សមាគមបណ្ដាញយុវជនកម្ពុជា (CYN) កាលពីថ្ងៃទី០២ ខែមិថុនា ចេញផ្សាយរបាយការណ៍មួយ ស្ដីពីយុវជនក្នុងអំឡុងពេលជំងឺកូវីត១៩ ដោយបង្ហាញពីផលប៉ះពាល់យុវជនដល់មួយចំនួននៅក្នុងរាជធានីភ្នំពេញ និងយុវជននៅជុំវិញតំបន់ព្រៃឡង់។របាយការណ៍នេះផ្ដោតលើផលប៉ះពាល់ដូចជា ការអប់រំ សិទ្ធិការងារ ការចូលរួមការពារធនធានធម្មជាតិ និងការលើកកម្ពស់សិទ្ធិមនុស្សនិងប្រជាធិបតេយ្យ។
មន្ត្រីផ្នែកកម្មវិធីស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា ស៊ីហៅកាត់ថា (CYN) លោក ហេង គឹមហុង ថ្លែងថា របាយការណ៍ស្រាវជ្រាវនេះគឺផ្ដោតសំខាន់ទៅលើយុវជនរស់នៅរាជធានីភ្នំពេញ និងយុវជនរស់នៅជុំវិញតំបន់ព្រៃឡង់ដែលរងពាល់ប៉ះពាល់កំឡុងពេលកូវីដ១៩ ពាក់ព័ន្ធនឹង ការអប់រំ ការបំពេញការងារ ការចូលរួមកិច្ចការពារធនធានធម្មជាតិ ការលើកកម្ពស់សិទ្ធិមនុស្ស និងប្រជាធិបតេយ្យ។ លោកបន្តថា បញ្ហាប្រឈមក្នុងពេលរីករាលដាលជំងឺកូវីដ គឺយុវជនមួយចំនួននៅតំបន់ដាច់ស្រយាលពុំមានសេវាទូរស័ព្ទសម្រាប់សិក្សាតាមប្រព័ន្ធអនឡាយ (online) ដែលធ្វើឱ្យពួកគាត់មួយចំនួនបោះបង់ការសិក្សា ការរំលោភសិទ្ធិមនុស្សដោយមិនឱ្យពលរដ្ឋចូលល្បាតព្រៃ និងអំពើពុករលួយនៅតែបន្តកើតឡើង បើទោះបីជាមានរីករាលដាលបញ្ហាកូវីដយ៉ាងណាក្ដី។ លើសពីនេះ លោក ហេង គឹមហុង បន្ថែមថា កត្តាចម្បងដែលធ្វើឱ្យមានយុវជនបោះបង់ការសិក្សា ការងារ និងធ្វើឱ្យបាត់បង់ធនធានធម្មជាតិនោះ គឺដោយសាររដ្ឋាភិបាលបានចេញវិធានការមួយចំនួនប៉ះពាល់ដល់ការអនុវត្តសិទ្ធិសេរីភាពរបស់ពួកគាត់ និងកង្វះការយកចិត្តទុកដាក់ចំពោះយុវជន។
លោក ហេង គឹមហុង៖ «យើងសង្ឃឹមថា ភាគីពាក់ព័ន្ធជាពិសេសអង្គការរដ្ឋនឹងពិនិត្យទៅលើអនុសាសន៍របស់យើងអាចជំរុញឱ្យមានការបង្កលក្ខណៈឱ្យងាយស្រួលបន្ថែមទៀត បើពេលខាងមុខមានវិបត្តិស្រដៀងគ្នានេះហើយនៅពេលអនាគត ហើយមួយទៀតយើងឃើញថា ពាក់ព័ន្ធសិទ្ធិមួយចំនួនហ្នឹងក៏គួរតែបង្កលក្ខណៈងាយស្រួលដែរ កុំឱ្យមានការយកហេតុផលមួយចំនួនទៅរឹតត្បិតសិទ្ធិសេរីភាពពលរដ្ឋ»។
របាយការណ៍ស្រាវជ្រាវស្ដីពី យុវជនក្នុងអំឡុងពេលជំងឺកូវីដ១៩ ចេញផ្សាយនៅថ្ងៃទី២ មិថុនា ធ្វើឡើងនៅរាជធានីភ្នំពេញ ។ កម្មវិធីរយៈពេលមួយព្រឹកនេះមានការចូលរួមពីយុវជនចំនួន ៣០នាក់ និងមានអ្នកចូលរួមមួយចំនួន បានសួរសំណួរ និងបញ្ចេញមតិយោបល់បន្ថែមទៅលើលទ្ធផលនៃការស្រាវជ្រាវនេះដែរ។
លទ្ធផលស្រាវជ្រាវនេះបង្ហាញថា យុវជននិងការអប់រំ យុវជននិងសិទ្ធិការងារ ការលើកកម្ពស់យុវជនជាស្ត្រីចូលរួមការពារធនធានធម្មជាតិ គឺរឿងចាំបាច់ពីព្រោះយុវជនដើរតួនាទីសំខាន់ក្នុងការចូលរួមអភិវឌ្ឍន៍សង្គម។ សមាគមបណ្ដាញយុវជនកម្ពុជាបានផ្សាភ្ជាប់នឹងដំណោះស្រាយផងដែរ ដោយស្នើឱ្យក្រសួងពាក់ព័ន្ធគួរតែបង្កើនការយកចិត្តចំពោះការបណ្ដុះបណ្ដាលធនធានមនុស្ស ការផ្សព្វផ្សាយពីការថែរក្សាសម្បត្តិធម្មជាតិ ការលើកកម្ពស់ស្ត្រី និងពង្រឹងការអនុវត្តច្បាប់ដើម្បីទប់ស្កាត់អំពើពុករលួយជាដើម។
យុវតីមួយរូប ដែលបានចូលរួមក្នុងកម្មវិធី កញ្ញា អន ស្រីឡែន យល់ឃើញថា របាយការណ៍នេះបង្ហាញឱ្យកញ្ញា បានសិក្សាកាន់តែស៊ីជម្រៅពីស្ថានភាពរបស់យុវជននៅក្នុងសង្គម ជាពិសេសផ្ដល់ឱ្យយុវជនបានស្វែងយល់អំពីការកាប់បំផ្លាញព្រៃឈើនៅតំបន់ព្រៃឡង់។ កញ្ញារំពឹងថា កញ្ញានឹងបានចូលរួមការពារធនធានធម្មជាតិ និងបញ្ហាពាក់ព័ន្ធនឹងជីវភាពរបស់ពលរដ្ឋរស់នៅតំបន់ព្រៃឡង់។
កញ្ញា អន ស្រីឡែន៖ «ជាចុងក្រោយខ្ញុំសូមអំពាវនាវដល់យុវជនទាំងអស់គ្នាជួយយកចិត្តទុកដាក់លើធនធានធម្មជាតិ និងបញ្ហាបរិស្ថានរបស់យើងផង ពីព្រោះយើងជំនាន់ក្រោយនេះ បើសិនជាបញ្ហាបរិស្ថានធម្មជាតិហ្នឹងវាចាប់ផ្ដើមឡើងកម្ដៅអីផ្សេងៗ យើងជំនាន់ក្រោយគឺទទួលរងទាំងអស់គ្នាគ្មាននរណាគេចផុតទេ ខ្ញុំសូមទទូចហើយទទូចទៀតសូមឱ្យយុវជនទាំងអស់យកចិត្តទុកដាក់តាមដាននូវព័ត៌មានផ្សេងទាក់ទងហ្នឹងបញ្ហាព្រៃឈើ និងបញ្ហាបរិស្ថានរបស់យើង»។
វិទ្យុអាស៊ីសេរីមិនអាចទាក់ទងអ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាល លោក កត្តា អ៊ន និងអ្នកនាំពាក្យក្រសួងបរិស្ថាន លោក នេត្រ ភត្រា ដើម្បីអធិប្បាយជុំវិញបញ្ហានេះបានទេ នៅថ្ងៃទី២ មិថុនា។
ក្រៅពីចេញរបាយការណ៍ពាក់ព័ន្ធស្ថានភាពយុវជនក្នុងអំឡុងពេលកូវីត១៩ សមាគម បណ្ដាញយុវជនកម្ពុជាក៏ធ្លាប់ចេញរបាយការណ៍ទាក់ទងនឹងសិទ្ធិមនុស្ស ការកាប់បំផ្លាញព្រៃឈើ តំបន់អភិរក្សព្រៃលិចទឹក និងសិទ្ធិជនជាតិដើមភាគតិចនៅក្នុងការការពារធនធានធម្មជាតិជាដើម។ មន្ត្រីសង្គមស៊ីវិល និងយុវជនរំពឹងថា អាជ្ញាធរមានសមត្ថកិច្ចនឹងចូលរួមសហការជាមួយក្រុមយុវជនដើម្បីលើកកម្ពស់ការអនុវត្តសិទ្ធិសេរីភាពនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។