មានអ្នកជំងឺកកកុញនាំគ្នាមកទទួលសេវាពិនិត្យព្យាបាលជំងឺត្រចៀក ច្រមុះ និងបំពង់ក ដោយឥតបង់ប្រាក់ នៅមន្ទីរពេទ្យមិត្តភាពខ្មែរ-សូវៀត ក្នុងរយៈពេល ៣ថ្ងៃ កន្លងមកនេះ។
ប្រធានផ្នែកជំងឺត្រចៀក ច្រមុះ និងបំពង់ក នៃមន្ទីរពេទ្យមិត្តភាពខ្មែរ-សូវៀត លោកវេជ្ជបណ្ឌិត បាន ចំរ៉ុង ឱ្យដឹងថាអ្នកជំងឺលើកនេះច្រើនជាងលើកមុន ដែលក្នុងរយៈពេល ៣ ថ្ងៃ មានអ្នកជំងឺជិត ១ ពាន់ ៥ រយនាក់ មកទទួលការពិនិត្យ ព្យាបាល និងវះកាត់។
លោកវេជ្ជបណ្ឌិតមានប្រសាសន៍ថា អ្នកជំងឺភាគច្រើនគឺមានជំងឺរ៉ាំរ៉ៃនៅតាមខេត្តរាប់ឆ្នាំមកហើយ៖ «ភាគច្រើន ជំងឺដុះសាច់ក្នុងបំពង់ក ជំងឺឫសដូងច្រមុះ ជំងឺវៀចឆ្អឹងច្រមុះ ហើយមានជំងឺត្រចៀកដែរ ប៉ុន្តែយើងមិនវះបានភ្លាមៗទេ យើងទុកទៅពេលក្រោយចុងកម្មវិធី ព្រោះអាហ្នឹងជាការវះកាត់ធំ ដាក់ថ្នាំសណ្ដំ ត្រូវគ្រូពេទ្យចូលម្ដង ៤នាក់។ អ៊ីចឹងចាំចុងក្រោយ ចុងកម្មវិធី។ ឥឡូវយើងវះតែជំងឺល្មមស្រាលៗ។ ជំងឺខ្លះរ៉ាំរ៉ៃ មិនមែនចាប់ផ្ដើមឡើង ១ ខែឬ ២ ខែទេ គឺរាប់ឆ្នាំហើយ ប៉ុន្តែវាកប់តាមមូលដ្ឋានតាមជនបទដាច់ស្រយាលអ៊ីចឹងទៅ ហើយការប្រកូកប្រកាសរបស់យើងតាមវិទ្យុ នៅស្រុកស្រែគេស្ដាប់។ ស្ដាប់ទៅគេឮគេមក។ មានអ្នកជំងឺខ្លះគាត់ដឹងថាគាត់ឈឺ តែមិនមានលទ្ធភាពមក។ តែពេលនេះឃើញគាត់ចេញមក ហើយយើងវះកាត់ជូនគាត់បានទាំងអស់ ដោយមិនបង់ប្រាក់ ឬបង់សេវាអីអត់មានទេ»។
អ្នកជំងឺមួយចំនួន ដែលមកពីខេត្តដូចជាខេត្តតាកែវ និងកំពង់ឆ្នាំង ថ្លែងនៅថ្ងៃទី ២២ ឧសភាថា ទោះជាគាត់ត្រូវចាំតាមលេខរៀងសម្រាប់ចូលវះកាត់ក្ដី ក៏ពួកគាត់សុខចិត្តដែរ ព្រោះគាត់មិនមានលទ្ធភាពទៅរកសេវាព្យាបាលបង់លុយរាប់រយដុល្លារទេ។ កម្មវិធីពិនិត្យព្យាបាលជំងឺត្រចៀក ច្រមុះ និងបំពង់ក ដោយឥតបង់ប្រាក់ នៅមន្ទីរពេទ្យមិត្តភាពខ្មែរ-សូវៀត នឹងត្រូវបន្តរហូតដល់ថ្ងៃទី ៦ ខែមិថុនា ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។