ឆ្នាំនេះខ្មែរក្រោមនឹងប្រារព្ធខួប៦៩ឆ្នាំនៃការបាត់បង់ទឹកដីដោយគ្មានការហែញត្តិ
2018.05.30
នាយកកម្មវិធីសមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ លោក សឺន ជុំជួន ផ្ដល់បទសម្ភាសន៍ដល់វិទ្យុអាស៊ីសេរី នៅថ្ងៃទី៦ ខែធ្នូ ឆ្នាំ២០១៥។
RFA
សហគមន៍ខ្មែរកម្ពុជាក្រោម នឹងប្រារព្ធខួបបាត់បង់ទឹកដីខ្មែរក្រោម នៅថ្ងៃទី៤ មិថុនា ជាខួបទី៦៩ឆ្នាំ តូចជាងរាល់ឆ្នាំ ដោយសារតែស្ថានភាពនយោបាយមានភាពតានតឹងខ្លាំង បណ្ដាលឱ្យសុំទីតាំងវត្តអារាម និងទីតាំងសាធារណៈមិនបាន ទើបត្រូវបង្ខំចិត្ត រៀបចំនៅក្នុងសហគមន៍ខ្មែរកម្ពុជាក្រោម ដែលអាចផ្ទុកមនុស្សបានចន្លោះ២០០ ទៅ៥០០នាក់។ សង្គមស៊ីវិល ចង់ឃើញរដ្ឋាភិបាលយកចិត្តទុកដាក់ និងជួយសម្របសម្រួលឱ្យមានទីតាំងសាធារណៈណាមួយ ដល់ក្រុមខ្មែរក្រោម បានប្រារព្ធទិវាប្រវត្តិសាស្ត្រនេះ។
នាយកកម្មវិធីសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ លោក សឺន ជុំជួន ថា ខួបបាត់បង់ទឹកដីខ្មែរក្រោមនៅឆ្នាំនេះ នឹងធ្វើឡើងដោយស្ថានភាពលំបាក ដោយសារតែស្ថានភាពនយោបាយ នៅកម្ពុជា មានភាពតានតឹងខ្លាំង។ «»
សហគមន៍ខ្មែរក្រោម បានចេញសេចក្តីអំពាវនាវ កាលពីថ្ងៃទី១៨ ខែឧសភា ឱ្យពលរដ្ឋចូលរួមរំលឹកខួបបាត់បង់ទឹកដីកម្ពុជាក្រោម ខួបទី៦៩ឆ្នាំ នៅថ្ងៃទី៤ មិថុនា ឆ្នាំ២០១៨ ដែលនឹងប្រារព្ធនៅទីស្នាក់ការសហគមន៍ខ្មែរក្រោម នៅភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ។
អាណានិគមនិយមបារាំង បានកាត់ទឹកដីខ្មែរកម្ពុជាក្រោម ឱ្យស្ថិតក្រោមអាណានិគមវៀតណាមគ្រប់គ្រងបន្ត នៅថ្ងៃទី៤ មិថុនា ឆ្នាំ១៩៤៩។ ប្រធានប្រតិបត្តិសហគមន៍ខ្មែរក្រោម លោក ថាច់ សេដ្ឋា លើកឡើងក្នុងសេចក្តីអំពាវនាវថា ចាប់ពីពេលនោះមក អាជ្ញាធរអាណានិគមវៀតណាម បានប្រើគ្រប់មធ្យោបាយដើម្បីរំលាយពូជសាសន៍ និងព្រះពុទ្ធសាសនាខ្មែរយ៉ាងសាហាវឃោរឃៅជាទីបំផុត។ ផ្ដើមចេញពីអំពើអមនុស្សធម៌បែបនេះ លោក ថាច់ សេដ្ឋា ថា ការតស៊ូពលីជីវិតនៃប្រជាជាតិខ្មែរ ក៏ចាប់ផ្ដើមឡើង ដើម្បីការពារអត្តសញ្ញាណជាតិ សិល្បៈ វប្បធម៌ អក្សរសាស្ត្រ ព្រះពុទ្ធសាសនា ទំនៀមទម្លាប់ ប្រពៃណីជាតិជាដើម ហើយដើម្បីសម្ដែងនូវកតញ្ញុតាធម៌ និងគារវកិច្ច ចំពោះវីរបុរសស្នេហាជាតិ ក្នុងបុព្វហេតុមាតុភូមិ ក្រុមអង្គការ សហគមន៍ខ្មែរក្រោម និងសម្ព័ន្ធយុវជនខ្មែរ ដើម្បីប្រជាធិបតេយ្យ តែងតែប្រារព្ធខួបបាត់បង់ទឹកដីដោយនាំគ្នា រាប់បាត្រព្រះសង្ឃ ១៩៤៩អង្គ និងប្រារព្ធទិវាកាន់ទុក្ខជាតិខ្មែរ រាល់ថ្ងៃទី៤ មិថុនា។
ខួប៦៩ឆ្នាំ នៃការបាត់បង់ទឹកដីខ្មែរក្រោមនៅឆ្នាំនេះ ក៏នឹងមានការចូលរួមពីព្រះរាជតំណាងរបស់ព្រះមហាក្សត្រ ព្រះករុណព្រះបាទសម្ដេចព្រះបរមនាថ នរោត្តម សីហមុនី ដែរ។ ប៉ុន្តែ នៅឆ្នាំនេះ សហគមន៍ខ្មែរក្រោម នឹងមិនធ្វើការហែញត្តិទៅដាក់នៅរដ្ឋសភាទេ ដោយសារកាលពីឆ្នាំមុនអាជ្ញាធរបានរារាំងខ្មែរក្រោម មិនឱ្យដើរយកញត្តិទៅដាក់នៅរដ្ឋសភា ហើយញត្តិដែលបានដាក់នោះ មិនត្រូវបានរដ្ឋសភាយកចិត្តទុក្ខដាក់ អំពីទុក្ខកង្វល់របស់ខ្មែរក្រោមទេ។
កាលពីឆ្នាំមុន សហគមន៍ខ្មែរក្រោមបានទទូចឱ្យរបបក្រុងភ្នំពេញបញ្ចូលថ្ងៃទី៤ មិថុនា ជាទិវាជាតិ ដើម្បីរំលឹកពីការបាត់បង់ទឹកដីកម្ពុជាក្រោម តែត្រូវរបបក្រុងភ្នំពេញបដិសេធ។
អ្នកនាំពាក្យសមាគមសិទ្ធិមនុស្សអាដហុក (Adhoc) លោក ស៊ឹង សែនករុណា សង្កេតឃើញថា កន្លងមករបបក្រុងភ្នំពេញ មិនបានខ្វាយខ្វល់អំពីខួបនៃការបាត់បង់ទឹកដីខ្មែរក្រោមទេ តែអាជ្ញាធរក្នុងរបបនេះ តែងបានរារាំង និងរឹតត្បិត ហាក់មិនចង់ឱ្យក្រុមខ្មែរ មកពីកម្ពុជាក្រោម បានរៀបចំកម្មវិធីប្រវត្តិសាស្ត្រនៃការបាត់បង់ដីខ្មែរនេះ បានស្រួលបួលទេ។ លោក ស៊ឹង សែនករុណា យល់ថា របបក្រុងភ្នំពេញ គួរតែជួយសម្រួលឱ្យក្រុមខ្មែរក្រោម បានរៀបចំកម្មវិធីប្រវត្តិសាស្ត្រនេះឱ្យបានល្អ ដើម្បីបង្ហាញពីប្រវត្តិសាស្ត្ររបស់ខ្មែរ និងដើម្បីឱ្យកូនខ្មែរនៅជំនាន់ក្រោយ ស្វែងយល់។ «»
ក្រៅពីមិនហែញត្តិ សហគមន៍ខ្មែរក្រោម ក៏មិនបានដាក់លិខិតអញ្ជើញតំណាងគណបក្សនយោបាយ ឱ្យចូលរួមកម្មវិធីដូចរាល់ឆ្នាំដែរ ដោយគ្រាន់អំពាវនាវជាទូទៅឱ្យពលរដ្ឋខ្មែរចូលរួម។ សហគមន៍ខ្មែរក្រោម ក៏នឹងរៀបចំវេទិកាសំណួរចម្លើយ ស្ដីពីការបាត់បង់ទឹកដីកម្ពុជាក្រោម នៅថ្ងៃទី៤ មិថុនា ដើម្បីពង្រីកចំណេះដឹងរបស់ពលរដ្ឋ ទាក់ទងនឹងការបាត់បង់ទឹកដីខ្មែរកម្ពុជាក្រោមផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- សមត្ថកិច្ចថៃចាប់បញ្ជូនជនភៀសខ្លួនខ្មែរជិត១០នាក់ទៅកម្ពុជា
- UNHCR អំពាវនាវដល់កម្ពុជា និងថៃ ឱ្យគោរពតាមច្បាប់ស្ដីពីការមិនចាប់បញ្ជូនជនភៀសខ្លួនត្រឡប់ទៅឱ្យរងទុក្ខបុកម្នេញនៅប្រទេសកំណើត
- បទសម្ភាសន៍លោក សុខ ឥសាន ស្ដីពីគម្រោងរដ្ឋាភិបាលបង្កើតច្បាប់ប្រឆាំងភេរវកម្ម ដើម្បីទប់ទល់លោក សម រង្ស៊ី
- ជនភៀសខ្លួនខ្មែរ ៦នាក់ ដែលបញ្ជូនពីថៃ ត្រូវបានឃុំខ្លួននៅពន្ធនាគារផ្សេងគ្នា អំពីបទក្បត់ជាតិ