ្ហាជំងឺផ្សេងៗមួយចំនួនទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។