ក្រសួងសុខាភិបាលថា ករណីឆ្លងមេរោគកូវីដ១៩ ប្រភេទថ្មីអូមីក្រុង (Omicron) រៀងរាល់ថ្ងៃ មានការកើនឡើងគួរឲ្យព្រួយបារម្ភ។
អ្នកនាំពាក្យក្រសួងសុខាភិបាល អ្នកស្រីវេជ្ជបណ្ឌិត ឱ វ៉ាន់ឌីន ឲ្យដឹងថា រហូតមកដល់ថ្ងៃទី២៤ ខែកុម្ភៈ ករណីអ្នកឆ្លងមេរោគអូមីក្រុង មានចំនួន ជិត ៧ពាន់ ៤រយនាក់ (៧.៣៨២)។ អ្នកស្រីអះអាង ថា ប្រសិនបើ មិនបានអនុវត្តវិធានសុខាភិបាលត្រឹមត្រូវ ដើម្បីកាត់បន្ថយការឆ្លងនោះទេ អត្រាអ្នកឆ្លង អាចកើនឡើងដល់រាប់ម៉ឺននាក់ ក្នុងមួយថ្ងៃៗ។
អ្នកនាំពាក្យក្រសួងសុខាភិបាលរូបនេះឲ្យដឹងដែរថា ការកាត់បន្ថយការប្រមូលផ្តុំមនុស្សច្រើន និងការអនុវត្តវិធានសុខាភិបាល រួមមាន ពាក់ម៉ាស់ គម្លាតសុវត្ថិភាពសង្គម និងការរក្សាអនាម័យឲ្យបានខ្ជាប់ខ្ជួន នោះគឺជាវិធីសាស្ត្រដ៏សំខាន់ ដើម្បីកាត់បន្ថយការឆ្លងជំងឺកូវីដ១៩ ទ្រង់ទ្រាយធំក្នុងសហគមន៍។
ការប្រកាសនេះធ្វើឡើងស្របពេល លោកនាយករដ្ឋមន្ត្រី ហ៊ុន សែន ប្រកាសថា លោកធ្វើចត្តាឡីស័កមួយរយ:ពេលខ្លី ដោយសារបានប៉ះពាល់ដោយផ្ទាល់ ជាមួយ អ្នកវិជ្ជមានកូវីដ១៩។
លោក ហ៊ុន សែន បានសរសេរនៅលើហ្វេសប៊ុករបស់លោក កាលពីថ្ងៃទី២៥ ខែកុម្ភៈថា លោកនឹងរស់នៅដាច់ដោយឡែក ក៏ប៉ុន្តែលោកនៅតែបន្តធ្វើការតាមទម្លាប់ ដូចដែលបានធ្វើចត្តាឡីស័ក៣លើក កាលពីមុនៗនោះដែរ ដោយមិនទាន់លុបចោលកម្មវិធីសម្រាប់សប្តាហ៍ក្រោយនៅឡើយទេ។ លោកថា នឹងបន្តធ្វើតេស្តដើម្បីបញ្ជាក់ពីលទ្ធផលវិជ្ជមាន ឬអវិជ្ជមានកូវីដ១៩ ដើម្បីបញ្ចប់ការធ្វើចត្តាឡីស័ក ហើយនឹងជូនព័ត៌មានតាមក្រោយ។
ក្រសួងសុខាភិបាល ឲ្យដឹងថា អ្នកស្លាប់ដោយសារជំងឺកូវីដ-១៩ បានកើនឡើងដល់ ៣ពាន់ ៣២ នាក់ (៣.០៣២) នាក់ហើយ ក្រោយពីអ្នកជំងឺ ៥ នាក់ទៀតបានស្លាប់ ក្នុងនោះ ៤ នាក់មិនបានចាក់វ៉ាក់សាំង។ ចំណែកករណីឆ្លងថ្មីវិញ ក្រសួងសុខាភិបាលប្រកាសថា មានចំនួនជិត ៥រយ នាក់ (៤៧០) ដែលសុទ្ធតែជាមេរោគបំប្លែងខ្លួនថ្មី អូមីក្រុង (Omicron) ក្នុងនោះ ៣៥នាក់ ជាករណីនាំចូល និង ៤៣៥ នាក់ទៀតជាករណីឆ្លងក្នុងសហគមន៍។
គិតត្រឹមព្រឹកថ្ងៃទី២៦ កុម្ភៈ កម្ពុជាមានអ្នកកើតជំងឺកូវីដ-១៩ ជិត ១សែន ៣ម៉ឺននាក់ (១២៩.៥៤៨) ក្នុងនោះអ្នកជាសះស្បើយមានជាង ១ សែន ២ម៉ឺននាក់ (១២២.៨៧៧)។
ក្រសួងសុខាភិបាលឲ្យដឹងថា គិតត្រឹមថ្ងៃទី២៥ កុម្ភៈ រដ្ឋាភិបាលចាក់វ៉ាក់សាំងគ្រប់ដូសជូនពលរដ្ឋបានជាង ១៣ លាន ៨សែននាក់ ក្នុងចំណោមពលរដ្ឋដែលត្រូវចាក់ប្រមាណ ១៤លាននាក់ រាប់ពីកុមារអាយុ ៥ឆ្នាំ រហូតដល់មនុស្សពេញវ័យ។ រីឯដូសជំរុញទី៣ និង ទី៤វិញ រដ្ឋាភិបាលចាក់ជូនពលរដ្ឋបានជាង ៧លាននាក់ ស្របពេលកុមារអាយុពី ៣ឆ្នាំដល់ក្រោម ៥ឆ្នាំ រដ្ឋាភិបាលចាក់ដូសទី១ បានជាង ៩ម៉ឺននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។