ពលរដ្ឋ​ក្នុង​ភូមិ​ដែល​មាន​ឆ្លង​មេរោគ​អេដស៍​នៅ​បាត់ដំបង​បារម្ភ​ពី​កូន​ចៅ​ពិបាក​រក​គូស្រករ

ដោយ ហ៊ុំ ចំរើន
2014-12-23
Share
ពិនិត្យ​ឈាម​រក​មេរោគ​អេដស៍ បាត់ដំបង ៦២០ ពលរដ្ឋ​ចុះ​ឈ្មោះ​ធ្វើ​តេស្ដ​ឈាម​រក​មេរោគ​អេដស៍ នៅ​មណ្ឌល​សុខភាព ឃុំ​រកា ស្រុក​សង្កែ ខេត្ត​បាត់ដំបង កាល​ពី​ព្រឹក​ថ្ងៃ​ទី​១៦ ខែ​ធ្នូ ឆ្នាំ​២០១៤។
RFA/Hum Chamroeun

ក្រុម​ប្រជាពលរដ្ឋ​ដែល​ឆ្លង​មេរោគ​អេដស៍​ជាច្រើន​គ្រួសារ នៅ​ភូមិ​រកា ឃុំ​រកា ស្រុក​សង្កែ ខេត្ត​បាត់ដំបង សម្ដែង​ក្ដី​បារម្ភ​ចំពោះ​កូនចៅ​របស់​ខ្លួន ខ្លាច​ពិបាក​រក​គូស្រករ​នៅ​ថ្ងៃ​អនាគត។ ការ​ព្រួយ​បារម្ភ​នេះ កើត​មាន​បន្ទាប់​ពី​ពួក​គាត់​ធ្វើ​តេស្ដ​ឈាម​នៅ​មណ្ឌល​សុខភាព​រកា រក​ឃើញ​ថា​មាន​ផ្ទុក​មេរោគ​អេដស៍។

ក្រុម​ប្រជាពលរដ្ឋ​ទាំង​អ្នក​ឆ្លង​មេរោគ​អេដស៍ និង​អ្នក​ដែល​ពុំ​មាន​មេរោគ​អេដស៍ នៅ​ភូមិ​រកា សម្ដែង​ការ​ព្រួយ​បារម្ភ​ថា ពួក​គេ​នឹង​ប្រឈម​មុខ​គ្មាន​គូស្រករ ឬ​ប្ដី​ប្រពន្ធ​ទៅ​ថ្ងៃ​មុខ​ជា​មិន​ខាន ដោយសារ​មាន​ផ្ទុក​មេរោគ​អេដស៍​នៅ​ក្នុង​ខ្លួន។

ក្រុម​ប្រជាពលរដ្ឋ​នៅ​ភូមិ​រកា ស្រុក​សង្កែ ខេត្ត​បាត់ដំបង ថ្លែង​ក្នុង​ទឹក​មុខ​ស្រពោន​នៅ​ថ្ងៃ​ទី​២៣ ធ្នូ ថា ពួក​គាត់​ខ្លាច​គ្មាន​គូស្រករ​ដូច​គេ​ឯង​នៅ​ឃុំ​ដទៃ ហើយ​មាន​ការ​ខ្មាស​អៀន​ក្នុង​ការ​បង្ហាញ​ខ្លួន​នៅ​ទី​សាធារណៈ។ អ្នក​ភូមិ​បញ្ជាក់​ថា សព្វថ្ងៃ​នេះ គ្រួសារ​មួយ​ចំនួន​ដែល​ឆ្លង​មេរោគ​អេដស៍ ត្រូវ​គេ​រិះគន់​បណ្ដើរៗ​ហើយ ធ្វើ​ឲ្យ​អ្នក​ខ្លះ​មិន​ចង់​ទៅ​សាលា​រៀន​នោះ​ទេ៖ «ខ្ញុំ​ព្រួយ​បារម្ភ​ខ្លាំង​ទៅ​លើ​កូន ព្រោះ​ទៅ​ថ្ងៃ​អនាគត​ខ្លាច​មិន​មាន​គូស្រករ​ហ្នឹង​គេ។ អនាគត​គ្នា​ទៅ​មុខ​ទៀត​មិន​ដឹង​យ៉ាង​ណា បើ​ជំងឺ​នេះ​ព្យាបាល​មិន​ជា​អ៊ីចឹង។ ខ្ញុំ​បារម្ភ​ខ្លាច​កូន​ពេញ​ក្រមុំ​ទៅ គ្មាន​អ្នក​មក​ស្ដី​ដណ្ដឹង​ជា​គូ​អនាគត ពីព្រោះ​អ្នក​កើត​ជំងឺ​អេដស៍​ហ្នឹង​ពេញ​ភូមិ​ទៅ​ហើយ។ យើង​មនុស្ស​កើត​ទៅ​វា​មិន​ជា​សំខាន់​ទេ តែ​ក្មេង​ដល់​ពេល​កើត​អ៊ីចឹង​ទៅ​មិន​ជា​យ៉ាង​នោះ​ទេ»

ទាក់ទង​នឹង​បញ្ហា​នេះ មេ​ភូមិ​រកា លោក ឆាត ចឹក មាន​ប្រសាសន៍​បញ្ជាក់​ថា អ្នក​ដែល​ឆ្លង​មេរោគ​អេដស៍​ក្នុង​ភូមិ​រកា មាន​ទាំង​កូន​ក្មេង និង​មនុស្ស​ចាស់។ ទោះ​យ៉ាង​នេះ​ក្ដី លោក​ពុំ​ទាន់​ដឹង​ចំនួន​អ្នក​ដែល​ឆ្លង​មេរោគ​អេដស៍​ប៉ុន្មាន​នាក់​នៅ​ឡើយ​ទេ តែ​ប្រជាពលរដ្ឋ​ក្នុង​ភូមិ​ពិត​ជា​មាន​ការ​ព្រួយ​បារម្ភ​ចំពោះ​អនាគត​កូនចៅ​របស់​ពួក​គាត់​ប្រាកដ​មែន៖ «បាទ! អា​រឿង​ទុក​ដាក់​កូន​ចៅ​ហ្នឹង​ប្រជាពលរដ្ឋ​ក្នុង​ភូមិ​ខ្វល់​គ្រប់​តែ​គ្នា​ហ្នឹង មិន​ជា​យ៉ាង​ណា​ទេ»

ទាក់ទង​នឹង​បញ្ហា​នេះ​ដែរ មន្ត្រី​ទីប្រឹក្សា​បច្ចេកទេស​អង្គការ​សម្ព័ន្ធ​ភាព​ខ្មែរ ប្រយុទ្ធ​នឹង​ជំងឺ​អេដស៍ លោក នី សុជាត មាន​ប្រសាសន៍​ថា មាន​កត្តា​សំខាន់​បី​យ៉ាង​ដែល​ចម្លង​មេរោគ​អេដស៍​ឆាប់​រហ័ស រួម​មាន ការ​ឆ្លង​តាម​រយៈ​ឈាម ការ​ឆ្លង​ពី​ម្ដាយ​ទៅ​កូន និង​ឆ្លង​តាម​រយៈ​ការ​រួម​ភេទ ហើយ​ការ​ឆ្លង​ខ្ពស់​ជាង​គេ គឺ​ឆ្លង​តាម​រយៈ​ឈាម ដូចជា​ការ​ប្រើប្រាស់​គ្រឿង​ញៀន​ដែល​ប្រើ​ស៊ីរាំង​ចាក់​រួម​គ្នា ជាដើម៖ «កាល​ណា​យើង​ដឹង​ថា​ឆ្លង​មេរោគ​អេដស៍​អ៊ីចឹង គាត់​ត្រូវ​ប្រញាប់​ទៅ​ធ្វើ​តេស្ដ​ឈាម​ជាមួយ​គ្រូពេទ្យ​ឲ្យ​បាន​ឆាប់ តាម​ដាន​មេរោគ​នេះ។ បើ​ពិនិត្យ​ឃើញ​មាន​ផ្ទុក​មេរោគ​អេដស៍​ហើយ ត្រូវ​ទៅ​ទទួល​សេវា​ព្យាបាល​ឲ្យ​ឆាប់​រហ័ស»

កាល​ពី​រសៀល​ថ្ងៃ​ទី​២២ ធ្នូ ព្រះរាជ​អាជ្ញា​នៃ​សាលា​ដំបូង​ខេត្ត​បាត់ដំបង សម្រេច​ចោទ​ប្រកាន់​គ្រូពេទ្យ លោក យ៉ែម ជ្រិន ដែល​អ្នក​ភូមិ​សង្ស័យ​ថា​ជា​អ្នក​ចម្លង​មេរោគ​អេដស៍​ដល់​ប្រជាពលរដ្ឋ​នៅ​ភូមិ​រកា ចំនួន ៣​ករណី។ ករណី​ទី​១ ចោទ​ពី​បទ​ប្រព្រឹត្ត​ដោយ​ចេតនា ធ្វើ​ឲ្យ​អ្នក​ដទៃ​ឆ្លង​មេរោគ​អេដស៍។ ករណី​ទី​២ អំពើ​ឃោរឃៅ​ពាក់ព័ន្ធ​នឹង​ឃាតកម្ម និង​ករណី​ទី​៣ បើក​កន្លែង​ពិនិត្យ​សុខភាព​ដោយ​ពុំ​មាន​ការ​អនុញ្ញាត​ពី​ក្រសួង​សុខាភិបាល។

កាល​ពី​ថ្ងៃ​ទី​២០ ធ្នូ នាយក​វិទ្យាស្ថាន​ប៉ាស្ទ័រ​កម្ពុជា លោក​វេជ្ជបណ្ឌិត ដេលីយ៉េ ហ្វង់តេនីល (Dilier Fontenille) ប្រាប់​អ្នក​កាសែត​ក្នុង​ស្រុក​ថា អ្នក​ផ្ទុក​មេរោគ​អេដស៍​ឃុំ​រកា ស្រុក​សង្កែ ខេត្ត​បាត់ដំបង កើន​ឡើង​រហូត​ដល់ ១៤០​នាក់។ រហូត​មក​ទល់​ពេល​នេះ ប្រជាពលរដ្ឋ​នៅ​តែ​បន្ត​ទៅ​ធ្វើ​តេស្ត​ឈាម​ពិនិត្យ​មេរោគ​អេដស៍​នៅ​មណ្ឌល​សុខភាព​រកា ជា​បន្តបន្ទាប់​នៅ​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល