ក្រសួង​ព័ត៌មាន​ថា ​ស្ថានភាព​សារព័ត៌មាន​នៅ​កម្ពុជា​ល្អ​ប្រសើរ ឯ​អ្នក​ជំនាញ​ថា បន្ត​ធ្លាក់​ចុះ​ដុនដាប​ខ្លាំង

ដោយ សុ ជីវី
2019-05-03
អ៊ីម៉ែល
មតិ
Share
បោះពុម្ព
អតីត​អ្នក​យក​ព័ត៌មាន​អាស៊ីសេរី លោក អ៊ួន ឈិន (ឆ្វេង) និង​លោក យាង សុធារិន្ទ ហៅ យាង សុជាមេត្តា (ស្ដាំ)។
អតីត​អ្នក​យក​ព័ត៌មាន​អាស៊ីសេរី លោក អ៊ួន ឈិន (ឆ្វេង) និង​លោក យាង សុធារិន្ទ ហៅ យាង សុជាមេត្តា (ស្ដាំ)។
Photo: RFA

ក្រសួង​ព័ត៌មាន​អះអាង​ថា សេរីភាព​សារព័ត៌មាន​នៅ​កម្ពុជា មិន​មាន​ការ​ធ្លាក់​ចុះ​ទេ គឺ​មានតែ​កើន​ឡើង​គ្រប់​ប្រព័ន្ធ​ផ្សព្វផ្សាយ ឯ​សេរីភាព​អ្នកសារព័ត៌មាន ក៏​មាន​ភាព​ទូលំទូលាយ​ដែរ។

ការ​លើក​ឡើង​នេះ ក្រោយពេល​ក្រសួង​ព័ត៌មាន បាន​ប្រារព្ធ​ទិវា​សេរីភាព​សារព័ត៌មាន នៅ​ថ្ងៃ​ទី៣ ឧសភា នៅ​រាជធានី​ភ្នំពេញ ក្រោម​ប្រធានបទ តួនាទី​ប្រកបដោយ​សក្ដានុពល​របស់​សារព័ត៌មាន ក្នុង​ការ​គាំទ្រ​សន្តិភាព និង​ប្រជាធិបតេយ្យ។ ឯ​អ្នក​ជំនាញ​ផ្នែក​សារព័ត៌មាន យល់ថា សេរីភាព​សារព័ត៌មាន​បន្ត​ធ្លាក់​ចុះ ចាប់តាំង​ពី​ឆ្នាំ​២០១៧​មក ក្រោយពេល​របប​ក្រុងភ្នំពេញ ធ្វើទុក្ខបុកម្នេញ សារព័ត៌មាន​ឯករាជ្យ បណ្ដាល​ឱ្យ​សារព័ត៌មាន​ដទៃ​ទៀត មិន​ហ៊ាន​សរសេរ​រិះគន់​រដ្ឋាភិបាល​ទាល់តែ​សោះ។

អ្នកនាំពាក្យ​ក្រសួង​ព័ត៌មាន លោក មាស សុភ័ណ្ឌ ប្រាប់​អាស៊ីសេរី​ថា ក្នុង​ទិវា​សារព័ត៌មាន ដែល​ប្រារព្ធ​នៅ​សណ្ឋាគារ រ៉ាហ្វ៉ល ឡឺ រ៉ូយ៉ាល់ (Raffle Le Royal) រដ្ឋមន្ត្រី​ក្រសួង​ព័ត៌មាន លោក ខៀវ កាញារីទ្ធ លើកឡើង​ថា សេរីភាព​សារព័ត៌មាន​នៅ​កម្ពុជា មាន​ភាព​ល្អ​ប្រសើរ ពី​មួយ​ថ្ងៃ ទៅ​មួយ​ថ្ងៃ​។ លោក មាស សុភ័ណ្ឌ អះអាង​ថា ការ​កើនឡើង​នូវ​សេរីភាព​សារព័ត៌មាន​នៅ​កម្ពុជា ដោយសារ​ក្រសួង​ព័ត៌មាន​គោរព​សិទ្ធិ សេរីភាព​អ្នកសារព័ត៌មាន និង​បន្ត​គាំទ្រ​លើកទឹកចិត្ត​រាល់​ការ​ផ្សព្វផ្សាយ​ព័ត៌មាន​ពិត ជាដើម៖ «ពិនិត្យ​មើល​ទៅ ថា​តើ​សេរីភាព​សារព័ត៌មាននៅ​កម្ពុជា​យើង ធ្លាក់​ចុះ ឬ​យ៉ាងណា យើង​មើល​ទិដ្ឋភាព​ជាក់ស្ដែង ក្នុង​ពេល​បច្ចុប្បន្ន​នេះ តើ​យ៉ាងណា​? បើ​តាម​យើង​សង្កេតឃើញ​យើង​ដឹង សេរីភាព​សារព័ត៌មាននៅ​កម្ពុជា កំពុង​មាន​ការ​រីកចម្រើន មានការ​គាំទ្រ ពី​រាជរដ្ឋាភិបាល​កម្ពុជា ផង​ដែរ»

ប៉ុន្តែ​អង្គការ​ការពារ​អ្នកកាសែត​គ្មាន​ព្រំដែន រកឃើញ​ថា សេរីភាព​សារព័ត៌មាន​នៅ​កម្ពុជា ធ្លាក់​ចុះ​យ៉ាង​គំហុក ចាប់​តាំង​ពី​ឆ្នាំ​២០១៧​មក គឺ ចាប់ពី​ពេល​ដែល​របប​ក្រុងភ្នំពេញ ធ្វើ​ទុក​បុក​ម្នេញ លើ​សារព័ត៌មាន​ឯករាជ្យ​ធំ​២ គឺ​កាសែត ឌឹ ខេមបូឌា ដេលី (The Cambodia Daily) និង​ការិយាល័យ​វិទ្យុ​អាស៊ីសេរី​ប្រចាំ​កម្ពុជា។

បន្ថែម​ពី​ការ​ធ្វើ​ទុក្ខបុកម្នេញ ករណី​ពន្ធដារ អាជ្ញាធរ​នៃ​របប​ក្រុងភ្នំពេញ បាន​ចាប់ខ្លួន​អតីត​អ្នកសារព័ត៌មាន​អាស៊ីសេរី​២​នាក់​ទៀត ដែល​បណ្ដាល​ឱ្យ​មានការ​ភ័យ​ព្រួយ ដល់​អ្នកសារព័ត៌មាន​ផ្សេងទៀត។

ដូច​រាល់​ឆ្នាំ​ដែរ ក្នុង​ទិវា​សេរីភាព​សារព័ត៌មាន​ពិភពលោក លោក ហ៊ុន សែន មេដឹកនាំ​របប​ក្រុងភ្នំពេញ អះអាង​ថា សេរីភាព​សារព័ត៌មាននៅ​កម្ពុជា​ល្អ​ជាង​ប្រទេស​មួយ​ចំនួន​ក្នុង​តំបន់​អាស៊ាន​។ លោក ជំរុញ​ឱ្យ​អ្នកសារព័ត៌មាន មាន​ភាព​ស្មោះត្រង់​ក្នុង​វិជ្ជាជីវៈ ក្លាហាន​និយាយ​ការពិត ហ៊ាន​រិះគន់​ក្នុង​ន័យ​ស្ថាបនា និង​ហ៊ាន​ទទួលយក​ការពិត ដើម្បី​ធ្វើ​ឱ្យ​ព័ត៌មាន​នោះ ជា​ព័ត៌មាន​ពិត ឆ្លុះ​បញ្ចាំង​ពី​តថភាព​សង្គម​ជាក់ស្ដែង ដែល​ជា​ការ​រួមចំណែក​រក​យុត្តិធម៌​សង្គម សុខ​សន្តិភាព និង​ការ​អភិវឌ្ឍ ជា​បំណង​របស់​ពលរដ្ឋ។

លោក ហ៊ុន សែន ក៏​អំពាវនាវ​ឱ្យ​សារព័ត៌មាន​គ្រប់​និន្នាការ និង​អន្តរជាតិ សូម​អនុវត្ត​ត្រឹមត្រូវ តាម​ក្រមសីលធម៌ វិជ្ជាជីវៈ ជៀសវាង​ការផ្សាយ​ព័ត៌មាន​មិន​គ្រប់​ជ្រុងជ្រោយ ឬ​ផ្សាយ​ព័ត៌មាន​ក្លែងក្លាយ ដើម្បី​បំប៉ោង​សភាពការណ៍ បន្តុះបង្អាប់ ញុះញង់​អុជអាល ឱ្យ​មានការ​ស្អប់ខ្ពើម​ជាតិ​សាសន៍ ជំនឿ ពណ៌​សម្បុរ ភេទ និន្នាការ​នយោបាយ ឬ​បែកបាក់​សាមគ្គី​ជាតិ​ជាដើម។

ទោះជា​យ៉ាងណា អ្នកសារព័ត៌មាន​ម្នាក់ អ្នកស្រី ឡុង គឹមម៉ារីតា ឱ្យ​ដឹង​ថា ស្ថានភាព​សេរីភាព​សារព័ត៌មាននៅ​កម្ពុជា​សព្វថ្ងៃ មិន​ផ្ដល់​ឱកាស​ពេញលេញ​ឱ្យ​អ្នកសារព័ត៌មាន បាន​ផ្សាយ​ការពិត​ទាំងស្រុង​ទេ។ អ្នកស្រី ថា អ្នកសារព័ត៌មាន និង​ស្ថាប័ន​សារព័ត៌មាន​ខ្លះ​នៅ​កម្ពុជា ចាប់ផ្ដើម​ភ័យខ្លាច មិន​ហ៊ាន​ផ្សាយ​គ្រប់​ជ្រុងជ្រោយ ពី​ភាព​អវិជ្ជមាន​របស់​រដ្ឋាភិបាល ក្រោយ​ពេល អាជ្ញាធរ​ចាប់ខ្លួន អតីត​អ្នកសារព័ត៌មាន​អាស៊ីសេរី កាលពី​ចុង​ឆ្នាំ​២០១៧។

អ្នកស្រី​បន្ត​ថា អ្នកសារព័ត៌មាន នៅតែ​ប្រឈម​ខ្ពស់​នឹង​ហានិភ័យ ប្រសិនបើ​ហ៊ាន​ផ្សាយ​ការពិត​ណា ដែល​រិះគន់​រដ្ឋាភិបាល​ធ្ងន់ធ្ងរ​។ អ្នកស្រី សម្ដែង​ការ​សោកស្ដាយ នៅ​ពេល​ពលរដ្ឋ​មានទុក្ខ​កង្វល់​ខ្លះ បាន​ពឹង​ពាក់ ឱ្យ​ផ្សាយ​ព័ត៌មាន​ពី​ការរំលោភ​សិទ្ធិ តែ​សារព័ត៌មាន​មិន​អាច​ផ្សាយ​បាន៖ «បើសិនជា​យើង​សរសេរ រាយការណ៍​អ្វី​ល្អៗ ពី​សមិទ្ធផល​ល្អៗ របស់​រដ្ឋាភិបាល គឺ​ស្រួល។ ចង់​ទាក់ទង​អ្នកណា (​ប្រភព​) ក៏បាន អ៊ីចឹង​ណា​។ តែ​បើសិនជា​យើង​ចង់ វាយប្រហារ​រដ្ឋាភិបាល ច្បាស់​ជា យើង​រត់​ប្រផាប់​ប្រភីង ដូច​អាស៊ីសេរី ជាដើម​អ៊ីចឹង​។ បច្ចុប្បន្ន​ខ្ញុំ​គិត​ថា អ្នកកាសែត​ដែល​សរសេរ​ពី​ភាព​មិន​សកម្ម ដូចជា​ពួក​ខ្ញុំ​រាល់ថ្ងៃ​មាន​។ ខ្ញុំ​សរសេរ​ច្រើន​ណាស់​។ ប៉ុន្តែ​យើង​(​សរសេរ​)​ក្នុង​បរិបទ​មួយ​។ យើង​សរសេរ​ក្នុង​បរិបទ​មួយ​ដែល​យើង​អាច​សរសេរ​បាន​។ ដូច​ខ្ញុំ​និយាយ​ពី​ខាងដើម​អ៊ីចឹង​ណា យើង​សរសេរ​ក្នុង​បរិបទ​មួយ​ដែល​យើង​អាច​សរសេរ​បាន»

ចំណែក អ្នកសារព័ត៌មាន​វិទ្យុ​សំឡេង​សហរដ្ឋអាមេរិក វីអូអេ (VOA) លោក ស៊ុន ណារិន យល់ថា​ស្ថានភាព​សេរីភាព​សារព័ត៌មាន​បន្ត​នៅ​ទ្រឹង មិនមាន​ភាព​ប្រសើរ​ជាង​មុន​​ទេ ចាប់​តាំង​មាន​ការ​បិទ​ការិយាល័យ​កាសែត ឌឹ ខេមបូឌា ដេលី និង​ការិយាល័យ​វិទ្យុ​អាស៊ីសេរី នៅ​កម្ពុជា​មក។ លោក​ថា ការ​រឹតត្បិត​សេរីភាព​របស់​សារព័ត៌មាន​ធំៗ​ទាំងពីរ​នេះ បាន​ធ្វើ​ឱ្យ​សារព័ត៌មាន​ធ្លាក់​ចុះ បាត់​ប្រយោជន៍​អ្នកអាន និង​អ្នក​ស្ដាប់​ខ្លាំង ព្រោះ​រឿង​ល្អ​សម្រាប់​អ្នកអាន​ត្រូវ​បាត់ អ្នកកាសែត​ពូកែៗ បាត់បង់​ការងារ​ធ្វើ​។ ឯ​អ្នកសារព័ត៌មាន​ខ្លះ ត្រូវ​ជ្រើសរើស​រឿង​សរសេរ មិន​ហ៊ាន​សរសេរ​រឿង​ណា ដែល​មាន​ការ​ប៉ះពាល់​រដ្ឋាភិបាល ជាដើម។

ស្ថានភាព​នៃ​ការ​ធ្វើ​ការងារ​ប្រចាំថ្ងៃ​វិញ លោក ស៊ុន ណារិន ថា ក្រោយពេល​រដ្ឋាភិបាល​ចោទ វិទ្យុ​វីអូអេ ជា​ផ្នែក​នៃ​បដិវត្តន៍​ពណ៌ ពលរដ្ឋ​បារម្ភ​នៅ​ពេល​ផ្ដល់​បទសម្ភាសន៍​។ ឯ​ប្រភព ជា​មន្ត្រី​រដ្ឋាភិបាល វិញ ខ្លះ​មិន​ផ្ដល់​បទសម្ភាសន៍ ឯ​ខ្លះ ប្រើ​សំដី​ថា អ្នកសារព័ត៌មាន​វីអូអេ ជា​អ្នកបម្រើ​បរទេស ក៏​មាន៖ «ខ្ញុំ​គ្រាន់តែ​សំណូមពរ​រដ្ឋាភិបាល ព្រោះ​គាត់​បាន​លើកឡើង​អំពី​ការ​ប្រយុទ្ធប្រឆាំង​ព័ត៌មាន​ក្លែងក្លាយ​។ អ៊ីចឹង អ្នកកាសែត​ក៏​មិន​សរសេរ​ព័ត៌មាន​ក្លែងក្លាយ តែ​យើង​សរសេរ​ការពិត តែ​សុំ​ឱ្យ​រដ្ឋាភិបាល​យល់ថា អាហ្នឹង​ជា​ការ​ពិត មិនមែន​ជា​រឿង​ដែល​ប្រឆាំង នឹង​ពួកគាត់​ទេ​ណា​។ សុំ​ឱ្យ​ពួកគាត់ យល់​អាហ្នឹង»

អ្នកនាំពាក្យ​ក្រសួង​ព័ត៌មាន លោក មាស សុភ័ណ្ឌ អះអាង​ថា ដូច​មន្ត្រី​រដ្ឋាភិបាល​ផ្សេងទៀត​ដែរ គឺ វិធានការណ៍​លើ​សារព័ត៌មាន​ឯករាជ្យ និង​ការ​បិទ​ហ្វ្រេកង់ (Frequency) វិទ្យុ​ផ្សាយ​បន្ត​តាម​ខេត្ត​របស់​សារព័ត៌មាន​ទាំងនេះ សុទ្ធ​ជា​ការ​អនុវត្ត​ច្បាប់ រួមទាំង​ការ​ចាប់ និង​ឃុំខ្លួន អតីត​អ្នកសារព័ត៌មាន​វិទ្យុ​អាស៊ីសេរី​។ ប៉ុន្តែ​អ្នកច្បាប់​សិទ្ធិ​មនុស្សជាតិ និង​អន្តរជាតិ​មិនបាន​យល់ឃើញ​ដូច​បែប​នោះ​ទេ​។

ទោះជា​យ៉ាងណា​លោក មាស សុភ័ណ្ឌ ថា រដ្ឋាភិបាល នៅ​តែ​មាន​ឆន្ទៈ ឱ្យ​កាសែត ឌឺ ខេមបូឌា ដេលី និង វិទ្យុ​អាស៊ីសេរី បើក​ការិយាល័យ​នៅ​កម្ពុជា​ឡើងវិញ តាម​លិខិត​របស់​រដ្ឋាភិបាល​កាលពី​ខែ​ធ្នូ ឆ្នាំ​២០១៨​។ ចំណែក ស្ថានីយ​វិទ្យុ​ជាង​១០​ផ្សេងទៀត នៅ​តាម​ខេត្ត ដែល​ធ្លាប់​ជួល​ម៉ោង​ផ្សាយ​ឱ្យ​វិទ្យុ​អាស៊ីសេរី វី​អូអេ និងវីអូឌី (VOD) អាច​នឹង​បើក​ឱ្យ​ដំណើរការ​វិញ ក្រោយ​ពេល វិទ្យុ​វីអូអេ ដែល​កំពុង​ចរចា​ជាមួយ​រដ្ឋាភិបាល​ឱ្យ​បើក​វិទ្យុ​ផ្សាយ​របស់​ខ្លួន​ឡើងវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល