រដ្ឋមន្ត្រីក្រសួងការបរទេសសហរដ្ឋអាមេរិកលោក ម៉ារកូ រ៉ូប៊ីអូ (Marco Robio) បានលើកឡើងតាមរយៈសេចក្ដីថ្លែងការណ៍មួយនៅថ្ងៃទី០៧ ខែសីហាថា សហរដ្ឋអាមេរិកស្វាគមន៍លទ្ធផលកិច្ចប្រជុំគណៈកម្មាធិការព្រំដែនទូទៅ រវាងរដ្ឋមន្ត្រីក្រសួងការពារជាតិកម្ពុជានិងថៃ នៅក្នុងទីក្រុងកូឡាឡាំពួរ (Kuala Lumpur) ។ លោក ម៉ារកូ រ៉ូប៊ីអូ បានចាត់ទុកថា វាជាជំហានឆ្ពោះទៅមុខដ៏សំខាន់មួយ ក្នុងការធ្វើឱ្យរឹងមាំនូវលក្ខខណ្ឌបទឈប់បាញ់ និងការបង្កើតយន្តការអ្នកសង្កេតការណ៍អាស៊ាន។
លោកបន្តថា លោកប្រធានាធិបតី ដូណាល់ ត្រាំ (Donald Trump) រំពឹងថា រដ្ឋាភិបាលកម្ពុជានិងថៃ នឹងគោរពយ៉ាងពេញលេញតាមការប្ដេជ្ញាចិត្តរបស់ប្រទេសទាំងពីរ ដើម្បីបញ្ចប់ជម្លោះព្រំដែន។ លោកក៏បានអរគុណនាយករដ្ឋមន្ត្រីម៉ាឡេស៊ីលោក អាន់វ៉ា ហ៊ីប្រាហ៊ីម (Anwar Ibrahim) ដែលបានដឹកនាំនិងធ្វើជាម្ចាស់ផ្ទះរៀបចំឱ្យមានដំណើរការបទឈប់បាញ់ ចាប់តាំងពីកិច្ចប្រជុំពិសេសនៅថ្ងៃទី២៨ ខែកក្កដា ដែលសហការរៀបចំដោយម៉ាឡេស៊ីនិងសហរដ្ឋអាមេរិក។
លោក ម៉ារកូ រ៉ូប៊ីអូ បានបញ្ជាក់ទៀតថា សហរដ្ឋអាមេរិកនឹងបន្តគាំទ្រម៉ាឡេស៊ី អាស៊ាន និងប្រទេសកម្ពុជា-ថៃ នៅពេលបទឈប់បាញ់មានដំណើរការទៅមុខ។
ការលើកឡើងពីរដ្ឋមន្ត្រីក្រសួងការបរទេសសហរដ្ឋអាមេរិកបែបនេះ បានធ្វើឡើងបន្ទាប់ពីរដ្ឋមន្ត្រីក្រសួងការពារជាតិកម្ពុជាលោក ទៀ សីហា និងរដ្ឋមន្ត្រីក្រសួងការពារជាតិស្ដីទីថៃលោក ណាត់ថាក់ផុន ណាកផានីត (Nattaphon Narkphanit) បានចុះកិច្ចព្រមព្រៀង១៣ចំណុច ស្ដីពីលក្ខខណ្ឌបទឈប់បាញ់ យន្តការបង្កើតក្រុមអ្នកសង្កេតការណ៍អាស៊ានលើបទឈប់បាញ់ និងការសន្យាបន្តជួបប្រជុំគ្នាគ្រប់កម្រិត ដើម្បីដោះស្រាយភាពតានតឹងព្រំដែនដោយសារការប្រមុខដាក់គ្នានៃកងទ័ពប្រទេសទាំងពីរ។
កាលពីថ្ងៃទី០៧ ខែសីហា លោកនាយករដ្ឋមន្ត្រី ហ៊ុន ម៉ាណែត បានសរសេរលើហ្វេសប៊ុកថា លោកបានផ្ញើលិខិតជាផ្លូវការទៅគណៈកម្មការពានរង្វាន់ណូបែលសន្តិភាព ដើម្បីគាំទ្របេក្ខភាពលោក ដូណាល់ ត្រាំ ទទួលបានពានរង្វាន់ណូបែលសន្តិភាព ដើម្បីទទួលស្គាល់ការរួមចំណែកជាប្រវត្តិសាស្ត្ររបស់លោក ក្នុងការលើកកម្ពស់សន្តិភាពពិភពលោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។