ក្រសួងសុខាភិបាលប្រកាសថា មានអ្នកជំងឺកូវីដ១៩ ម្នាក់ថ្មីទៀតបានស្លាប់ ដែលជាអ្នកបានចាក់វ៉ាក់សាំងរួចរាល់ ប៉ុន្តែក្រសួងមិនបានបញ្ជាក់អំពីអត្តសញ្ញាណ និងទីកន្លែងអ្នកស្លាប់នោះទេ។ ចំណែកករណីឆ្លងថ្មីវិញ ក្រសួងសុខាភិបាលឱ្យដឹងថា មាន ១៣៩នាក់ ដែលសុទ្ធតែជាមេរោគ អូមីក្រុង (Omicron) ក្នុងនោះជាង ១០០នាក់ ជាករណីឆ្លងក្នុងសហគមន៍ និងចំនួន ២៤នាក់ទៀត ជាករណីនាំ ចូលពីក្រៅប្រទេស។
គិតត្រឹមព្រឹកថ្ងៃទី១៥ មីនានេះ កម្ពុជាមានអ្នកកើតជំងឺកូវីដ-១៩ ជាង ១៣ម៉ឺននាក់ (១៣៤.៣៥២) ក្នុងនោះអ្នកជាសះស្បើយមានជិត ១៣ម៉ឺននាក់ (១២៩.៧១៩) និងអ្នកស្លាប់មានចំនួន ៣ពាន់ ៤៨ នាក់ (៣.០៤៨)។
ចំពោះការចាក់វ៉ាក់សាំងបង្ការជំងឺកូវីដ១៩ វិញ ក្រសួងសុខាភិបាលប្រកាសថា គិតត្រឹមថ្ងៃទី១៤ មីនាម្សិលមិញ រដ្ឋាភិបាលចាក់ជូនពលរដ្ឋដែលមានអាយុចាប់ពី ៣ឆ្នាំឡើងបានជាង ១៤លាន ៧សែននាក់ សម្រាប់ដូសទី១ រីឯដូសទី២ ចាក់បានជាង ១៣លាន ៩សែននាក់ ហើយដូសទី៣ និងដូសទី៤ រដ្ឋាភិបាលចាក់ជូនពលរដ្ឋបានជាង ៨លាន ៧សែននាក់៕