មន្រ្តីឃ្លាំមើលសិទ្ធិពលករ ថាកម្ពុជានៅតែមិនទាន់បង្ហាញឆន្ទៈ ក្នុងការយកចិត្តទុកដាក់លើសុខុមាលភាពរបស់ពលករចំណាកស្រុកខ្មែរនៅប្រទេសថៃ នៅឡើយទេ ព្រោះរហូតមកដល់ពេលនេះ រដ្ឋាភិបាលមិនបានផ្តល់វ៉ាក់សាំងបង្ការជំងឺកូវីដ-១៩ ជូនពលករខ្មែរជិត ២ លាននាក់ ដែលកំពុងប្រឈមគ្រោះថ្នាក់ ក្នុងការឆ្លងជំងឺនេះ។
មន្រ្តីឃ្លាំមើលសិទ្ធិពលករ ថាអាជ្ញាធរកម្ពុជានៅតែយកចិត្តទុកដាក់ទាប លើសុខុមាលភាពរបស់ពលករខ្មែរនៅប្រទេសថៃ ស្របពេលដែលអាជ្ញាធរថៃ មិនទាន់មានលទ្ធភាពចាក់វ៉ាក់សាំងជូនពលករបរទេស។
កម្ពុជាបានចំណាយប្រាក់អស់មិនតិចជាង ២២៥ លានដុល្លារ ទិញវ៉ាក់សាំងចិនចំនួន ២២,៥ លានដូស ពីចិន (China)។ ក្រៅពីនោះ កម្ពុជាក៏ទទួលបានជំនួយវ៉ាក់សាំងជាលក្ខណៈទ្វេភាគី និងក្រោមយន្តការកូវ៉ាក់ (COVAX) របស់អង្គការសុខភាពពិភពលោក(WHO) ពីចិន ជប៉ុន(Japan)អាមេរិក(US) និងអង់គ្លេស (UK) សរុបជាង ៧ លានដូសបន្ថែមទៀត។ ជាសរុបកម្ពុជាមានវ៉ាក់សាំងជិត ៣០ លានដូស (២៩,៥៩៩,១០០)។
ប៉ុន្តែក្នុងចំណោមប្រជាពលរដ្ឋជាង ១០ លាននាក់ ដែលទទួលបានវ៉ាក់សាំងនេះរួច គឺជាអ្នកនៅក្នុងប្រទេសកម្ពុជា។ ចំណែកឯពលករចំណាកខ្មែរនៅប្រទេសថៃ និងនៅប្រទេសផ្សេងទៀតដូចជានៅម៉ាឡេស៊ី (Malaysia) និងកូរ៉េខាងត្បូង (South Korea) ជាដើម ដែលមន្រ្តីខ្មែរធ្លាប់ប្រសិទ្ធនាមថា ជា «វីរបុរសជាតិ» នោះ គិតមកដល់ពេលនេះ នៅមិនទាន់ទទួលបានវ៉ាក់សាំងនេះពីរដ្ឋាភិបាលខ្លួនឯងនៅឡើយទេ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស(CENTRAL) លោក មឿន តុលា ថាអាជ្ញាធរថៃ ខ្វះការទទួលខុសត្រូវ និងបំពានច្បាប់អន្តរជាតិ អំពីកាតព្វកិច្ចយកចិត្តទុកដាក់ដល់សុខុមាលភាពរបស់ពលករបរទេសទៅហើយ។ ប៉ុន្តែហេតុម្តេចឡើយ បានជាអាជ្ញាធរនៃរដ្ឋាភិបាលកម្ពុជាមិនធ្វើអន្តរាគមន៍ ដើម្បីជួយប្រជាពលរដ្ឋខ្លួនឯង ដែលកំពុងរងគ្រោះថ្នាក់នៅប្រទេសថៃដូច្នេះ? លោក មឿន តុលា អះអាងថា មានមធ្យោបាយច្រើនដែលកម្ពុជាអាចផ្តល់វ៉ាក់សាំង ដល់ពលករខ្មែរនៅប្រទេសថៃ បើរដ្ឋាភិបាលមានឆន្ទៈចង់ធ្វើដូច្នេះមែន៖ «កម្ពុជាអាចតាមរយៈស្ថានទូតខ្លួនឯងហ្នឹង ឬក៏តាមរយៈក្រសួងការបរទេសរបស់ខ្លួនឯងហ្នឹង ចរចាជាមួយភាគីថៃឲ្យមានការផ្ដល់វ៉ាក់សាំងជូនពលរដ្ឋខ្លួនឯងនៅហ្នុងទីមួយ។ ទីពីរបើសិនជានេះទេ យើងអាចទិញវ៉ាក់សាំងយកទៅចាក់ឲ្យពលករយើងបានតើ! មានអី! ថៃក៏គេមិនទៅបដិសេធដែរបើសិនជាកម្ពុជាមានការទិញវ៉ាក់សាំងដើម្បីផ្តល់ជូនពលករដែលជាពលរដ្ឋរបស់ខ្លួនឯង»។
ជុំវិញថា តើរដ្ឋាភិបាលកម្ពុជា បានគិតគូររឿងផ្តល់វ៉ាក់សាំងជូនពលករចំណាកស្រុកនៅប្រទេសថៃដែរឬយ៉ាងណា មន្រ្តីរដ្ឋាភិបាលកម្ពុជា មិនមានយោបល់អ្វីនោះទេ ដោយលោកស្នើឲ្យទៅសួរឯកអគ្គរាជទូតខ្មែរប្រចាំទីក្រុងបាងកក ប្រទេសថៃវិញ។ ប៉ុន្តែ លោកបានអះអាងប្រាប់វិទ្យុអាស៊ីសេរី អំពីការកំពុងយកចិត្តទុកដាក់របស់អាជ្ញាធរខ្មែរ ទៅលើការថែទាំសុខភាព និងព្យាបាលជំងឺពលករចំណាកស្រុកទាំងនេះ។
អ្នកនាំពាក្យក្រសួងការបរទេសកម្ពុជាលោក កុយ គួង ប្រាប់វិទ្យុអាស៊ីសេរីតាមបណ្តាញសង្គមតេឡេក្រាម កាលពីរាត្រីថ្ងៃទី៨ ខែកញ្ញា ថា ឯកអគ្គរាជទូតខ្មែរប្រចាំនៅប្រទេសថៃ កំពុងសហការគ្នាយ៉ាងជិតស្និតជាមួយអាជ្ញាធរថៃ ដើម្បីយកចិត្តទុកដាក់ដល់សុខុមាលភាពរបស់ពលករខ្មែរនៅទីនោះ។ លោកអះអាងបន្ថែមទៀតថា ពេលណាពលករឆ្លងជំងឺនេះ ពួកគេទទួលបានការយកចិត្តទុកដាក់ក្នុងការព្យាបាលត្រឹមត្រូវ។
វិទ្យុអាស៊ីសេរី មិនទាន់អាចសុំការបំភ្លឺពីមន្រ្តីតំណាងទូតខ្មែរនៅប្រទេសថៃ បាននៅឡើយទេ កាលពីថ្ងៃទី៨ ខែកញ្ញា ដោយសារទូរស័ព្ទចូលច្រើនដង គ្មានអ្នកទទួល។
ផ្ទុយពីការអះអាងរបស់មន្រ្តីការបរទេសកម្ពុជា ពលករខ្មែរនៅប្រទេសថៃជាច្រើន ត្អូញត្អែរពីភាពខ្វះការយកចិត្តទុកដាក់របស់អាជ្ញាធរខ្មែរ និងអាជ្ញាធរថៃ ក្នុងគ្រាមានវិបត្តិដោយសារជំងឺកូវីដ-១៩ នេះ។ ពួកគាត់ខ្លះដាច់ស្បៀង និងត្រូវបង្ខំចិត្តព្យាបាលជំងឺដោយខ្លួនឯងនៅតាមបន្ទប់ជួល ដោយសារតែខ្វះការយកចិត្តទុកដាក់នេះ។ ក្នុងពេលជាមួយគ្នានេះ មានពលករជាច្រើន បង្ខំចិត្តវិលត្រឡប់មកស្រុកកំណើតវិញ និងដោយនាំទាំងជំងឺមកជាមួយផង។ ក្រសួងសុខាភិបាលកម្ពុជាឲ្យដឹងថា រហូតមកដល់ពេលនេះ ករណីជំងឺកូវីដ-១៩ នាំចូលពីក្រៅប្រទេសចំនួនជាង ១ម៉ឺន៦ពាន់នាក់ (១៦,៣១០)។
ដោយឡែកក្នុងចំណោមពលករខ្មែរជិត ២ លាននាក់ ដែលកំពុងធ្វើការនៅប្រទេសថៃ ក្រសួងសុខាភិបាលថៃឲ្យដឹង គិតត្រឹមថ្ងៃទី៦ ខែកញ្ញា ថាមានពលករខ្មែរជាង ២ម៉ឺន៣ពាន់នាក់ (២៣,២១១) ឆ្លងជំងឺនេះ។ ចំនួននេះ មិនរាប់បញ្ចូលអ្នកឆ្លង ដែលសម្រាកព្យាបាលនៅតាមបន្ទប់ជួលដោយខ្លួនឯងនោះឡើយ។
មន្រ្តីសង្គមស៊ីវិលផ្នែកសិទ្ធិពលករ ស្នើឲ្យរដ្ឋាភិបាល កុំចាត់វិធានការដោះស្រាយបញ្ហាបែបស្លន់ស្លោ ដូចករណីបិទព្រំដែន ហើយបែរជាទុកឲ្យពលករនៅជាប់ផុងក្នុងទឹកដីថៃ ដែលបង្កហានិភ័យកាន់តែខ្លាំង។ ប៉ុន្តែ គួរចាត់វិធានការបង្ការ និងទប់ស្កាត់ជាមុន ដូចជា ការត្រៀមមណ្ឌលចត្តាឡីស័កនៅតាមព្រំដែន និងរកលទ្ធភាពចាក់វ៉ាក់សាំង ជូនពលករចំណាកស្រុកទាំងអស់ មុនពួកគាត់វិលត្រឡប់ចូលមកប្រទេសកម្ពុជាវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។