មន្ត្រីទទួលបន្ទុកសិទ្ធិមនុស្សកម្ពុជា ពីខាងរដ្ឋាភិបាល ថ្លែងការពារថា ការគោរពសិទ្ធិមនុស្សនៅកម្ពុជា មិនមានការធ្លាក់ចុះដូចរបាយការណ៍ដែលចេញផ្សាយក្នុងពេលកន្លងទៅនោះទេ។ មិនតែប៉ុណ្ណោះ រដ្ឋាភិបាលបានប្រកាន់ភ្ជាប់នូវច្បាប់ និងគោលការណ៍មួយចំនួនអំពីអនុសញ្ញាអន្តរជាតិនានាស្ដីពីសិទ្ធិមនុស្ស ជាពិសេសសិទ្ធិទទួលបានយុត្តិធម៌ចំពោះមុខច្បាប់។
ការច្រានចោលចំពោះការរិះគន់របស់អង្គការមិនមែនរដ្ឋាភិបាលជាតិ និងអន្តរជាតិ ថាសិទ្ធិមនុស្សនៅកម្ពុជា កំពុងដើរថយក្រោយវិញនេះ ត្រូវបានមន្ត្រីជាន់ខ្ពស់នៃគណៈកម្មាធិការសិទ្ធិមនុស្សកម្ពុជា យល់ឃើញថា នេះជារបៀបបកស្រាយមួយជ្រុង ដែលខ្លួនកំពុងតែអនុវត្តទាំងបំពានច្បាប់ និងថែមទាំងធ្វើឲ្យប៉ះពាល់ដល់សិទ្ធិរបស់អ្នកដទៃទៀតផង។
ថ្លែងនៅទីស្នាក់ការកណ្ដាលគណៈកម្មាធិការសិទ្ធិមនុស្សកម្ពុជា នៅថ្ងៃទី៩ ឧសភា និងជាការស្វាគមន៍ចូលកាន់តំណែងជាប្រធានស្ថាប័ននេះថ្មីថ្មោងផង លោក កែវ រ៉េមី និយាយថា បាតុកម្ម និងការប្រមូលផ្ដុំនៅពេលនេះ គឺជាសកម្មភាពដែលអនុវត្តលើសពីច្បាប់កំណត់។ លោកបន្តថា ប្រសិនបើទង្វើមិនបំពានដែលនាំឲ្យរំខានទៅដល់សិទ្ធិរបស់អ្នកដទៃទៀត គឺវាពុំមានអ្វីដែលជាបញ្ហាចោទ។ បន្ថែមពីលើនេះ លោក កែវ រ៉េមី បញ្ជាក់ថា រាល់ថ្ងៃ រដ្ឋាភិបាលតែងផ្ដល់សិទ្ធិសេរីភាពស្មើៗគ្នា មិនប្រកាន់និន្នាការនយោបាយ ទាំងក្នុងដំណាក់កាលយុទ្ធនាការសម្ដែងមតិ រហូតដល់ការអនុវត្តនីតិវិធីនៅតុលាការ។ លោកបន្តថា «សិទ្ធិធ្វើនយោបាយ។ គណបក្សនយោបាយចុះឈ្មោះបង្កើតបន្តបន្ទាប់ ខ្ញុំដូចឥតមានការរើសអើង ទប់ស្កាត់មិនឲ្យបុគ្គលណាបង្កើតគណបក្សនយោបាយ ឥតឃើញទេ»។
ផ្ទុយពីនេះវិញ អង្គការមិនមែនរដ្ឋាភិបាល ជាញឹកញាប់ចាត់ទុកការអនុវត្តចំពោះការផ្ដល់សិទ្ធិសេរីភាពនេះ ថាតែងមើលឃើញសង្គមស៊ីវិល និងអ្នកតស៊ូមតិដើម្បីលើកកម្ពស់លទ្ធិប្រជាធិបតេយ្យ ក្នុងរូបភាពខ្មៅងងឹតជានិច្ច។
នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព យល់ឃើញថា សិទ្ធិសេរីភាពនៅតែមិនទាន់បានបើកចំហនៅឡើយ។ អ្នកស្រីបន្តថា ការបកស្រាយ គឺជារឿងពីរផ្សេងគ្នា ដោយសារតែការអនុវត្ត ឬសកម្មភាពដែលសំអាងលើកកម្ពស់សិទ្ធិសេរីភាព និងប្រជាធិបតេយ្យ គឺផ្ទុយពីខ្លឹមសារនៃច្បាប់។ អ្នកស្រីបន្តថា «មកដល់បច្ចុប្បន្ននេះ បើយើងមើលទៅគេហៅថាលំហប្រជាធិបតេយ្យ ហើយនិងស្ថានភាពសិទ្ធិមនុស្ស ហាក់ដូចជាទទួលការគំរាមកំហែងខ្លាំងមែនទែន។ យើងឃើញថា តួអង្គសំខាន់ៗសូម្បីតែតំណាងរាស្ត្រ ក៏ត្រូវបានគេវាយប្រហារ ឬក៏ចាប់ខ្លួនចោទប្រកាន់។ ហើយឥឡូវនេះ តួអង្គសង្គមស៊ីវិល»។
របាយការណ៍ដែលចេញផ្សាយកាលពីថ្ងៃទី៣ ខែឧសភា របស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ចាត់ទុកការចាប់ខ្លួនបុគ្គលិកការពារសិទ្ធិមនុស្សសមាគមអាដហុក (ADHOC) ៤រូប មន្ត្រី គ.ជ.ប ១រូប និងការគំរាមកំហែងមន្ត្រីអង្គការសហប្រជាជាតិផ្នែកសិទ្ធិមនុស្ស ថាជាយុទ្ធនាការរារាំងដល់កិច្ចការការពាររបស់អ្នកការពារសិទ្ធិមនុស្ស។
នាយកប្រតិបត្តិអង្គការ យូមែន រ៉ៃត៍ វ៉ច្ឆ លោក ប៊្រែដ អាដាម (Brad Adams) និយាយចំអកនៅក្នុងសេចក្ដីថ្លែងការណ៍ថា ករណីនេះ គឺជាកិច្ចប្រឹងប្រែងរបស់លោក ហ៊ុន សែន ក្នុងបំណងការពារអំណាចរបស់លោក ដែលគ្រប់គ្រងប្រទេសកម្ពុជា ជាង ៣ទសវត្សរ៍មកហើយប៉ុណ្ណោះ។
ថ្វីបើលោក កែវ រ៉េមី ដែលទើបចូលកាន់តំណែងថ្មីនៅពេលនេះ អះអាងថា រដ្ឋាភិបាលកំពុងអនុវត្តសិទ្ធិសេរីភាពយ៉ាងពេញលេញចំពោះមុខច្បាប់ស្មើៗគ្នាក៏ដោយចុះ ផ្ទុយទៅវិញ សកម្មភាពមួយចំនួនរបស់រដ្ឋាភិបាល ត្រូវរងការរិះគន់ដ៏ចម្រូងចម្រាសពីមជ្ឈដ្ឋានជាតិ និងអន្តរជាតិ ថាមិនបានអនុវត្តដូចការបកស្រាយឡើយ។ មានការចោទប្រកាន់ជាច្រើនសំណុំរឿងថា រដ្ឋាភិបាលដែលគ្រប់គ្រងដោយគណបក្សប្រជាជនកម្ពុជា បានអនុវត្តដោយលម្អៀងរួចទៅហើយចំពោះការអនុវត្តសិទ្ធិសេរីភាពនេះ។
កាលពីចុងខែតុលា ឆ្នាំ២០១៥ តំណាងរាស្ត្រ ២រូបរបស់បក្សប្រឆាំង ត្រូវរងអំពើហិង្សាពីក្រុមបាតុករ ដែលគេជឿថា គាំទ្រគណបក្សកាន់អំណាច។ ក្រោយមកទៀត ក្រុមអ្នកតវ៉ាដែលចូលសារភាពតាមការអំពាវនាវរបស់លោក ហ៊ុន សែន បានអះអាងក្នុងពេលជំនុំជម្រះនៅមុខចៅក្រមថា មានអ្នកខ្លះគឺជាកងអង្គរក្សរបស់លោក ហ៊ុន សែន នៅបន្ទាយក្រុងតាខ្មៅ។ ក៏ប៉ុន្តែសកម្មភាពទាំងនេះ មិនត្រូវបានសមត្ថកិច្ចចាប់ខ្លួនភ្លាមៗចំពោះអ្នកវាយដំទៅលើតំណាងរាស្ត្រ ហើយថែមទាំងពុំបានរារាំងការធ្វើបាតុកម្ម ដែលភាគច្រើនជាកម្លាំងបុរសទៀតផង។ ការប្រមូលផ្ដុំមួយផ្សេងទៀត ដែលទាមទារទម្លាក់លោក កឹម សុខា ពីអនុប្រធានទី១ នៃរដ្ឋសភា ក្នុងពេលប្រហាក់ប្រហែលគ្នានេះដែរ តែគេសង្កេតឃើញថា ក្រុមបាតុករសម្ដែងមតិទៅដោយរលូន ពុំមានឧបសគ្គអ្វីឡើយ។
ចំណែកក្នុងសំណុំរឿងអាស្រូវស្នេហាដែលគេចោទថា លោក កឹម សុខា មានទំនាក់ទំនងស្នេហាក្រៅឆាកជាមួយអ្នកនាង ខុម ចាន់តារាទី ហៅ ស្រីមុំ ហើយមានយុវជនមួយក្រុមដឹកនាំដោយលោក ស្រី ចំរើន ធ្វើសកម្មភាពដូចគ្នានេះ អាជ្ញាធររដ្ឋមិនបានចោទប្រកាន់ដូចការប្រមូលផ្ដុំរបស់សកម្មជនដីធ្លី អ្នកការពារសិទ្ធិមនុស្ស និងបក្សប្រឆាំង ថាអនុវត្តលើសពីច្បាប់កំណត់ឡើយ។
បើទោះបីជាបែបណា លោក កែវ រ៉េមី ដែលកាលពីពេលធ្វើជាតំណាងរាស្ត្របក្សប្រឆាំង ធ្លាប់តែរិះគន់រដ្ឋាភិបាលពេញៗមាត់ថា ខ្វះអភិបាលកិច្ចល្អ មិនមានតម្លាភាព ប្រព្រឹត្តអំពើពុករលួយ និងមានការរំលោភសិទ្ធិមនុស្សផងនោះ នៅពេលនេះ លោកបានបញ្ជាក់ជំហរថា គណៈកម្មាធិការសិទ្ធិមនុស្សកម្ពុជា នឹងពិនិត្យ និងឃ្លាំមើលការអនុវត្តសិទ្ធិឲ្យបានពេញលេញ ក្នុងនាមជាសេនាធិការរបស់រដ្ឋាភិបាល។ ក្រៅពីនេះ គណៈកម្មាធិការសិទ្ធិមនុស្សកម្ពុជា នៅមានសេវាគាំពារតាមផ្លូវច្បាប់បន្ថែមទៀត ដូចជាការផ្ដល់មេធាវីដល់ជនរងគ្រោះដើម្បីការពារខ្លួន ក្នុងការដោះបន្ទុកនៅពេលសវនាការ ជាដើម។
យ៉ាងនេះក៏ដោយចុះ សង្គមស៊ីវិលរិះគន់ចំណាត់ការរបស់គណៈកម្មាធិការសិទ្ធិមនុស្សពីខាងរដ្ឋាភិបាល ថាពុំដែលឃើញស្ថាប័នរដ្ឋមួយនេះ ប្រតិកម្មអ្វីទាល់តែសោះនៅពេលមានការបំពានផ្នែកសិទ្ធិមនុស្សក្នុងពេលកន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។