អតីតនាយករដ្ឋមន្ត្រីលោក ហ៊ុន សែន ចេញមុខបំភ្លឺថា ភរិយារបស់លោកគឺ អ្នកស្រី ប៊ុន រ៉ានី ពិតជាដួលសន្លប់ និងកំពុងព្យាបាលជំងឺ។
អតីតនាយករដ្ឋមន្ត្រី លោក ហ៊ុន សែន ឱ្យដឹងតាមរយៈទំព័រហ្វេសប៊ុក នៅថ្ងៃទី០២ ខែកុម្ភៈថា កាលពី៤ថ្ងៃមុន ភរិយារបស់លោកដួលក្នុងបន្ទប់សម្រាក ដែលធ្វើឱ្យប៉ះពាល់ក្បាលដែលចាំបាច់ត្រូវយកទៅពិនិត្យ និងព្យាបាលនៅមន្ទីរពេទ្យកាលម៉ែត្រ។ លោក ហ៊ុន សែន ឱ្យដឹងទៀតថា បន្ទាប់ពីពិនិត្យព្យាបាល ពីគ្រូពេទ្យសុខភាពភរិយារបស់លោកបានល្អប្រសើរវិញហើយ តែមិនទាន់អាចចាកចេញពីមន្ទីរពេទ្យនៅឡើយទេ ព្រោះត្រូវរង់ចាំការថតក្បាលជាលើកទី៣ ដើម្បីមើលសរសៃដែលរងការប៉ះទង្គិចនោះ។
អតីតនាយករដ្ឋមន្ត្រី និងជាប្រធានគណបក្សកាន់អំណាចរូបនេះឱ្យដឹងថា គិតមកដល់មកត្រឹមថ្ងៃទី០២ ខែកុម្ភៈ ភរិយារបស់លោក ហ៊ុន សែន កំពុងសម្រាកព្យាបាលនៅក្នុងមន្ទីរពេទ្យកាល់ម៉ែត្រ ដោយមិនបានបញ្ជូនទៅសង្គ្រោះនៅក្រៅប្រទេសនោះឡើយ។ នេះបើតាមការអះអាងរបស់លោក។
ទោះយ៉ាងណា លោក ហ៊ុន សែន មិនទាន់បង្ហាញរូបភាពភរិយារបស់លោកដែលបានធូរស្រាលពីរបួសវិញ នៅពេលនេះនៅឡើយទេ។ លោកត្រឹមបង្ហោះរូបភាពចាស់មួយសន្លឹករបស់លោកជាមួយភរិយាលោកប៉ុណ្ណោះ។ ការចេញមុខបកស្រាយពីបញ្ហាសុខភាពភរិយារបស់លោកនៅពេលនេះ បន្ទាប់លោក ហ៊ុន សែន និងកូនៗរបស់លោក បានរក្សាភាពស្ងៀមស្ងាត់ មិនបកស្រាយពីបញ្ហាសុខភាពអ្នកស្រី ប៊ុន រ៉ានី ទោះជាមានសារព័ត៌មាន និងបណ្ដាញសង្គមមួយចំនួនបានផ្សព្វផ្សាយពីបញ្ហាសុខភាពរបស់ អ្នកស្រី ប៊ុន រ៉ានី។ លោក ហ៊ុន សែន ក៏អរព្រះគុណ ព្រះមហាក្សត្រី នរោត្ដម មុនីនាថ សីហនុ ដែលយាងទៅសួរសុខទុក្ខភរិយារបស់លោកដល់មន្ទីរពេទ្យផងដែរ។
លោក ហ៊ុន សែន ក៏ឆ្លៀតឱកាសនេះ ស្នើទៅអ្នករិះគន់ ដែលលោកហៅថា ពួកអាក្រក់ឱ្យបញ្ឈប់នូវការបំពុលព័ត៌មាន រឿងបញ្ហាសុខភាពភរិយារបស់លោក។
វិទ្យុអាស៊ីសេរីមិនអាចសុំការបកស្រាយពីប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា អ្នកនាំពាក្យនាយករដ្ឋមន្ត្រី លោក មាស សុភ័ណ្ឌ និងអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេនៅថ្ងៃទី២ ខែកុម្ភៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។