លោកនាយករដ្ឋមន្ត្រី ហ៊ុន សែន គ្រោងនឹងដកបម្រាមពាក់ម៉ាស់នៅទីសាធារណៈទូទាំងប្រទេស ក្នុងពេលឆាប់ៗ ខាងមុខនេះ។ លោក ហ៊ុន សែន បានប្រកាសនៅក្នុងពិធីទទួលវ៉ាក់សាំងបង្ការជំងឺកូវីដ១៩ ពីរដ្ឋាភិបាលប្រទេសអីតាលី (Italy) នៅរាជធានីភ្នំពេញព្រឹកថ្ងៃទី២៥ មេសាថា គម្រោងដកបម្រាមពាក់ម៉ាស់នេះ ដោយលោកពិនិត្យឃើញការឆ្លងជំងឺកូវីដនៅកម្ពុជាបានថយចុះជារៀងរាល់ថ្ងៃ បើទោះបីជារដ្ឋាភិបាលបើកឱ្យប្រជាពលរដ្ឋដើរលេងកម្សាន្តក្នុងថ្ងៃបុណ្យចូលឆ្នាំខ្មែរក្ដី។ លោក ហ៊ុន សែន បញ្ជាក់ថា ការធ្វើបែបនេះនឹងចំណេញដល់សេដ្ឋកិច្ចជាតិ៖ «ចំណុចនេះហើយដែលខ្ញុំសុំថា ម្ខាងខ្ញុំអំពាវនាវឱ្យមានការប្រជុំដើម្បីពិនិត្យបញ្ហានេះ ហើយខ្ញុំចង្អុលបង្ហាញថា សុំកុំគិតតែបញ្ហាសុខភាពតែមួយមុខ ត្រូវគិតដល់បញ្ហាសង្គម សេដ្ឋកិច្ច និងចិត្តសាស្ត្ររបស់ប្រជាពលរដ្ឋផងដែរទាក់ទងការប្រើប្រាស់ម៉ាស់នៅជាប់នឹងខ្លួនហ្នឹង វាមិនមែនចេះស្រួលឯណា ព្រោះអានេះជាប្រដាប់បន្ថែម។ បើនារីៗ វិញ អ្នកលក់ម៉ាកកាយ៉េ ការ៉េមអីហ្នឹងលក់មិនដាច់ទេ ដោយសារពាក់ម៉ាស់អស់ទៅហើយមានចាំបាច់លាប់ម៉ាកកាយ៉េធ្វើអីទៀត » ។
ក្រសួងសុខាភិបាល រកឃើញអ្នកឆ្លងជំងឺកូវីដ-១៩ ចំនួន ១២ករណីថ្មីទៀត ដែលសុទ្ធតែជាវីរុសបំប្លែងថ្មីអូមីក្រុង (Omicron) ឆ្លងក្នុងសហគមន៍ទាំងអស់។
គិតត្រឹមព្រឹកថ្ងៃទី២៥ មេសា កម្ពុជាមានអ្នកកើតជំងឺកូវីដ-១៩ ជាង ១៣ម៉ឺន ៦ពាន់នាក់ (១៣៦.២២៨) ក្នុងនោះអ្នកជាសះស្បើយមានជិត ១៣ម៉ឺននាក់ ៣ពាន់នាក់ (១៣២.៩៤៥) និងអ្នកស្លាប់មានចំនួន ៣ពាន់ ៥៦នាក់ (៣.០៥៦)។
ចំពោះការចាក់វ៉ាក់សាំងបង្ការជំងឺកូវីដ១៩ វិញ ក្រសួងសុខាភិបាលប្រកាសថា គិតត្រឹមថ្ងៃទី២៤ មេសា រដ្ឋាភិបាលចាក់ជូនពលរដ្ឋដែលមានអាយុចាប់ពី ៣ឆ្នាំឡើងបានជាង ១៤លាន ៨សែននាក់ សម្រាប់ដូសទី១ រីឯដូសទី២ ចាក់បានជាង ១៤លាន ១សែន ៥ម៉ឺននាក់ ហើយដូសទី៣ និងដូសទី៤ រដ្ឋាភិបាលចាក់ជូនពលរដ្ឋបានជាង ៩លាន ៦សែននាក់។
ជាមួយគ្នានេះវ៉ាក់សាំងបង្ការជំងឺកូវីដ១៩ ជាង ១លានដូស (១.០០៥.៦០០) ដែលជាជំនួយរបស់រដ្ឋាភិបាលអីតាលី (Italy) ត្រូវបានដឹកជញ្ជូនមកដល់កម្ពុជាហើយនៅព្រឹកថ្ងៃទី២៥ មេសា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។