លោកស្រី ឡុង គឹមហ៊ាង ភរិយាលោក រ៉ាត់ រត្នមុនី សកម្មជនការពារសិទ្ធិការងារបានប្រកាសថា អ្នកស្រីនឹងដឹកនាំធ្វើបាតុកម្មដើម្បីទាមទាររកយុត្តិធម៌ បន្ទាប់ពីស្វាមីរបស់លោកស្រី ត្រូវបានរបបក្រុងភ្នំពេញបាននាំខ្លួនពីប្រទេសថៃ យកមកសាកសួរនៅក្នុងប្រទេសកម្ពុជា។
អ្នកស្រី ឡុង គឹមហ៊ាង បានប្រាប់អាស៊ីសេរីនៅថ្ងៃពុធទី១២ ធ្នូ ថា អ្នកស្រីនឹងដាក់គម្រោងធ្វើបាតុកម្មដើម្បីទាមទាររកយុត្តិធម៌ជូនស្វាមី លោកស្រីក្រោយពីអាជ្ញាធររបបក្រុងភ្នំពេញបានចាប់បញ្ជូនខ្លួនយ៉ាងតក់ក្រហល់ពីទីក្រុងបាងកកប្រទេសថៃ មកកាន់ប្រទេសកម្ពុជា។
ប្រធានសហព័ន្ធសហជីពកម្មករសំណង់កម្ពុជា (CCTUF) លោក រ៉ាត់ រត្នមុនី ត្រូវបានអាជ្ញាធរថៃឃាត់ខ្លួននៅទីក្រុងបាងកក កាលពីថ្ងៃទី៧ ធ្នូ កន្លងទៅនេះ ហើយបន្ទាប់មក ត្រូវបានបញ្ជូនខ្លួនតាមឧទ្ធម្ភាគចក្រមកដល់ប្រទេសកម្ពុជាវិញហើយ កាលពីរសៀលថ្ងៃទី១២ ខែធ្នូ។
លោក រ៉ាត់ រត្នមុនី និងគ្រួសារបានព្យាយាមស្វែងរកសិទ្ធិជាជនភៀសខ្លួននៅក្នុងប្រទេសទីបី នៅមុនពេលដែលលោកត្រូវអាជ្ញាធរថៃចាប់បញ្ជូនខ្លួនមកឲ្យរបបក្រុងភ្នំពេញ។
របបក្រុងភ្នំពេញបានចោទប្រកាន់លោក រ៉ាត់ រត្នមុនី ពីបទសង្ស័យថា បានឱ្យលុយទៅតួអង្គម្ដាយកូនស្រី ២នាក់ ចំនួន ២០០ដុល្លារ ជាថ្នូរនឹងការនិយាយកុហកក្នុងភាពយន្តឯកសារដែលបង្ហាញពីករណីម្ដាយលក់កូនស្រីឯងបង្កើត ដើម្បីបំរើសេវាកម្មផ្លូវភេទដែលមានចំណងជើងថា “ម្ដាយខ្ញុំ លក់ខ្ញុំ”។
អ្នកស្រី ឡុង គឹមហ៊ាង បានបញ្ជាក់ថា ខ្សែវីដេអូដែលស្វាមីអ្នកស្រីផលិតឡើងនេះគ្រាន់តែបង្ហាញពីរឿងពិតដែលបានកើតឡើងតែប៉ុណ្ណោះ៖ «ការជួញដូរមនុស្សនៅកម្ពុជាវាកើតឡើងមិនមែនមានតែនៅក្នុងខ្សែភាពយន្តនោះទេ គឺវាកើតឡើងមាននៅក្នុងរបាយការណ៍ជាតិ នឹងអន្តរជាតិក៏ធ្លាប់បានលើកឡើង ហើយរដ្ឋាភិបាលកម្ពុជាក៏ធ្លាប់បានប្រតិកម្មផងដែរ»។
ភាពយន្តឯកសារនេះ មានចំនួនចូលទស្សនាជាង ១ លាន ៤ សែនដង លើបណ្ដាញយូធូប (You Tube) និងជាង ៥ សែនដង នៅលើបណ្តាញសង្គមហ្វេសប៊ុក (Facebook) ដែលជាវីដេអូសង្ខេបផ្តោតលើគ្រួសារអតីតពលរដ្ឋបឹងកក់ដែលរងការបណ្តេញចេញដោយបង្ខំ។
អាស៊ីសេរីមិនអាចទាក់ទងលោក ខៀវ សុភ័គ អ្នកនាំពាក្យក្រសួងមហាផ្ទៃបានទេ។ លោក ស ខេង រដ្ឋមន្ត្រីក្រសួងមហាផ្ទៃត្រូវបានសារព័ត៌មានក្នុងស្រុកបានដកស្រង់ថា របបក្រុងភ្នំពេញមិនទាន់មានការចោទប្រកាន់ជាផ្លូវការណាមួយប្រឆាំងជំទាស់លើលោក រ៉ាត់ រត្នមុនី នៅឡើយ។
លោក ស ខេង និយាយថា អាជ្ញាធរគ្រាន់តែនាំជនសង្ស័យយកមកសាកសួរតែប៉ុណ្ណោះ។
អ្នកស្រី ឡុង គឹមហ៊ាង បារម្ភពីស្វាមីរបស់លោកស្រីអាចត្រូវបានរបបក្រុងភ្នំពេញចាប់បង្ខំដើម្បីបានចម្លើយសារភាពក្លែងក្លាយ។
ក្រសួងការបរទេសសហរដ្ឋអាមេរិក បានចេញរបាយការណ៍ស្ដីពីការជួញដូរមនុស្ស ដោយបានបង្ហាញថា ប្រទេសកម្ពុជាស្ថិតនៅក្នុងលំដាប់ថ្នាក់ទីពីរក្នុងបញ្ជីប្រឆាំងការជួញដូរមនុស្សសម្រាប់ឆ្នាំ២០១៧ ដែលបញ្ហាជួញដូរមនុស្សនេះមិនមានអ្វី ប្រសើរជាងឆ្នាំមុននោះទេ។
របាយការណ៍នោះបានឲ្យដឹងថា កម្ពុជាបានបន្តស្ថិតនៅក្នុងលំដាប់ថ្នាក់ទីពីរ ដោយសារតែរដ្ឋាភិបាលកម្ពុជាមិនបានបំពេញតាមនិយាមអប្បបរមាក្នុងការលុបបំបាត់ការជួញដូរមនុស្សទេ ដូចជាការមិនស៊ើបអង្កេត ឬយកមកកាត់ទោសក្រុមមន្ត្រី ដែលពាក់ព័ន្ធនឹងបទល្មើសនេះជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។