សហព័ន្ធខ្មែរកម្ពុជាក្រោមដែលមានមូលដ្ឋាន នៅសហរដ្ឋអាមេរិក នឹងធ្វើពិធីជួបជុំគ្នាមួយ នៅរដ្ឋ ផេនស៊ីលវិញ៉ា (Pennsylvania) ថ្ងៃទី៩ មីនា ចុងសប្ដាហ៍នេះ ដើម្បីអបអរទិវាសិទ្ធិនារីអន្តរជាតិ ៨ មីនា។ ក្នុងពិធីប្រមូលផ្តុំគ្នាដែលមានមនុស្សចូលរួម ប្រមាណជិត ៤០០នាក់នេះ ជាឱកាសមួយសម្រាប់ស្ត្រីជាខ្មែរកម្ពុជាក្រោមដើម្បីស្វែងយល់ពីស្ថានភាពស្ត្រីខ្មែរកម្ពុជាក្រោម ដែលកំពុងរស់នៅនៅលើទឹកដីកំណើត ដែលបច្ចុប្បន្ន វៀតណាមកំពុងគ្រប់គ្រង។
ប្រធានចលនាស្ត្រី នៃសហព័ន្ធខ្មែរកម្ពុជាក្រោម អ្នកស្រី លុត ស៊ើន មានប្រសាសន៍ ប្រាប់អាស៊ីសេរី កាលពីថ្ងៃទី៧ មីនា ថា ពិធីជួបជុំនេះនឹងជំរុញឱ្យស្ត្រីខ្មែរក្រោមនៅអាមេរិក និងប្រទេសមួយចំនួនទៀតក្នុងសកលលោក អាចជំរុញសហគមន៍អន្តរជាតិ យកចិត្តទុក្ខដាក់ដោះស្រាយវិបត្តិមួយចំនួន ដែលស្ត្រីខ្មែរកម្ពុជាក្រោមកំពុងជួបប្រទះ ដូចជា គ្មានឱកាសសិក្សារៀនសូត្រភាសាខ្មែរ ការរើសអើងក្នុងការផ្តល់ការងារក្នុងវិស័យរដ្ឋ និងឯកជនវៀតណាម កង្វះសេវាសុខភាព និងទាមទារឱ្យមានសិទ្ធិសេរីភាពស្ត្រីឱ្យស្មើនឹងបុរសជាដើម៖ «និយាយឱ្យត្រង់ទៅយើងចង់ឱ្យបងប្អូនខ្មែរ ពួកគាត់ដែលនៅជនបទ និងនៅឆ្ងាយពីក្រុងហ្នឹងឱ្យចេះភាសារបស់ខ្លួន គឺអក្សរខ្មែរ។ បច្ចុប្បន្ន ( វៀតណាម ) បើកឱ្យរៀនមួយអាទិត្យតែពីរម៉ោងអីទេ។ បងប្អូនខ្មែរគាត់អត់ចេះភាសាយើងច្បាស់លាស់ ហើយគាត់គ្មានលទ្ធភាពទៅរៀនដល់ខ្ពស់ដូចគេទេ។ ទោះបីជាអ្នករៀនខ្លះបានរៀនខ្ពស់ ក៏អត់មានការងារសមនឹងចំណេះដឹងរបស់គាត់ដែរ ពីព្រោះវាមានការរើសអើង។ ចំណែកខាងសុខាភិបាលវិញ មន្ទីរពេទ្យមានច្រើនតែនៅទីក្រុង អ៊ីចឹងហើយនៅខាងជនបទ ប្រសិនបើមាននារីមានផ្ទៃពោះ នៅពេល ( ធ្វើដំណើរ ) ដល់មន្ទីរពេទ្យជួនកាល អាចមានស្លាប់»។
វិធីជួបជុំ អបអរទិវាសិទ្ធិនារីអន្តរជាតិ៨ មីនា នេះ នឹងធ្វើឡើងនៅភោជនីយដ្ឋាន (Saigon Maxim) ដែលមានអាសយដ្ឋានលេខ ៦១២ ផ្លូវ វ៉ាស៊ីនតុន (Washington Ave) ទីក្រុង ហ្វលីដាលហ្វៀ (Philadelphia) នៅវេលាម៉ោង ៧យប់ រហូតដល់ម៉ោង ១២យប់៕