លោកនាយករដ្ឋមន្ត្រី ហ៊ុន សែន មានប្រសាសន៍ ក្នុងខួបលើទី៥០ នៃការលុបបំបាត់ជំងឺគ្រុនចាញ់ នៅព្រឹកថ្ងៃទី២៥ ខែមេសាថា ដើម្បីកសាងសហគមន៍មួយប្រកបដោយសុខមាលភាពល្អ ត្រូវតែមានការចូលរួមសហការពីគ្រប់មជ្ឈដ្ឋាន ជាពិសេស ភាគីពាក់ព័ន្ធត្រូវបញ្ជ្រាបការយល់ដឹងទៅដល់ប្រជាពលរដ្ឋគ្រប់ទីកន្លែងមិនថា ក្រុង ឬជនបទ ដើម្បីឲ្យប្រជាជនមានចំណេះដឹងគ្រប់គ្រាន់ក្នុងការបង្ការការពារជំងឺគ្រុនចាញ់ដោយខ្លួនឯង។ លោក ហ៊ុន សែន បន្ថែមថា ក្នុងគោលដៅលុបបំបាត់ជំងឺគ្រុនចាញ់ឲ្យបានទាំងស្រុង ទាមទារឲ្យមានកិច្ចសហប្រតិបត្តិការពីប្រទេសជាមិត្តនៅក្នុងតំបន់ ជាពិសេសប្រទេសចិន។ បន្ថែមពីនេះលោកថា រាជរដ្ឋាភិបាល ត្រូវមានយុទ្ធសាស្ត្រផ្ដល់ដល់មន្ត្រីក្រោមបង្គាប់ឲ្យអនុវត្តវិធានការលុបបំបាត់ជំងឺគ្រុនចាញ់ឲ្យបានខ្ជាប់ខ្ជួន៖ « យុទ្ធសាស្ត្រចំនួន៤ រួមមាន ១ - ការធ្វើរោគវិនិច្ឆ័យ និងព្យាបាលឲ្យបានរហ័ស ២ - ព្យាបាលដោយប្រើថ្នាំអាតេមីស៊ីនីន ឲ្យបានត្រឹមត្រូវតាមរូបមន្ត ដើម្បីបញ្ចៀសភាពស៊ាំរបស់ថ្នាំនេះ ៣ - បង្ការការចម្លងមេរោគគ្រុនចាញ់ដោយប្រើប្រាស់មុងជ្រលក់ថ្នាំ និង ៤ - ការងារអប់រំលើកកម្ពស់សុខភាព ដោយមានការចូលរួមពីគ្រប់ផ្នែកពាក់ព័ន្ធទាំងអស់ » ។
នៅព្រឹកថ្ងៃដដែលនេះលោក ហ៊ុន សែន ក៏ជួបពិភាក្សាការងារជាមួយឧកញ៉ា ចេន ហ្ស៊ី ប្រធានសម្ព័ន្ធក្រុមហ៊ុន ព្រីនស៍ គ្រុប (China Investment Corporation) ជនជាតិចិន និងមានក្រុមហ៊ុន២ទៀតចូលរួមគឺ ក្រុមហ៊ុនអ៊ីស្ទ័រ (Estore Group .,Ltd) និងក្រុមហ៊ុនគួអាន (Kua An Group., Ltd) របស់ជនជាតិចិន។ ការជួបពិភាក្សានេះធ្វើឡើងនៅរាជធានីភ្នំពេញ។កិច្ចពិភាក្សានេះផ្ដោតទៅលើការប្រើប្រាស់ឱសថ ថ្នាំប្រើសម្រាប់ការពារជំងឺគ្រុនចាញ់ និងកិច្ចសហប្រតិបត្តិការជាសកល ក្នុងការធ្វើឲ្យប្រសើរឡើងនូវសុខភាពប្រជាពលរដ្ឋខ្មែរ និងមនុស្សទូទាំងសកលលោក។
ចំពោះប្រទេសកម្ពុជាវិញ លោក ហ៊ុន សែន ឱ្យដឹងថា ធ្លាប់មានពលរដ្ឋកើតជំងឺគ្រុនចាញ់ជាង ១៧ម៉ឺននាក់ ក្នុងនោះជិត ១ពាន់នាក់ស្លាប់ក្នុងអំឡុងទសវត្សរ៍ឆ្នាំ១៩៨០។ សម្រាប់ឆ្នាំ ២០២១ កន្លងមកនេះជំងឺគ្រុនចាញ់ មានការធ្លាក់ចុះនៅត្រឹមជិត ៤ពាន់នាក់ (៣.៩៥៩) និងពុំមានមនុស្សស្លាប់នោះទេ នៅរយៈពេល៤ឆ្នាំមកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។