បុគ្គលិកធ្វើការនៅក្នុងអាគារកាស៊ីណូ ក្នុងក្រុងប៉ោយប៉ែត ខេត្តបន្ទាយមានជ័យ អះអាងថា ក្រុមឧក្រិដ្ឋជន កំពុងប្រតិបត្តិការឆបោកតាមអ៊ីនធឹណិតយ៉ាងអនាធិបតេយ្យ ដោយជ្រកក្រោមស្លាកយីហោកាស៊ីណូអនឡាញ។ ករណីនេះ ត្រូវបានប្រព័ន្ធផ្សព្វផ្សាយរបស់ថៃ យកមកចុះផ្សាយ ដោយយកជនរងគ្រោះដែលបានលួចរត់ចេញពីអាគារពីការឃុំឃាំង មកនិយាយលាតត្រដាងពីការធ្វើទារុណកម្ម និងគំរាមកំហែង ដើម្បីបង្ខំឱ្យពួកគេចូលរួមក្នុងប្រតិបត្តិការឆបោក និងការជួញដូរមនុស្សទៅកាន់កន្លែងឆបោកផ្សេងទៀត ដូចជាទំនិញ។
ប៉ោយប៉ែតគឺជាទីក្រុងស្រស់ឆើតឆាយមួយនៅភាគខាងលិចនៃប្រទេសកម្ពុជា ជាប់ព្រំដែនថៃ ដែលមានអាគារបនល្បែងកាស៊ីណូច្រើនស្អេកស្កះ។ ទិដ្ឋភាពបែបនេះមិនបានធ្វើឱ្យតំបន់ប៉ោយប៉ែតក្លាយជាទីក្រុងគួរឱ្យចង់រស់នៅសម្រាប់ប្រជាពលរដ្ឋទូទៅឡើយ ប៉ុន្តែអាចជាឋានសួគ៌សម្រាប់ឧក្រិដ្ឋជនឆបោកតាមអនឡាញ ដែលបង្កប់នូវឧក្រិដ្ឋកម្មលាងលុយកខ្វក់ ការបង្ខាំមនុស្ស ធ្វើទារុណកម្ម និងការស្លាប់នៃជនបរទេសដោយធ្លាក់ពីលើអាគារ។
បុគ្គលិកកាស៊ីណូ ក្រោន (Crown Casino) ម្នាក់ ថ្លែងក្នុងលក្ខខ័ណ្ឌមិនបញ្ចេញឈ្មោះ និងសំឡេង ដោយបារម្ភពីសុវត្ថិភាព អះអាងប្រាប់វិទ្យុអាស៊ីសេរី ថា នៅរយៈកាលចុងក្រោយនេះ មានជនជាតិថៃ និងបរទេសផ្សេងទៀតជាច្រើននាក់ ត្រូវបានគេល្បួងឱ្យមកធ្វើការងារ ឆបោកតាមអ៊ីនធឺណិត នៅក្នុងអាគារ ១៨ជាន់ ឬអាគារ ហ្គោលឌិន (Golden) និងអាគារ ២៥ជាន់របស់កាស៊ីណូក្រោន (Crown casino) ដែលជាកម្មសិទ្ធិរបស់ លោក កុក អាន ជាសមាជិកព្រឹទ្ធសភាគណបក្សប្រជាជនកម្ពុជា និងជាអនុប្រធានសមាគមឧកញ៉ាកម្ពុជា។ បុគ្គលិករូបនេះ បញ្ជាក់ថា នៅក្នុងអាគារនេះ បែងចែកជាផ្នែក ដោយជាន់ទី៤ ទី៥ និងទី ១៤ គឺជាកន្លែងប្រតិបត្តិការគេហទំព័រល្បែង និងឆបោកអនឡាញ ចំណែកជាន់ទី១ និងទី២ គឺជាកន្លែងប្រតិបត្តិការ កាស៊ីណូអនឡាញ និងជាន់ទី៣ គឺជាការិយាល័យរបស់ថៅកែជាជនជាតិចិន។
ការថ្លែងរបស់បុគ្គលិកកាស៊ីណូរូបនេះ ធ្វើឡើងបន្ទាប់ពីទូរទស្សន៍ប៉ុស្តិ៍លេខ១ របស់ថៃ កាលពីថ្ងៃទី ៥ ខែកុម្ភៈ បានចុះផ្សាយពី ករណីយុវតីអាយុ ១៨ឆ្នាំម្នាក់ មកពីខេត្ត ឧដន ថានី (Udon Thani) បានស្រែកយំតាមទូរស័ព្ទប្រាប់មកគ្រួសារ ដើម្បីសុំការជួយសង្គ្រោះ ខណៈកំពុងជាប់ឃុំក្នុងអាគារឆបោកមួយកន្លែង នៅក្រុងប៉ោយប៉ែត។ យុវតីរូបនេះអះអាងថា ក្រុមឧក្រិដ្ឋជន បានយកអត្តសញ្ញាណប័ណ្ណ និងឯកសារផ្ទាល់ខ្លួនរបស់នាង ទៅប្រើប្រាស់សម្រាប់បង្កើតគណនីធនាគារខុសច្បាប់ជាច្រើនគណនី។
យុវតី៖«គេ(ក្រុមឆបោក)មិនឱ្យកូនត្រឡប់ទៅវិញទេ។ គេគំរាមថា បើត្រឡប់ទៅវិញ នឹងត្រូវចាប់ខ្លូន។ គេប្រាប់ថា មិនឱ្យលេងហ្វេសប៊ុកទេ ជាមួយពុក(តា)ទេ និងបានចាប់យកទូរស័ព្ទខ្ញុំ គេមិនឱ្យលេងទូរស័ព្ទ គេឱ្យទុកទូរស័ព្ទ។ គេប្រាប់ឱ្យប្លុកហ្វេសប៊ុកពុកទៅ។ កុំទៅប្រាប់នរណាគេណា៎ កូនខ្លាចគេសម្លាប់»។
ដោយឡែក ទូរទស្សន៍ ថៃរ៉ាត(THAIRATH TV Original) ផ្សាយកាលពីថ្ងៃទី៣១ ខែមករា បានសាកសួរស្ត្រីជនជាតិថៃម្នាក់ ដែលអះអាងថា បានរត់គេចខ្លួនចេញពីទីតាំងឆបោក នៅអាគារ ១៨ជាន់ ក្នុងកាស៊ីណូ ក្រោន នៅក្រុងប៉ោយប៉ែត ជាមួយប្ដី និងកូនប្រុសអាយុ ២ឆ្នាំម្នាក់។ ស្ត្រីរូបនេះអះអាងថា លោកស្រី និងប្ដីត្រូវក្រុមឧក្រិដ្ឋជនចាប់យកទៅកាន់ជាន់ទី៤ នៃអាគារ ហើយត្រូវគេបង្ខំឱ្យស្កេនមុខ និងយកឯកសារសម្គាល់ខ្លួន ទៅបង្កើតគណនីធនាគារក្លែងក្លាយ ឬដែលហៅថា «បញ្ជីសេះ» ដោយក្រុមឧក្រិដ្ឋជន បានយកគណនីនេះ ទៅប្រើប្រាស់សម្រាប់ផ្ទេរប្រាក់ ដែលឆបោកបានពីជនរងគ្រោះ រហូតមានទឹកប្រាក់នៅក្នុងគណនីជាង ១ម៉ឺន ២ពាន់ដុល្លារ។
ស្ត្រីរងគ្រោះ៖«ពេលត្រឡប់មកវិញ មានដីកាកោះហៅ និងរឿងក្ដីជាច្រើនជាប់មកជាមួយ។ មានដីកោះហៅច្រើនណាស់ ដោយខ្លួនខ្ញុំផ្ទាល់ មានដីកាកោះហៅចំនួន ៣ទៅ៤ ហើយប្ដីរបស់ខ្ញុំក៏ទទួលបានមួយដែរ ហើយនៅមានដីកាកោះហៅដែលមិនទាន់មកដល់ជាច្រើនទៀត។ ពេលនោះបញ្ជីធនាគាររបស់ខ្ញុំ ប្រើការលែងបានទៀតហើយ សូម្បីលុយទុកសម្រាប់ផ្គត់ផ្គង់កូន ក៏មិនអាចដកបានដែរ ហើយខ្ញុំក៏មិនមានលុយទិញបាយហូបឡើយ ហើយត្រូវដើររឿងក្ដីនៅតុលាការថែមទៀត។ ពេលខ្លះខ្ញុំធ្លាប់គិតខ្លីដែរ ព្រោះគ្មានមធ្យោបាយដោះស្រាយ។ បានរួចផុតពីសេចក្ដីស្លាប់មកហើយ ប៉ុន្តែមកជួបរឿងក្ដីនេះទៀត»។
ប្រភពខាងលើអះអាងថា ក្រុមឧក្រិដ្ឋជន បានស្កេនមុខពួកគេ ដើម្បីបង្កើតគណនីធនាគារខុសច្បាប់ ក្នុងអាគារជាច្រើនកន្លែង ដែលមានទីតាំង និងអ្នកគ្រប់គ្រង ឬដែលឧក្រិដ្ឋជនហៅថា មេ (boss) ផ្សេងៗ គ្នា។ ជនរងគ្រោះបញ្ជាក់ថា មេខ្លោងរបស់ក្រុមឆបោកទាំងនោះ មានទាំងជនជាតិចិន និងជនជាតិថៃ ដែលពួកគេមានខ្សែបណ្ដាញទាំងនៅកម្ពុជា និងថៃ ដោយមានអ្នកល្បួងជនរងគ្រោះទៅធ្វើការ អ្នកនាំឆ្លងដែន និងអ្នកដឹកជញ្ជូនទៅកាន់អាគារ។
ចំណែកពលរដ្ឋ ដែលបានឃ្លាំមើលហេតុការណ៍នៅកាស៊ីណូ អះអាងប្រាប់វិទ្យុអាស៊ីសេរីថា ថ្មីៗ នេះ បុគ្គលិកនៅក្នុងអាគារ ២៥ជាន់ និង ១៨ជាន់ នៅកាស៊ីណូ ក្រោន មួយចំនួន ត្រូវបានគេដឹកជញ្ជូនតាមរថយន្តបិទកញ្ចក់ខ្មៅ ទៅកាន់អាគារឆបោកមួយកន្លែងទៀត នៅក្នុងតំបន់កាស៊ីណូ ស្តាហ្គោល (STAR GOLD) និងខ្លះទៀត ត្រូវគេបញ្ជូនទៅឃុំខ្លួនក្នុងអាគារនៅតំបន់អភិវឌ្ឍដីឡូត៍ និងផ្ទះល្វែងមួយកន្លែងឈ្មោះ «ឧទ្យាន ឈួ វិចិត្រ សានកូ (CHOU VICHET SANCO) ក្នុងក្រុងប៉ោយប៉ែត។ ប្រភពបញ្ជាក់ទៀតថា អ្នកដែលត្រូវគេចាប់ឃុំឃាំងមួយចំនួន ត្រូវគេបញ្ជូនបន្ត ទៅអាគារផ្សេងទៀត នៅតាមខេត្តជាប់ព្រំដែន មានដូចជា ច្រកអន្តរជាតិអូរស្មាច់ ក្នុងខេត្តឧត្តរមានជ័យ និងនៅក្រុងបាវិត ក្នុងខេត្តស្វាយរៀង។
ប្រភពដដែលបញ្ជាក់ថា ចំណែកឯបុគ្គលិកជាជនជាតិថៃវិញ ពួកគេមួយចំនួនត្រូវបានថៅកែរៀបចំឧបាយ ឱ្យបន្លំខ្លួនជាប៉ូលិស ឬភ្នាក់ងារធនាគារ ដើម្បីឆបោកពលរដ្ឋថៃដូចគ្នា។ ក្នុងចំណោមប្រតិបត្តិការតាមអនឡាញទាំងនោះ មានមួយចំនួន គឺជាអ្នកចាញ់បោក និងបង្ខំឱ្យធ្វើការ ប៉ុន្តែខ្លះទៀត គឺស្ម័គ្រចិត្តធ្វើការងារ ដោយពេញចិត្តប្រាក់ខែខ្ពស់ ឬបានភាគរយពីថៅកែ។ រីឯប្រាក់ដែលទទួលបានពីការឆបោកនោះ ក្រុមឧក្រិដ្ឋជនបានបញ្ជូនទៅក្នុងគណនីធនាគារខុសច្បាប់ផ្សេងៗ គ្នា មុននឹងផ្ទេរទៅកាន់ទីតាំងលាងលុយកខ្វក់ មួយចំនួនទៀត ដែលត្រូវបានគេបំប្លែងទៅជារូបិយប័ណ្ណឌីជីថល ឬគ្រីបតូ (Crypto) និងបែងចែកភាគរយឱ្យទៅអ្នកចូលរួមឆបោកចន្លោះពី ៥ ទៅ ៦ភាគរយ។
កាលពីថ្ងៃទី៣ ខែកុម្ភៈ ប៉ូលិសប្រឆាំងឧក្រិដ្ឋកម្មបច្ចេកវិទ្យារបស់ថៃ បានចាប់ខ្លួនជនសង្ស័យ ២នាក់ ពីបទឆបោកតាមប្រព័ន្ធបច្ចេកវិទ្យា និងលាងលុយកខ្វក់។ អាជ្ញាធរថៃប្រាប់អ្នកសារព័ត៌មានថា ជនសង្ស័យបានសារភាពថា ពួកគេបានក្លែងបន្លំអត្តសញ្ញាណជាមន្ត្រីប៉ូលិស និងឆបោកជនរងគ្រោះជាប្រព័ន្ធចំនួន ១៦៣ករណី ដែលមានទឹកប្រាក់សរុបជាង ១០ម៉ឺនដុល្លារ។ ពួកគេសារភាពទៀតថា មូលហេតុដែលថៅកែចិន បញ្ជូនពួកគេត្រឡប់មកថៃវិញ គឺដោយសារពួកគេមានជំងឺ និងធ្វើការលែងកើត ដោយថៅកែបានផ្ដល់ប្រាក់ ដែលបានមកពីការឆបោកមួយចំនួនទៀត ដល់ពួកគេ។ ជនសង្ស័យអះអាងថា ពួកគេត្រូវថៅកែជនជាតិចិនបង្ខំឱ្យធ្វើការឆបោក ប៉ុន្តែអាជ្ញាធរថៃរកឃើញថា ពួកគេពេញចិត្តនឹងការងារឆបោកតាមអនឡាញនេះ។
ងាកមកក្នុងកាស៊ីណូវិញ ស្ត្រីធ្វើការក្នុងអាគារ ២៥ជាន់ ក្នុងកាស៊ីណូ ក្រោន ដែលនៅក្បែរអាគារ ១៨ជាន់ ថ្លែងក្នុងលក្ខខ័ណ្ឌមិនបញ្ចេញឈ្មោះ និងសំឡេង បានអះអាងថា នៅក្នុងអាគារទាំង ២ នេះ មានបុគ្គលិកចម្រុះជាតិសាសន៍ ដូចជា ថៃ (Thai) ឥណ្ឌូណេស៊ី (Indonesia) ចិន (China) ឥណ្ឌា (India) និងនេប៉ាល់ (Nepal) ជាដើម។ កញ្ញាបញ្ជាក់ថា ថៅកែជនជាតិចិន បានធ្វើទារុណកម្មមកលើបុគ្គលិក នៅពេលដែលពួកគេមិនអាចឆបោក ឬអូសទាញជនរងគ្រោះឱ្យមកលេងល្បែងភ្នាល់តាមអនឡាញបាន ដូចជា បង្អត់អាហារ វាយ ឬឆក់នឹងដំបងអគ្គិសនី បង្ខំឱ្យទទួលទានផ្លែម្ទេស និងផ្លែម្រះជាដើម។
ប្រភពដដែលអះអាងទៀតថា នៅពេលមានបុគ្គលិកណាម្នាក់ សុំលាឈប់ពីការងារ ពួកគេត្រូវថៅកែប្រាប់ឱ្យធ្វើការបន្តរយៈពេល ៦ខែទៀត ប៉ុន្តែក្រោយការកំណត់ ៦ខែ ពួកគេនៅតែមិនអាចសុំលាឈប់បាន ដោយសារថៅកែតម្រូវឱ្យពួកគេ រកប្រាក់ធានាខ្លួនចំនួនជិត ១ម៉ឺនដុល្លារបន្ថែម។ ប្រភពបន្តថា នៅពេលបុគ្គលិកនោះ រកប្រាក់ធានាបានគ្រប់ចំនួនហើយនោះ ថៅកែនៅតែមិនអនុញ្ញាតដដែល និងបានប្ដូរកន្លែងធ្វើការរបស់ពួកគេទៅកន្លែងផ្សេងទៅវិញ។
ប្រការនេះ បានធ្វើឱ្យអ្នកជាប់ឃុំមួយចំនួន ទទួលរងសម្ពាធផ្លូវចិត្ត រហូតមានអ្នកខ្លះ រកវិធីរត់ចេញ ដោយទម្លាក់ខ្លួនតាមខ្សែ ខ្លះប្រថុយជីវិត លោតពីលើអាគារ និងផ្លោះរបងបន្លាលួស ដែលតភ្ជាប់បណ្ដាញអគ្គិសនី។ ក៏ប៉ុន្តែភាគច្រើន វាសនារបស់អ្នកលួចរត់ បានធ្លាក់ស្លាប់ និងឆក់ខ្សែភ្លើងស្លាប់ និងខ្លះទៀត ត្រូវសន្តិសុខរបស់ក្រុមហ៊ុនចាប់ខ្លួនបាន និងធ្វើទារុណកម្មធ្ងន់ធ្ងរ។
ជាឧទាហរណ៍ កាលពីថ្ងៃទី៨ ខែមករា មានជនជាតិថៃម្នាក់ បានធ្លាក់ពីជាន់ទី១៤ នៃអាគារ ហ្គោលឌិន នេះ បណ្ដាលឱ្យស្លាប់ភ្លាមៗ។ ក្រោយកើតហេតុនោះ អាជ្ញាធរកម្ពុជាបានដឹកសាកសពយកទៅរក្សាទុកភ្លាមៗ ខណៈសន្តិសុខនៅកាស៊ីណូនោះ បានចាប់យកទូរស័ព្ទអ្នកសារព័ត៌មាន និងបង្ខំឱ្យលុបវីដេអូ និងរូបភាពចោលទាំងអស់។ ទោះជាយ៉ាងណា ប៉ូលិសស៊ើបអង្កេតថៃ រកឃើញថា អ្នកដែលធ្លាក់ពីលើអាគារនោះ គឺជាជនរងគ្រោះ ដែលត្រូវក្រុមឧក្រិដ្ឋជនជនជាតិចិន បង្ខំឱ្យបម្រើការងារជាអ្នកឆបោកតាមអនឡាញ ឬហៅទូរស័ព្ទឆ្លងប្រទេស (Call Center)។
ដោយឡែក កាលពីថ្ងៃទី១ ខែកុម្ភៈ មានករណីជនជាតិឥណ្ឌូណេស៊ីម្នាក់ ធ្លាក់ពីលើអាគារកាស៊ីណូ ក្រោន (Crown Casino) នៅប៉ោយប៉ែត បណ្ដាលឱ្យស្លាប់នៅនឹងកន្លែង។ ក្នុងករណីនេះ អាជ្ញាធរអះអាងថា គឺបណ្ដាលមកពីជនរងគ្រោះឈ្លោះទាស់ទែងគ្នាជាមួយអ្នករួមការងារ ដែលជាជនជាតិឥណ្ឌូណេស៊ីដូចគ្នាចំនួន ៥នាក់ទៀត និងបង្កទៅជាអំពើហិង្សា ហើយជនរងគ្រោះបានរត់គេចខ្លួនតាមបង្អួចជាន់ទី៣ ទើបបណ្ដាលឱ្យធ្លាក់ស្លាប់។
ទោះជាបែបនេះក្ដី បុគ្គលិកធ្វើការនៅកាស៊ីណូក្រោន អះអាងថា ជនជាតិឥណ្ឌូណេស៊ីទាំងនោះ គឺជាអ្នកធ្វើការផ្នែកវ៉េបសាយបនល្បែងតាមអនឡាញខុសច្បាប់ ខណៈអាជ្ញាធរ ដែលបានចូលទៅត្រួតពិនិត្យទីតាំងកើតហេតុនៅក្នុងកាស៊ីណូនោះ មិនបានពិនិត្យលើករណីឆបោកនេះឡើយ។
វិទ្យុអាស៊ីសេរី មិនអាចទាក់ទង ស្នងការនគរបាលខេត្តបន្ទាយមានជ័យ លោក សិទ្ធិ ឡោះ និងសមាជិកព្រឹទ្ធសភាគណបក្សប្រជាជនកម្ពុជា និងជាអនុប្រធានសមាគមឧកញ៉ាកម្ពុជា លោក កុក អាន ដើម្បីសុំការបកស្រាយជុំវិញរឿងនេះបានទេ នៅថ្ងៃទី៥ ខែកុម្ភៈ។ ចំណែកអនុប្រធានអចិន្ត្រៃយ៍គណៈកម្មាធិការជាតិ ប្រយុទ្ធប្រឆាំងនឹងអំពើជួញដូរមនុស្ស អ្នកស្រី ជូ ប៊ុនអេង ក៏មិនអាចទាក់ទងបានដូចគ្នា។
ទោះជាយ៉ាងណាក្ដី កាលពីពេលកន្លងមក ស្នងការនគរបាលខេត្តបន្ទាយមានជ័យ លោក សិទ្ធិ ឡោះ ប្រាប់វិទ្យុអាស៊ីសេរីថា លោកមិនបានដឹងពីករណីឆបោកតាមអនឡាញ នៅក្នុងក្រុងប៉ោយប៉ែតឡើយ ទោះជាអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់(Thaksin Shinawatra) បានចង្អុលបង្ហាញថា អាគារ ២៥ជាន់ នៅក្នុងបរិវេណកាស៊ីណូក្រោន គឺជាទីតាំងឆបោកតាមអនឡាញ។
អ្នកគ្រប់គ្រងប្រចាំការិយាល័យអង្គការលីកាដូ ខេត្តបន្ទាយមានជ័យ លោក អ៊ិន គង់ជិត កត់សម្គាល់ឃើញថា មេខ្លោងឧក្រិដ្ឋជនឆបោកតាមអ៊ីនធឺណិត តែងតែកំណត់យកប្រទេស ដែលមាននីតិរដ្ឋខ្សោយ និងសម្បូរអំពើពុករលួយ សម្រាប់ធ្វើជាទីតាំងប្រតិបត្តិការឆបោក។ ទោះជាយ៉ាងណា លោក អ៊ិន គង់ជិត ស្នើឱ្យរដ្ឋាភិបាលបង្កើតគណៈកម្មការឯករាជ្យមួយ ស៊ើបអង្កេតរឿងនេះ ដើម្បីលាងជម្រះការចោទប្រកាន់របស់បរទេស ជាពិសេសគឺប្រទេសថៃ។
លោក អ៊ិន គង់ជិត៖«ការបើកការស៊ើបអង្កេត ឬការបង្ក្រាបផ្សេងៗ គួរតែធ្វើឡើងដោយស្ងប់ស្ងាត់ និងត្រជាក់ ដើម្បីស្រាវជ្រាវរកមុខសញ្ញាឱ្យឃើញ ហើយការបង្ក្រាបហ្នឹង ប្រសិនបើទទួលបានជោគជ័យ នឹងស្ដារមុខមាត់ដល់រដ្ឋាភិបាល និងប្រទេសជាតិយើង និងធ្វើឱ្យប្រទេសគេផ្សេងមានទំនុកចិត្តលើរដ្ឋាភិបាលយើង»។
ដើម្បីទប់ស្កាត់ឧក្រិដ្ឋកម្មឆបោកឆ្លងដែននេះ អាជ្ញាធរថៃបានបង្កើតប្រតិបត្តិការពិសេសមួយ ដែលមានឈ្មោះថា «ការបំផ្ទុះស្ពានឧក្រិដ្ឋជន» ដោយបានដាក់ពង្រាយទាហានដើរល្បាតតឹងរ៉ឹងជាងមុន ពង្រាយរបងខ្សែបន្លាលួស បិទច្រកឆ្លងដែនខុសច្បាប់ កាត់ផ្ដាច់បង្គោលខ្សែបណ្ដាញ ដែលតភ្ជាប់ចេញពីក្រុងប៉ោយប៉ែត ចូលមកទឹកដីថៃ និងត្រួតពិនិត្យគណនីធនាគារ និងជនបរទេសដែលឆ្លងដែនចូលមកទឹកដីថៃ។
អត្ថបទដែលទាក់ទង៖
ប៉ូលិសថៃបំផ្លាញបង្គោលអង់តែនដែលតភ្ជាប់ចេញពីអាគារឆបោកតាមអនឡាញមួយកន្លែង នៅប៉ោយប៉ែត
ចំណែកនៅប៉ែកខាងប្រទេស មីយ៉ាន់ម៉ា(Myanmar) វិញ រដ្ឋាភិបាលថៃ បានកាត់ផ្ដាច់ការផ្គត់ផ្គង់អគ្គិសនី សេវាអ៊ីនធឹណិត និងការផ្គត់ផ្គង់ប្រេងឥន្ធនៈ នៅក្នុងតំបន់មួយចំនួន នៃទីក្រុង មីយ៉ាវ៉ាឌី (Myawaddy) ដែលគេចោទថា ជាទីតាំងរបស់ឧក្រិដ្ឋជនឆបោកតាមអ៊ីនធឺណិត ខណៈនាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ (Paethongthan Shinawatra) បានស្នើឱ្យរដ្ឋាភិបាលចិន ជួយបង្ក្រាបឧក្រិដ្ឋជនឆបោកតាមអនឡាញនៅក្នុងទឹកដីមីយ៉ាន់ម៉ា នេះផងដែរ។
ក៏ប៉ុន្តែ វិធានការនេះ មិនអាចបញ្ឈប់ប្រតិបត្តិការឆបោកតាមអ៊ីនធឹណិត នៅក្នុងទឹកដី មីយ៉ាន់ម៉ា បានឡើយ ដោយអាគារមួយចំនួនបានដំឡើងម៉ាស៊ីនភ្លើង និងខ្លះទៀត បានតបណ្ដាញអគ្គិសនីពីប្រទេសឡាវ និងបើកដំណើរការជាធម្មតា។ ជាងនេះទៅទៀត អាជ្ញាធរថៃ រកឃើញថា ឧក្រិដ្ឋជនឆបោកតាមអនឡាញជាច្រើននាក់ បានផ្លាស់ប្ដូរទីតាំងឆបោក ចូលមកក្នុងទឹកដីថៃ និងកម្ពុជា។ ពាក់ព័ន្ធនឹងបញ្ហានេះ ក្រុមប្រឹក្សាសន្តិសុខជាតិថៃ កំពុងពិចារណាលើកវិធានការកាត់ផ្ដាច់ការផ្គត់ផ្គង់អគ្គិសនី ទឹកស្អាត និងសេវាអ៊ីនធឹណិត ក្នុងក្រុងប៉ោយប៉ែត ដូចនៅទីក្រុង មីយ៉ាវ៉ាឌី ដែរ ប្រសិនបើក្រុមឧក្រិដ្ឋកម្មមួយនេះ នៅតែបង្កផលប៉ះពាល់ដល់សណ្ដាប់ធ្នាប់ក្នុងសង្គម និងសុវត្ថិភាពរបស់ពលរដ្ឋថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។