អង្គការ​ខាណា​ទទួល​បាន​រង្វាន់ ក្នុង​ការ​បង្កើត​ប្រព័ន្ធ​ឆ្លើយតប​ភ្លាមៗ​ទៅ​នឹង​អំពើ​ហិង្សា​ខាង​យេនឌ័រ

ដោយ ម៉ៅ សុធានី
2020.07.10
ជួប សុខចំរើន ៦២០ ប្រធាន​អង្គការ​ខាណា (Khana) លោក ជួប សុខចំរើន ផ្ដល់​បទសម្ភាសន៍​កាល​ពី​ថ្ងៃ​ទី​៤ កក្កដា ឆ្នាំ​២០១៥។
RFA

ធនាគារ​ពិភពលោក និង​អង្គការ​ស្រាវជ្រាវ​អំពើ​ហិង្សា​ខាង​ផ្លូវ​ភេទ (Sexual Violence Research Initiative/SVRI) កាល​ពី​ថ្ងៃទី៩ ខែ​កក្កដា បាន​ប្រកាស​ប្រគល់​រង្វាន់ ដល់​មជ្ឈមណ្ឌល​ស្រាវជ្រាវ​សុខភាព​ប្រជាជន​អង្គការ​ខាណា (KHANA Center for Population Health Research) ដែល​បាន​បង្កើត​ប្រព័ន្ធ​ឆ្លើយតប​ដើម្បី​ទប់ស្កាត់​អំពើ​ហិង្សា​លើ​ស្ត្រីភេទ​នៅ​កម្ពុជា។

សេចក្ដី​ថ្លែងការណ៍​របស់​ធនាគារ​ពិភពលោក មិន​បាន​បញ្ជាក់​ពី​ទឹកប្រាក់​ដែល​ផ្ដល់​ឱ្យ​អង្គការ​ខាណា​នោះ​ទេ ប៉ុន្តែ​រង្វាន់​នេះ គឺជា​កម្មវិធី​របស់ «​ទីផ្សារ​អភិវឌ្ឍន៍​ឆ្នាំ​២០២០» ដែល​នឹង​ជួយ​បង្ក​លទ្ធភាព​ដល់​អ្នកស្រាវជ្រាវ​នៅ​អង្គការ​ខាណា​ដែល​បាន​បង្កើត បណ្ដាញ​ជជែក​គ្នា​មួយ​តាម​ប្រព័ន្ធ WhatsApp ឈ្មោះថា ‘SMARTgirl Chatline’ ដើម្បី​ផ្ដល់​សេវា​គាំទ្រ ២៤​ម៉ោង ដល់​ស្ត្រី​ធ្វើការ​នៅ​តាម​ឧស្សាហកម្ម​កម្សាន្ត​នានា ដែល​ប្រឈម​នឹង​ហានិភ័យ​ខ្ពស់​ក្នុង​ការងារ និង​ជា​ជនរងគ្រោះ​ដោយសារ​អំពើ​ហិង្សា។

ប្រធាន​គ្រប់គ្រង​នៃ​ធនាគារ​ពិភពលោក​ប្រចាំ​កម្ពុជា អ្នកស្រី អ៊ីនហ្គូណា ដូប្រាចា (Inguna Dobraja) បញ្ជាក់​ក្នុង​សេចក្ដី​ថ្លែងការណ៍​ថា​៖ «​សមភាព​យេនឌ័រ​គឺជា​អាទិភាព​ខ្ពស់​មួយ​សម្រាប់​ធនាគារ​ពិភពលោក​ប្រចាំ​នៅ​កម្ពុជា។ គម្រោង​របស់​អង្គការ​ខាណា គឺ​ជា​កិច្ច​ខិតខំ​ដ៏​មាន​សារៈសំខាន់​មួយ សម្រាប់​ស្វែងរក​មធ្យោបាយ​ជួយ​ឱ្យ​នារី​និយោជិក​ទាំងនោះ មាន​សុវត្ថិភាព ជាពិសេស អ្នក​ដែល​ប្រឈម​នឹង​ហានិភ័យ​ខ្ពស់»

កម្មវិធី​ពានរង្វាន់​ទីផ្សារ​អភិវឌ្ឍន៍ (Development Marketplace) ដែល​ទទួល​បាន​ការ​គាំទ្រ​ហិរញ្ញវត្ថុ​ពី​ធនាគារ​ពិភពលោក និង​អង្គការ​ស្រាវជ្រាវ​អំពើ​ហិង្សា​ខាង​ផ្លូវ​ភេទ (SVRI) គឺជា​ព្រឹត្តិការណ៍​ប្រកួតប្រជែង​ជា​លក្ខណៈ​សាកល ធ្វើ​ឡើងជា​រៀងរាល់​ឆ្នាំ សម្រាប់​វិធីសាស្ត្រ​ឆ្នៃ​ប្រឌិត ក្នុង​ការ​ស្វែងរក​ដំណោះស្រាយ ជួយ​ដល់​បុគ្គល និង​សហគមន៍​របស់​ពួកគេ ក្នុង​ការ​ទប់ស្កាត់ និង​ឆ្លើយតប​ចំពោះ​អំពើ​ហិង្សា​ផ្នែក​យេនឌ័រ។

នៅ​ក្នុង​រយៈពេល​បួន​ឆ្នាំ​ចុង​ក្រោយនេះ ធនាគារ​ពិភពលោក និង​អង្គការ SVRI បាន​ប្រគល់​រង្វាន់​គិត​ជា​ទឹកប្រាក់ ៥​លាន ដុល្លារ​អាមេរិក ដល់​គម្រោង​ស្រាវជ្រាវ​ចំនួន ៥០​គម្រោង នៅ​តាម​ប្រទេស​ចំនួន​ជាង ៣២ ប្រទេស​ដែល​មាន​ប្រាក់ចំណូល​ទាប និង​មធ្យម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។