អង្គការ​សង្គម​ស៊ីវិល​សង្ស័យ​លើ​សមត្ថភាព និង​ការ​លាក់បាំង​ព័ត៌មាន​ករណី​ឆ្លង​វីរុស ​កូរ៉ូណា នៅ​កម្ពុជា

0:00 / 0:00

សង្គម​ស៊ីវិល សង្ស័យ​លើ​សមត្ថភាព និង​តម្លាភាព​របស់​ក្រសួង​សុខាភិបាល ពាក់ព័ន្ធ​នឹង​ករណី​ឆ្លង​មេរោគ​វីរុស​កូរ៉ូណា​នៅ​កម្ពុជា។ ការ​សង្ស័យ​នេះ បន្ទាប់​ពី​មាន​ជន​ជាតិ​ចិន ៣នាក់ រក​ឃើញ​ថា ឆ្លង​​មេរោគ​កូរ៉ូណា ក្រោយ​ពួក​គេ​ចាក​ចេញ​ពី​កម្ពុជា​រយៈ​ពេល ៤ថ្ងៃ។

មន្ត្រី​សង្គម​ស៊ីវិល និង​ពលរដ្ឋ​មួយ​ចំនួន នៅ​តែ​មិន​អស់​ចិត្ត​ចំពោះ​ការ​បក​ស្រាយ​របស់​ក្រសួង​សុខាភិបាល​ដែល​ថា ជន​ជាតិ​ចិន ៣នាក់ មិន​បាន​ឆ្លង​វីរុស​កូរ៉ូណា​នៅ​កម្ពុជា​នោះ​ទេ ប៉ុន្តែ ពួក​គេ​ទំនង​ជា​ឆ្លង ពេល​ធ្វើ​ដំណើរ​នៅ​លើ​យន្តហោះ ឬ​ពេល​ទៅ​ដល់ និង​ស្នាក់​នៅ​ក្នុង​ប្រទេស​ចិន​វិញ។

នាយក​ប្រតិបត្តិ​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ មាន​ប្រសាសន៍​ថា លោក​មាន​ការ​សង្ស័យ​ច្រើន ចំពោះ​ការ​រក​ឃើញ​ផ្ទុយ​គ្នា​រវាង​ក្រុម​គ្រូ​ពេទ្យ​កម្ពុជា និង​ក្រុម​គ្រូពេទ្យ ចិន លើ​ជន​ជាតិ​ចិន ៣នាក់ ដែល​ឆ្លង​វីរុស​កូរ៉ូណា​នោះ។ លោក​យល់​ថា ក្រសួង​សុខាភិបាល​កម្ពុជា គួរ​តែ​ពិនិត្យ និង​ស្រាវជ្រាវ​ករណី​នេះ​ឡើង​វិញ​ឲ្យ​បាន​ច្បាស់លាស់ ព្រោះ​មិន​អាច​ទៅ​រួច​នោះ​ទេ ដែល​ថា ជន​ជាតិ​ចិន ៣នាក់ អាច​ឆ្លង​វីរុស​កូរ៉ូណា​នៅ​លើ​យន្តហោះ៖ « យើង​មាន​ការ​មន្ទិល​ទី១ ទៅ​លើ​សមត្ថភាព​ក្នុង​ការ​បញ្ជាក់​ទៅ​លើ​ការ​រក​រោគសញ្ញា។ ទី២ អាច​ហៅ​ថា​ជា​ការ​ធ្វេស​ប្រហែស ដែល​ទាំង​នេះ​ជា​ប្រភេទ​រូបភាព​មួយ​ធ្វើ ឲ្យ​យើង​មាន​ការ​មន្ទិល​សង្ស័យ​កាន់​តែ​ខ្លាំង​ទៅ​លើ​ជន​ជាតិ​ចិន​ដទៃ​ទៀត​ដែល​ចូល​មក​ដល់​កម្ពុជា ជា​ពិសេស មុន​ពេល​នៃ​ការ​ផ្ទុះ​កក្រើក​នៃ​វីរុស​កូរ៉ូណា​នេះ »

ការ​លើក​ឡើង​នេះ បន្ទាប់​ពី​សារ​ព័ត៌មាន​ចិន​ចុះ​ផ្សាយ កាល​ពី​ថ្ងៃ​ទី៣ ខែ​កុម្ភៈ​ថា មាន​ជន​ជាតិ ៣នាក់ ដែល​​ទើប​​តែ​​ចាក​​ចេញ​​ពី​​កម្ពុជា​​កាល​​ពី​​ថ្ងៃ​​ទី២៩ ខែ​​មករា ត្រូវ​​បាន​​រក​​ឃើញ​​ថា ពួក​​គេ​​បាន​ផ្ទុក​វីរុស​​កូរ៉ូណា នៅ​​ពេល​​ទៅ​​ដល់​​ប្រទេស​​ចិន​​វិញ​​រយៈ​​ពេល ៤ថ្ងៃ។ ជន​ជាតិ​ចិន​ទាំង ៣នាក់​នេះ មាន​​ប្រុស​​ម្នាក់​​អាយុ ៦២ឆ្នាំ និង​​ស្រី ២នាក់ ដោយ​​ម្នាក់​​អាយុ ៦២ឆ្នាំ និង​​ម្នាក់​​ទៀត អាយុ ៥៨ឆ្នាំ។ ពួក​គេ​ទាំង ៣នាក់នេះ ស្ថិត​ក្នុង​ចំណោម​ជនជាតិ​ចិន​ជិត ៨០នាក់ ដែល​បាន​ជិះ​យន្តហោះ​ជាមួយ​បុរស​ចិន​ម្នាក់​ទៀត ដែល​ផ្ទុក​មេរោគ​កូរ៉ូណា ចេញ​ពី​ទីក្រុង​វូហាន មក​កាន់​ខេត្ត​ព្រះសីហនុ កាល​ពី​​ថ្ងៃទី​២៣ ខែ​មករា ឆ្នាំ២០២០។

អ្នក​នាំ​ពាក្យ​ក្រសួង​សុខាភិបាល វេជ្ជបណ្ឌិត លី សូវ៉ាន់ បាន​ប្រាប់​អាស៊ី​សេរី កាល​ពី​ថ្ងៃ​ទី៣ ខែ​កុម្ភៈ​ថា ជន​ជាតិ​ចិន​ទាំង ៣នាក់​នោះ​ អាច​ប្រហែល​ឆ្លង​ពី​ជន​ជាតិ​ចិន​ដូច​គ្នា​ពេល​ធ្វើ​ដំណើរ​តាម​យន្ត​ហោះ ឫ ពេល​ទៅ​ដល់​ប្រទេស​ចិន​វិញ មិន​មែន​ឆ្លង​ក្នុង​អំឡុង​ពេល​ពួក​គេ​ស្នាក់​នៅ​កម្ពុជា​ឡើយ។ លោក​អះអាង​ថា ជន​ជាតិ​ចិន​ទាំង ៣នាក់​នេះ មុន​ពេល​ត្រឡប់​ទៅ​ប្រទេស​ចិន​វិញ​នោះ គឺ​ពួក​គេ​ស្នាក់​នៅ​សណ្ឋាគារ​មួយ ក្នុង​ខែត្រ​ព្រះ​សីហនុ ហើយ​គ្រូពេទ្យ​កម្ពុជា ក៏​បាន​ពិនិត្យ​សុខភាព របស់​ពួក​គេ​ដែរ ប៉ុន្តែ​រក​មិន​ឃើញ​មាន​រោគ​សញ្ញា​វិជ្ជមាន​នោះ​ទេ។

ទោះ​ជា​យ៉ាង​ណា ប្រជាពលរដ្ឋ​មួយ​ចំនួន បង្ហោះ​សារ​នៅ​លើ​ហ្វេសប៊ុក​បង្ហាញ​ការ​ព្រួយ​បារម្ភ និង ដាក់​ការ​សង្ស័យ​ទៅ​លើ​សមត្ថភាព​របស់​ក្រសួង​សុខាភិបាល​កម្ពុជា ក្នុង​ការ​ពិនិត្យ​រក​មេរោគ​កូរ៉ូណា​នេះ ឬ​អាច​ថា ក្រសួង​សុខាភិបាល​លាក់​បាំង​ព័ត៌មាន។ អ្នក​ខ្លះ​ចោទ​ជា​សំណួរ​ថា យោង​តាម​ការ ប្រកាស​របស់​ក្រសួង​សុខាភិបាល​កន្លង​មក គឺ​អ្នក​ឆ្លង​វីរុស​នេះ នឹង​ចេញ​រោគ​សញ្ញា​ក្នុង​រយៈ​ពេល ១៤ថ្ងៃ ឬ​ពីរ​សប្តាហ៍ ដូច្នេះ​មាន​ន័យ​ថា ប្រសិន​បើ​ជន​ជាតិ​ចិន​ទាំង ៣នាក់នេះ ទើប​តែ​ទៅ​ដល់​ប្រទេស​ចិន​ក្នុងរយៈពេល៣ទៅ៤ថ្ងៃនេះ ហើយ​រក​ឃើញ​រោគ​សញ្ញា​ភ្លាម គឺ​មាន​ន័យ​ថា ពួក​គេ​មាន វីរុស​កូរ៉ូណា​ក្នុង​ខ្លួន​តាំង​ពី​នៅ​ស្រុក​ខ្មែរ​រួច​ទៅ​ហើយ ហើយ​ក៏​មាន​លទ្ធភាព​ខ្ពស់​ក្នុង​ចម្លង​ទៅ​មនុស្ស ផ្សេង​ទៀត​ដែរ។

ទាក់ទង​នឹង​ករណី​នេះ អគ្គនាយក​ក្រុមហ៊ុន ម៉េងលី ជេ. គួច អេឌ្យូខេសិន (J.Quach Education) លោក​វេជ្ជបណ្ឌិត គួច ម៉េងលី មាន​ប្រសាសន៍​ថា លោក​មិន​ជំទាស់​ចំពោះ​ការ​បក​ស្រាយ​របស់​ក្រសួង​សុខាភិបាល​នោះ​ទេ ប៉ុន្តែ​លោក​បញ្ជាក់​ថា នៅ​ពេល​មេរោគ​អ្វី​មួយ​ឆ្លង​ចូល​ក្នុង​ខ្លួន​មនុស្ស គឺ​មិន​អាច​ចេញ​រោគ​សញ្ញា​ភ្លាមៗ នោះ​ទេ។ លោក​អះអាង​ថា ការ​ចេញ​រោគ​សញ្ញា គឺ​អាច​ចាប់​ពី​ថ្ងៃ​ទី២ រហូត​ដល់​ថ្ងៃ​ទី១៤ បន្ទាប់​ពី​ការ​ឆ្លង​មេរោគ​ពី​មនុស្ស​ម្នាក់​ទៅ​មនុស្ស​ម្នាក់៖ « ពេល​វេលា​យ៉ាង​ហោច​ណាស់​ក៏​មួយ​ថ្ងៃ​ដល់ ១៤ថ្ងៃ​ដែរ ឬ​ពីរ​សប្ដាហ៍ ដើម្បី​វីរុស​ចេញ​សញ្ញា។ ដូច្នេះ​ការ​ចេញ​សញ្ញា​នេះ អាច​ចេញ​នៅ​ពេល​យូរ។ ដូច្នេះ​ហើយ​យើង​អត់ ដឹង​ថា វា​ពិត​ប្រាកដ​វា​កើត​ឡើង​នៅ​លើ​ស្រុក​ចិន ឬ​ស្រុក​ខ្មែរ​ទេ ឬ​នៅ​កន្លែង​ណា​យើង​អត់​ដឹង​ពិត​ប្រាកដ។ តាម​ខ្ញុំ​ដឹង​តាម​ក្រសួង​សុខាភិបាល​ប្រកាស​មក​វា​ត្រូវ​ម្យ៉ាង​ដែរ ព្រោះ​ក្រែងលោ​គាត់ មាន​ឆ្លង​រោគ​នេះ ពី​ស្រុក​ចិន​ក៏​មិន​ដឹង»

អាស៊ី​សេរី បាន​ព្យាយាម​សុំ​ការ​បញ្ជាក់​បន្ថែម​ពី​អ្នក​នាំ​ពាក្យ​ក្រសួង​សុខាភិបាល​ពីរ​រូប គឺ​អ្នកស្រី ឱ វណ្ណឌីន និង​លោក លី សូវ៉ាន់ ប៉ុន្តែ​ពុំ​មាន​អ្នក​ទទួល​ទូរស័ព្ទ​នៅ​ថ្ងៃ​ទី៤ ខែ​កុម្ភៈ។

ជំងឺ​រលាក​ប្រព័ន្ធ​ដង្ហើម ដែល​បង្ក​ដោយ​វីរុស​កូរ៉ូណា​ថ្មី​នេះ បាន​ផ្ទុះ​ឡើង​នៅ​ទីក្រុង​វូហាន ខេត្ត​ហ៊ូបេ (Hubei) ប្រទេស​ចិន ចាប់​តាំង​ពី​ចុង​ខែ​ធ្នូ ឆ្នាំ២០១៩។ គិត​ត្រឹម​ថ្ងៃ​ទី៤ ខែ​កុម្ភៈ វីរុស​កូរ៉ូណា បាន​សម្លាប់​មនុស្ស ៤២៧នាក់​ក្នុង​ប្រទេស​ចិន និង​ម្នាក់​ទៀត​នៅ​ប្រទេស​ហ្វីលីពីន ហើយ​អ្នក​ឆ្លង​វីរុស​នេះ បាន​កើន​ដល់​ជាង ២ម៉ឺនាក់ហើយ ។ រួម​ទាំង​ក្នុង​ប្រទេស​ចិន​ផង ករណី​ឆ្លង​មេរោគ​នេះ បាន​រីក​រាលដាល​ដល់​ប្រទេស​ចំនួន២៦។

រដ្ឋាភិបាល​លោក ហ៊ុន សែន ពុំ​មាន​វិធានការ​បិទ​ជើង​ហោះហើរ និង​ជម្លៀស​និស្សិត​ខ្មែរ​ពី​ប្រទេស ចិន ដូច​អ្វី​ដែល​រដ្ឋាភិបាល​ប្រទេស​មួយ​ចំនួន​កំពុង​តែ​ធ្វើ​នោះ​ទេ ទោះ​បី​ជា​អង្គការ​សុខភាព​ពិភព​លោក ​ប្រកាស​ដាក់​ករណី​ផ្ទុះ​រីក​រាលដាល​នៃ​ជំងឺ​រលាក​ផ្លូវ​ដង្ហើម​បង្កឡើង​ដោយ​មេរោគ​វីរុស​កូរ៉ូណា​ប្រភេទ​ថ្មី​នេះ ជា​បញ្ហា​អាសន្ន​សាកល​ផ្នែក​សុខភាព​ក៏ដោយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។